ຍອມຮັບໂດຍດີວ່າຕົກໂງ່ແລ້ວ

- advert banner 728 90 728x90 - ຍອມຮັບໂດຍດີວ່າຕົກໂງ່ແລ້ວ

ນັບ​ແຕ່ “ບັນຫາ​ຈານ​ແຫຍ່” ​ໄດ້​ກາຍ​ເປັນ​ຄໍ​ລຳ “ລອຍ​ຕົວ” ມາ​ເປັນ​ເວລາ 7 ​ເດືອນ​ແລ້ວ​ນີ້, ຈານ​ແຫຍ່​ມີ​ໂອກາດ​ພົບ​ກັບ​ຜູ້​ອ່ານ​ໜ້ອຍ​ລົງ ​ແຕ່​ຂໍ​ບອກ​ວ່າ​ຍັງ​ຄິດ​ຮອດ​ທຸກ​ຄົນ ​ເນື່ອງ​ຈາກ​ດົນໆ​ເຫັນ​ກັນ​ເທື່ອ​ໜຶ່ງ, ມື້ນີ້​ຈຶ່ງ​ຂໍ​ໂສ​ກັບ​ຜູ້​ອ່ານ​ກ່ຽວ​ກັບ​ບັນຫາ​ທີ່​ຈານ​ແຫຍ່​ບົ່ມ​ໄວ້​ດົນ​ເຕີບ, ມັນ​ເປັນ​ບັນຫາ​ຮ້ອນ​ທີ່​ສັງຄົມ​ເດືອດ​ຍ້ອນ ​ແລະ ​ເປັນ​ເລື່ອງ​ເດັ່ນ​ໃນ​ໜ້າ​ທີ​ໜຶ່ງ​ຂອງ​ໜັງສືພິມ​ຫລາຍ​ສະບັບ. ​ເລື່ອງ​ທີ່​ຄົງ​ໜີບໍ່ມົ້ມກົ້ມບໍ່​ຫວິດ ​ເລື່ອງ​ບໍລິສັດ​ພີ​ເອັສ (PS-ຊື່​ເຕັມ​ແນວ​ໃດ​ນັ້ນຂໍ​ໃຫ້​ທ່ານ​ຜູ້​ອ່ານ​ຊອກ​ເອງ) ລະດົມ​ທຶນ​ຈາກ​ສັງຄົມ​ແບບ​ຍ່າງ​ສວນ​ທາງ​ກັບ​ກົດໝາຍ​ບ້ານ​ເມືອງ. ​

- new3 - ຍອມຮັບໂດຍດີວ່າຕົກໂງ່ແລ້ວ

ເລື່ອງ​ນີ້​ມີ​ບົດ​ຄວາມ​ຫລາຍ​ບົດ​ເວົ້າຮອດ​ ​ແຕ່​ຖ້າ​ຢາກ​ຮູ້​ຄັກໆ​ໝົດ​ຕັບ​ໝົດ​ບີ​ໃຫ້​ອ່ານ​ບົດ​ຂອງ​ນັກ​ຂ່າວ-ນັກ​ຂຽນ​ປາກກາ​ເພັດ​ຄື ລັດສະໝີ ດວງ​ສັດຈະ ທີ່​ມີ​ຢັ່ງຢາຍ​ຕາມ​ບົດ​ໜັງສືພິມ​ຫລາຍ​ສະບັບ ​ເພາະ​ເຈົ້າຂອງ​ບົດ​ເປັນ​ມື​ສື່​ປະຈຳ​ຢູ່​ທະນາຄານ​ແຫ່ງ​ລັດ, ອ່ານ​ແລ້ວ​ຈະ​ເຫັນ​ພາບ​ແຈ້ງ​ຈ່າງ​ປ່າງປານ​ກາງ​ເວັນ. ​ເລື່ອງ​ການ​ເຄື່ອນ​ໄຫວ​ຂອງ​ບໍລິສັດ PS ນີ້ ຈານ​ແຫຍ່​ໃຫ້​ຄວາມ​ສົນ​ໃຈ​ໜ້ອຍ ​ແຕ່​ບໍ່​ໄດ້​ໝາຍວ່າ​ບໍ່​ຫ່ວງ​ໄຍນຳ​ຜູ້​ຫົວ​ໃສ​ໃຈງ່າຍ​ທີ່​ຕ້ອງການ​ຫາ​ລວຍ​ທາງ​ລັດ​ຊອກ “Easy Money). ທີ່​ຕ້ອງ​ຈະ​ຕົກ​ເປັນ​ເຫຍື່ອ​ກົນ​ລວງ​ທີ່​ຊ້ຳຮອຍ​ມາ​ແລ້ວ​ບໍ່​ຮັກ​ຈັກ​ຫລົບ​ຈັກ​ຕ່າວ. ຈານ​ແຫຍ່​ເຄີຍ​ໄດ້​ຍິນ​ຫລາຍ​ຄົນ​ເວົ້າວ່າ: ຄົນ​ລາວ​ເຮົາ​ເປັນ​ຄົນ​ລືມ​ໄວ ​ແລະ ​ເຊື່ອ​ງ່າຍ ຢາກ​ເຫັນ​ໜ້າ​ແຕ່​ບໍ່​ຍອມ​ງວາກ​ເບິ່ງ​ຫລັງ. ​ເຄີຍ​ມີ​ພີ່ນ້ອງ​ໃກ້ຊິດ​ມາ​ປຶກສາ​ຈານ​ແຫຍ່​ກ່ຽວ​ກັບ​ການ​ຮ່ວມ​ທຶນ​ກັບ PS, ຈານ​ແຫຍ່​ກໍ​ຕອບ​ໄປ​ແບບ​ຄ້ອນ​ຕອກ​ສິ່ວວ່າ “​ເອົາ​ໂລດ ! ​ແຕ່​ຢ່າ​ຮ້ອງ​ໂວຍວາຍ​ຕາຍ​ຍາກ ​ເມື່ອ​ເວລາ​ຖືກຕົ້ມຈົນ​ເປື່ອຍ, ຂໍ​ໃຫ້​ຄິດ​ວ່າ​ຕົກ​ໂງ່​ ແລ້ວ​ກໍ​ຍອມ​ຍິ້ມຮັບ​ມັນ, ​ເລື່ອ​ງ​ແບບ​ນີ້​ບໍ່​ເຫັນ​ໄປ​ລອດ​ຈັກ​ລາຍ”. ພີ່ນ້ອງ​ຄົນ​ດັ່ງກ່າວ​ເຮັດ​ຄໍ​​ເຕື່ອຍ​ເຕະ​​ເຊະ​ມາ, ​ແຕ່​ມີ​ຮອຍ​ຍິ້ມງອຍ​ຢູ່​ຮີມ​ສົບ “ອ້າຍ​ເວົ້າຖືກ, ນ້ອງ​ຈະ​ບໍ່​ຕໍ່​ວ່າ​ຕໍ່​ຂານ​ຫຍັງ​ໝົດ !” ​ເອີ​ແນວ​ນີ້​ກໍ​ຊ່າງ​ເປັນ, ຍິ້ມຕ້ອນຮັບ​ຄວາມ​ໂງ່ ! ຈານ​ແຫຍ່​ຄິດ​ໃນ,​ ​ແຕ່​ຫລາຍ​ຄົນ​ພັດ​ບໍ່​ເປັນ​ແນວ​ນີ້​ຫັ້ນຕິ. ພີ່ນ້ອງ​ຂອງ​ຈານ​ແຫຍ່​ບອກ​ວ່າ ມັນ​ຄິດ​ແນວ​ນີ້​ຄື​ລອງ​ສ່ຽງ​ເບິ່ງ… ຊາມ​ຊິ​ຖືກຕົ້ມອາດ​ໄດ້​ທຶນ​ຄືນ ຫລື ມີ​ກຳ​ໄລ​ເລັກ​ໜ້ອຍ “ກຳ​ຂີ້​ດີກ​ວ່າ​ກຳ​ຕົດ”. ​ເລື່ອງ​ກັບ PS ນີ້ ຈານ​ແຫຍ່​ບໍ່​ມີ​ແນວ​​ແນະນຳ ​ເພາະ​​ໄດ້​ມີ​ການ​ສາວ​ໄສ້​ໄຈ້​ພຸງ​ກັນ​ໝົດ​ແລ້ວ ​ແຕ່​ມີ​ສອງ​ຈຸດ​ທີ່​ຈານ​ແຫຍ່​ຢາກ​ເວົ້າ ຄື​ໜຶ່ງ ທັງ​ຜູ້ຕົ້ມ, ຜູ້​ຖືກຕົ້ມ ​ແລະ ທາງ​ການ​ກ່ຽວຂ້ອງ​ຂອງ​ພວກ​ເຮົາ​ຕ້ອງ​ຈົດ​ຈຳ​ບົດຮຽນ​ນີ້​ໄປ​ຕະຫລອດ​ຊີວິດ. ສຳລັບ​ທາງ​ການ​ນັ້ນສຳຄັນ​ຫລາຍ ​ເພາະ​ມີ​ບົດບາດ “ມະຫາ​ພາກ” ຂໍ​ໃຫ້​ເດັດຂາດ ​ແລະ ທັນ​ການ​ໃນ​ການ​ແກ້​ໄຂ​ບັນຫາ​ແບບ​ນີ້ ດັ່ງ​ບົດ​ຄວາມ “Smart actions Key to preventing the loss of hard-earned Savings) ຂອງ​ໜັງສືພິມ​ວຽງ​ຈັນທາ​ມ ສະບັບ​ວັນ​ທີ 10/06/2017) ທີ່​ໄດ້​ເຕືອນ​ໄວ້​ວ່າ “​ເມື່ອ​ຮູ້​ວ່າ​ມີ​ການລະ​ເມີດ​ກົດ​ລະບຽບ, ຂະ​ແໜງ​ການ​ກ່ຽວຂ້ອງ​ດຳ​ເນີນ​ການ​ແກ້​ໄຂ​ຕາມ​ກົດໝາຍ​ຕໍ່​ບໍລິສັດ (PS) ຢ່າງ​ທັນ​ການ​ໂລດ…” ​ແລະ ​ໃນ​ວັກ​ຕໍ່ໆ​ໄປ​ໄດ້​ເວົ້າວ່າ “…ຕາມ​ຕົວຢ່າງ​ທີ່​ເວົ້າມາ​ຂ້າງ​ເທິງ​ນີ້, ທະນາຄານ​ (ກາງ) ກໍ​ຮູ້​ວ່າ​ບໍລິສັດ PS ​ໄດ້​ເລີ່​ມດຳ​ເນີນ​ການ​ລະດົມ​ທຶນ​ມາ​ແຕ່​ປີ 2014 ​ແຕ່​ຮອດ​ປີ 2017 ພີ້​ຈຶ່ງ​ເອົາ​ມາດ​ຕະການ​ເດັດຂາດ​ກັບ​ທາງ​ບໍລິສັດ”. ​ເນື້ອ​ໃນ​ທີ່​ຈານ​ແຫຍ່​ແກະ​ອອກ​ມາ​ຈາກ​ບົດ​ພາສາ​ອັງກິດ​ຂອງ​ກອງ​ບັນນາທິການ​ໜັງສືພິມ​ວຽງ​ຈັນທາ​ມນີ້​ລົງ​ພິມ​ໃນ​ໜ້າ 6 ຢູ່​ເສົາ​ທີ 6. ຂໍ້ຄວາ​ມທ່ອນ​ນີ້​ອາດ​ພາ​ໃຫ້​ຜູ້​ອ່ານ​ຕັ້ງຂໍ້​ສົງ​ໄສ​ວ່າ ​ເຫດ​ໃດ​ການ​ເອົາ​ມາດ​ຕະການ​ເດັດຂາດ​ຈຶ່ງ​ຊັກ​ຊ້າ ? ​ເຫດ​ໃດ​ເມື່ອ​ຮູ້​ວ່າ​ໂຈນ​ປຸ້ນ​ເຮືອນ​ຈຶ່ງ​ປ່ອຍ​ໃຫ້​ມັນ​ປຸ້ນ​ຕໍ່, ​ແນວ​ວ່າ​ໂຈນ​ແລ້ວ ​ເຫດ​ໃດ​ຍັງ​​ໃຈ​ເຢັນ​ຢູ່​ໄດ້ ? ຫລື​ວ່າ ມີ​ອິດ​ທິພົນ ຫລື ບັນຫາ​ຜົນ​ປະ​ໂຫຍ​ດ​ເຂົ້າມາ​ພົວພັນທ່ວງດຶງ​ໃຫ້​ແກ່ຍາວ. ຖ້າ​ໃຜ​ຕອບ​ບັນຫາ​ນີ້​ໄດ້​ຂໍ​ໃຫ້​ຕອບ​ຄຳ​ຄິດ​ເຫັນ​ຂອງ​ບົດ​ໜັງສືພິມ​ວຽງ​ຈັນທາ​ມບໍ່​ແມ່ນ​ຂອງ​ຈານ​ແຫຍ່. ບັນຫາ​ສຸດ​ທ້າຍ​ທີ່​ຕ້ອງການ​ໃຫ້​ທາງ​ການ​ພວກ​ເຮົາ​ເດັດຂາດ ຄື​ຢ່າ​ປ່ອຍ​ໃຫ້​ພະນັກງານ​ລະດັບ​ການ​ນຳ​ຄົນ​ໃດ​ຄົນ​ໜຶ່ງ​ມີ​ການ​ເຄື່ອນ​ໄຫວ (ດ້ວຍ​ຄວາມ​ຕັ້ງ​ໃຈ ຫລື ບໍ່​ກໍ​ຕາມ) ​ເພື່ອ​ເປັນ​ຄັນ​ຕາ​ລະ​ບັດ​ໃຫ້​ແກ່​ບໍລິສັດ ຫລື ຜູ້​ປະກອບ​ການ​ທີ່​ເຮັດ​ຜິດ​ກົດໝາຍ ​ເພາະ​ມັນ​ສໍ່າ​ກັບ​ໄປ​ຢັ້ງຢືນ​ຄວາມ​ຖືກຕ້ອງ​ໃຫ້​ບໍລິສັດ​ໂຫລໆ​ເຫລົ່ານັ້ນ ​ແລະ ສຸດ​ທ້າຍ​ມັນ​ຈະ​ນຳ​ຜົນ​ເສຍ​ຫາຍ​ມາສູ່​ພະນັກງານ​ຄົນ​ນັ້ນ​ເອງ ​ແລະ ຈະ​ທຳລາຍ​ອິດ​ທິພົນ​ຂອງ​ທາງ​ການ​ເຮົາ​ໄປ​ພ້ອມໆ​ກັນ.

- lattana 1 - ຍອມຮັບໂດຍດີວ່າຕົກໂງ່ແລ້ວ
error: Content is protected !!