​ໂຄ​ວິດ-19 ສົ່ງ​ເສີມ​ໃຫ້​ຄົນລາວ​ທ່ຽວ​ລາວ

- 555 38 - ​ໂຄ​ວິດ-19 ສົ່ງ​ເສີມ​ໃຫ້​ຄົນລາວ​ທ່ຽວ​ລາວ
- 174233 - ​ໂຄ​ວິດ-19 ສົ່ງ​ເສີມ​ໃຫ້​ຄົນລາວ​ທ່ຽວ​ລາວ

ໂດຍ: ທິດ​ກໍ່າ

ນັບ​ແຕ່​ເຊື້ອພະຍາດ​ໂຄ​ວິດ-19 ​ໄດ້​ປາກົດ​ຕົວ​ຂຶ້ນ ​ແລະ ​ໄດ້​ທຳລາຍ​ຊີວິດ​ອິນ​ຊີ​ຂອງ​ມວນ​ມະນຸດ​ໃນ​ທົ່ວ​ໂລກ​ໄປ​ແລ້ວ 1 ລ້ານ​ກວ່າ​ຄົນ ຈົນ​ມາ​ຮອດ​ໄລຍະ​ນີ້ ກໍ​ຍັງ​ບໍ່​ທັນ​ມີ​ທ່າ​ທີ​ຫລຸດ​ໜ້ອຍ​ຖອຍ​ລົງ ​ແລະ ມະ​ຫັບ​ມະຫາຍ​ໄປ​ຈາກ​ໂລກ​ໃບ​ນີ້​ຢ່າງ​ສິ້ນ​ເຊີງ​ເທື່ອ. ຫລ້າ​ສຸດ​ມາ​ຮອດ​ວັນ​ທີ 14 ຕຸລາ​ 2020 ສະ​ເພາະ​ຈຳນວນ​ຜູ້​ຕິດ​ເຊື້ອ​ໂຄ​ວິດ-19 ຢູ່​ລາວ​ເຮົາ​ຍັງ​ຢູ່​ໃນ​ລະດັບ​ເກົ່າ ຄື​ຈຳນວນ​ທັງ​ໝົດ 23 ຄົນ​, ປິ່ນປົວ​ດີ​ແລ້ວ 22 ຄົນ, ພວມ​ປິ່ນປົວ​ຢູ່​ໂຮງໝໍ 1 ຄົນ ​ແລະ ກໍ​ເຫັນ​ວ່າມີ​ອາການ​ດີ​ຂຶ້ນ​ເລື້ອຍໆ. ສ່ວນ​ໃນ​ທົ່ວ​ໂລກ ປັດຈຸບັນ​ມີ​ຜູ້​ຕິດ​ເຊື້ອ​ເຖິງ 38 ລ້ານ​ກວ່າ​ຄົນ, ​ໄດ້​ຮັບ​ການ​ປິ່ນປົວ​ໃຫ້ຫາ​ຍດີ 28 ລ້ານ​ກວ່າ​ຄົນ ​ແລະ ​ເສຍ​ຊີວິດ​ໄປ​ແລ້ວ 1 ລ້ານ​ກວ່າ​ຄົນ. ປະ​ເທດ​ທີ່​ນຳ​ໜ້າ​ຕິດ​ເຊື້ອຫລາຍ​ກວ່າ​ໝູ່​ກໍ​ແມ່ນ​ສະຫະລັດ​ອາ​ເມ​ລິ​ກາ ​ເຊິ່ງມາ​ຮອດ​ປັດຈຸບັນ​ໄດ້​ມີຜູ້​ຕິດ​ເຊື້ອ​ເຖິງ 8 ລ້ານ​ກວ່າ​ຄົນ ​ແລະ ​ເສຍ​ຊີວິດ​ໄປ​ແລ້ວ 2 ​ແສນ​ກວ່າ​ຄົນ.

​ແນວ​ໃດ​ກໍ​ຕາມ, ​ເຖິງ​ວ່າ​ພະຍາດ​ດັ່ງກ່າວ​ຍັງ​ເດີນ​ໜ້າ​ແຜ່​ຂະຫຍາຍ​ໄປ​ທົ່ວ​ໂລກ ​ແລະ ຍັງ​ຈະ​ຢູ່​ນຳ​ພວກ​ເຕົາ​ອີກ​ຕໍ່​​ໄປ, ​ແຕ່ລະ​ປະ​ເທດ​ກໍ​ຫາ​ວິທີ​ທຸກ​ສິ່ງ​ທຸກ​ຢ່າງ​ເພື່ອ​ຕ້ານ ​ແລະ ສະກັດ​ກັ້ນຢ່າງ​ສຸດ​ຂັ້ນສຸດ​ຂີດ. ​ໄປ​ພ້ອມ​ດຽວ​ກັນນັ້ນ ຫລ້າ​ສຸດ​ກໍ​ໄດ້​ມີ​ຫລາຍ​ປະ​ເທດ​ສາມາດ​ຜະລິດ​ວັກ​ຊີ​ນຕ້ານ​ພະຍາດ​ດັ່ງກ່າວ ​ເຊິ່ງພວມ​ຢູ່​ໃນ​ຂັ້ນຕອນ​ທົດ​ລອງ​ໃນ​ຫລາຍ​ປະ​ເທດ​ເຊັ່ນ: ຣັດ​ເຊຍ, ຈີນ ​ແລະ ຍີ່ປຸ່ນ. ສ່ວນ​ສະຫະລັດ​ອາ​ເມ​ລິ​ການັ້ນ ​ໃນ​ເບື້ອງຕົ້ນກໍ​ວ່າ​ສາມາດ​ຜະລິດ​ອອກ​ມາ​ໄດ້​ຮຽບຮ້ອຍ​ແລ້ວ, ​ແຕ່​ພັດ​ມີ​ແຫ​ລ່ງຂ່າວ​ຫລ້າ​ສຸດ​ບອກ​ວ່າ: ຜ່ານ​ການ​ທົດ​ລອງ​ຈາກ​ອາສາ​ສະໝັກ​ຍັງ​ມີ​ກໍລະນີມີ​ຄົນ​ບໍ່​ສະບາຍ​ເລີຍ​​ໂຈະການ​ທົດ​ລອງ​ເປັນ​ການ​ຊົ່ວຄາວ ​ເພື່ອ​ຫາ​ວິທີ​ຄົ້ນຄວ້າ ​ແລະ ທົດ​ລອງ​ຄືນ​ໃໝ່.

ກໍ​ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ, ນັບ​ແຕ່​ເຊື້ອ​ໄວຣັສສາຍ​ພັນ​ໃໝ່​ໂຄ​ໂຣນາ ຫລື​ວ່າ ​ໂຄ​ວິດ-19 ​ໄດ້​ປາກົດ​ຕົວ​ຂຶ້ນ​ໃນ​ໂລກ ​ແລະ ​ໄດ້​ເລີ່​ມທຳລາຍ​ຊີວິດ​ອິນ​ຊີ​ຂອງ​ຊາວ​ໂລກ​ມາ​ແຕ່​ທ້າຍ​ປີ 2019 ຈົນ​ມາ​ຮອດ​ປັດຈຸບັນ​ ບໍ່​ພຽງ​ແຕ່​ເຮັດ​ໃຫ້​ສູນ​ເສຍ​ພົນລະ​ເມືອງ​ໃນ​ຫລາຍ​ປະ​ເທດ​ຂອງ​ຕົນ​ເທົ່າ​ນັ້ນ, ​ແຕ່​ຍັງ​ມີ​ຜົນ​ກະທົບ​ທາງ​ດ້ານ​ເສດຖະກິດ-ສັງຄົມ​ຂອງ​ແຕ່ລະ​ປະ​ເທດ​ຢ່າງ​ໃຫຍ່​ຫລວງ. ດັ່ງ ສປປ ລາວ ຂອງ​ພວກ​ເຮົາ​ນັບ​ແຕ່​ມີ​ສະພາບ​ໂຄ​ວິດ-19 ​ເປັນຕົ້ນມາ ມັນ​ໄດ້​ອາ​ລະວາ​ດຄວາມ​ສະຫງົບ​ສຸກ, ຄວາມ​ມັ່ງ​ຄັ່ງ​ໝັ້ນຄົງ​ຂອງ​ບ້ານ​ເມືອງ​ເຮົາ​ຢ່າງ​ໃຫຍ່​ຫລວງ ​ເປັນຕົ້ນການ​ເສຍ​ລາຍ​ຮັບ​ຂອງ​ປະ​ເທດ​ຊາດ​ຢ່າງ​ມະຫາສານ. ສະ​ເພາະ​ການ​ເສຍ​ລາຍ​ຮັບ​ຈາກ​ການທ່ອງທ່ຽວ​ທີ່​ເປັນອຸດສາຫະກຳ​ຂອງ​ປະ​ເທດ​ເປັນ​ຕື້ໆ​ໂດ​ລາ. ສະພາບ​ໃນ​ຕໍ່ໜ້າ ຫລື ຍາວ​ນານ, ຖ້າ​ຫາກ​ໂຄ​ວິດ-19 ຍັງ​ຈະ​ສືບ​ຕໍ່​ຢູ່​ນຳ​ພວກ​ເຮົາ​ອີກ​ດົນ ຍິ່ງ​ຈະ​ເສຍ​ລາຍ​ຮັບ​ແຫ່ງ​ຊາດ​ໄປ​ຈັກຕື້ຈັກ​ໂກດ ​ແລະ ກໍ​ຍັງ​ບໍ່​ທັນ​ຮູ້​ແນ່ນອນ​ວ່າ​ມັນ​ຈະ​ສືບ​ຕໍ່​ແກ່ຍາວ​ໄປ​ອີກ​ຈັກ​ເດືອນຈັກ​ປີ ພວກ​ເຮົາ​ຈຶ່ງ​ຈະ​ສາມາດ​ຢັບຢັ້ງມັນ​ໄດ້​ໂດຍສິ້ນ​ເຊີງ.

- Wave100S AD to Website 2020 0 - ​ໂຄ​ວິດ-19 ສົ່ງ​ເສີມ​ໃຫ້​ຄົນລາວ​ທ່ຽວ​ລາວ

​ເພາະສະນັ້ນ, ຈຶ່ງ​ເຫັນ​ໄດ້​ວ່າ ຖ້າ​ປະປ່ອຍ​ໂອກາດ ຫລື​ວ່າ ລໍຖ້າ​ໃຫ້​ເຊື້ອພະຍາດ​ຊະນິດ​ນີ້​ໝົດ​ໄປ​ໂດຍ​ບໍ່​ພາກັນ​ຊອກ​ຫາ​ທາງ​ອອກ​ທີ່​ສອດຄ່ອງ​ເໝາະ​ສົມ​ກໍ​ອາດ​ເຮັດ​ໃຫ້​ລະບົບ​ເສດຖະກິດ​ຂອງ​ຊາດ​ນັບ​ມື້​ເສຍ​ຫາຍ​ເປັນ​ອຳມະພາດ​ໄປ​ຢ່າງ​ໜັກໜ່ວງ. ຈາກ​ຕົວ​ເລກ​ການ​ຄາດ​ຄະ​ເນ​ເສ​ດຖະກິດ​ໃນ​ອາ​ຊຽນຂອງ​ທະນາຄານ​ໂລກ​ສະ​ເພາະ​ເດືອນ​ຕຸລາ 2020 ນີ້ ລາວ​ເຮົາ​ຕິດ​ລົບ -0,6% ​ແຕ່​ຈະ​ເປັນ​ໄປ​ຕາມ​ຄາດກະ ຫລື ບໍ່​ນັ້ນ ພວກ​ເຮົາ​ຍັງ​ຕ້ອງ​ຕິດຕາມ​ນຳ​ກັນ​ຕໍ່​ໄປ. ສ່ວນ​ບັນດາ​ປະ​ເທດ​ອື່ນ​ໃນ​ອາ​ຊຽນ​ເຊັ່ນ: ຫວຽດນາມ​ຍັງ​ຕິດ​ບວກ +2,8, ມຽນມາ +0,5, ອິນ​ໂດ​ເນ​ເຊຍ -1,6, ກຳປູ​ເຈຍ -2,0, ມາ​ເລ​ເຊຍ -4,9, ຟີ​ລິບ​ປິນ -6,9, ​ໄທ -8,3, ຍົກ​ເວັ້ນສິງກະ​ໂປ ​ແລະ ບຣູ​ໄນ. ນີ້​ຄື​ຄວາມ​ທ້າ​ທາຍ​ຂອງ​ຄວາມ​ຫາ​ຍະ​ນະ​ອັນ​ໃຫຍ່​ຫລວງ​ຈາກ​ຜົນ​ກະທົບ​ຂອງ​ເຊື້ອພະຍາດ​ໂຄ​ວິດ-19 ຢູ່​ໃນ​ພາກພື້ນ ກໍ​ຄື​ຢູ່​ໃນ​ໂລກ​ທີ່​ພວມ​ສ້າງ​ຄວາມ​ວິຕົກ​ກັງວົນ​ໃຫ້​ຄົນ​ທັງຫລາຍ​ໃນ​ແຕ່ລະ​ປະ​ເທດ​ມີ​ຄວາມ​ຫວາດ​ຫວັ່ນ​ຢ້ານ​ກົວ​ຈົນ​ເຖິງ​ຂັ້ນປິດ​ປະ​ເທດ, ຈຳກັດ​ການ​ເຂົ້າ-ອອກ​ສັນຈອນ​ໄປ-ມາ​ພາຍ​ໃນ-ພາຍ​ນອກ.

​ເມື່ອ​ຕັ້ງ​ໂຈດ​ກັນ​ວ່າ, ​ໃນ​ອະນາຄົດ​ເພື່ອ​ຄວາມ​ຢູ່​ລອດ​ຂອງ​ຊີວິດ​ອິນ​ຊີ ​ແລະ ​ເພື່ອ​ແກ້​ໄຂ​ບັນຫາ​ເສດຖະກິດ​ຂອງ​ຊາດ​ພາຍ​ໃນ​ປະ​ເທດ​ຕ້ອງ​ພາກັນ​ເຮັດ​ແນວ​ໃດ ?. ຄຳ​ຕອບ​ໂຈດ​ມັນ​ກໍ​ມີ​ຫລາຍ​ປັດ​ໄຈ ​ແຕ່​ກ່ອນ​ອື່ນ​ພວກ​ເຮົາ​ຕ້ອງ​ເຂົ້າ​ໃຈ​ວ່າ ​ເຊື້ອພະຍາດ​ໂຄ​ວິດ-19 ນັ້ນມີ​ການ​ຕິດ​ເຊື້ອຈາກ​ຄົນ​ສູ່​ຄົນ. ປະຫວັດ​ການ​ພົວພັນ​ຕິດ​ເຊື້ອຢູ່ ສປປ ລາວ ​ເຮົາ​ນັ້ນ​ແມ່ນ​ແຕ່​ນອກ​ເຂົ້າມາ​ໃນ. ໝາຍ​ວ່າ​ຄົນ​ລາວ​ໄປ​ຕິດ​ເຊື້ອຈາກ​ປະ​ເທດ​ທີ່​ມີ​ການ​ແຜ່​ລະບາດ​ໜັກ​ແລ້ວ​ເຂົ້າມາ​ພາຍ​ໃນ​ປະ​ເທດ ​ເພາະສະນັ້ນຖ້າ​ພວກ​ເຮົາ​ຫາກ​ພ້ອມ​ກັນ​ປະຕິບັດ​ມາດ​ຕະການ​ຜ່ອນຜັນ​ແຕ່ລະ​ໄລຍະ​ທີ່​ລັດຖະບານ​ວາງ​ອອກ​ໃຫ້​ເຂັ້ມງວດ​ເດັດຂາດ​ກໍ​ຈະ​ເຮັດ​ໃຫ້​ຄົນ​ລາວ​ເຮົາ​ປາສະຈາກ​ການ​ຕິດ​ເຊື້ອ ​ແລະ ມີ​ຄວາມ​ປອດ​ໄພ​ສູງ.

​ເຖິງ​ຢ່າງ​ໃດ​ກໍ​ດີ, ອີງ​ໃສ່​ສະພາບ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ທີ່​ໄດ້​ກ່າວ​ມາ​ຂ້າງ​ເທິງ​ນັ້ນ ມາ​ເບິ່ງ​ນະ​ໂຍບ​າຍ​ໃນ​ການ​ສ້າງສາ​ພັດທະນາ​ເສດຖະກິດ​ຂອງ​ບ້ານ​ເຮົາ​ກໍ​ຍັງ​ດຳ​ເນີນ​ໄປ​ຢ່າງ​ມີ​ຈັງຫວະ ​ໃນ​ນີ້​ໄດ້​ຖື​ເອົາ​ການ​ຜະລິດ​ພາຍ​ໃນ​ໃຫ້​ເຂັ້ມ​ແຂງ ​ເພື່ອ​ຄວາມ​ຢູ່​ລອດ ​ເປັນຕົ້ນພາກ​ອຸດສາຫະກຳ​ຕ້ອງ​ດຳ​ເນີນ ​ແລະ ຂະຫຍາຍ​​ໄປ​ຕິກໆ, ພາກ​ກະສິກຳ​ຕ້ອງ​ເລັ່ງ​ໃສ່​ການ​ປູກ​ການ​ລ້ຽງ​ເພື່ອ​ກຸ້ມ​ຕົນ​ເອງ ​ແລະ ສົ່ງ​ອອກ​ໃຫ້​ຫລາຍ. ​ເລັ່ງຊຸກຍູ້​ສົ່ງ​ເສີມ​ການ​ຜະລິດ​ຂະໜາດ​ກາງ ​ແລະ ຂະໜາດ​ນ້ອຍ​ໃຫ້​ເດີນ​ໜ້າ​ໄປ​ໄວ. ສ່ວນ​ພາກ​ອຸດສາຫະກຳ​ການທ່ອງທ່ຽວ​ຕ້ອງ​ເລັ່ງສົ່ງ​ເສີມ​ໃຫ້​ຄົນ​ລາວ​ເຮົາ​ພາກັນ​ທ່ອງ​ທ່ຽວ​ຢູ່​ພາຍ​ໃນ​ປະ​ເທດ​ໃຫ້​ຫລາຍ ​ເພາະ​ສະຖານ​ທີ່​ທ່ອງ​ທ່ຽວ​ທາງ​ທຳ​ມະ​ຊາດ, ວັດທະນະທຳ ​ແລະ ທາງ​ປະຫວັດສາດ​ຢູ່​ປະ​ເທດ​ເຮົາ​ກໍ​ຍັງ​ມີ​ຫລາກ​ຫລາຍ​ບໍ່​ໜ້ອຍ​ໜ້າ​ຈາກ​ຊາດ​ອື່ນ. ສົມ​ກັບ​ພູມີ​ປະ​ເທດ​ຍັງ​ສວຍ​ງາມ, ອຸດົມສົມບູນ, ຄົນ​ລາວ​ເຮົາ​ມີ​ຈິດ​ໃຈ​ເອື້ອ​ເຟື້ອ​ເຜື່ອ​ແຜ່, ຜູ້​ຢູ່​ພາກ​ເໜືອ​ລົງ​ໄປ​ທ່ຽວ​ພາກ​ໃຕ້, ຜູ້​ຢູ່​ພາກ​ໃຕ້​ໄປ​ສຳຜັດ​ບັນຍາກາດ​ພາກ​ເໜືອ, ຜູ້​ຢູ່​ພູດ​ອຍລົງ​ມາ​ເບິ່ງ​ທົ່ງພຽງ, ຜູ້​ຢູ່​ທົ່ງພຽງ​ຂຶ້ນ​ໄປ​ຊົມ​ທຳ​ມະ​ຊາດ​ກິນ​ອາກາດ​ຢູ່​ພູດ​ອຍກໍ​ເປັນ​ອັນວ່າ​ສຸດ​ຍອດ​ຂອງ​ຄຳ​ວ່າ: “ຄົນ​ລາວ​ຢູ່​ເມືອງ​ລາວ, ລາວ​ທ່ຽວ​ລາວ” ​ເງິນ​ຄຳ​ບໍ່​ຮົ່ວ​ໄຫລ​ມີ​ແຕ່​ໄດ້​ກັບ​ໄດ້ ສຸດ​ທ້າຍ​ລັດ ​ແລະ ປະ​ເທດ​ຊາດ​ກໍ​ຮັ່ງມີ​ເຂັ້ມ​ແຂງ ມີ​ເງິນ​ຄຳ​ເຕັມ​ເລົ້າ ມີ​ເຂົ້າ​ເຕັມ​ສາງ ຍ້ອນ​ລາວ​ທ່ຽວ​ລາວ ຊັ້ນຕົວ !.

- WhatsApp Image 2020 05 27 at 5 - ​ໂຄ​ວິດ-19 ສົ່ງ​ເສີມ​ໃຫ້​ຄົນລາວ​ທ່ຽວ​ລາວ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!