ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ

ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ - 555 28 - ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ
ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ - Untitled design - ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ
#ແອຣເນສໂຕ ເກວາຣາ ຫລື ເຈ ເກວາຣາ ເກີດເມື່ອວັນທີ 14 ມິຖຸນາ 1928 ທີ່ເມືອງ ໂຣຊາຣິໂອ ປະເທດອາກຊັງຕິນ ພໍ່ຊື່ວ່າ ແອຣເນສໂຕ ເກວາຣາລິນ ເປັນນັກວິສະວະກອນໂຍທາ ແມ່ຊື່ ເຊເລຍ ເດິ ລາແຊຮນາ ເຊື້ອສາຍແອັດສະປາຍ. ເຈ ເກວາຣາ ມີນ້ອງສາມຄົນ ຊາຍສອງຍິງໜຶ່ງ.
ຫລັງຈາກຮຽນຈົບມັດທະຍົມ ເຈ ໄດ້ເສັງເຂົ້າຮຽນຕໍ່ທີ່ສະຖາບັນແພດສາດ ບົວໂນໄອເຣສ ຈົບປະລິນຍາຕີ 1953. ເຈ ມັກກີລາລອຍນ້ຳ, ຂີ່ມ້າ, ເຕະບານ, ເທນນິດ ແລະ ຍິງປືນ, ມັກຮຽນພາສາຝຣັ່ງ, ອ່ານບົດກະວີ, ອ່ານໜັງສື ເປັນຄົນຕັດສິນໃຈເດັດຂາດ ແລະ ອົດທົນ.
ເຈ ເກວາຣາ ມີຄວາມປາຖະໜາຢາກໄປທ່ອງທ່ຽວທົ່ວທົ່ວທະວີບອາເມຣິກາລາຕິນ ເພື່ອຊົມ ແລະ ສຶກສາຄົ້ນຄວ້າກ່ຽວກັບຄວາມຮຸ່ງເຮືອງສີວິໄລຂອງຊາວພື້ນເມືອງ ແລະ ບູຮານຄະດີ.
ເຈ ເກວາຣາ ແມ່ນນັກກໍ່ສ້າງສັງຄົມນິຍົມ ໄດ້ຖືກຮັບຮອງເອົາເປັນພົນລະເມືອງຂອງກູບາ ໃນວັນທີ 9 ກຸມພາ 1959
ຖືກແຕ່ງຕັ້ງເປັນລັດຖະມົນຕີກະຊວງອຸດສາຫະກຳ ທັງເປັນຜູ້ຊີ້ນຳສະຖາບັນການປະຕິຮູບທີ່ດິນແຫ່ງຊາດ, ເປັນຜູ້ບັນຊາການ ຕໍ່ມາເປັນຜູ້ອຳນວຍການທະນາຄານແຫ່ງຊາດ ແລະ ຮັບຜິດຊອບຄັງຫລວງຂອງກູບາ.
ປີ 1960 ເຈ ໄດ້ນຳພາຄະນະຜູ້ແທນການຄ້າກູບາໄປເຈລະຈາດ້ານການຄ້າກັບບັນດາປະເທດສັງຄົມນິຍົມເຊັ່ນ: ໂຊວຽດ, ຈີນ, ເຊັກໂກສະໂລວາກີ, ເກົາຫລີເໜືອ….
ປີ 1961 ເຈ ຖືກຍ້າຍມາເປັນລັດຖະມົນຕີກະຊວງອຸດສາຫະກຳອີກເທື່ອໜຶ່ງ.
ເຈ ເກວາຣາ ມີຕຳແໜ່ງຮອດຂັ້ນ ລັດຖະມົນຕີ ແຕ່ເພິ່ນກໍຍັງດຳລົງຊີວິດ ແລະ ເຮັດວຽກໜັກໜ່ວງເພື່ອສັງຄົມ, ອອກແຮງງານໂດຍບໍ່ຫວັງຄ່າຕອບແທນ.
ເຈ ເກວາຣາ ໄດ້ອຸທິດແນວຄິດຈິດໃຈ ແລະ ຢາດເຫື່ອເພື່ອສ້າງກູບາໃໝ່. ກາງຄືນເພິ່ນຈະອ່ານ,ຂຽນ ກາງເວັນເພິ່ນຈະເຮັດໜ້າທີ່ເປັນສະມາຊິກໃນຄະນະລັດຖະບານ, ວັນເສົາ ເພິ່ນຈະອອກແຮງງານສາມັກຄີກັບກຳມະກອນຕາມໂຮງງານ, ທີ່ສາທາລະນະ, ວັນທິດ ເພິ່ນຈະຊອກເງື່ອນໄຂພົບປະກັບຊາວໄຮ່ນາດ້ວຍການໄປຊ່ວຍຕັດອ້ອຍ ແລະ ອື່ນໆ.
ເຈ ເກວາຣາ ແມ່ນນັກທິດສະດີສົງຄາມກອງຫລອນ ເປັນບົດຮຽນທາງຍຸດທະສາດທີ່ຫລັກແຫລມທີ່ສຸດ. ທິດສະດີຂອງເພິ່ນແມ່ນ ໃຊ້ກຳລັງໜ້ອຍເພື່ອຕີເອົາຊະນະສັດຕູຜູ້ເປັນກອງທັບເຂັ້ມແຂງ ແລະ ທັນສະໄໝຮອບດ້ານ.
ເຈ ເກວາຣາ ແມ່ນນັກທິດສະດີປະຕິວັດ ເພິ່ນໃຫ້ຄວາມຄິດກ່ຽວກັບນັກປະຕິວັດຊັ້ນແນວໜ້າຄື ” ນັກປະຕິວັດຕ້ອງມີຄວາມຮັກຕໍ່ປະຊາຊົນ, ມີມະນຸດສະທຳ, ມີຄວາມຍຸຕິທຳ, ບໍ່ມົວເມົາແຕ່ຫລັກການຫລາຍຈົນແຍກຕົວອອກຈາກມາຫາຊົນ, ຕ້ອງເປັນຜູ້ເສຍສະຫລະສິດຜົນປະໂຫຍດສ່ວນຕົວ-ຄອບຄົວ ເພື່ອຜົນປະໂຫຍດສ່ວນລວມຂອງຊາດ, ເຮັດການປະຕິວັດບໍ່ຫວັງສິ່ງຕອບແທນດ້ານວັດຖຸເງິນຄຳ, ເຮັດກາປະຕິວັດດ້ວຍອຸດົມການຄືໄຊຊະນະ ແລະ ປົດປ່ອຍມວນຊົນອອກຈາກການຂູດຮີດ.
ກ່ຽວກັບການສ້າງສັງຄົມນິຍົມເພິ່ນໄດ້ໃຫ້ຄຳເຫັນວ່າ ” ການສ້າງສັງຄົມນິຍົມ ບໍ່ແມ່ນເຮັດແຕ່ວຽກ ຫລື ຍົກລະດັບການເມືອງເທົ່ານັ້ນ ຕ້ອງເຮັດໄປພ້ອມກັນໝາຍວ່າຕ້ອງຜະລິດວັດຖຸສິ່ງຂອງ ແລະ ຊຸບຫລໍ່ແນວຄິດການເມືອງໄປພ້ອມກັນ “
ເຈ ເກວາຣາ ໃຫ້ຄວາມສຳຄັນຂອງກຳມະກອນໃນລະບອບສັງຄົມນິຍົມຄື ” ພື້ນຖານການປະຕິວັດສັງຄົມນິຍົມແມ່ນຊົນຊັ້ນກຳມະກອນ ເມື່ອສ້າງລະລະບອບສັງຄົມນິຍົມທີ່ຂາດບໍ່ໄດ້ກໍແມ່ນຜະເດັດການກຳມະຊີບ ໝາຍວ່າ ຜະເດັດການປະຊາທິປະໄຕຂອງຊົນຊັ້ນກຳມະກອນໃນທຸກໆລະດັບ ຂອງວຽກວງານພາຍໃນປະເທດ ແຕ່ສຳຄັນທີ່ສຸດແມ່ນການກຳຈັດປັດເຂ່ຍພະຍາດຮ້າຍແຮງອັນໜຶ່ງຄື: ລັດທິອາດຍາສິດ, ບົ່ງຄຳສັ່ງຈາກຫ້ອງການ, ຫ່າງເຫີນຈາກມວນຊົນ, ແບບລັດທິຄຳພີ, ລັດທິພາກສ່ວນ “
ເຈ ເກວາຣາ ຖືຊາວໜຸ່ມແມ່ນກ້ອນກຳລັງແຮງ ແມ່ນແກ່ນສານສຳຄັນທີ່ສຸດຂອງການປະຕິວັດເພິ່ນເວົ້າວ່າ: ” ເຍົາວະຊົນແມ່ນດິນດາກພື້ນຖານເພື່ອປັ້ນຜົນງານຂອງພວກເຮົາ ໃນນັ້ນພວກເຮົາໄດ້ເອົາຄວາມຫວັງອັນຍິ່ງໃຫຍ່ຝາກໄວ້ກັບເຂົາ ແລ້ ພວກເຂົາກໍໄດ້ກະກຽມເຂົາໄວ້ເປັນຜູ້ສືບທອດ ຍົກສູງຄັນທຸງປະຕິວັດພວກເຮົາ “
ເຈ ເກວາຣາ ແມ່ນນັກສາກົນນິຍົມຊົນຊັ້ນກຳມະຊີບ ທີ່ໄດ້ພິສູດ ແລະ ຢັ້ງຢືນໃຫ້ເຫັນແນວຄວາມຄິດຂອງເພິ່ນທີ່ວ່າ ” ບ່ອນໃດເຮົາສາມາດຕໍ່ສູ້ປົດປ່ອຍຜູ້ຖືກກົດຂີ່ຂູດຮີດ ບ່ອນນັ້ນຄືປິຕຸພູມຂອງເຮົາ, ການຕໍ່ສູ້ເອົາເປັນເອົາຕາຍນັ້ນແມ່ນບໍ່ມີຊາຍແດນຂີດຂັ້ນ ພວກເຮົາບໍ່ສາມາດຢູ້ເສີຍໆໄດ້ເມື່ອມີສິ່ງໃດສິ່ງໜຶ່ງເກີດຂຶ້ນໃນພາກສ່ວນໃດສ່ວນໜຶ່ງຂອງໂລກ, ໄຊຊະນະຕໍ່ພວກຈັກກະພັດປະເທດໃດກໍຕາມນັ້ນຄືໄຊຊະນະຂອງພວກເຮົາ “
ເຈ ເກວາຣາ ໄດ້ເດີນທາງໄປໂບລີບີກັບເພື່ອນ17 ຄົນ ໂດຍມີຈຸດປະສົງຕໍ່ສູ້ໃຫ້ບັນດາປະເທດໃນທະວີບອາເມຣິກາລາຕິນກາຍເປັນປະເທດສັງຄົມນິຍົມທັງໝົດ. ເຈ ພ້ອມດ້ວຍໝູ່ອີກ 6 ຄົນຖືກຂ້າຕາຍຢູ່ໂບລີບີ ໃນວັນທີ 9 ຕຸລາ 1967 ” ຍິງຂ້ອຍໂລດ ຂ້ອຍກໍເປັນພຽງຜູ້ຊາຍທຳມະດາ ” ເປັນຄຳເວົ້າປະໂຫຍກສຸດທ້າຍຂອງ ເຈ ເກວາຣາ.
ພາຍຫລັງການຕາຍຂອງ ເຈ ເກວາຣາ 10 ວັນ ຄື ວັນທີ 18 ຕຸລາ 1967 ຟີເດລ ຄາສໂຕຣ ໄດ້ກ່າວສູນທອນພົດລະນຶກເຖິງ ເຈ ເກວາຣາ ຕໍ່ທີ່ຊຸມນຸມວ່າ ” ຄຸນລັກສະນະພິເສດຂອງ ເຈ ຄືຄວາມກ້າຫານ ເຂົາເປັນນັກຮົບທີ່ບໍ່ໄດ້ເກີດໃນປະເທດກູບາ ແຕ່ເຂົາມາຕໍ່ສູ້ຄຽງບ່າຄຽງໄຫລ່ກັບກູບາ, ເຂົາມີຄວາມກະຕືລືລົ້ນຢາກເຂົ້າຮ່ວມການຕໍ່ສູ້ບໍ່ວ່າຈະຢູ່ແຜ່ນດິນໃດກໍຕາມໃນທະວີບອາເມຣິກາ, ເຂົາເປັນນັກສາກົນທີ່ຍິ່ງໃຫຍ່, ຍາມໃດ ເຈ ກໍເຕັມໃຈສຸກໃຈທີ່ຈະເຮັດຫລ້ອນໜ້າທີ່ອັນຫຍຸ້ງຍາກທີ່ສຸດ, ສ່ຽງໄພທີ່ສຸດໂດຍບໍ່ລັງເລໃຈຫຍັງໝົດ. ຍ້ອນເຫດນີ້ເຂົາຈຶ່ງໄດ້ຍົດຊັ້ນພັນຕີ ແລະ ຕຳແໜ່ງຜູ້ບັນຊາການທະຫານແນວທີສອງທີ່ປະຕິບັດງານໃນສາຍພູ ມາແອສຕຣາ. ເຈ ເກວາຣາ ແມ່ນນັກຮົບທີ່ຫາຜູ້ປຽບທຽບບໍ່ໄດ້, ແມ່ນຜູ້ນຳທີ່ຫາຜູ້ປຽບໄດ້ຍາກ, ເປັນຜູ້ບັນຊາການທະຫານທີ່ດີເລີດ,ເປັນແບບຢ່າງທີ່ທຸກຄົນຕ້ອງຮຽນເອົາ. ເຈ ເກວາຣາ ໄດ້ນຳເອົາແນວຄິດລັດທິມາກ-ເລນິນ ກັບຄືນມາສູ່ຄວາມສົດໃສບໍລິສຸດ ສູ່ຄວາມຮູ້ສຶກປະຕິວັດທີ່ຍິ່ງໃຫຍ່ອີກເທື່ອໜຶ່ງ. ໃນຍຸກຂອງພວກເຮົານີ້ບໍ່ມີບຸກຄົນໃດສາມາດຍົກສູງແນວຄິດສາກົນນິຍົມໃຫ້ທຽມທັນລະດັບຂອງ ເຈ ເກວາຣາ ຕະຫລອດອະນາຄົດ.
ຜ່ານໄປ 30 ປີ ຄືວັນທີ 28 ມິຖຸນາ 1997 ກະດູກຂອງເຈໄດ້ຖືກຂຸດຄົ້ນຂຶ້ນມາ ແລະ ສົ່ງໄປຝັງໄວ້ທີ່ເມືອງຊານຕາກລາຣາເປັນຖານທີ່ໝັ້ນເກົ່າການປະຕິວັດຂອງກູບາ.
ປະທານ ໄກສອນ ພົມວິຫານ ໄດ້ກ່າວຄຳປາໄສໃນວັນທີ 13 ມັງກອນ 1976 ທີ່ຊານເຕຍໂກ ດີ ກູບາ ຕໍ່ໜ້າມວນຊົນ ແລະ ທ່ານ ຟີເດລ ຄາສໂຕຣ ວ່າ ” ເຖິງແມ່ນວ່າປະເທດທັງສອງຂອງພວກເຮົາຈະຢູ່ໄກກັນຄົນລະຟາກໂລກກໍຕາມ ບໍ່ວ່າທະວີບໃດມະຫາສະໝຸດໃດກໍບໍ່ສາມາດຕັດແຍກພວກເຮົາອອກຈາກກັນ ຍ້ອນວ່າປະຊາຊົນລາວ ແລະ ກູບາ ມີສັດຕູໂຕດຽວກັນ, ອຸດົມຄະຕິອັນດຽວກັນ ແລະ ສາຍພົວພັນລະຫວ່າງປະຊາຊົນສອງຊາດພວກເຮົາກໍ່ສ້າງຂຶ້ນບົນພື້ນຖານແນວຄິດສາກົນນິຍົມຊົນຊັ້ນກຳມາຊີບ ໂດຍໄດ້ຮັບຜົນສະທ້ອນຈາກແບບຢ່າງຂອງ ເຈ ເກວາຣາ ບັນດານາຍແພດ ກູບາ ກໍ່ໄດ້ຜ່ານຜ່າອຸປະສັກຮ້ອຍແປດພັນປະການເພື່ອຮັບໃຊ້ປະຊາຊົນ ແລ້ວການປະຕິວັດລາວຢ່າງຈົ່ງຮັກພັກດີ “
ຂອບໃຈຈາກໂພສ: Khambounmee Lonveexai
ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ - Wave100S AD to Website 2020 0 - ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ
ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ - WhatsApp Image 2020 05 27 at 5 - ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ
ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ - WhatsApp Image 2020 05 27 at 5 - ວັນທີ 9 ຕຸລາ ເປັນວັນທີ່ນັກປະຕິວັດ ເຈ ເກວາຣາ ຖືກປະຫານຊີວິດ
error: Alert: ເນື້ອຫາຂ່າວມີລິຂະສິດ !!