ນະຄອນຫລວງກຽມຈັດສັນຄວາມເປັນລະບຽບຮຽບຮ້ອຍໃນຕົວເມືອງຄືນໃໝ່

- advert banner 728 90 728x90 - ນະຄອນຫລວງກຽມຈັດສັນຄວາມເປັນລະບຽບຮຽບຮ້ອຍໃນຕົວເມືອງຄືນໃໝ່

ໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນ ນະຄອນຫລວງວຽງຈັນ, ທີ່ພວມດຳເນີນຢູ່ໃນວັນທີ 29 ມີຖຸນານີ້, ໄດ້ຮັບຮອງຮ່າງຂໍ້ຕົກລົງວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງຂອງນະຄອນຫລວງໃນໄລຍະໃໝ່, ຈາກການນຳສະເໜີຂອງຫ້ອງການພັດທະນາຕົວເມືອງ ນະຄອນຫລວງວຽງຈັນ, ຮ່າງດັ່ງກ່າວແມ່ນວຽກງານໜຶ່ງຕ້ອງເລັ່ງຈັດຕັ້ງປະຕິບັດ, ເພື່ອເຮັດໃຫ້ນະຄອນຫລວງວຽງຈັນ ໃຫ້ມີຄວາມເປັນລະບຽບຮຽບຮ້ອຍ ແລະ ມີໃບໜ້າໃໝ່.    ທ່ານ ນາງ ວິໄລວອນ ຈັນທະລາຕີ ຫົວໜ້າຫ້ອງການ ພັດທະນາຕົວເມືອງ ນະຄອນຫລວງວຽງຈັນ ກ່າວຕໍ່ທີ່ປະຊຸມ ວ່າ: ເນື່ອງຈາກວ່າໃນໄລຍະຜ່ານມາ ນະຄອນຫລວງວຽງຈັນ ໄດ້ມີການພັດທະນາຫລາຍຂຶ້ນໃນທຸກດ້ານ ໂດຍສະເພາະພຶ້ນຖານໂຄງລ່າງເຊັ່ນ: ການກໍ່ສ້າງຕຶກອາຄານ, ສູນການຄ້າ, ກິດຈະການສາທາລະນະປະໂຫຍດ, ຄຽງຄູ່ກັນນີ້ ຍານພາຫະນະເພີ່ມຂຶ້ນຢ່າງວ່ອງໄວ, ລວມທັງຊີວິດການເປັນຢູ່ຂອງຊາວນະຄອນຫລວງ ກໍໄດ້ຮັບການພັດທະນາດີຂຶ້ນ, ສິ່ງເຫລົ່ານີ້ ແມ່ນການປະກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີໂສມໜ້າໃໝ່, ແຕ່ຄຽງຄູ່ກັນນັ້ນ ກໍຍັງມີສິ່ງຫຍໍ້ທໍ້ບາງຢ່າງເກີດຂຶ້ນ ໂດຍສະເພາະການຄ້າຂາຍເຄື່ອງຊະຊາຍ, ການຈອດລົດບໍ່ຖືກລະບຽບ ເຮັດໃຫ້ການສັນຈອນຕິດຄັດ ແລະ ສົ່ງຜົນກະທົບຕໍ່ການບໍລິຫານຄຸ້ມຄອງຕົວເມືອງທີ່ດີຂອງລັດ ກໍຄື ຂອງນະຄອນຫລວງວຽງຈັນ.

- new3 - ນະຄອນຫລວງກຽມຈັດສັນຄວາມເປັນລະບຽບຮຽບຮ້ອຍໃນຕົວເມືອງຄືນໃໝ່

ຕໍ່ກັບສະພາບການດັ່ງກ່າວນີ້, ອົງການປົກຄອງ ນະຄອນຫລວງວຽງຈັນ ຈຶ່ງໄດ້ຮ່າງຂໍ້ຕົກລົງວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງໃນໄລຍະໃໝ່ຂຶ້ນ, ເພື່ອເປັນບ່ອນອີງໃຫ້ແກ່ການພັດທະນາຕົວເມືອງ ນະຄອນຫລວງວຽງຈັນ ກ້າວສູ່ຄວາມສີວິໄລ.

ຫົວໜ້າຫ້ອງການ ພັດທະນາຕົວເມືອງດັ່ງກ່າວ ໃຫ້ຮູ້ອີກວ່າ: ການຈັດສັນຄວາມບໍ່ເປັນລະບຽບຮຽບຮ້ອຍ ປະກອບມີ 11 ກິດຈະການຄື: ການຈັດສັນບັນດາກິດຈະການທີ່ລົ້ນຕະຫລາດຄືນໃໝ່, ການຂາຍເຄື່ອງນອກທີ່ຕັ້ງ ທີ່ກຳນົດໄວ້ໃນການອອກໃບອະນຸຍາດ, ຈັດສັນບາງເສັ້ນທາງເດີນລົດຄືໃໝ່, ການຮື້ຖອນສິ່ງຕໍ່ເຕີມກໍ່ສ້າງບໍ່ຖືກຕ້ອງ ກັບແຜນຜັງ ແລະ ສິ່ງຮົກເຮື້ອຕາມຖະໜົນຫລວງ ແລະ ເສັ້ນທາງສຳຄັນຕ່າງໆໃນເທດສະບານ, ຮື້ຖອນປ້າຍໂຄສະນາທຸກສະນິດທີ່ຕິດຕັ້ງບໍ່ຖືກລະບຽບການ, ແກ້ໄຂສິ່ງກີດຂວາງຕາມທາງຍ່າງ ແລະ ຕາມເຂດສາທາລະນະ, ຈັດສັນຄວາມບໍ່ເປັນລະບຽບຮຽບຮ້ອຍໃນກິດຈະການກໍ່ສ້າງ ແລະ ສ້ອມແປງຕຶກອາຄານ, ແກ້ໄຂຊຸມສາຍໂທລະສັບ, ສາຍໄຟຟ້າ ແລະ ສາຍເຄເບິ້ນຕາມເສັ້ນທາງຫລວງແຫ່ງຊາດ ແລະ ເສັ້ນທາງຫລັກ 21 ເສັ້ນ, ຕາມເທດສະບານ, ຕາມຕະຫລາດ ແລະ ຊຸມຊົນ, ແກ້ໄຂການມົ້ວສຸມ, ດື່ມສິ່ງມືນເມົາອາລະວາດຕີກັນ, ແກ້ໄຂຮ້ານຄາລາໂອເກະ, ຮ້ານກາເຟທີ່ເຄື່ອນໄຫວແບບລາມົກອານາຈານ ແລະ ການໂຄສະນາ-ຮ້ອງເພັງທີ່ບໍ່ຖືກຕ້ອງກັບວັດທະນະທຳ ແລະ ການເປີດສຽງດັງເກີນຂອບເຂດ.

- lattana 1 - ນະຄອນຫລວງກຽມຈັດສັນຄວາມເປັນລະບຽບຮຽບຮ້ອຍໃນຕົວເມືອງຄືນໃໝ່

ແນວໃດກໍດີ ຮ່າງຂໍ້ຕົກລົງດັ່ງກ່າວ ຄາດວ່າຈະເລີ່ມນຳໃຊ້ໃນອີກ 1 ເດືອນ ຕໍ່ໜ້າ, ຫລັງຈາກການແຕ່ງຕັ້ງໜ່ວຍສະເພາະກິດ ແລະ ການປັບປຸງບາງມາດຕາ ຈາກການສະເໜີ ຂອງ ສສຊ ນະຄອນຫລວງວຽງຈັນໃຫ້ມີເນື້ອໃນຄົບຖ້ວນສົມບູນ.

 

error: Content is protected !!