ສະພາແຫ່ງຊາດ ຮັບຮອງເອົາກົດ ໝາຍໃໝ່ ວ່າດ້ວຍຊາວໜຸ່ມລາວ
ໃນກອງປະຊຸມສະໄໝມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ໃນວັນທີ 10 ພະຈິກນີ້ ໂດຍການເປັນປະທານຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດ (ສສຊ) ໄດ້ສຸມໃສ່ປະກອບຄຳຄິດຄຳເຫັນໃສ່ຮ່າງກົດໝາຍວ່າດ້ວຍຊາວໜຸ່ມລາວ (ສ້າງໃໝ່) ທີ່ສະເໜີໂດຍທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມ ປະຕິວັດລາວ ແລະ ໄດ້ພ້ອມກັນລົງຄະແນນສຽງຮັບຮອງເອົາຮ່າງກົດໝາຍສະບັບດັ່ງກ່າວ ດ້ວຍຄະແນນສຽງເຫັນດີເປັນສ່ວນຫລາຍ ເຊິ່ງກົດໝານສະບັບນີ້ປະກອບມີ 9 ພາກ, 7 ໝວດ, 63 ມາດຕາ.
ບັນດາ ສສຊ ໃນແຕ່ລະເຂດ ໄດ້ສຸມໃສ່ປະກອບຄຳເຫັນໃສ່ບາງມາດຕາ ເປັນຕົ້ນແມ່ນມາດຕາ 4 ເວົ້າເລື່ອງນະໂຍບາຍຂອງລັດໃນການສ້າງຕາໜ່າງຄວາມປອດໄພໃຫ້ຊາວໜຸ່ມລາວ ແລະ ການສ້າງເງື່ອນໄຂໃນການສົ່ງເສີມວິຊາຊີບໃຫ້ຊາວໜຸ່ມ; ມາດຕາ 5 ຫລັກການເຄື່ອນໄຫວກ່ຽວກັບຊາວໜຸ່ມລາວທີ່ໄດ້ກຳນົດ 5 ຫລັກການ; ມາດຕາ 8 ປະເພດຊາວໜຸ່ມລາວ ໄດ້ກໍານົດ 16 ປະເພດ ໂດຍໄດ້ແຍກປະເພດອອກເປັນຢ່າງລະອຽດ. ພ້ອມນັ້ນ ສສຊ ໄດ້ສະເໜີໃຫ້ໂຮມບາງປະເພດເຂົ້າກັນ; ມາດຕາ 47 ການຈັດຕັ້ງຊາວໜຸ່ມລາວທີ່ໄດ້ກຳນົດສອງການຈັດຕັ້ງຄື: ຄະນະຊາວໜຸ່ມປະຊາຊົນ ປະຕິວັດລາວ ແລະ ສະຫະພັນຊາວໜຸ່ມລາວ ແລະ ມາດຕາ 52 ອົງການຄຸ້ມຄອງຊາວໜຸ່ມລາວ ທີ່ໄດ້ກຳນົດ 4 ອົງການຄຸ້ມຄອງຄື: ຄະນະຊາວໜຸ່ມປະຊາຊົນປະຕິວັດລາວ, ສະຫະພັນຊາວໜຸ່ມລາວ, ການຈັດຕັ້ງຂອງລັດ ແລະ ການຈັດຕັ້ງຂອງພາກສ່ວນອື່ນ ເພື່ອແນໃສ່ເຮັດໃຫ້ກົດໝາຍສະບັບນີ້ຮັບປະກັນໃນການຄຸ້ມຄອງ, ການປົກປ້ອງ, ສົ່ງເສີມ ແລະ ພັດທະນາຊາວໜຸ່ມລາວຢ່າງເປັນລະບົບ ສາມາດປະກອບສ່ວນເຂົ້າໃນການປົກປັກຮັກສາປະເທດຊາດໄດ້ຢ່າງມີປະສິດທິພາບ ແລະ ປະສິດທິຜົນສູງຂຶ້ນ.
