ລະວັງ…! ເຊກອງກວດພົບແປ້ງນົວປອມ

ຂ່າວທ້ອງຖິ່ນລາຍງານໃຫ້ຮູ້ວ່າ: ວັນທີ 21 ຕຸລານີ້ ຄະນະກໍາມະການຄຸ້ມຄອງຊັບສິນທາງປັນຍາແຂວງເຊກອງ ໄດ້ລົງກວດກາສິນຄ້າທີ່ມີການປອມແປງເຄື່ອງໝາຍການຄ້າລັກວາງຈຳໜ່າຍຢູ່ບາງຮ້ານພາຍໃນຕະຫລາດ ເທດສະບານແຂວງ.

ທ່ານ ວຽງໄຊ ວໍລະສິງ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງເຊກອງ ກ່າວວ່າ: ເພື່ອເປັນການປົກປ້ອງຊັບສິນທາງປັນຍາຂອງເຈົ້າຂອງເຄື່ອງໝາຍການຄ້າ ປົກປ້ອງຜົນປະໂຫຍດປະຊາຊົນ ໃຫ້ໄດ້ຜະລິດຕະພັນທີ່ມີຄຸນນະພາບ ແລະ ຕ້ານສະກັດກັ້ນການຜະລິດ ແລະ ການຈຳໜ່າຍສິນຄ້າປອມແປງ ສິນຄ້າຮຽນແບບເຄື່ອງໝາຍທາງການຄ້າ ຜ່ານການລົງກວດກາຢູ່ເມືອງ ທ່າແຕງ ແລະ ເມືອງ ລະມາມ ຈຳນວນ 24 ຮ້ານ ພົບເຫັນສິນຄ້າຮຽນແບບເຄື່ອງໝາຍການຄ້າແປ້ງນົວກາຈອງ ຢູ່ເມືອງ ລະມາມ 2 ຮ້ານ ແລະ ເມືອງທ່າແຕງ 1 ຮ້ານ ລວມຈຳນວນ 30 ຖົງ ພາຍຫຼັງທີ່ກວດພົບໄດ້ເຮັດບົດບັນທຶກກັບເຈົ້າຂອງຮ້ານ ແລະ ໄດ້ຢຶດເອົາສິນຄ້າດັ່ງກ່າວມາຮັກສາໃວ້ພະແນກວິທະຍາສາດ ແລະ ເຕັກໂນໂລຊີ ແຂວງເຊກອງ ເພື່ອລໍຖ້າການຄົ້ນຄວ້າພິຈາລະນາຕາມຂັ້ນຕອນລະບຽບກົດໜາຍ.