ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ

ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ - 555 5 - ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ
ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ - 174233 - ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ

ໂດຍ: ທິດ​ກໍ່າ

      ​ໃນ​ເງື່ອນ​ໄຂ​ທີ່​ພະຍາດ​ໂຄ​ວິດ-19 ຍັງ​ລະບາດ​ບຸກລຸກ​ທຳລາຍ​ຊີວິດ​ອິນ​ຊີ, ຄວາມ​ຢູ່​ດີ​ກິນ​ດີ​ຂອງ​ມວນ​ມະນຸດ ​ແລະ ຍັງ​ບໍ່​ທັນ​ຮູ້​ວ່າ​ອີກ​ດົນ​ປານ​ໃດ​ມັນ​ຈຶ່ງ​ຈະ​ມະ​ຫັບ​ມະຫາຍ​ໄປ​ຈາກ​ໂລກ​ໃບ​ນີ້​ຢ່າງ​ສິ້ນ​ເຊີງ. ​ແຕ່​ວ່າ​ແນວ​ໃດ​ກໍ​ຕາມ, ສິ່ງ​ທີ່​ປາດ​ຖະໜາ​ຂອງ​ມວນ​ມະນຸດ​ໃນ​ທົ່ວ​ໂລກ​ກໍ​ຫວັງ​ຢ່າງ​ຍິ່ງ​ວ່າ: ​ເຊື້ອພະຍາດ​ດັ່ງກ່າວ ຈະ​ຕ້ອງ​ຖືກ​ຈຳກັດ ​ແລະ ມະນຸດ​ເຮົາ​ຕ້ອງ​ສາມາດ​ຕ້ານທານ​ກັບ​ມັນ​ໄດ້​ໃນ​ທີ່​ສຸດ, ​ແຕ່​ວ່າ​ກວ່າ​ຈະ​ໄປ​ເຖິງ​ຜົນສຳ​ເລັດ​ຕາມ​ຈຸດປະສົງ ​ແລະ ​ເປົ້າໝາຍ​ປາຍທາງ ມັນ​ກໍ​ຕ້ອງ​ໄດ້​ຜ່ານ​ໄລຍະ​ໃດ​ໜຶ່ງ ຫລື ມີ​ເວລາ​ໃນ​ການ​ຄົ້ນຄວ້າ​ທົດ​ລອງ​ຢຸກຢາ​ທາ​ນັງມາ​ຢັບຢັ້ງ ​ເໝືອນ​ດັ່ງ​ໂຣກຮ້າຍ​ຊະນິດ​ອື່ນໆ​ທີ່​ໄດ້​ກຳ​ເນີ​ດ​ເກີດ​ມາ​ຄວບ​ຄູ່​ກັບ​ການ​ດຳລົງ​ຊີວິດ​ຂອງ​ມວນ​ມະນຸດ​ໃນ​ທົ່ວ​ໂລກ.

ສຳລັບ ສປປ ລາວ ພວກ​ເຮົາ​ນັບ​ແຕ່​ວັນ​ທີ 1 ພະຈິກ ຫາ​ວັນ​ທີ 31 ທັນວາ 2020 ລັດຖະບານ​ໄດ້​ອອກ​ແຈ້ງ​ການ​ສະບັບ​ເລກທີ 1202/ຫສນຍ, ລົງ​ວັນ​ທີ 31/10/2020 ກ່ຽວ​ກັບ​ການ​ສືບ​ຕໍ່​ປະຕິບັດ​ບັນດາ​ມາດ​ຕະການ​ຜ່ອນຜັນ, ບັນດາ​ມາດ​ຕະການ​ປ້ອງ​ກັນ, ຄວບ​ຄຸມ, ສະກັດ​ກັ້ນ ​ແລະ ​ແກ້​ໄຂ​ການລະບາດ​ຂອງ​ເຊື້ອພະຍາດ​ໂຄ​ວິດ-19 ຕໍ່​ໄປ​ອີກ​ຈົນ​ກວ່າ​ໝົດ​ປີ​ນີ້. ​ແຕ່​ອັນ​ທີ່​ມີ​ການ​ອະນຸຍາດ​ຜ່ອນຜັນ​ເພີ່ມ​ຕື່ມ​ກໍ​ແມ່ນ​ເຫັນ​ດີ​ໃຫ້​ເປີດ​ຮ້ານ​ບັນ​ເທີ​ງ ​ແລະ ຄາຣາ​ໂອ​ເກະ ​ເພື່ອ​ຫລຸດຜ່ອນ​ຜົນ​ກະທົບ​ທາງ​ດ້ານ​ທຸລະ​ກິດ. ນອກຈາກ​ນັ້ນ ກໍ​ເຫັນ​ດີ​ໃຫ້​ປຶກສາ​ຫາລື​ນະ​ໂຍບາຍ​ຜ່ອນຜັນ​ຕື່ມ​ໃນ​ການ​ເດີນທາງ​ເຂົ້າ-ອອກປະ​ເທດ ລະຫວ່າງ ສປປ ລາວ ກັບ ສສ ຫວຽດນາມ, ສປປ ລາວ ກັບ ຍີ່ປຸ່ນ ​ແລະ ບັນດາ​ປະ​ເທດ​ອາ​ຊຽນ ທີ່​ໄດ້​ສະ​ເໜີ​ເຂົ້າມາ​ໃໝ່. ສ່ວນ​ການ​ປິດ-​ເປີດ​ດ່ານ​ຊາຍ​ແດນ ນັບ​ທັງ​ດ່ານ​ສາກົນ ​ແລະ ດ່ານ​ປະ​ເພນີ​ນັ້ນ ກໍ​ແມ່ນ​ໄດ້​ເປີດບາງ​ດ່ານ​ທີ່​ຈຳ​ເປັນ ທັງ​ໃຫ້​ປະຕິບັດ​ຕາມ​ມາດ​ຕະການ​ຜ່ອນຜັນ ທັງ​ຄົນ ​ແລະ ພາຫະນະ​ທີ່​ຂົນ​ສົ່ງ​ສິນຄ້າ​ເຂົ້າ-ອອກ.

ກໍ​ດັ່ງ​ພວກ​ເຮົາ​ໄດ້​ຮັບ​ຮູ້​ນຳ​ກັນ​ແລ້ວ​ວ່າ, ນັບ​ແຕ່​ມີ​ເຊື້ອພະຍາດ​ສາຍ​ພັນ​ໃໝ່​ໂຄ​ວິດ-19 ມາ​ທຳລາຍ​ເຜົາ​ຜານ​ຊີວິດ​ອິນ​ຊີ​ຂອງ​ມວນ​ມະນຸດ​ໃນ​ທົ່ວ​ໂລກ ​ໄດ້​ເຮັດ​ໃຫ້​ພົນລະ​ເມືອງ​ຂອງ​ໂລກ​ຕາຍ​ໄປ​ນັບ​ລ້ານ​ກວ່າ​ຄົນ​ແລ້ວ. ນອກ​ນັ້ນ ທາງ​ດ້ານ​ເສດຖະກິດ-ສັງຄົມ​ຂອງ​ໂລກ​ກໍ​ມີ​ການ​ທົດ​ຖອຍ​ໄປ​ຕາມ​ໆ​ກັນ; ການ​ພົວພັນ​ເຂົ້າ-ອອກ​ໄປ​ມາ​ຄ້າຂາຍ​ຂອງ​ແຕ່ລະ​ປະ​ເທດ​ອາດ​ເວົ້າ​ໄດ້​ວ່າ​ປິດ​ທັງ​ພາຍ​ນອກ​ພາຍ​ໃນ​ຢູ່​ຫລາຍ​ປະ​ເທດ ​​ໂດຍ​ສະ​ເພາະ​ແມ່ນ​ປະ​ເທດ​ທີ່​ມີ​ການລະບາດ​ໜັກ. ສິ່ງ​ທີ່​ໜ້າ​ຄິດ ​ແລະ ​ເປັນ​ຫ່ວງ​ນັ້ນ ມາ​ຮອດ​ປັດຈຸບັນ​ເຊື້ອພະຍາດ​ໂຄ​ວິດ-19 ມັນ​ຍັງ​ບໍ່​ທັນ​ມີ​ທ່າ​ທີ​ຫລຸດຜ່ອນ, ​ເບິ່ງ​ຢ່າງ​ໜຶ່ງ​ຄື​ວ່າ​ມັນ​ບໍ່​ອະນຸຍາດ​ໃຫ້​ມະນຸດ​ໃນ​ໂລກ​ນີ້​ມີ​ການ​ພົວພັນ, ​ເຊື່ອມ​ໂຍງ​ໄປມາຫາສູ່​ກັນ, ສະ​ແດງ​ອອກ​ຄື​ໃນ​ເມື່ອ​ຕ້ານ ​ແລະ ປາບ​ປາມ​ສະຫງົບ​ລົງ​ແລ້ວ ມັນ​ພັດ​ກັບ​ມາ​ເກີດ​ຄືນ​ອີກ. ອີກ​ປະການ​ໜຶ່ງ ສິ່ງ​ທີ່​ໜ້າ​ຢ້ານ​ກົວ ​ແລະ ວິຕົກ​ກັງວົນ​ທີ່​ສຸດ ກໍ​ແມ່ນ​ມາ​ຮອດ​ປັດຈຸບັນ​ຍັງ​ບໍ່​ທັນ​ມີ​ຢາ​ວັກ​ຊິນ​ຊະນິດ​ໃດ​ທີ່​ຈະ​ມາ​ປິ່ນປົວ​ຢັບຢັ້ງມັນ​ລົງ​ໄດ້​ຢ່າງ​ທັນ​ການ, ​ເຖິງ​ວ່າ​ມີ​ຫລາຍ​ປະ​ເທດ​ຄົ້ນຄວ້າ​ຜະລິດ​ຢາ​ວັກ​ຊິນ​ໄດ້ ​ແຕ່​ກໍ​ຍັງ​ຢູ່​ໃນ​ຂັ້ນທົດ​ລອງ​ຈົນ​ກວ່າ​ເວລາ​ອັນ​ສົມຄວນ​ຈຶ່ງ​ສາມາດ​ເອົາ​ອອກ​ມາ​ນຳ​ໃຊ້​ກັບ​ຄົນ​ເຮົາ​ໄດ້​ຢ່າງ​ສົມບູນ.

ສະ​ເພາະ ສປປ ລາວ ຂອງ​ພວກ​ເຮົາ ນັບ​ແຕ່​ມີ​ໂຄ​ວິດ​ເຂົ້າມາ​ອາ​ລະວາ​ດ ​ໄດ້​ເຮັດ​ໃຫ້​ເສດຖະກິດ​ຂອງ​ປະ​ເທດ​ທົດ​ຖອຍ​ຈາກ 6% ລົງ​ມາ​ເຫລືອ​ພຽງ 3% ຫລື ອາດ​ຈະ​ຫລາຍ​ກວ່າ​ນີ້​ພາຍຫລັງ​ໝົດ​ປີ 2020. ຕົວຢ່າງ​ສະ​ເພາະ​ຄວາມ​ເສຍຫາຍ​ທາງ​ດ້ານ​ລາຍ​ຮັບ​ຈາກ​ການທ່ອງທ່ຽວ​ແມ່ນ​ມີ​ປະມານ 800 ລ້ານ ຫາ 1 ຕື້​ໂດ​ລາ​ສະຫະລັດ ​ໂດຍ​ປະມານ​ນັບ​ແຕ່​ທ້າຍ​ປີ 2019 ຫາ​ໝົດ​ປີ 2020 ຫລື ​ໄປ​ຮອດ​ຕົ້ນປີ 2021. ນອກຈາກ​ນັ້ນ ກໍ​ຍັງ​ມີ​ຜົນ​ກະທົບ​ໃນ​ດ້ານ​ອື່ນໆ​ອີກ​ຢ່າງ​ຫລວງຫລາຍ​ພາຍ​ມາກ.

ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ - Wave100S AD to Website 2020 0 - ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ

​ແຕ່​ວ່າ​ແນວ​ໃດ​ກໍ​ຕາມ, ສຳລັບ​ບັນຫາ​ການທ່ອງທ່ຽວ​ມາ​ຮອດ​ໄລຍະ​ປັດຈຸບັນ ອີງ​ໃສ່​ສະພາບ​ຄວາມ​ເປັນ​ຈິງ​ທີ່​ໄດ້​ກ່າວ​ມາ​ຂ້າງ​ເທິງ​ນັ້ນ ຈຶ່ງ​ມີ​ຄວາມ​ຈຳ​ເປັນ​ວາງ​ນ​ະ​ໂຍບາຍ​ຫັນ​ທິດ​ໃສ່​ການທ່ອງທ່ຽວ​ພາຍ​ໃນ​ເປັນ​ຈຸດ​ໜັກ. ໝາຍວ່າ ປະຕິບັດ​ຄຳ​ຂວັນ “ລາວ​ທ່ຽວ​ລາວ” ​ເພື່ອ​ຊຸກຍູ້ ​ແລະ ສົ່ງ​ເສີມ​ໃຫ້ການ​ທ່ອງ​ທ່ຽວ​ພາຍ​ໃນ​ປະ​ເທດ​ໄດ້​ເຕີບ​ໃຫຍ່​ຄຶກຄັກ​ແຂງ​ແຮງ ​ແລະ ຖື​ເອົາ​ຊ່ວງ​ຕ້ານ​ໂຄ​ວິດ-19 ​ເປັນ​ທາງ​ອອກ​ໃນ​ການທ່ອງທ່ຽວ​ຕິດ​ພັນ​ກັບ​ການ​ຜະລິດ​ແບບ​ຍືນ​ຍົງ, ສີຂຽວ, ສະອາດ​ຢູ່​ພາຍ​ໃນ​ປະ​ເທດ​ໃຫ້​ມີ​ຄວາມ​ເຂັ້ມ​ແຂງ, ສາມາດ​ຮັກສາ​ຄວາມ​ເຕີບ​ໃຫຍ່ ​ແລະ ດຸ່ນດ່ຽງ​ທາງ​ດ້ານ​ລາຍ​ຮັບ​ຈາກ​ການທ່ອງທ່ຽວ ຫລື ​ເສດຖະກິດ-ສັງຄົມ​ຂອງ​ປະ​ເທດ.

​ເຖິງ​ຢ່າງ​ໃດ​ກໍ​ດີ, ​ເພື່ອ​ໃຫ້​ພາລະກິດ​ການທ່ອງທ່ຽວ​ຢູ່​ພາຍ​ໃນ​ປະ​ເທດ​ມີ​ຄວາມ​ເຂັ້ມ​ແຂງ ​ແລະ ​ເຕີບ​ໃຫຍ່​ຂຶ້ນຢ່າງ​ເຫັນ​ໄດ້​ຊັດ ບໍ່​ວ່າ​ໃນ​ໄລຍະ​ປັດຈຸບັນ ກໍ​ຄື​ອະນາຄົດ ອັນ​ສຳຄັນ​ກວ່າ​ໝູ່​ໝົດ​ຕ້ອງ​ໄດ້​ສ້າງ​ປັດ​ໄຈ​ຫລາຍ​ຢ່າງ​ທີ່​ເອື້ອອຳນວຍ​ເພື່ອ​ກະຕຸກ​ຊຸກຍູ້​ຂົງ​ເຂດ​ດັ່ງກ່າວ​ໃຫ້​ເປັນ​ໄປ​ຕາມ​ຈຸດປະສົງ ​ແລະ ​ເປົ້າໝາຍ ​ເປັນຕົ້ນບັນຫາ​ເສັ້ນທາງ​ຄົມມະນາຄົມ​ຕ້ອງ​ໄປ​ມາສະ​ດວກ​ສະບາຍ, ​ໂລ່ງ​ລ່ຽນ. ພ້ອມ​ກັນນັ້ນ ​ແຫ​ລ່ງທ່ອງ​ທ່ຽວ​ແຕ່ລະ​ແຫ່ງ​ຕ້ອງ​ໄດ້​ປັບປຸງ​ພື້ນຖານ​ໂຄງ​ລ່າງ​ໃຫ້​ດີ ​ແລະ ຮັບປະກັນ ​ໂດຍ​ສະ​ເພາະ​ແມ່ນ​ແຫ​ລ່ງທ່ອງ​ທ່ຽວ​ທຳ​ມະ​ຊາດ. ນອກຈາກ​ນັ້ນ ກໍ​ປັບປຸງ​ການ​ບໍລິການ​ໃຫ້​ເປັນ​ທີ່​ພໍ​ໃຈ​ຂອງ​ນັກ​ທ່ອງ​ທ່ຽວ​ທີ່​ໄດ້​ໄປ​ສຳຜັດ.

ປະ​ເທດ​ລາວ​ຂອງ​ພວກ​ເຮົາ​ເປັນ​ປະ​ເທດ​ທີ່​ອຸດົມສົມບູນ​ໄປ​ດ້ວຍ​ດ້ານ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ເປັນຕົ້ນມີ​ພູຜາ​ປ່າ​ໄມ້​ທີ່​ຂຽວ​ສົດ​ງົດ​ງາມ ນັບ​ທັງ​ມີ​ພື້ນຖານ​ວັດທະນະທຳ-ສັງຄົມ, ສະຖາປັດຕະຍະ ກຳ​ທີ່​ມີ​ເອກະລັກ​ສະ​ເພາະ, ມີ​ມູນ​ເຊື້ອຕໍ່ສູ້​ຢ່າງ​ພິລະ​ອາດ​ຫານ​ໃນ​ປະຫວັດສາດ​ແຕ່​ລະ​ຍຸກ, ​ແຕ່​ລະສະ​ໄໝ​ມາ​ຢ່າງ​ຍາວ​ນານ. ນອກ​ນັ້ນ ຍັງ​ມີ​ຮີດຄອງ​ປະ​ເພນີ​ອັນ​ດີງາມ​ຂອງ​ແຕ່ລະ​ເຜົ່າ​ຊົນ​ທີ່​ຈະ​ດູດ​ດຶງ​ເອົາ​ນັກ​ທ່ອງ​ທ່ຽວ​ທັງ​ໃກ້ ​ແລະ ​ໄກ​ໄດ້​ໄປ​ສຳຜັດ​ກັບ​ຄວາມ​ເປັນ​ທຳ​ມະ​ຊາດ​ຂອງ​ແຕ່ລະ​ທ້ອງ​ຖິ່ນ. ​ແນ່ນອນ​ຖ້າ​ຫາກ​ໂຄງການ​ຕາມ​ຄຳ​ຂວັນ “ລາວ​ທ່ຽວ​ລາວ” ​ເປັນ​ໄປ​ຕາມ​ຄວາມ​ຫວັງ ບໍ່​ວ່າ​ພາກ​ລັດ ​ແລະ ບຸກຄົນ​ຈະ​ຕ້ອງ​ພາກັນ​ຖົງ​ຕຶ່ງ​ໃນ​ອະນາຄົດ ຖ້າ​ພວກ​ເຮົາ​ພ້ອມ​ກັນ​ເຮັດ​ສຸດ​ກົກ​ສຸດ​ປາຍ.

 

ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ - WhatsApp Image 2020 05 27 at 5 - ລາວ​ທ່ຽວ​ລາວ​ຕ້ອງ​ສ້າງ​ປັດ​ໄຈ​ໃຫ້​ລັດ ​ແລະ ບຸກຄົນ​ຖົງ​ຕື່ງ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!