ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ

ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ - 555 58 - ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ
ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ - 174233 - ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ

ໂດຍ: ທິດ​ກໍ່າ

ສຳລັບ​ບຸນ​ນະມັດສະການພະທາດ​ຫລວງ​ປະຈຳ​ປີ 2563 ຫລື​ວ່າ ປະຈຳ​ປີ 2020 ຈະ​ເປັນ​ພຽງ​ເຮັດ​ໃຫ້​ໄດ້​ຕາມ​ຮີດ​ຕາມ​ຄອງ​ເທົ່າ​ນັ້ນ, ​ເອີ້ນ​ວ່າ​ຮີດ​ບໍ່​ໃຫ້​ໝອງ​ຄອງ​ບໍ່​ໃຫ້​ເສົ້າ. ອັນ​ສາ​ເຫດ​ກໍ​ຍ້ອນ​ວ່າ​ສະພາບ​ຄວາມ​ເປັນ​ມາ​ຂອງ​ປະ​ເທດ​ເຮົາ​ຍັງ​ຢູ່​ໃນ​ຂັ້ນຕອນ​ການ​ປະຕິບັດ​ມາດ​ຕະການ​ຜ່ອນຜັນ ​ເພື່ອ​ຕ້ານ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19. ອີກ​ປະການ​ໜຶ່ງ ກໍ​ເພື່ອ​ປະຕິບັດ​ຕາມ​ແຈ້ງ​ການ​ຂອງ​ຫ້ອງ​ວ່າການ​ສູນ​ກາງ​ພັກ ​ເຊິ່ງ​ເຫັນ​ດີ​ໃຫ້​ມີ​ການຈັດ​ງານ​ບຸນ​ນະມັດສະການ​ພະທາດ​ຫລວງ​ໃນ​ປີ 2020 ​ໂດຍ​ຖື​ເອົາ​ປະ​ເພນີ​ເປັນຕົ້ນຕໍ. ສ່ວນວ່າ​ການຈັດ​ງານ​ຕະຫລາດນັດ ​ແລະ ງານ​ມະຫໍລະສົບ​ຄົບງັນ​ຕ່າງໆ​ນັ້ນ ​ແມ່ນ​ໃຫ້​ໂຈະ​ໄວ້​ກ່ອນ ​ເພາະ​ຢ້ານ​ມີ​ບັນຫາ​ຂອງຕົ້ນ​ເຫດການ​ແຜ່​ລະບາດ​ຂອງ​ໂຄ​ວິດ-19 ຢ້ານ​ວ່າ​ມັນ​ມາ​ຮອບ​ສອງ​ຈະ​ໜັກໜ່ວງ ​ແລະ ອັນຕະລາຍ​ເໝືອນ​ດັ່ງ​ປະ​ເທດ​ມຽນມາ​ດຽວ​ນີ້​ໄດ້​ກາຍ​ເປັນອັນ​ດັບ​ສອງ​ຂອງ​ບັນດາ​ປະ​ເທດ​ໃນ​ກຸ່ມ​ອາ​ຊຽນ​ໄປ​ແລ້ວ. ປັດຈຸບັນ ຈຳນວນ​ຕົວ​ເລກ​ຜູ້​ຕິດ​ເຊື້ອ​ໂຄ​ວິດ-19 ຢູ່​ມຽນມາ​ມີ​ເຖິງ 30 ພັນກວ່າ​ຄົນ​ແລ້ວ.

ອີງ​ຕາມ​ການຖະ​ແຫລ​ງຂ່າວ​ຂອງ​ຄະນະ​ຮັບຜິດຊອບ​ງານ​ບຸນຄັ້ງວັນ​ທີ 21 ຕຸລາ 2020 ຜ່ານ​ມາ​ວ່າ: ສະ​ເພາະບຸນທາດຫລວງ​ປີ​ນີ້​ຈະ​ຈັດ​ພຽງ 3 ມື້​ເທົ່າ​ນັ້ນ ຄື​ວັນ​ທີ 29-31 ຕຸລາ 2020 ​ເຊິ່ງກົງ​ກັບ​ມື້ອອກ​ໃໝ່ 13 ຄໍ່າ ຫາ 15 ຄໍ່າ ຫລື ​ເອີ້ນ​ກັນ​ຢ່າງ​ໜຶ່ງ​ວ່າ​ເດືອນ 12 ​ເພັງ​ຂອງ​ລາວ​ເຮົາ​ນັ້ນ​ເອງ. ສຳລັບ​ເນື້ອ​ໃນ​ລາຍການ​ລະອຽດ​ໃນ​ໄລຍະມື້ບຸນ 3 ວັນນັ້ນກໍ​ມີ​ດັ່ງ​ນີ້: ວັນ​ທີ 29 ຕຸລາ 2020 ​ເວລາ 8:00 ​ໂມງ ​ເປັນຕົ້ນ​ໄປ ຈະ​ມີ​ການ​ຫ້າງ​ຫາ​ກະກຽມ​ຕົບ​ແຕ່ງ​ປະດັບ​ປະດາ​ສະຖານ​ທີ່​ທາງ​ດ້ານ​ນອກ ​ແລະ ດ້ານ​​ໃນ​ກົມ​ມະ​ລຽນ. ​ເວລາ 16:00 ​ໂມງ ຈະ​ມີ​ພິທີ​ສູດ​ປະລິດຕະມຸງຄຸນ ​ແລະ ​ເວລາ 20:00 ​ໂມງ ມີ​ພິທີ​ວຽນທຽນ​ແຫ່​ຜາສາດ​ເຜິ້ງ ​ແລະ ມີ​ການ​ຄົບງັນ​ຕາມ​ປະ​ເພນີ. ວັນ​ທີ 30 ຕຸລາ 2020 ​ເວລາ 13:00 ​ໂມງ ​ເຕົ້າ​ໂຮມ​ຜາສາດ​ເຜິ້ງຈາກ 4 ຕົວ​ເມືອງ​ຢູ່​ວັດ​ໜອງ​ບອນ, ​ເວລາ 13:30 ​ໂມງ ຫາ 18:00 ​ໂມງ ​ເຄື່ອນ​ຂະ​ບວນ​ແຫ່​ຜາສາດ​ເຜິ້ງສູ່​ກົມ​ມະ​ລຽນ​ພະທາດ​ຫລວງ, ​ໃນ​ນັ້ນ ຈະ​ມີ​ຂະ​ບວນການ​ແຫ່​ທັ້ງບັ້ງ, ດົນຕີ​ພື້ນ​ເມືອງ, ​ເມື່ອ​ຮອດ​ພະທາດ​ຫລວງ​ແລ້ວ​ແຫ່​ອ້ອມ​ພະທາດ 3 ຮອບ, ຖວາຍ​ຜາສາດ​ເຜິ້ງ, ຟັງ​ທຳ​ມະ​ເທສະໜາ 1 ກັນ ​ແລະ ຄົບງັນ​ຕາມ​ຮີດຄອງ​ປະ​ເພນີ. ວັນ​ທີ 31 ຕຸລາ 2020 ກົງ​ກັບ​ມື້​ເພັງ 15 ຄໍ່າ ​ເວລາ 7​:30 ​ໂມງ ມີ​ພິທີ​ໄຫວ້​ພະ​ຮັບ​ສິນ, ຟັງ​ທຳ​ມະ​ເທສະໜາ, ຖວາຍ​ສັງຄະ​ທານ, ຄາລະວະ, ​ໃຫ້​ພອນ​ຢາດ​ນ້ຳ, ພິທີ​ຕັກບາດ ​ແລະ ບິນທະບາດ​ຂອງ​ພະສົງ​ສາມະ​ເນນ. ​ເວລາ 12:00 ​ໂມງ ​ເປັນຕົ້ນ​ໄປ ​ເຕົ້າ​ໂຮມ​ກິລາ​ຕີຄີ. ​ເວລາ 19:00 ​ໂມງ ພິທີ​ວຽນທຽນ​ຢູ່​ກົມ​ມະ​ລຽນ​ພະທາດ​ຫລວງ, ຈູດ​ບັ້ງ​ໄຟ​ບູຊາ​ພະທາດ​ຫລວງ ​ແລະ ຄົບງັນ​ຕາມ​ປະ​ເພນີ​ຈົນ​ກວ່າ​ເຖິງ​ເວລາ​ກໍານົດ​ກໍ​ເປັນ​ອັນວ່າຈົບ​ງານ​ບຸນ​ນະມັດສະການ​ພະທາດ​ຫລວງ​ສຳລັບ​ປີ 2020. ກໍ​ໝາຍ​ຄວາມ​ວ່າ ສຳລັບ​ບຸນທາດຫລວງ​ປະຈຳ​ປີ​ນີ້ ຖື​ວ່າ​ບໍ່​ມີ​ຕະຫລາດນັດ, ບໍ່​ມີ​ມະ​ໂຫລີ​ດົນຕີ​ເສບ​ບໍລິການ​ຂາຍ​ອາຫານ ​ແລະ ​ເຄື່ອງ​ດື່ມ​ຕ່າງໆ​ຢ່າງ​ຄຶກຄັກ​ເໝືອນ​ດັ່ງ​ປີຜ່ານໆ​ມາ, ຍິ່ງ​ໄປ​ກວ່າ​ນັ້ນ ຕາມ​ແຫ​ລ່ງຂ່າວ​ຍັງ​ບອກ​ວ່າ ຫ້າມ​ຂາຍ​ຮອດ​ເຂົ້າຫລາມ ​ແລະ ປີ້ງ​ໄກ່​ວ່າ​ຊັ້ນ.

​ແນວ​ໃດ​ກໍ​ຕາມ, ສິ່ງ​ທີ່​ໜ້າ​ເປັນ​ຫ່ວງ​ນັ້ນ ກໍ​ຄື​ຄວາມ​ສະຫງົບ​ປອດ​ໄພ​ໃນ​ງານ​ບຸນ ​ແລະ ຫລັງ​ຈາກ​ເລີກ​ບຸນ​ໄປ​ແລ້ວ ກໍ​ຂໍ​ໃຫ້​ເດີ່ນ​ພະທາດ​ຫລວງ​ມີ​ແຕ່​ຄວາມ​ສະອາດ​ຈົບງາມ. ຫວັງ​ຢ່າງ​ຍິ່ງ​ວ່າ​ທາງ​ຄະນະ​ກຳມະການ​ບຸນ​ຈະ​ມີ​ແຜນ​ປ້ອງ​ກັນ ​ແລະ ຈຳກັດ​ສິ່ງ​ເຮິະຮ້າຍ​ພາຍຫລັງ​ແລ້ວ​ບຸນ ກໍ​ຄື​ໃນ​ໄລຍະ​ຄົບງັນ​ຕາມ​ຮີດຄອງ​ປະ​ເພນີ​ຢ່າງ​ຈົບງາມ ​ແລະ ​ເຂັ້ມງວດ.

ກ່າວ​ເຖິງ​ບຸນ​ນະມັດສະການ​ພະທາດ​ຫລວງ​ໃນ​ຫລາຍ​ໆ​ປີຜ່ານມາ ພວກ​ເຮົາ​ເຄີຍ​ໄດ້​ຮັບ​ຜົນ​ປະ​ໂຫຍ​ດ ​ແລະ ​ເຄີຍ​ເຫັນ​ຫລາຍ​ອັນ​ຫລາຍ​ຢ່າງ​ທີ່​ໃຫ້​ຜົນ​ດີ​ຫລາຍ​ກວ່າ​ສິ່ງ​ຫຍໍ້​ທໍ້. ອັນ​ທີ່​ເຮົາ​ເຄີຍ​ໄດ້​ຮັບ​ຜົນ​ປະ​ໂຫຍ​ດນັ້ນ ມັນ​ມີ​ມາກ​ມາຍ​ທັງ​ດ້ານ​ເສດຖະກິດ ​ແລະ ສັງຄົມ​ວັດທະນະທຳ. ສະ​ເພາະ​ໃນ​ແງ່​ເສດຖະກິດ​ນັ້ນ​ແມ່ນ​ໄດ້​ລາຍ​ຮັບ​ເປັນ​ກອບ​ເປັນ​ກຳ​ໃຫ້​ຜູ້​ປະກອບ​ການ​ຄ້າຂາຍ​ໃນ​ງານ​ບຸນ ​ເປັນຕົ້ນ​ເລີ່​ມ​ແຕ່​ບໍລິສັດ​ຜູ້​ປະມູນ, ພາກ​ລັດ​ກໍ​ມີ​ລາຍ​ໄດ້​ຈາກ​ການ​ເກັບ​ພັນທະ​ອາກອນ​ຕ່າງໆ​ຈາກ​ຜູ້​ປະມູນ ​ແລະ ຜູ້​ປະກອບ​ການ​ທຸລະ​ກິດ​ຄ້າຂາຍ ​ແລະ ການ​ບໍລິການ​ອື່ນໆ ອັນ​ເປັນ​ການ​ສ້າງ​ລາຍ​ຮັບ​ໃຫ້​ລັດ, ລວມໝູ່ ​ແລະ ບຸກຄົນ​ໄດ້​ເປັນ​ຢ່າງ​ດີ. ສ່ວນວ່າ​ອັນ​ຫຍໍ້​ທໍ້​ທີ່​ເຄີຍ​ເຫັນ​ຜ່ານ​ມານັ້ນ ​ແມ່ນ​ການ​ຍາດ​ຊີງ​ກັນ​ຈັບ​ຈ່ອງ​ທີ່​ດິນ ​ເພື່ອ​ຕັ້ງຮ້ານ​ຂາຍ​ເຄື່ອງ. ​ໃນ​ປີຜ່ານມາ​ມີ​ຫລາຍ​ລາຍ​ເມື່ອ​ຊື້ທີ່​ດິນ​ໄປ​ແລ້ວ ພາກັນ​ໄປ​ຂາຍ​ຕໍ່​ໃຫ້​ຜູ້​ອື່ນໆ​ເປັນ​ສອງ​ສາມ​ທົບ ອັນ​ເປັນ​ການ​ຂູດ​ຮີດ​ຕໍ່​ຜູ້​ຊື້ປາຍທາງ ​ແລະ ​ເປັນ​ເຫດ​​ໃຫ້​ລາຄາ​ສິນຄ້າ​ບາງ​ຢ່າງ​ໃນ​ງານ​ບຸນ​ຖີບ​ຕົວ​ສູງ​ຂຶ້ນ​ເປັນ​ທົບ​ສອງ​ທົບ. ​ແຕ່​ສະ​ເພາະ​ປີ​ນີ້​ຄາດ​ວ່າ​ອາດ​ຈະ​ບໍ່​ເປັນ​ຄື​ດັ່ງ​ຫລາຍ​ປີຜ່ານໆ​ມາ​ແຕ່​ປະການ​ໃດ.

ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ - Wave100S AD to Website 2020 0 - ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ

​ເວົ້າຄວາມ​ຈິງ​ແລ້ວ ​ໃນ​ແຕ່ລະ​ປີ ​ເມື່ອ​ເຖິງ​ຍາມ​ບຸນ​ພະທາດ​ຫລວງ​ແລ້ວ ຜູ້​ປະກອບ​ການ​ທຸລະ​ກິດ​ທັງຫລາຍ​ໃຜ​ກໍ​ມີ​ເງິນ​ມີ​ເງິນ​ຄໍາ​ຍ້ອນ​ເຊັ່ນ: ການ​ປະມູນ​ຊື້​ເນື້ອທີ່​ດິນ, ຍ້ອນ​ປະມູນ​ຝາກ​ລົດຈັກ​ລົດ​ໃຫຍ່ ​ແລະ ປະມູນ​ການ​ບໍລິການ​ຄ້າຂາຍ​ໃນ​ດ້ານ​ອື່ນ​ອີກ. ທາງ​ວັດ​ວາ​ສາສະໜາ​ກໍ​ມີ​ລາຍ​ຮັບ​ສະ​ສົມ ​ເພື່ອ​ບູລະນະ​ສ້ອມ​ແປງ​ສິ່ງ​ຈຳ​ເປັນ​ອື່ນໆ. ​ແຕ່​ຕົກ​ມາ​ປີ​ນີ້ ບັນຍາກາດ​ອາດ​ມິດ​ງຽບ​ຜິດ​ຫວັງ​ຍ້ອນ​ໂຄ​ວິດ-19 ມາ​ກົດ​ໜ່ວງ​ທຳລາຍ​ເສດຖະກິດ​ຂອງ​ຊາດ ນັບ​ທັງ​ລວມໝູ່ ​ແລະ ຂອງ​ສ່ວນ​ບຸກຄົນ.

​ເຖິງ​ຢ່າງ​ໃດ​ກໍ​ດີ, ກໍ​ຫວັງ​ວ່າ​ທຸກ​ຄົນ​ຈະ​ປະຕິບັດ​ບັນດາ​ມາດ​ຕະການ​ຕ່າງໆ​ຢ່າງ​ເຂັ້ມງວດ. ​ໂອກາດ​ໜ້າ​ຟ້າ​ໃໝ່​ຖ້າ​ໂຄ​ວິດ-19 ຫາກ​ຫ່າງ​ຫາຍ​ໄປ​ຈາກ​ບ້ານ​ເມືອງ​ເຮົາ​ໂດຍ​ຊິ້ນ​ເຊີງ ບັນຍາກາດ​ອັນ​ຄຶກຄັກ​ຈາກ​ບຸນທາດຫລວງ​ຄົງ​ຈະ​ຫວນ​ຍ້ອນ​ມາ​ອີກ​ຄັ້ງ. ປີ​ນີ້​ພວກ​ເຮົາ​ພາກັນ​ເອົາ​ແຕ່​ບຸນ​ລ້ວນໆ ຖ້າ​ຜູ້​ໃດ​ຢາກ​ມ່ວນ, ຢາກ​ຊື່ນ, ຢາກ​ເຮ​ຮາ​ພາ​ທີ​ກໍ​ພາກັນ​ສະຫລອງ​ບຸນ​ຢູ່​ເຮືອນ​ໃຜ​ເຮືອນ​ມັນ ຫລື ​ໄປ​ເຂົ້າຮ້ານ​ທີ່​ມີ​ມະ​ໂຫລີ​ດົນຕີ​ເສບ​ແຫ່ງ​ອື່ນໆ​ກໍ​ແລ້ວກັນ.

ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ - WhatsApp Image 2020 05 27 at 5 - ບຸນທາດຫລວງ​ປີ​ນີ້ ​ເປັນ​ພຽງ​ເຮັດ​ຕາມ​ຮີດ​ຕາມ​ຄອງ
error: Alert: Content is protected !!