ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ

ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ - 555 40 - ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ
ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ - 174233 - ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ

ໂດຍ: ທິດກໍ່າ

       ​ເລື່ອງ​ລາວ​ຂ່າວ​ຄາວ​ກ່ຽວ​ກັບກາ​ນ​ເຈັບ, ການ​ເປັນ, ການລົ້ມ, ການ​ຕາຍ​ຍ້ອນ​ອຸປະຕິ​ເຫດ​ໃນ​ປະ​ເທດ​ເຮົາ​ແມ່ນ​ມີ​ມາ​ຢ່າງ​ຍາວ​ນານ ​ແລະ ຫລາກ​ຫລາຍ​ສົມຄວນ. ອາດ​ເວົ້າ​ໄດ້​ວ່າ​ເປັນ​ເວລາ​ຫລາຍ​ສິບ​ປີ ​ແລະ ມັນ​ຈະ​ກາຍ​ເປັນ​ຊຳ​ເຮື້ອ​ໄປ​ຕະຫລອດ ຖ້າ​ພວກ​ເຮົາ​ບໍ່​ມີ​ມາດ​ຕະການ​ຢ່າງ​ເໝາະ​ສົມ ​ແລະ ​ເດັດຂາດ ​ເພາະ​ມາ​ຮອດ​ດຽວ​ນີ້​ກໍ​ຍັງ​ບໍ່​ທັນ​ແກ້​ໄຂ​ໃຫ້​ມີ​ການ​ຫລຸດ​ໜ້ອຍ​ຖອຍ​ລົງ​ກວ່າ​ຈະ​ກ້າວ​ໄປ​ໃຫ້ຫາ​ຍຂາດ​ໃນ​ສັງຄົມ​ໄດ້​ຢ່າງ​ເຫັນ​ທັນຕາ. ຫລ້າ​ສຸດ ຕາມ​ແຫ​ລ່ງຂ່າວ​ຈາກ​ຂະ​ແໜງ​ການ​ກ່ຽວຂ້ອງ​ໄດ້​ແຈ້ງ​ໃຫ້​ຮູ້​ວ່າ: ສະ​ເພາະ​ເດືອນ​ກັນຍາ 2020 ຜ່ານ​ມາ, ​ໄດ້​ມີ​ຄົນ​ຕາຍ​ຍ້ອນ​ອຸປະຕິ​ເຫດ​ໃນ​ທົ່ວ​ປະ​ເທດ​ເຖິງ 76 ຄົນ ​ໃນ​ນີ້​ເປັນ​ເພດ​ຍິງ 23 ຄົນ. ຈາກ​ອຸປະ​ຕິ​ເຫດ​ທີ່​ເກີດ​ຂຶ້ນທັງ​ໝົດ 497 ກໍລະນີ​ໃນ​ທົ່ວ​ປະ​ເທດ. ​ແຕ່​ຖ້າ​ທຽບ​ໃສ່​ເດືອນ​ສິງຫາ​ຍັງ​ຫລຸດ​ລົງ 89 ກໍລະນີ. ນັ້ນກໍ​ສະ​ແດງ​ວ່າ: ​ໃນ​ເດືອນ​ສິງຫາ​ມີ​ອຸປະຕິ​ເຫດ​ໃນ​ທ້ອງ​ຖະໜົນ​ເຖິງ 586 ກໍລະນີ, ​ແຕ່​ຜູ້​ເສຍ​ຊີວິດ​ນັ້ນ​ໄດ້​ເພີ່ມ​ຂຶ້ນຈາກ​ເດືອນ​ສິງຫ​າ​ເຖິງ 8 ຄົນ.

ຈາກ​ຕົວ​ເລກ​ທີ່​ສະ​ແດງ​ໃຫ້​ເຫັນ​ຂ້າງ​ເທິງ​ນີ້, ພວກ​ເຮົາ​ມາ​ພ້ອມ​ກັນ​ຄິດ ​ແລະ ຫວນ​ຄືນ​ຫລັງ ທັງ​ບວກ​ລົບ​ຄູນ​ຫານ​ເບິ່ງ​ວ່າ ຄົນລາວເຮົາໄດ້ເສຍຊີວິດຈາກອຸປະຕິເຫດໃນທ້ອງຖະໜົນໃນແຕ່ລະເດືອນ, ແຕ່ລະປີໃນທົ່ວປະເທດຊ່ວງໄລຍະ 5 ປີ ຫລື 10 ປີຄືນຫລັງມັນຈະຫລາຍ ຫລື ໜ້ອຍຊໍ່າໃດ ແລະ ຖ້າຫາກສະເລ່ຍຕາຍເດືອນໜຶ່ງພຽງ 30 ຄົນໃນປີໜຶ່ງມັນກໍຈະຕົກຢູ່ 360 ຄົນ, 5 ປີມັນກໍຈະຕົກຢູ່ 1.800 ຄົນ ແລະ ຖ້າແມ່ນ 10 ປີ ມັນກໍຈະຕົກເປັນ 18.000 ຄົນ, ແຕ່ວ່າ ຕາມທິດກໍ່າຄິດເບິ່ງສະພາບ ຄວາມເປັນຈິງຂອງການເກີດອຸປະຕິເຫດຕາມທ້ອງຖະໜົນຢູ່ບ້ານເຮົາເລີ່ມແຕ່ມີ​ການ​ພັດທະນາ​ສ້າງສາ​ບ້ານ​ເມືອງ​ໃນ​ຫລາຍ​ສິບ​ປີ​ມາ​ນີ້​ອາດ​ຈະ​ແມ່ນ​ມີ​ຕົວ​ເລກ​ຫລາຍ​ກວ່າ​ນີ້ ​ເພາະ​ບາງ​ມື້, ບາງ​ອາທິດ​ມັນ​ມີ​ກໍລະນີ​ຕາຍ​ພາບ​ດຽວ​ເປັນ​ສີ່​ເປັນ​ຫ້າ​ຄົນ​ກໍ​ມີ.

ນີ້​ຄື​ຕົວ​ເລກ​ທ້າ​ທາຍ​ຫາ​ຍະ​ນະ​ປະ​ເພດ​ໜຶ່ງ​ທີ່​ວຽນ​ວາຍ​ຕາຍ​ເກີດ​ແກ່​ຄົນ​ລາວ​ເຮົາ​ໃນ​ຍຸກ​ບ້ານ​ເມືອງ​ພວມ​ມີ​ຄວາມ​ຈະ​ເລີ​ນຮຸ່ງ​ເຮືອງ ​ແລະ ສ້າງສາ​ພັດທະນາ. ຖ້າ​ເຮົາ​ຈະຕັ້ງ​ໂຈດ​ກັນ​ວ່າ ອຸປະຕິ​ເຫດ​ໃນ​ທ້ອງ​ຖະໜົນ​ຢູ່​ບ້ານ​ເຮົາ​ມັນ​ເກີດ​ມາ​ຈາກ​ໃສ. ​ໃນ​ຄຳ​ຕອບ​ຂອງ​ຫລາຍ​ຄົນ​ກໍ​ອາດ​ມີ​ຫລາຍ​ສາ​ເຫດ ​ແລະ ຫລາຍ​ປັດ​ໄຈ ​ເປັນຕົ້ນບາງ​ຄົນ​ກໍ​ວ່າ​ຖະໜົນ​ຫົນທາງ​ຢູ່​ບ້ານ​ເຮົາ​ສ່ວນ​ຫລາຍ​ມັນ​ບໍ່​ໄດ້​ມາດຕະຖານ, ​ເສັ້ນທາງ​ແຄບ, ​ເສັ້ນທາງ​ເປັນ​ບວກ​ຂຸມ, ​ເສັ້ນທາງ​ຂຶ້ນພູ​ລົງ​ຫ້ວຍ, ລະ​ອິດ​ລະ​ອ້ຽວ, ຄົດ​ໂຂ​ໂງ​ເງ, ຍາມ​ຝົນ​ມາ​ເປັນ​ບວກ​ຂຸມ, ຍາມ​ແລ້ງ​ເຕັມ​ແຕ່​ຂີ້ຝຸ່ນ​ໄງ້​ກຸ້ມ ​ແລະ ອື່ນໆ. ສ່ວນ​ສາ​ເຫດ ​ແລະ ປັດ​ໄຈ​ອັນ​ທີ​ສອງ​ກໍ​ວ່າ​ມັນ​ເປັນ​ນຳ​ການລະ​ເມີດ​ກົດ​ຈະລາຈອນ​ອັນ​ໄດ້​ແກ່​ຂັບ​ຂີ່​ໄວ​ເກີນ​ກຳນົດ, ​ເມົາ​ແລ້ວ​ຂັບ​ຂີ່​ລົດ, ລ່ວງ​ໄຟ​ແດງ, ​ແຊງ​ກັນ​ໄປ​ກ່ອນ​ໄປ​ລຸນ ອັນ​ເຮັດ​ໃຫ້ການ​ນຳ​ໃຊ້​ລົດ, ນຳ​ໃຊ້​ຖະໜົນ​ບໍ່​ເປັນ​ໄປ​ຕາມ​ລະບຽບ​ກົດໝາຍ ຫລື​ວ່າ ກົດ​ຈະລາຈອນ. ຕາມ​ທິດ​ກໍ່າ​ຄິດ​ຕໍ່​ຄຳ​ເຫັນ​ສອງ​ຢ່າງ​ນີ້​ມັນ​ກໍ​ລ້ວນ​ແລ້ວ​ແຕ່​ເປັນ​ການ​ຖືກຕ້ອງ​ສອດຄ່ອງ​ກັບ​ເຫດການ​ທີ່​ເກີດ​ຂຶ້ນຕາມ​ສະພາບ​ຕົວ​ຈິງ​ໃນ​ທ້ອງ​ຖະໜົນ​ອີ່ຫລີ.

ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ - Wave100S AD to Website 2020 0 - ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ

​ແຕ່​ແນວ​ໃດ​ກໍ​ຕາມ, ສຳລັບ​ທິດ​ກໍ່າ​ແລ້ວ ຄິດ​ວ່າ​ອັນ​ບັນຫາ​ສ່ວນ​ໃຫຍ່ໆ​ມັນ​ຂຶ້ນກັບ​ຄົນ​ເຮົາ ຫລື​ວ່າ ພວກ​ເຮົາ​ເອງ​ເປັນຕົ້ນ​ເຫດ​ເຊັ່ນ: ສ້າງ​ຖະໜົນ​ຫົນທາງ​ແຄບ​ບໍ່​ໄດ້​ມາດຕະຖານ​ກໍ​ແມ່ນ​ຄົນ​ເປັນ​ຜູ້​ເຮັດ, ຜູ້​ສ້າງ, ລະ​ເມີດ​ກົດ​ຈະລາຈອນ​ຂັບ​ໄວ​ຂັບ​ຊ້າ​ກໍ​ແມ່ນ​ຄົນ, ດື່ມ​ເຫລົ້າ​ເມົາ​​ແລ້ວ​ຂັບ​ລົດ​ກໍ​ແມ່ນ​ຄົນ, ລ່ວງ​ໄຟ​ແດງ​ກໍ​ແມ່ນ​ຄົນ​ຜູ້​ຂັບ​ຂີ່​ລົດ, ​ເວລາ​ເກີດ​ອຸປະຕິ​ເຫດ​ເຈັບ​ເປັນ​ເອັນ​ອຸ່ນ​ກໍ​ແມ່ນ​ຄົນ​ຜູ້​ຂັບ​ຂີ່ ຫລື​ວ່າ ຜູ້ນຳ​ໃຊ້​ລົດ, ​ໃຊ້​ຖະໜົນ​ນັ້ນລະ​ເປັນ​ຜູ້​ຮັບ​ເຄາະ​ເປັນ​ສ່ວນ​ໃຫຍ່ ​​ເພາະສະນັ້ນຈະ​ໄປ​ໃສ​ມາ​ໃສ, ຂຶ້ນ​ເໜືອ​ລ່ອງ​ໃຕ້, ​ໄປ​ໃກ້​ໄປ​ໄກ​ກໍ​ແມ່ນ​ຜູ້​ຂັບ​ຂີ່​ຕ້ອງ​ມີ​ສະຕິ, ປະຕິບັດ​ກົດ​ຈະລາຈອນ​ໃຫ້​ເຂັ້ມງວດ​ກວດ​ຂັນ​ຈຶ່ງ​ມີ​ຄວາມ​ປອດ​ໄພ​ໃຫ້​ຊີວິດ ​ແລະ ຊັບ​ສິນ​ຂອງ​ຕົນ​ເອງ​ນັ້ນລະ​ເປັນ​ທີ່​ຕັ້ງ.

​ໃນ​ຫລາຍ​ສິບ​ປີຜ່ານມາ, ສະພາບ​ການ​ເຈັບ, ການ​ເປັນ, ການລົ້ມການ​ຕາຍ​ຂອງ​ຄົນ​ລາວ​ຍ້ອນ​ອຸປະຕິ​ເຫດ​ໃນ​ທ້ອງຖະໜົນແມ່ນມີຢ່າງຫລວງຫລາຍແທ້, ແຕ່ວ່າເມື່ອເກີດຂຶ້ນມາແລ້ວກໍແມ່ນຜູ້ປົກຄອງ, ພໍ່ແມ່, ຍາດພີ່ນ້ອງກໍຕ້ອງໄດ້ເປັນທຸກນຳຢ່າງຫລີກລ່ຽງບໍ່ໄດ້. ອີກປະການໜຶ່ງ ໃນສະພາບປັດຈຸບັນນີ້ ເປັນສັງຄົມລາວເຮົາມັນພວມເຫີ່ກັນຫລິ້ນກິນແບບ​ຟຸມ​ເຟືອຍ, ສົມທົບ​ກັບປະ​ເພນີ​ຮີດຄອງ​ໄປ​ຫາ​ກັນ, ຢ້ຽມຢາມ​ຖາມ​ຂ່າວ​ກັນກໍ​ມີ​ເຫລົ້າຢາ​ປາ​ແປ້ງ​ຕ້ອນຮັບ​ຂັບ​ສູ່ ​ເມື່ອ​ກິນ​ແລ້ວ​ດື່ມ​ແລ້ວ​ພັດ​ມີ​ອັນ​ເປັນ​ໄປ ​ເພາະ​ພິດ​ເຫລົ້າພິດ​ເບຍ​ເປັນນ້ຳສັດ​ຊື່ ຜູ້​ໃດ​ກິນ​ຜູ້ນັ້ນກໍ​ເມົາ, ​ໃນ​ເມື່ອ​ເມົາ​ແລ້ວ​ພັດ​ຂັບ​ລົດ ອັນ​ເປັນ​ທີ່​ມາ​ຂອງ​ຄຳ​ວ່າ: “ມໍຣະນະ”. ນອກຈາກ​ສາ​ເຫດ​ຂອງ​ຄວາມ​ເມົາ​ແລ້ວ ຍັງ​ມີ​ສາ​ເຫດ​ອື່ນໆ​ອີກ​ອັນ​ເປັນ​ທີ່​ມາ​ຂອງ​ຄວາມ​ຕາຍ​ສຳລັບ​ຜູ້ນຳ​ໃຊ້​ລົດ, ນຳ​ໃຊ້​ຖະໜົນ. ນີ້​ລະ​ເຂົາ​ວ່າ: ຫລີກ​ຈາກ​ໂຣກລະບາດ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ. ດັ່ງ​ທີ່​ເຫັນ​ມາ​ໃນ​ແຫ​ລ່ງຂ່າວ​ຄາວ​ສະພາບ​ການ​ໄປມາ​ໃນ​ສັງຄົມ​ບ້ານ​ເຮົາ​ປັດຈຸບັນ.

 

ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ - WhatsApp Image 2020 05 27 at 5 - ຫລີກ​ໂຄ​ວິດ​ພັດ​ໄປ​ຕິດ​ກັບ​ດັກ​ອຸປະຕິ​ເຫດ
error: Alert: Content is protected !!