ເປີດ​ຂຶ້ນ​ແລ້ວງານວາງສະແດງສິນຄ້າລາວ-ຫວຽດ ທີ່ນະຄອນຫຼວງວຽງຈັນ

- advert banner 728 90 728x90 - ເປີດ​ຂຶ້ນ​ແລ້ວງານວາງສະແດງສິນຄ້າລາວ-ຫວຽດ ທີ່ນະຄອນຫຼວງວຽງຈັນ

ງານວານສະແດງສິນຄ້າລາວ-ຫວຽດ 2017  ໄດ້​ເປີດຂຶ້ນໃນວັນທີ 29 ມິຖຸນານີ້ – ວັນທີ 3 ກໍລະກົດ ທີ່ສູນການຄ້າລາວໄອເຕັກ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງລັດຖະມົນຕີ​ແຫ່ງ ສປປ ລາວ, ຮອງປະທານຄະນະຊີ້ນໍາລະດັບຊາດ ວ່າດ້ວຍການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2017, ທ່ານ ພົທ ເຈິ່ນ ເດີນ ຮອງລັດຖະມົນຕີກະຊວງປ້ອງກັນປະເທດແຫ່ງ ສສ ຫວຽດນາມ, ມີບັນດາທູຕານຸທູດ, ຜູ້ຕາງໜ້າອົງການຈັດຕັ້ງສາກົນປະຈໍາລາວ ແລະ ຊາວ​ນະຄອນຫລວງ​ວຽງ​ຈັນເຂົ້າຮ່ວມຢ່າງຫຼວງຫຼາຍ.

- new3 - ເປີດ​ຂຶ້ນ​ແລ້ວງານວາງສະແດງສິນຄ້າລາວ-ຫວຽດ ທີ່ນະຄອນຫຼວງວຽງຈັນ

ທ່ານນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ກ່າວ​ເປີດ​ງານວ່າ: ງານວາງສະແດງສິນຄ້າ ລາວ-ຫວຽດນາມ ປີນີ້ແມ່ນໜຶ່ງໃນກິດຈະກໍາແຫ່ງການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ກໍຄືວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ (18/7/1977-18/7/2017) ແລະ ວັນສ້າງຕັ້ງການພົວພັນການທູດ ລາວ-ຫວຽດນາມ ຄົບຮອບ 55 ປີ (5/7/1962-5/7/2017) ​ແລະ ​ໃນ​ຂະນະ​ດຽວ​ກັນ ສອງກະຊວງອຸດສາຫະກໍາ ແລະ ການຄ້າ ລາວ-ຫວຽດນາມ ຈະ​ໄດ້ຮ່ວມກັນ​ເປີດ​ເວ​ບ​ໄຊ​ຂອງ​ຕົນ WWW. Vietlaotrade.com ຂ້າພະເຈົ້າເຊື່ອໜັ້ນວ່າຜ່ານງານວາງສະແດງສິນຄ້າ ແລະ ຊ່ອງທາງການຄ້າແບບໃໝ່ການພົວພັນດ້ານເສດຖະກິດ-ການຄ້າ ລາວ-ຫວຽດນາມ ຈະໄດ້ຮັບການຂະຫຍາຍຕົວຂຶ້ນໄປເລື້ອຍໆ ແລະ ສາມາດ​ເຊື່ອມ​ໂຍງ​ເຂົ້າກັບພາກພື້ນ ແລະ ສາກົນໃນເງື່ອນໄຂປະຊາຄົມອາຊຽນ.

ສໍາລັບງານວາງສະແດງຄັ້ງນີ້ ມີຫ້ອງວາງສະແດງທັງໝົດ 320 ຫ້ອງ, ໃນນັ້ນມີຫົວໜ່ວຍທຸລະກິດຈາກ ສສ ຫວຽດນາມ 120 ຫ້ອງ ແລະຫົວໜ່ວຍທຸລະກິດລາວ 200 ຫ້ອງ ມາຈາກບັນດາຫົວໜ່ວຍທຸລະກິດລາວ-ຫວຽດ ຫຼາຍກວ່າ 100 ບໍລິສັດ ​ເຊິ່ງສິນຄ້າທີ່ນໍາມາວາງສະແດງປະກອບມີເຄື່ອງໃຊ້ໄຟຟ້າ, ວັດສະດຸກໍ່ສ້າງ, ກົນຈັກການກະເສດ, ເຄື່ອງຫັດຖະກໍາ, ຢາພື້ນເມືອງ, ເຄື່ອງໃຊ້ປະຈໍາວັນ, ອາຫານ ແລະ ເຄື່ອງດື່ມ, ເຄື່ອງມືຮັບໃຊ້ການຜະລິດ, ເຄື່ອງໃຊ້ໃນຄົວເຮືອນ, ເຟີນີເຈີ ແລະ ອື່ນໆ. ພິເສດໃນງານຍັງມີກອງປະຊຸມເຜີຍແຜ່ການຄ້າສອງຝ່າຍ ແລະ ສັນຍາການຄ້າຊາຍແດນ ລາວ-ຫວຽດນາມ, ກອງປະຊຸມພົບປະທຸລະກິດ ລະຫວ່າງ ສອງນະຄອນຫລວງວຽງຈັນ-ຮ່າໂນ້ຍ, ການສະແດງສິລະປະຂອງ 2 ຊາດ ລາວ-ຫວຽດນາມ,  ການແຂ່ງຂັນຮ້ອງເພງລາວ-ຫວຽດ ຂອງນັກຮຽນ. ນອກນີ້ ຍັງມີການບໍລິການກວດສຸຂະພາບໂດຍບໍ່ເສຍຄ່າ ຈາກແພດທະຫານລາວ ແລະ ຫວຽດນາມອີກດ້ວຍ ​ແລະ ງານວາງສະແດງຄັ້ງນີ້ບໍ່ພຽງແຕ່​ເປັນ​ການຊຸກຍູ້ສົ່ງເສີມການຄ້າການລົງທຶນຂອງສອງປະເທດ ລາວ-ຫວຽດນາມ ​ເທົ່າ​ນັ້ນ ມັນ​ຍັງເປັນການສົ່ງເສີມ ​ແລະ ການແລກປ່ຽນວັດທະນະທໍາລະຫວ່າງ​ປະຊາຊົນ​ສອງ​ຊາດ​ອີກ​ດ້ວຍ.

- lattana 1 - ເປີດ​ຂຶ້ນ​ແລ້ວງານວາງສະແດງສິນຄ້າລາວ-ຫວຽດ ທີ່ນະຄອນຫຼວງວຽງຈັນ
error: Content is protected !!