12 ຕຸລາ 1945 ວັນ​ປະກາດ​ເອກະລາດ ວັນປະຫວັດສາດທີ່ຈາລຶກໃນດວງໃຈຂອງປວງຊົນລາວທັງຊາດ

- 555 31 - 12 ຕຸລາ 1945  ວັນ​ປະກາດ​ເອກະລາດ ວັນປະຫວັດສາດທີ່ຈາລຶກໃນດວງໃຈຂອງປວງຊົນລາວທັງຊາດ
- Untitled design - 12 ຕຸລາ 1945  ວັນ​ປະກາດ​ເອກະລາດ ວັນປະຫວັດສາດທີ່ຈາລຶກໃນດວງໃຈຂອງປວງຊົນລາວທັງຊາດ

ໂດຍ: ທິດ​ກໍ່າ

ວັນ​ທີ 12 ຕຸລາ 1945 ​ເປັນ​ວັນ​ປະຫວັດສາດ​ສຳຄັນ​ວັນ​ໜຶ່ງ​ຂອງ​ຊາດ​ລາວ ​ແລະ ປະຊາຊົນ​ລາວ​ບັນດ​າ​ເຜົ່າ​ເຮົາ​ໃນ​ໄລຍະປະຫວັດສາດ​ຍຸກ​ໜຶ່ງ​ຜ່ານ​ມາ. ອັນ​ສາ​ເຫດ​ກໍ​ຍ້ອນ​ວ່າ​ມັນ​ໄດ້​ປາກົດ​ຕົວ​ຂຶ້ນ​ໃນ​ເງື່ອນ​ໄຂ​ທີ່​ປະ​ເທດ​ລາວ​ລ້ານ​ຊ້າງ​ພວມ​ຕົກ​ຢູ່​ໃນ​ຊາ​ຕາ​ອາພັບ, ພວມ​ຖືກ​ສັກ​ດີ​ນາ​ສະຫຍາມ, ຈັກກະພັດ​ຍີ່ປຸ່ນ ​ແລະ ຈັກກະພັດ​ຝຣັ່ງ ​ໄດ້​ຍາດ​ແຍ່ງ​ກັນ​ປົກຄອງ ​ເບິ່ງ​ຢ່າງ​ໜຶ່ງ​ຄື​ວ່າ​ປະ​ເທດ​ລາວ​ລ້ານ​ຊ້າງ​ໃນ​ຍຸກ​ນັ້ນບໍ່​ມີ​ເຈົ້າມີ​ຈອມ​ປົກຄອງ​ບ້ານ​ເມືອງ ປະປ່ອຍ​ໃຫ້​ຕ່າງ​ຊາດ​ເຂົ້າມາ​ຮຸກ​ຮານ​ຍາດ​ແຍ່ງ​ແບ່ງ​ກັນ​ຄອບ​ຄອງ​ຕາມ​ໃຈ, ​ເອົາ​ແຕ່​ໃຜ​ຊິ​ເຮັດ​ຕາມ​ອຳນາດ​ບາດ​ສິດ​ຂອງ​ລັດທິ​ລ່າ​ເມືອງ​ຂຶ້ນ. ​ເລື່ອງ​ລາວ​ປະຫວັດສາດ​ການ​ກຳ​ເນີ​ດ​ໃຫ້​ມີ​ວັນ​ທີ 12 ຕຸລາ 1945 ມັນ​ກໍ​ມີ​ຢູ່​ວ່າ: ກ່ອນ​ໜ້ານັ້ນ ລາວ​ເຮົາ​ຍັງ​ຕົກ​ເປັນ​ເມືອງ​ຂຶ້ນຂອງ​ປະ​ເທດ​ສະຫຍາມ (​ໄທ) ມາ​ເປັນ​ເວລາ​ຮ້ອຍ​ກວ່າ​ປີ​ແລ້ວ. ​ໃນ​ຍຸກ​ສົງຄາມ​ໂລກ​ຄັ້ງທີ II ຝຣັ່ງ​ໄດ້​ເຂົ້າມາ​ລ່າ​ອານາ​ນິຄົມ​ຢຶດ​ເອົາ​ແຫລມ​ອິນດູຈີນ ​ແລະ ຫວັງ​ຈະ​ຢຶດ​ເອົາ​ປະ​ເທດ​ສະຫຍາມ ຫລື ປະ​ເທດ​ໄທ​ຕື່ມ, ​ແຕ່​ມັນ​ກໍ​ບໍ່​ເປັນ​ໄປ​ຕາມ​ທີ່​ຄິດ ຍ້ອນ​ສະຫຍາມ​ມີ​ອັງກິດ​ໜູນ​ຫລັງ ຈຳ​ເປັນ​ຝຣັ່ງກັບ​ສະຫຍາມ​ໄດ້​ຕົກລົງ​ກັນ​ຕັດ​ແບ່ງ​ດິນ​ແດນ​ລາວ​ປັນ​ກັນ​ຄອບ​ຄອງ​ໃນ​ວັນ​ທີ 3 ຕຸລາ 1893. ຟາກ​ແມ່ນ້ຳຂອງ​ຝັ່ງ​ຊ້າຍ​ໄດ້​ຕົກ​ເປັນ​ຂອງຝຣັ່ງຄອບ​ຄອງ, ສ່ວນ​ຝັ່ງ​ຂວາ​ໄດ້​ຕົກ​ເປັນ​ຂອງ​ໄທ​ຈົນ​ມາ​ຮອດ​ທຸກ​ວັນ​ນີ້. ພໍ​ຕົກ​ມາ​ໃນ​ປີ 1945 ອັນ​ເປັນ​ໄລຍະ​ຂ້ອນ​ທ້າຍ​ຂອງ​ສົງຄາມ​ໂລກ​ຄັ້ງທີ II ພວກ​ຟາ​ຊິດ​ຍີ່ປຸ່ນ​ໄດ້​ມີ​ອິດ​ທິພົນ​ເຂົ້າມາ​ຢຶດ​ເອົາ​ແຫລມ​ອິນດູຈີນ ​ແລ້ວ​ໄດ້​ຂັບ​ໄລ່​ໄຖ​ຫົວ​ຝຣັ່ງອອກ​ຈາກ​ອິນດູຈີນ ອັນ​ມີ​ລາວ, ຫວຽດນາມ ​ແລະ ກຳປູ​ເຈຍ. ລາວ​ເຮົາ​ໄດ້​ສວຍ​ໂອກາດ​ອັນ​ສົບ​ສົນ​ອົນລະ​ເວ​ງນີ້ ຈັດຕັ້ງຂະ​ການ​ແນວ​ລາວ​ອິດສະຫລະ, ສ້າງຕັ້ງລັດຖະບານ​ແນວ​ລາວ​ອິດສະຫລະ​ຂຶ້ນ, ກຳນົດ​ເອົາ​ທຸກ​ກາ​ວົງ​ເດືອນ​ເປັນ​ທຸງຊາດ​ ພາຍ​ໃຕ້​ການ​ເປັນ​ປະທານ​ຂອງ​ເຈົ້າ​ເພັດ​ຊະລາ​ດ ​ແລ້ວ​ກໍ​ປະກາ​ດ​ເອກະລາດ​ໃນ​ວັນ​ທີ 12 ຕຸລາ 1945 ຢູ່​ນະຄອນຫລວງ​ວຽງ​ຈັນ ພາຍ​ໃຕ້​ການ​ສະໜັບສະໜູນ ​ແລະ ​ເປັນ​ໃຈ​ຂອງ​ຍີ່ປຸ່ນ. ​ແຕ່​ວ່າ​ພວກ​ຟາ​ຊິດ​ຍີ່ປຸ່ນ​ເຂົ້າມາ​ຄອບ​ຄອງ​ຢູ່​ລາວ​ບໍ່​ທັນ​ເຖິງ​ປີ​ກໍ​ເສຍ​ໄຊ​ໃຫ້​ພັນທະ​ມິດ​ໃນ​ສົງຄາມ​ໂລກ​ຄັ້ງທີ II ​ແລ້ວຝຣັ່ງກໍ​ກັບ​ຄືນ​ມາ​ຮຸກ​ຮານ ​ແລະ ຄອບ​ຄອງ​ປະ​ເທດ​ລາວ​ເປັນ​ຫົວ​ເມືອງ​ຂຶ້ນ​ເປັນຄັ້ງທີ​ສອງ ຈຶ່ງ​ກໍ່​ໃຫ້​ເກີດ​ມີ​ຂະ​ບວນການ​ປະຕິວັດ​ປົດ​ປ່ອຍ​ຊາດ​ຢ່າງ​ຍືດ​ເຍື້ອຍາວ​ນານສືບ​ຕໍ່​ກັນ​ມາ​ເປັນ​ເວລາ​ເກືອບ​ຮ້ອຍ​ປີ.

​ເພາະສະນັ້ນ, ພວກ​ເຮົາ​ຈຶ່ງ​ຖື​ໄດ້​ວ່າ ວັນ​ທີ 12 ຕຸລາ 1945 ​ເປັນ​ວັນ​ປະຫວັດສາດ ​ແລະ ​ເປັນ​ວັນ​ແຫ່ງ​ໄຊຊະນະ​ໃນ​ຂະ​ບວນການ​ຕໍ່ສູ້ ​ເພື່ອ​ເອກະລາດ​ຂອງ​ຊາດ​ໃນ​ຍຸກ​ບັ້ນທ້າຍ​ແຫ່ງ​ການ​ເຊື່ອມ​ໂຍງ​ຂອງ​ປະ​ເທດ​ລ້ານ​ຊ້າງ​ທີ່​ເຄີຍ​ມີ​ອະລິຍະ​ທຳ ​ແລະ ດິນ​ແດນ​ອັນ​ກວ້າງ​ໃຫຍ່​ໄພສານ. ນີ້​ລະ​ຄື​ປະຫວັດສາດ​ທີ່​ໄປ​ທີ່​ມາ​ຂອງ​ວັນ​ປະກາດ​ເອກະລາດ 12 ຕຸລາ 1945.

- Wave100S AD to Website 2020 0 - 12 ຕຸລາ 1945  ວັນ​ປະກາດ​ເອກະລາດ ວັນປະຫວັດສາດທີ່ຈາລຶກໃນດວງໃຈຂອງປວງຊົນລາວທັງຊາດ

​ແນວ​ໃດ​ກໍ​ຕາມ, ຜ່ານ​ຂະ​ບວນການ​ຕໍ່ສູ້​ເພື່ອ​ຄວາມ​ເປັນ​ເອກະລາດ​ຂອງ​ຊາດ​ຂອງ​ແຜ່ນດິນ ນັບ​ແຕ່​ຍຸກ​ເຈົ້າອານຸວົງ, ມາ​ຕໍ່​ໃສ່​ຍຸກ​ພໍ່​ກະ​ດວດ, ອົງ​ແກ້ວ​ກົມມະ​ດຳ, ​ເຈົ້າຟ້າ​ປັດ​ໄຈ ຈົນ​ກໍ່​ໃຫ້​ເກີດ​ມີ​ການ​ນຳພາ​ຂອງ​ພັກ​ກອມ​ມູນິດ​ອິນດູຈີນ, ພັກ​ປະຊາຊົນ​ປະຕິວັດ​ລາວ ຈົນ​ສາມາດ​ປົດ​ປ່ອຍປະ​ເທດ​ຊາດ​ໄດ້​ຢ່າ​ງສົມບູນ​ໃນ​ປີ 1975 ອັນ​ເປັນ​ຂີດ​ໝາຍ​ປະຫວັດສາດ​ແຫ່ງ​ຍຸກ​ໃໝ່, ສະ​ໄໝ​ໃໝ່​ຂອງ​ປະ​ເທດ​ຊາດ​ບ້ານ​ເມືອງ, ຂອງ​ຄົນ​ລາວ​ເຮົາ​ທີ່​ໄດ້​ຕົກ​ເປັນ​ຂ້ອຍ​ຂ້າ​ຂອງ​ຊາດ​ອື່ນ ທັງ​ເປັນຫົວ​ເມືອງ​ຂຶ້ນຂອງ​ຈັກກະພັດ​ຜູ້​ຮຸກ​ຮານມາ​ຫລາຍ​ຮ້ອຍ​ປີ ມາ​ເຖິງ​ຍຸກ​ນີ້​ໄດ້​ຫລຸດ​ພົ້ນອອກ​ຈາກ​ແອກ​ຄອບ​ຄອງ​ເໝືອນ​ຕາຍ​ແລ້ວ​ເກີດ​ໃໝ່​ໄປ​ພ້ອມ​ປະ​ເທດຊາດກໍ​ມີ​ຊື່​ໃໝ່​ຄື ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ. ລະບອບ​ສັກ​ດີ​ນາ​ໃນ​ຍຸກ​ລ້ານ​ຊ້າງ​ຕອນ​ປາຍ​ທີ່​ນຳພາ​ປົກຄອງ​ບ້ານ​ເມືອງ​ໄດ້​ຊຸດ​ໂຊມ, ມີ​ແຕ່​ແນວ​ຈິບຫາຍ, ປະ​ເທດ​ລາວ​ຍັງ​ເຫລືອ​ແຜ່ນດິນ​ບໍ່​ຮອດ​ເຄິ່ງໜຶ່ງ, ພົນລະ​ເມືອງ​ລາວ​ໝົດ​ໄປ​ຫລາຍ​ສິບ​ລ້ານ ຍ້ອນ​ສັກ​ດີ​ນາລາ​ວບໍ່​ເປັນຕາ​ສາ​ເທດ, ພາກັນ​ຍາດ​ຕັ່ງ, ຍາດ​ຜົນ​ປະ​ໂຫຍ​ດ, ຍາດ​ອຳນາດ​ບາດ​ໃຫຍ່ ​ເຮັດ​ໃຫ້​ຕ່າງ​ຊາດ​ເຂົ້າມາ​ຮຸກ​ຮານ, ​ເຜົາ​ຜານ​ແຜ່ນດິນ​ລາວ, ຄົນ​ລາວ​ຕົກ​ຕໍ່າ​ດ້ອຍ​ພັດທະນາ​ ຈົນ​ລາມ​ເປັນ​ຊຳ​ເຮື້ອມາ​ຮອດ​ທຸກ​ວັນ​ນີ້.

​ເພາະສະນັ້ນ, ຊາຕາກຳ​ຂອງ​ປະ​ເທດ​ຊາດ​ບ້ານ​ເມືອງ​ຈຶ່ງ​ພາ​ໃຫ້​ເກີດ​ມີ​ລາວ​ຫລົງ, ລາວ​ນອກ, ລາວ​ໃນ, ໜີ​ໄປ​ຄົນ​ລະ​ທີບ, ລາວ​ນອກ​ກໍ​ໜີ​ໄປ​ຢູ່​ນຳ​ນາຍ​ເກົ່າ ຄື​ຈັກກະພັດ ​ແລະ ສັກ​ດີ​ນາ​ທີ່​ເຂົາວ່າ​ດີ​ມີ​ສັດທາ​ນຳ, ​ແຕ່​ປະຫວັດສາດ​ພັດ​ມີ​ແຕ່​ແນວ​ຈິບຫາຍ. ສ່ວນ​ພວກ​ເຮົາ​ທີ່ຢູ່​ພາຍ​ໃນ​ປະ​ເທດ ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ​ປະຕິວັດ​ລາວ ​ແລະ ລັດຖະບານ​ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ອັນ​ມີ​ທຸງ​ກາ​ວົງ​ເດືອນ​ເປັນ​ທຸງຊາດ, ​ເປັນ​ສັນຍາ​ລັກ​ຂອງ​ສີສັນ ​ແລະ ມູນ​ເຊື້ອ ວັນ​ທີ 12 ຕຸລາ 1945 ຍັງ​ປິວ​ສະ​ບັດ​ຢູ່​ເທິງ​ຍອດ​ເສົາພາຍ​ໃຕ້​ທ້ອງຟ້າ​ສີ​ຄາມ​ດ້ວຍ​ຄວາມ​ສະຫງົບ​ໝັ້ນຄົງ.

- WhatsApp Image 2020 05 27 at 5 - 12 ຕຸລາ 1945  ວັນ​ປະກາດ​ເອກະລາດ ວັນປະຫວັດສາດທີ່ຈາລຶກໃນດວງໃຈຂອງປວງຊົນລາວທັງຊາດ
- WhatsApp Image 2020 05 27 at 5 - 12 ຕຸລາ 1945  ວັນ​ປະກາດ​ເອກະລາດ ວັນປະຫວັດສາດທີ່ຈາລຶກໃນດວງໃຈຂອງປວງຊົນລາວທັງຊາດ
error: Alert: ເນື້ອຫາຂ່າວມີລິຂະສິດ !!