ອຸຕຸເຕືອນໃຫ້ລະວັງພະຍຸນັງກາ

ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນປະຊາຊົນໃນຂອບເຂດທົ່ວປະເທດ ໃຫ້ລະວັງ ​ແລະ ກຽມຄວາມພ້ອມຮັບມືກັບສະພາບນໍ້າປ່າໄຫລຊຸ, ນໍ້າຖວ້ມຢູ່ຫລາຍທ້ອງຖິ່ນ ເນື່ອງຈາກວ່າໃນວັນທີ 12 ຕຸລານີ້ ພາຍຸດີເປຣຊັນທີ່ກໍ່ຕົວຢູ່ປະເທດຟີລິບປິນ ພວມເຄື່ອນຕົວມາທາງທິດຕາເວັນຕົກດ້ວຍຄວາມໄວ 15 ກິໂລແມັດຕໍ່ຊົ່ວໂມງ ແລະ ຈະເພີ່ມກໍາລັງແຮງຂຶ້ນ ກາຍເປັນພາຍຸໝູນເຂດຮ້ອນນັງກາ (Nang Ka) ຫົວທີ 16 ປະຈໍາປີ 2020 ​ແລະ ຄາດວ່າພາຍຸຫົວນີ້ຈະສືບຕໍ່ເຄື່ອນທີ່ຜ່ານເກາະໄຮ້ໜຳ ແລະ ຂຶ້ນຝັ່ງທາງພາກເໜືອຂອງ ສສ ຫວຽດນາມ ໃນວັນທີ 15 ຕຸລາ ແລະ ວົງລັດສະໝີຂອງພາຍຸຫົວດັ່ງກ່າວ ກວມເອົາເຂດພາກເໜືອດ້ານຕາເວັນອອກຂອງປະເທດລາວ ຊຶ່ງຈະເຮັດໃຫ້ມີຝົນຕົກຟ້າເຫລື້ອມໃນລະດັບຄ່ອຍຢູ່ເກືອບທົ່ວໄປໃນແຕ່ລະພາກ ແລະ ຕົກປານກາງຫາຕົກໜັກ, ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນແຂວງພາກເໜືອດ້ານຕາເວັນອອກລົງຫາພາກກາງ ແລະ ພາກໃຕ້.

ດັ່ງນັ້ນ, ຈຶ່ງແຈ້ງເຕືອນໃຫ້ປະຊາຊົນໃນເຂດດັ່ງກ່າວມີສະຕິຕໍ່ສະພາບຝົນຕົກຫນັກ, ນໍ້າຖ້ວມ ແລະ ໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດເປັນປະຈໍາ.