ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ

ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ -                                                    - ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ
ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ - Untitled design - ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ

ໂດຍຕອບສະໜອງຕາມການເຊື້ອເຊີນຂອງ ສະຫາຍ ສະເຫລີມໄຊ ກົມມະສິດລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ, ສະຫາຍ ຫວັງ ອີ້ ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດແຫ່ງ ສາທາລະນະລັດ ປະຊາຊົນຈີນ ພ້ອມຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 13-14 ຕຸລານີ້.

ການ​ພົບ​ປະ​ສອງ​ຝ່າຍ​ໄດ້​ມີ​ຂຶ້ນ​ໃນ​ວັນ​ທີ 14 ຕຸລາ​ນີ້ ທີ່​ນະຄອນຫລວງ​ວຽງ​ຈັນ. ໃນໂອກາດນີ້, ສະຫາຍ ລັດຖະມົນຕີ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ຄັ້ງທີ 2 ຂອງສະຫາຍ ລັດຖະມົນຕີ ຫວັງ ອີ້ ໃນປີ 2020 ນີ້, ສອງຝ່າຍໄດ້ຕີລາຄາສູງຕໍ່ການພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກໍາ ລາວ-ຈີນ ກໍຄືປະຊາຊົນສອງຊາດນັບມື້ໄດ້ຮັບການເສີມຂະຫຍາຍດ້ວຍຄຸນນະພາບໃໝ່ ໂດຍໄດ້ສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຂອງສອງປະເທດຢ່າງເປັນປົກກະຕິ. ສປປ ລາວ ໄດ້ສະແດງຄວາມຊົມເຊີຍ ແລະ ສະໜັບສະໜູນຕໍ່ຂໍ້ລິເລີ່ມທີ່ ສະຫາຍ ລັດຖະມົນຕີ ຫວັງ ອີ້ ໄດ້ສະເໜີຢູ່ໃນກອງປະຊຸມສາກົນຜ່ານລະບົບທາງໄກ ກ່ຽວກັບຄວາມໝັ້ນຄົງທາງດ້ານຂໍ້ມູນຂ່າວສານສາກົນ (Global Initiative on Data Security) ໃນວັນທີ 8 ກັນຍາຜ່ານມາ ຊຶ່ງເປັນຂໍ້ລິເລີ່ມທີ່ມີຄວາມໝາຍສໍາຄັນ ແລະ ເປັນປະໂຫຍດຕໍ່ກັບຫລາຍປະເທດໃນພາກພື້ນ ແລະ ສາກົນ ເພື່ອຄວາມກ້າວໜ້າທາງເຕັກໂນໂລຊີ, ຄວາມປອດໄພ  ທາງດ້ານຂໍ້ມູນຂ່າວສານ ລວມທັງຄວາມໝັ້ນຄົງຂອງຊາດ ແລະ ຜົນປະໂຫຍດສ່ວນລວມ.

ພ້ອມກັນນີ້, ສປປ ລາວ ຍັງໄດ້ສະແດງການສະໜັບສະໜູນຢ່າງເຕັມປ່ຽມຕໍ່ເນື້ອໃນບົດປາໄສຂອງ ສະຫາຍ ປະທານປະເທດ ສີ ຈິນຜິງ ທີ່ໄດ້ກ່າວຜ່ານກອງປະຊຸມທາງໄກ ໃນໂອກາດວັນສ້າງຕັ້ງ ສປຊ ຄົບຮອບ 75 ປີ ມີ 6 ຈຸດໃຫຍ່ ຄື: 1. ການເປັນຄູ່ຮ່ວມຊະຕາກໍາຂອງມວນມະນຸດ; 2. ການຮ່ວມມືຕ່າງຝ່າຍຕ່າງມີຜົນປະໂຫຍດ; 3. ການສົ່ງເສີມການຄ້າຫລາຍຝ່າຍ; 4. ແນວຄິດການພັດທະນາແບບໃໝ່; 5. ການຮ່ວມມືໃນຂອບຫລາຍຝ່າຍ ແລະ 6. ການສະໜັບສະໜູນຄວາມເປັນແກນກາງຂອງສະຫະປະຊາຊາດ ແລະ ອື່ນໆ. ພ້ອມນັ້ນ, ສອງຝ່າຍຍັງໄດ້ເປັນເອກະພາບຕໍ່ການຕີລາຄາການຮ່ວມມືສອງຝ່າຍ​ໃນ​ໄລຍະ​ຜ່ານ​ມາ ພາຍ​ໃຕ້​ສະຖານະ​ການ​ໃໝ່​ຂອງ​ການ​ແຜ່​ລະບາດ​ໂຄ​ວິດ-19 ແລະ ສະພາບການສາກົນໃນປັດຈຸບັນເຊັ່ນ: ດ້ານການເມືອງຄວາມໝັ້ນຄົງ, ສອງຝ່າຍໄດ້ມີການຮ່ວມມືກັນຢ່າງໃກ້ຊິດ ແລະ ແລກປ່ຽນຂໍ້ມູນຊຶ່ງກັນ ແລະ ກັນຢ່າງເປັນປະຈຳ ເຮັດໃຫ້ຊາຍແດນ ລາວ-ຈີນ ເປັນຊາຍແດນມິດຕະພາບ, ບ້ານ​ໃກ້ເຮືອນຄຽງ ຕາມທິດ 4 ດີ ແລະ ຄູ່ຮ່ວມຊະຕາກໍາອັນແທ້ຈິງ; ດ້ານເສດຖະກິດ ແລະ ການຄ້າ, ສອງຝ່າຍໄດ້​ໃຫ້ການສະໜັບສະໜູນນະໂຍບາຍ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ຊຶ່ງຈະນໍາຜົນປະໂຫຍດອັນໃຫຍ່ຫລວງມາໃຫ້ບັນດາປະເທດຕ່າງໆທີ່ເຂົ້າຮ່ວມ ໂດຍສະເພາະ ສປປ ລາວ ແມ່ນໄດ້ໃຫ້ຄວາມສຳຄັນ ແລະ ເຂົ້າຮ່ວມຢ່າງຕັ້ງໜ້າ ໂດຍໄດ້ເຊື່ອມໂຍງລະຫວ່າງຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງເຊື່ອມຈອດ” ເຂົ້າກັບຍຸດທະສາດ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ໂດຍຖືເອົາການກໍ່ສ້າງທາງລົດໄຟ ລາວ-ຈີນ ແລະ ທາງດ່ວນ ວຽງຈັນ-ວັງວຽງ, ວັງວຽງ-ຫລວງພະບາງ, ຫລວງພະບາງ-ອຸດົມໄຊ ໄປຈົນຮອດຊາຍແດນ ລາວ-ຈີນ ດ່ານບໍ່ເຕັນ-ບໍ່ຫານ ເປັນໜຶ່ງໃນການເຊື່ອມໂຍງຍຸດທະສາດອັນສຳຄັນຂອງສອງປະເທດ ແລະ ຖືເປັນສອງເສັ້ນທາງທີ່ສຳຄັນໃນການປະຕິບັດແລວເສດຖະກິດ ລາວ-ຈີນ, ຈີນ-ລາວ ຊຶ່ງໂຄງການກໍ່ສ້າງທາງລົດໄຟ ລາວ-ຈີນ ໃນປັດຈຸບັນແມ່ນມີຄວາມຄືບໜ້າຫລາຍກວ່າ 90,7% ແລະ ໂຄງການທາງດ່ວນ ວຽງຈັນ-ວັງວຽງ ຄາດວ່າຈະເປີດນຳໃຊ້ໃນວັນທີ 2 ທັນວານີ້. ນອກຈາກນີ້, ຍັງມີໂຄງການຮ່ວມມືອື່ນໆທີ່ສຳຄັນເຊັ່ນ: ໂຄງການກໍ່ສ້າງໂຮງໝໍມະໂຫສົດຫລັງໃໝ່ ສຳເລັດແລ້ວ 60% ແລະ ຄາດວ່າຈະສໍາເລັດການກໍ່ສ້າງໃນປີ 2021, ໂຄງການແລວທາງເສດຖະກິດ ລາວ-ຈີນ ແລະ ໂຄງການສ້າງສູນກວດພະຍາດໂຄວິດ-19 ໃຫ້ແກ່ກະຊວງສາທາລະນະສຸກ; ດ້ານການຄ້າ ແລະ ການລົງທຶນ, ສອງຝ່າຍໄດ້ສະແດງຄວາມຍິນດີທີ່ເຫັນວ່າ ໄດ້ມີການຂະຫຍາຍຕົວສູງ, ໃນປີ 2019 ສປ ຈີນ ເປັນປະເທດລົງທຶນອັນດັບ 1 ຢູ່ ສປປ ລາວ ມີ 785 ໂຄງການ ລວມມູນຄ່າ 12 ຕື້ໂດລາສະຫະລັດ ແລະ ​ເປັນປະເທດຄູ່ຄ້າລາຍໃຫຍ່ອັນດັບ 2 ຂອງ ສປປ ລາວ ມີມູນຄ່າການຄ້າບັນລຸໄດ້ 3,540 ລ້ານໂດລາສະຫະລັດ ເພີ່ມຂຶ້ນ 17,4%, ມູນຄ່າການນໍາເຂົ້າມີ 1,600 ລ້ານໂດລາສະຫະລັດ ເພີ່ມຂຶ້ນ 29,6% ແລະ ມູນຄ່າສົ່ງອອກມີ 1,940 ລ້ານໂດລາສະຫະລັດ ເພີ່ມຂຶ້ນ 8,9% ເມື່ອທຽບໃສ່ໄລຍະດຽວກັນຂອງປີຜ່ານມາ. ສອງຝ່າຍຍັງຕົກລົງເຫັນດີໃນການຈັດຕັ້ງປະຕິບັດຊ່ອງທາງໄວຮ່ວມກັນ (Fast-Track Lane) ໃນໄລຍະການແຜ່ລະບາດຂອງພະຍາດໂຄວິດ-19 ເພື່ອສົ່ງເສີມການໄປມາຫາສູ່ກັນລະຫວ່າງພະນັກງານ, ເຈົ້າໜ້າທີ່ກ່ຽວຂ້ອງ ກໍຄືແຮງງານ ແລະ ຊ່ຽວຊານ ສຳລັບໂຄງການໃຫຍ່ໆທີ່ສຳຄັນລະຫວ່າງສອງປະເທດ ຊຶ່ງຊ່ອງທາງດັ່ງກ່າວຈະເປັນການປະກອບສ່ວນເຂົ້າໃນການສົ່ງເສີມການຮ່ວມມື ເພື່ອຊ່ວຍຟື້ນຟູເສດຖະກິດຂອງ ສປປ ລາວ ກໍຄືເຮັດໃຫ້ການປະຕິບັດໂຄງການຕ່າງໆຂອງ ສປ ຈີນ ຢູ່ ສປປ ລາວ ສຳເລັດຕາມຄາດໝາຍ. ພ້ອມນັ້ນ, ສອງຝ່າຍຍັງເຫັນດີໃນດ້ານຫລັກການໃຫ້ເປີດນຳໃຊ້ຊ່ອງທາງສີຂຽວ ເພື່ອອຳນວຍຄວາມສະດວກໃຫ້ແກ່ລົດບັນທຸກສິນຄ້າຜ່ານແດນ ລາວ-ຈີນ, ຈີນ-ລາວ ຢູ່ດ່ານສາກົນບໍ່ເຕັນ-ບໍ່ຫານ ແຂວງຫລວງນໍ້າທາ ໃຫ້ມີຄວາມວ່ອງໄວຂຶ້ນ. ນອກຈາກນີ້, ສອງຝ່າຍຍັງໄດ້ປຶກສາຫາລືກ່ຽວກັບທິດທາງແຜນການຮ່ວມມືໃນຕໍ່ໜ້າ ໂດຍສະເພາະແມ່ນການສະເໜີແຜນການສະເຫລີມສະຫລອງ ວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 60 ປີ ແລະ ປີມິດຕະພາບ ລາວ-ຈີນ ໃນປີ 2021, ພ້ອມທັງປຶກສາຫາລືກ່ຽວກັບການສືບຕໍ່ຮ່ວມມືກັນຢ່າງໃກ້ຊິດ ແລະ ຊ່ວຍເຫລືອຊຶ່ງກັນ ແລະ ກັນໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ເພື່ອປ້ອງກັນບໍ່ໃຫ້ກັບມາລະບາດອີກຮອບໃໝ່.

ໃນໂອກາດນີ້, ສະຫາຍ ລັດຖະມົນຕີ ສະເຫລີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ຜົນສຳເລັດທີ່ພັກ ແລະ ລັດຖະບານ ແຫ່ງ ສປ ຈີນ ຍາດມາໄດ້ໃນການຄວບຄຸມ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19, ພ້ອມທັງສະແດງຄວາມຂອບໃຈ ແລະ ຮູ້ບຸນຄຸນຕໍ່ ສປ ຈີນ ທີ່ໄດ້ບິແບ່ງການຊ່ວຍເຫລືອອັນມີຄຸນຄ່າໃຫ້ແກ່ ສປປ ລາວ ໃນການປ້ອງກັນ ແລະ ຕໍ່ສູ້ກັບພະຍາດໂຄວິດ-19 ນັບແຕ່ຕົ້ນຈົນເຖິງປັດຈຸບັນ ຊຶ່ງເປັນການປະກອບສ່ວນອັນສຳຄັນ ເຮັດໃຫ້ ສປປ ລາວ ປະສົບຜົນສຳເລັດຢ່າງສູງໃນການປ້ອງກັນ ແລະ ຄວບຄຸມພະຍາດດັ່ງກ່າວ. ​ໃນ​ຂະນະ​ດຽວ​ກັນ, ສະຫາຍ ລັດຖະມົນຕີ ຫວັງ ອີ້ ກໍ​ໄດ້​ສະ​ແດງ​ຄວາມ​ຂອບ​ໃຈ​ມາ​ຍັງ​ພັກ, ລັດຖະບານ ​ແຫ່ງ ສປປ ລາວ ທີ່​ໄດ້​ໃຫ້​ກຽດ​ຕ້ອນຮັບ​ຢ່າງ​ອົບ​ອຸ່ນ​ໃນ​ການ​ມາ​ຢ້ຽມຢາມ​ທາງ​ການ ສປປ ລາວ ຂອງຕົນໃນຄັ້ງນີ້ ແລະ ສະແດງຄວາມຍິນດີຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ເປັນຄູ່ຮ່ວມຊະຕາກຳ ລາວ-ຈີນ, ຈີນ-ລາວ ລະຫວ່າງ ສອງພັກ-ສອງລັດຖະບານ ກໍຄືປະຊາຊົນສອງຊາດ ລາວ ແລະ ຈີນ ໃຫ້ນັບມື້ນັບໄດ້ຮັບການເສີມຂະຫຍາຍ ທັງລວງກວ້າງ, ລວງເລິກ ແລະ ໃຫ້ມີປະສິດທິຜົນ, ນໍາເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດ ລາວ ແລະ ຈີນ.

ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ - Wave100S AD to Website 2020 0 - ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ

ພາຍຫລັງສຳເລັດການພົບປະສອງຝ່າຍ ໄດ້ມີການແລກປ່ຽນຈົດໝາຍ ແລກປ່ຽນໂຄງການຊ່ວຍເຫລືອລ້າ 3 ສະບັບຄື: 1.) ໂຄງການຊ່ວຍເຫລືອລ້າ ກ່ຽວກັບອຸປະກອນຕ້ານໄຂ້ເລືອດອອກ; 2.) ໂຄງການພື້ນຖານໂຄງລ່າງການພັດທະນາຊົນນະບົດ ໄລຍະ 2 ແລະ 3.) ໂຄງການແລກປ່ຽນ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສປ ຈີນ ກ່ຽວກັບການຮັບເອົາສິດພິເສດທາງດ້ານພາສີ 0% ໃຫ້ແກ່ 97% ຂອງລາຍການສິນຄ້າທັງໝົດ (GSP 97%).

ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ - WhatsApp Image 2020 05 27 at 5 - ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ
ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ - WhatsApp Image 2020 05 27 at 5 - ລາວ-ຈີນ ເສີມຂະຫຍາຍສາຍພົວພັນຮ່ວມມືສອງຝ່າຍ
error: Alert: ເນື້ອຫາຂ່າວມີລິຂະສິດ !!