ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ

ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ - 666 - ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ
ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ - 174233 - ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ

ພົນລະເມືອງຂອງ ອາຊຽນ, ສະເພາະແລ້ວແມ່ນ ຄົນຂອງປະເທດສະມາຊິກໃໝ່ ຄື ສປປລາວ ແລະ ລາຊະອານາຈັກກຳປູເຈຍ ຮູ້ສຶກຕົກໃຈເມື່ອຊາບວ່າ ຄົນຜູ້ເຄີຍເປັນທີ່ໜ້ານັບຖືໃນການປົກປ້ອງ ສະມາຄົມບັນດາປະເທດໃນພາກພື້ນອາຊີອາຄະເນ (ອາຊຽນ) ໄດ້ຕັດສິນໃຈບໍ່ປ້ອງກັນອົງການອີກແລ້ວ ດ້ວຍການສົ່ງຂໍ້ຄວາມອັນຜິດພາດອອກສູ່ໂລກ ໃນການສະເໜີໃຫ້ເອົາລາວ ແລະ ກຳປູເຈຍ ອອກຈາກ ອາຊຽນ. ມີຄຳຖາມຫຼາຍອັນຖືກຍົກຂຶ້ນວ່າ ແມ່ນຫຍັງທີ່ພາໃຫ້ອະດີດນັກການທູດ-ທູດບິນລາຮາຣີ ກໍສິກັນ ຫັນປ່ຽນແນວຄວາມຄິດຂອງຕົນ; ເປັນຫຍັງຜູ້ກ່ຽວຈຶ່ງຕັດສິນໃຈ ເດີນສວນທາງກັນກັບ ບິດາ ຜູ້ກໍ່ຕັ້ງວິໄສທັດອາຊຽນ ແລະ ປະຊາຊົນຂອງອາຊຽນ; ເປັນຫຍັງຜູ້ກ່ຽວຈຶ່ງຕັດສິນໃຈບໍ່ສືບຕໍ່ຊຸກຍູ້ ສົ່ງເສີມກົດບັດອາຊຽນ ທີ່ຕົນເອງໄດ້ເປັນຜູ້ປະກອບສ່ວນສ້າງດ້ານເນື້ອໃນ; ເປັນຫຍັງຜູ້ກ່ຽວຈຶ່ງ ທຳລາຍມ້າງຫຼັກການທີ່ວາງໄວ້ຢູ່ໃນ ສົນທິສັນຍາວ່າດ້ວຍມິດຕະພາບ ແລະ ການຮ່ວມມື ຢູ່ໃນ ພາກພື້ນອາຊີອາຄະເນ; ແລະ ເປັນຫຍັງຜູ້ກ່ຽວຈຶ່ງບໍ່ເລືອກຂຽນບົດ ກ່ຽວກັບວາລະອັນຮີບດ່ວນ ເພື່ອການຊ່ວຍຊຸກຍູ້ພາກພື້ນນີ້ ໂດຍສະເພາະໃນເວລາທີ່ ຜູ້ນຳ ລັດຖະບານ ແລະ ປະຊາຊົນອາຊຽນ ພວມມີຄວາມພະຍາຍາມຮ່ວມກັນຜ່ານຜ່າຜົນກະທົບຂອງການແພ່ລະບາດຢ່າງຮ້າຍແຮງຂອງ ໂຄວິດ-19, ກ້າວໄປສູ່ ການສ້າງປະຊາຄົມອາຊຽນໃຫ້ເຂັ້ມແຂງ.

ໃນເວລານີ້, ພວກເຮົາ ບັນດານັກການທູດບຳນານຂອງ ສປປລາວ ໄດ້ຂຽນຈົດໝາຍເປີດຊອງ ສະບັບນີ້ຂຶ້ນ ເພື່ອແຈ້ງໃຫ້ຮູ້ວ່າ ພວກເຮົາຮູ້ສຶກເຈັບປວດ ແລະ ຖືກທຳຮ້າຍເຖິງສ່ວນເລິກຂອງຫົວໃຈ ຍ້ອນບົດຂຽນຂອງ ທູດບິນລາຮາຣີ ກໍສິກັນ ລົງວັນທີ 24 ຕຸລາ 2020. ບົດຂຽນດັ່ງກ່າວ ແມ່ນເປັນ ການສົ່ງເສີມການແບ່ງແຍກອາຊຽນ ທີ່ສະແດງອອກໃນ ແນວຄວາມຄິດຂອງ ທ. ກໍສິກັນ ທີ່ສະເໜີວ່າ ອາຊຽນຄວນຂັບໄລ່ ລາວ ແລະ ກຳປູເຈຍ ອອກໄປ ຖ້າຫາກສອງປະເທດນີ້ສືບຕໍ່ເອົາທາງເລືອກທີ່ ຜິດພາດ ຫຼືວ່າ ຖືກບົງການໂດຍອຳນາດອິດທິພົນຈາກພາຍນອກ. ໃນນີ້, ພວກເຮົາບໍ່ພຽງແຕ່ຢາກແຈ້ງ ໃຫ້ປະຊາຄົມສາກົນຊາບເທົ່ານັ້ນ ແຕ່ກໍຕ້ອງການເຕືອນຄວາມຊົງຈຳຂອງ ທູດບິນລາຮາຣີ ກໍສິກັນ ວ່າ ບົດຂຽນຂອງຜູ້ກ່ຽວ ແມ່ນລ້ວນແລ້ວແຕ່ມີລັກສະນະຂອງຄົນ “ສາຍຕາສັ້ນ”, ຜິວເຜີນ, ບິດເບືອນ ແລະ ມີການຕີລາຄາແບບຜິດພາດ. ຍິ່ງໄປກວ່ານັ້ນ, ກໍເປັນໜ້າເສົ້າໃຈ ທີ່ທູດ ກໍສິກັນ ໃຫ້ການຖືເບົາ ສົງຄາມທຳລາຍອັນຍືດເຍື້ອ ທີ່ສ້າງຄວາມຂົມຂື່ນໃຫ້ແກ່ປະຊາຊົນສອງຊາດນັ້ນ ຊຶ່ງໄດ້ດຳເນີນການຕໍ່ສູ້ ເພື່ອຍາດເອົາ ເອກະລາດ ດ້ວຍການເສຍສະຫຼະຊີວິດ ແລະ ເລືອດເນື້ອຂອງປະຊາຊົນພວກເຮົາ. ສຳລັບກໍລະນີຂອງ ສປປລາວ, ໃນສົງຄາມທຳລາຍອັນໂຫດຮ້າຍປ່າເຖື່ອນ ບໍ່ພຽງແຕ່ໄດ້ມີການ ເສຍສະຫຼະ ດັ່ງທີ່ໄດ້ ກ່າວໄວ້ເທົ່ານັ້ນ, ແຕ່ຫາກວ່າ 1/3 ຂອງດິນແດນປະເທດລາວ ຍັງມີລະເບີດ ທີ່ຍັງບໍ່ທັນແຕກກະແຈກກະຈາຍຢູ່ ຊຶ່ງບໍ່ພຽງແຕ່ໄດ້ເຂັ່ນຂ້າປະຊາຊົນເປັນຈຳນວນຫຼາຍ ໃນແຕ່ລະປີ ແຕ່ຍັງເປັນສິ່ງກີດຂວາງ ບໍ່ໃຫ້ປະຊາຊົນສາມາດສ້າງສາພັດທະນາປະເທດຂອງຕົນໄດ້ຢ່າງເຕັມສ່ວນ.

ພາຍຫຼັງການຍາດມາໄດ້ຊຶ່ງ ເອກະລາດ ດ້ວຍຄວາມຍາກລຳບາກ, ສປປລາວ ແລະ ປະຊາຊົນ ຂອງຕົນ ແມ່ນຮູ້ດີເຖິງຄຸນຄ່າຂອງ ຄວາມເປັນ ເອກະລາດ, ສັນຕິພາບ ແລະ ການຮ່ວມມືເພື່ອການ ພັດທະນາ. ເຂົາເຈົ້າກໍບໍ່ຮູ້ໜ້ອຍໄປກວ່າປະຊາຊົນຊາດອື່ນໆຢູ່ໃນໂລກ ວ່າປະເທດຕົນຄວນດຳເນີນ ແນວທາງການຕ່າງປະເທດອັນໃດ ເພື່ອໃຫ້ສອດຄ່ອງກັບຜົນປະໂຫຍດແຫ່ງຊາດຂອງຕົນ. ປະເທດລາວ ມຸ່ງໝັ້ນເດີນຕາມແນວທາງການຕ່າງປະເທດ ສັນຕິພາບ, ເອກະລາດ ແລະ ການຮ່ວມມື. ຕົວຢ່າງທີ່ດີ ສຳລັບສິ່ງດັ່ງກ່າວແມ່ນການທີ່ ສປປລາວ ບໍ່ໄດ້ຕັດຂາດສາຍພົວພັນການທູດ ກັບ ສະຫະລັດອາເມຣິກາ ເຖິງແມ່ນວ່າ ໄດ້ມີສົງຄາມທຳລາຍ ແລະ ມີການເສຍສະຫຼະຂອງປະຊາຊົນຢ່າງຫຼວງຫຼາຍມາກ່ອນ, ແຕ່ຫາກຍັງໄດ້ມີການໃຫ້ຄວາມຮ່ວມມືທາງດ້ານມະນຸດສະທຳ ຮ່ວມກັບ ລັດຖະບານ ແລະ ປະຊາຊົນ ສະຫະລັດ ອາເມຣິກາ ເພື່ອຊອກຄົ້ນຫາສິ່ງເສດເຫຼືອຂອງທະຫານທີ່ສູນຫາຍໃນປາງສົງຄາມ (MIA) ຢູ່ ລາວ. ເຊັ່ນດຽວກັນ, ໃນເດືອນ ກໍລະກົດ 1992, ສປປລາວ ໄດ້ສະແດງຈຸດຢືນຂອງຕົນຢ່າງສະຫງ່າ ຜ່າເຜີຍ ໃນງານພິທີທີ່ຈັດຂຶ້ນໂດຍ ປະເທດຟີລິບປິນ ທີ່ເຮັດບົດບາດເປັນ ປະທານອາຊຽນ ໂດຍມີການ ເຂົ້າຮ່ວມຂອງບັນດາລັດຖະມົນຕີຕ່າງປະເທດອາຊຽນດ້ວຍກັນ ເພື່ອປະກາດຮັບເອົາ ສປປລາວ ເປັນ ປະເທດສະມາຊິກສັງເກດການຂອງ ອາຊຽນ, ຊຶ່ງໃນນັ້ນ ໄດ້ມີການຖະແຫຼງວ່າ ສປປລາວ ເຫັນພ້ອມ ທີ່ຈະໃຫ້ສິ່ງຕ່າງໆໃນອະດີດຜ່ານມາ ເປັນເລື້ອງຂອງປະຫວັດສາດ, ພ້ອມທັງມີຄວາມມຸ່ງໝາຍທີ່ຈະໃຫ້ ຄວາມຮ່ວມມືທີ່ມີຜົນປະໂຫຍດຊຶ່ງກັນແລະກັນ ຮ່ວມກັບທຸກໆປະເທດສະມາຊິກອາຊຽນ ໃນຕໍ່ໜ້າ.

ແນວທາງການຕ່າງປະເທດຂອງ ສປປລາວ ໄດ້ສະທ້ອນໃຫ້ເຫັນເຊັ່ນດຽວກັນ ຢູ່ໃນກົດໝາຍ ວ່າດ້ວຍການສົ່ງເສີມການລົງທຶນຂອງຕ່າງປະເທດຢູ່ລາວ ຊຶ່ງຖືວ່າເປັນໜຶ່ງ ໃນບັນດາກົດໝາຍການ ລົງທຶນຂອງພາກພື້ນ ທີ່ເປີດເສລີໃນການຮັບເອົາການລົງທຶນຈາກທົ່ວທຸກມຸມໂລກ. ສິ່ງດັ່ງກ່າວແມ່ນ ສອດຄ່ອງຫຼາຍ ກັບແນວທາງຂອງອາຊຽນ ທີ່ໄດ້ວາງອອກເພື່ອດຶງດູູດເອົາການລົງທຶນໃຫ້ຫຼາຍຂຶ້ນ ຈາກບັນດາປະເທດຄູ່ເຈລະຈາ ແລະ ປະເທດອື່ນໆ, ເພື່ອໃຫ້ເຂົ້າເຖິງ ຕະຫຼາດພາຍນອກອັນມະຫາສານ, ການຮັບເອົາການຖ່າຍທອດເຕັກໂນໂລຊີ ແລະ ຄວາມຮູ້ຄວາມຊຳນານ, ແນໃສ່ຮັບປະກັນການເປັນ ແກນກາງ ຂອງ ອາຊຽນ ແລະ ເພື່ອຍົກສູງ ຖານະບົດບາດ ແລະ ທີ່ຕັ້ງຂອງ ອາຊຽນ ຢູ່ໃນເວທີສາກົນ.

ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ - Wave100S AD to Website 2020 0 - ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ

ນອກຈາກນັ້ນ, ພວກເຮົາກໍຢາກເຕືອນຄວາມຊົງຈຳຂອງ ທູດກໍສິກັນ ວ່ານັບແຕ່ໄດ້ຖືກຮັບເຂົ້້າ ເປັນສະມາຊິກສົມບູນຂອງ ອາຊຽນ ໃນວັນທີ 23 ກໍລະກົດ 1997, ສປປລາວ ໄດ້ວາງຕົນເປັນ ປະເທດສະມາຊິກທີ່ມີ ຄວາມພູມໃຈຢ່າງຍິ່ງ ແລະ ຄວາມຮັບຜິດຊອບສູງ ຂອງອົງການ. ສປປລາວ ບໍ່ພຽງແຕ່ໄດ້ປະຕິບັດຢ່າງ ເຄັ່ງຄັດ ທຸກໆຫຼັກການ ທີ່ວາງໄວ້ຢູ່ໃນ ກົດບັດອາຊຽນ ແລະ ສົນທິສັນຍາ ວ່າດ້ວຍ ມິດຕະພາບ ແລະ ການຮ່ວມມື ແລະ ອື່ນໆ, ແຕ່ກໍຍັງໄດ້ມີການວາງ ແຜນພັດທະນາ ເສດຖະກິດ-ສັງຄົມ ຂອງຕົນ ໃຫ້ມີ ຄວາມກົມກຽວກັບການສ້າງປະຊາຄົມອາຊຽນ ໃນການຮັດແຄບ ຄວາມແຕກໂຕນດ້ານການພັດທະນາ ເສດຖະກິດ ລະຫວ່າງ ສປປລາວ ແລະ ປະເທດສະມາຊິກອື່ນໆ, ເປັນຕົ້ນແມ່ນ ປະເທດສະມາຊິກເກົ່າ.

ໃນສອງທົດສະວັດທີ່ຜ່ານມາ, ໃນການເປັນສະມາຊິກ ອາຊຽນ ສປປລາວ ໄດ້ມີຄວາມສຳເລັດ ຫຼາຍຢ່າງໃນການພັດທະນາເສດຖະກິດ-ສັງຄົມ ທັງໆທີ່ໄດ້ມີການເລີ້ມຈາກລະດັບທີ່ຕ່ຳສຸດ ທີ່ເປັນ ຍ້ອນຜົນຮ້າຍຢ້ອນຫຼັງຂອງສົງຄາມທຳລາຍນັ້ນ. ໃນໄລຍະເວລາດຽວກັນ, ປະເທດລາວ ກໍໄດ້ໃຫ້ການ ປະກອບສ່ວນອັນສຳຄັນ ໃຫ້ແກ່ ອາຊຽນ ດ້ວຍຫຼາຍວິທີທາງ: ໜຶ່ງ, ສະຖຽນລະພາບທາງການເມືອງ ພາຍໃນຂອງ ສປປລາວ ກໍມີຄວາມໝາຍສຳຄັນຕໍ່ການປົກປັກຮັກສາ ສັນຕິພາບ ແລະ ຄວາມໝັ້ນຄົງ ຢູ່ໃນພາກພື້ນ. ສອງ, ຈຸດທີ່ຕັ້ງທາງດ້ານພູມຍຸດທະສາດຂອງ ລາວ ທີ່ເປັນເໝືອນປະຕູເປີດສູ່ ຈີນ ໄດ້ກາຍມາມີຄວາມໝາຍສຳຄັນ ແລະ ກໍແນ່ນອນວ່າຈະນຳເອົາຜົນປະໂຫຍດມາໃຫ້ອາຊຽນ. ເສັ້ນທາງ ລົດໄຟ ທີ່ມີໄລຍະທາງທີ່ສັ້ນ ແລະ ມີຄວາມໝາຍທາງເສດຖະກິດ ທີ່ເຊື່ອມຕໍ່ລະຫວ່າງ ຄູນໝິງ ແລະ ສິງກະໂປ(SKRL) ໂດຍຜ່ານ ສປປລາວ ຊຶ່ງຈະສ້າງສຳເລັດໃນປີ 2021 ແມ່ນເປັນຕົວຢ່າງອັນດີ. ໂຄງການ ດັ່ງກ່າວນີ້ ກໍຈະຊ່ວຍໃນການປະຕິບັດແຜນແມ່ບົດຂອງການເຊື່ອມຈອດ ອາຊຽນ ພາຍໃນປີ 2025 ໃຫ້ປະກົດຜົນເປັນຈິງ. ໃນເມື່ອສຳເລັດແລ້ວ, ໂຄງການດັ່ງກ່າວ ຈະເປັນເສັ້້ນທາງລົດໄຟທຳອິດ ທີ່ຕິດຕໍ່ລະຫວ່າງ ປະເທດອາຊຽນ, ຈີນ, ເກົາຫຼີໃຕ້, ອາຊີກາງ ແລະ ເອີຣົບ. ຖ້າຫາກບໍ່ມີການຕົກລົງ ຕັດສິນໃຈຍາດເອົາ ທຶນຮອນ ແລະ ການສະໜັບສະໜູນທາງດ້ານເຕັກນິກຈາກ ຈີນ, ໂຄງການ SKRL ທີ່ໄດ້ຖືກສະເໜີເປັນຄັ້ງທຳອິດ ໂດຍ ອາຊຽນ ໃນປີ 1995 ໃນໂອກາດກອງປະຊຸມສຸດຍອດ ຜູ້ນຳປະເທດອາຊຽນ ວ່າດ້ວຍການຮ່ວມມືພັດທະນາອ່າງແມ່ນ້ຳຂອງ (AMBDC) ໃນສອງທົດສະວັດ ກ່ອນໜ້ານີ້ ກໍຄົງຈະບໍ່ກາຍເປັນຈິງຂຶ້ນມາ. ບວກເຂົ້າກັບການເຊື່ອມຕໍ່ກັນທາງອາກາດ, ເສັ້ນທາງດ່ວນ ໄປຫາ ຄູນໝິງ ຜ່ານ ສປປລາວ ກໍພວມໄດ້ຮັບການກໍ່ສ້າງ. ສາມ, ປະເທດລາວ ບໍ່ພຽງແຕ່ໄດ້ເຄີຍເປັນ ປະເທດເຈົ້າພາບຈັດກອງປະຊຸມສຸດຍອດ ອາຊຽນ ແລະ ກອງປະຊຸມອື່ນໆທີ່ຕິດພັນນັ້ນ, ແຕ່ກໍຍັງ ໄດ້ມີການປະກອບສ່ວນຢ່າງແຂງແຮງ ໃຫ້ແກ່ການປະຕິບັດ ກົດບັດອາຊຽນ ແລະ ບັນດາ ເອກະສານ ທີ່ສຳຄັນອື່ນໆຂອງອົງການ. ສປປລາວ ໄດ້ເປັນປະເທດເຈົ້າພາບຈັດກອງປະຊຸມສຸດຍອດ ອາເຊັມ ໃນປີ 2012 ຢ່າງມີຜົນສຳເລັດ. ເຊັ່ນດຽວກັນ, ສປປລາວ ກໍໄດ້ເປັນຜູ້ປະສານງານໃຫ້ແກ່ການພົບປະ ລະຫວ່າງ ລັດຖະມົນຕີຕ່າງປະເທດ ສ. ເກົາຫຼີ ແລະ ສປປ ເກົາຫຼີ ໃນໂອກາດການເປັນເຈົ້າພາບ ຈັດກອງປະຊຸມ ສຸດຍອດອາຊຽນ ໃນປີ 2004. ນັ້ນແມ່ນບາງຕົວຢ່າງ ເພື່ອເຕືອນຄວາມຊົງຈຳຂອງ ທູດ ກໍສິກັນ.

ຂໍ້ຄວາມສຸດທ້າຍຂອງພວກເຮົາແມ່ນ ກ່ຽວກັບການທີ່ ສປປລາວ ເປັນ ລັດທີ່ມີ ເອກະລາດ ແລະ ອະທິປະໄຕ. ສປປລາວ ຮູ້ດີວ່າ ບໍ່ພຽງແຕ່ມີຄວາມຕ້ອງການຊຸກຍູ້ສົ່ງເສີມຜົນປະໂຫຍດແຫ່ງຊາດ ຂອງຕົນເທົ່ານັ້ນ, ແຕ່ກໍຍັງໄດ້ມີການຄຳນຶງເຖິງ ຜົນປະໂຫຍດຂອງພາກພື້ນ ເຊັ່ນດຽວກັນ. ສປປລາວ ເປັນປະເທດສະມາຊິກ ທີ່ມີຄວາມຮັບຜິດຊອບສູງຂອງ ສະຫະປະຊາຊາດ, ອາຊຽນ, ອົງການ ການຄ້າໂລກ ແລະ ອົງການສາກົນອື່ນໆ ຊຶ່ງ ສປປລາວ ລ້ວນແຕ່ປະຕິບັດຕາມຫຼັກການພື້ນຖານຢ່າງ ເຕັມສ່ວນ.  ສປປລາວ ແລະ ປະເທດສະມາຊິກອາຊຽນອື່ນໆ ໄດ້ໃຫ້ການປະກອບສ່ວນຂອງຕົນເພື່ອ ຊຸກຍູ້ສົ່ງເສີມ ແລະ ປົກປັກຮັກສາ ສັນຕິພາບ ແລະ ການພັດທະນາ ຢູ່ໃນຂົງເຂດ ແລະ ນອກພາກພື້ນ. ປະເທດລາວ ມີທ່າແຮງບົ່ມຊ້ອນອັນໃຫຍ່ຫຼວງ ຊຶ່ງຖ້າຫາກມີການປະສົມປະສານເຂົ້າກັບຜົນສຳເລັດ ແລະ ທ່າແຮງອັນມະຫາສານຂອງປະເທດສະມາຊິກອື່ນໆແລ້ວ ກໍຈະເປັນການສ້າງກາລະໂອກາດ ແລະ ນຳເອົາຜົນປະໂຫຍດໄດ້ຫຼາຍຂຶ້ນ ໃຫ້ແກ່ ອາຊຽນ. ໃນນາມທີ່ເປັນ ອະດີດນັກການທູດ, ທູດກໍສິກັນ ຄວນມີຄວາມເຂົ້າໃຈຕໍ່ສິ່ງນີ້ ແລະ ໃຫ້ການ ຊຸກຍູ້ສ້າງຄວາມເປັນເອກະພາບຂອງ ອາຊຽນ, ແທນທີ່ຈະ ຜິປອງສ້າງຄວາມແບ່ງແຍກ ອັນຈະສົ່ງຜົນກະທົບຮ້າຍແຮງ ໃຫ້ແກ່ຜົນປະໂຫຍດຂອງແຕ່ລະປະເທດ ສະມາຊິກ ແລະ ອາຊຽນທັງມວນ. ພວກເຮົາຫວັງວ່າ ການດຳເນີນບາດກ້າວທີ່ຜິດພາດໃນທາງ ການທູດດັ່ງກ່າວ ທີ່ບໍ່ເປັນປະໂຫຍດອັນໃດເລີຍໃຫ້ແກ່ການທູດໂດຍລວມ ນັບທັງການຂຽນບົດຄວາມ ໃສ່ຮ້າຍປ້າຍສີນັ້ນ ຄົງຈະເປັນສິ່ງສຸດທ້າຍ. ພວກເຮົາເຊື່ອຢ່າງແຂງແຮງວ່າ ຄວາມພະຍາຍາມ ຂອງທູດ ກໍສິກັນ ຈະບໍ່ມີທາງສຳເລັດໄດ້ ຍ້ອນວ່າມັນຊັກຈູງໄປສູ່ ການສ້າງ ຄວາມບາດໝາງ ແລະ ຄວາມ ແຕກແຍກ ຢູ່ພາຍໃນ ອາຊຽນ, ຊຶ່ງອາດຈະເຮັດໃຫ້ ຄວາມໜ້າເຊື່ອຖື ແລະ ກຽດຊື່ສຽງ ຂອງ ອົງການ ຫຼຸດລົງ.

ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ - WhatsApp Image 2020 05 27 at 5 - ຄວາມພະຍາຍາມຂອງ ຄົນສິງກະໂປຜູ້ໜຶ່ງ ເພື່ອແບ່ງແຍກອາຊຽນ ຈະບໍ່ມີທາງສຳເລັດ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!