10 ຂໍ້ຄິດ ທີ່ຈະປ່ຽນທຸກໃຫ້ເປັນສຸກ
October 31, 2020 - 4:18 PM
- ການມີຄວາມສຸກ ບໍ່ແມ່ນວ່າເຮົາຈະຕ້ອງໄປຢືນໃນຈຸດທີ່ສູງທີ່ສຸດ ຫລື ຈຸດທີ່ໃຜບອກວ່າງາມທີ່ສຸດ ພຽງແຕ່ເຮັດໃຈປ່ອຍວາງ ແລະ ມີຄວາມສຸກໃນຈຸດທີ່ຢືນຢູ່ກໍພໍ ແລະ ເຮົາຈະພົບວ່າຄວາມສຸກນັ້ນບໍ່ໄດ້ຢູ່ໃກ້ພຽງຍື້ເຖິງ ແຕ່ຄວາມສຸກຢູ່ໃກ້ພຽງເຮົາຢຸດຍື້.
- ເມື່ອເຮົາມີສະຕິ ເລື່ອງບໍ່ໜ້າມີຄວາມສຸກ ເຮົາກໍມີຄວາມສຸກໄດ້, ແຕ່ເມື່ອໃດທີ່ເຮົາຂາດສະຕິ ເລື່ອງທີ່ບໍ່ໜ້າທຸກ ກໍເຮັດໃຫ້ເຮົາທຸກໄດ້.
- ປ່ຽນຄຳນິນທາ ໃຫ້ເປັນຄະຕິສອນໃຈວ່າ ເຖິງເຮົາຈະເຮັດດີປານໃດ ຄົນທີ່ບໍ່ມັກເຮົາ ເຂົາກໍຍັງນິນທາເຮົາຄືເກົ່າ.
- ລອງພິຈາລະນາໃນຊີວິດເຮົາເບິ່ງ ວ່າເລື່ອງໃດແດ່ທີ່ເຮັດໃຫ້ເຮົາເປັນທຸກຢູ່ຕອນນີ້ ເມື່ອພິຈາລະນາໃຫ້ດີແລ້ວ ໃຫ້ຖືເບົາຕໍ່ມັນ, ພະຍາຍາມຢ່າສົນໃຈກັບມັນຫລາຍ.
- ຄົນທີ່ທຸກຈະທຸກໜັກກ່ວາເກົ່າ ຖ້າເອົາຄວາມທຸກໄປປຽບທຽບກັບຄົນທີ່ກຳລັງສຸກ, ແຕ່ຖ້າເຮັດຄວາມເຂົ້າໃຈວ່າບໍ່ມີໃຜດອກທີ່ສຸກຕະຫລອດເວລາ ແລະ ບໍ່ມີໃຜດອກທີ່ທຸກທັ້ງຊີວິດ ທຸກທີ່ໜັກກໍຈະເລີ່ມເບົາລົງທັນທີ.
- ຄົນເຮົາຮັກກັນຍ້ອນຂໍ້ດີ ແຕ່ຊຳ້ພັດຕ້ອງມາເລີກລາກັນຍ້ອນຂໍ້ເສຍ ແລະ ບໍ່ຍອມປັບຄວາມເຂົ້າໃຈກັນ ໂດຍທີ່ຮູ້ວ່າຄູ່ຮັກທີ່ບໍ່ມີຂໍ້ເສຍເລີຍນັ້ນໃນໂລກນີ້ບໍ່ມີ.
- ຄວາມສຸກບໍ່ໄດ້ໝາຍຄວາມວ່າເຮົາຕ້ອງມີທຸກຢ່າງ ແຕ່ຢູ່ບ່ອນການຍອມຮັບຂອງເຮົາວ່າບໍ່ມີຫຍັງໄດ້ດັ່ງໃຈເຮົາໄປໝົດ ເມື່ອຍອມຮັບໄດ້ ເຮົາກໍຈະມີຄວາມສຸກໃນປັດຈຸບັນ.
- ຈະຫ້າມແນວໃດສາຍນຳ້ກໍຕ້ອງປ່ຽນທິດ ຈະຖ່ວງດຶງແນວໃດຊີວິດກໍຕ້ອງປ່ຽນແປງ.
- ການພົບພໍ້ຄົນຮັກທີ່ດີນັ້ນອາດເປັນເລື່ອງທີ່ບໍ່ແນ່ນອນ ແຕ່ຖ້າພົບກັນແລ້ວ ການທີ່ຕ້ອງຈາກລາກັນນັ້ນເປັນເລື່ອງທີ່ແນ່ນອນ.
- ບໍ່ມີໃຜໃນໂລກນີ້ບໍ່ເຄີຍມີຄວາມທຸກ ການຈະຜ່ານທຸກນັ້ນຕ້ອງອາໄສກຳລັງໃຈ ແລະ ການຮູ້ຈັກປ່ອຍວາງ, ບອກຕົນເອງວ່າເວລາທີ່ຜ່ານມານັ້ນເປັນບົດຮຽນ ເວລາທີ່ເຫລືອຢູ່ເປັນໂອກາດໃຫ້ເລີ່ມຕົ້ນໃໝ່.
