ທຣຳ ບໍ່ຍອມຮັບວ່າ ໂຈໄບເດັນ ເປັນຜູ້ຊະນະການເລືອກຕັ້ງປະທານາທິບໍດີ

ສຳນັກຂ່າວ NBC News ລາຍງານ ເມື່ອວັນນີ້ 17 ພະຈິກວ່າ ທີ່ປຶກສາຂອງ ທຣຳ ທ່ານ O’Brien ກ່າວໃນໂທລະພາບແຫ່ງຊາດສະຫະລັດວ່າ ທ່ານ ໂຈໄບເດັນ ເປັນຜູ້ຊະນະການເລືອກຕັ້ງປະທານາທິບໍດີ ແຕ່ ທຣຳບໍ່ຍອມຮັບ. ທ່ານກ່າວຢໍ້າວ່າ ແນວໃດກໍຕາມ ຖ້າຫາກການນັບບັດຄະແນນສຽງຈຳນວນຫຼວງຫຼາຍຄືນໃໝ່ ທຣຳ ອາດຈະເປັນປະທານາທິບໍດີສະໄໝທີສອງກໍເປັນໄດ້, ແຕ່ທີ່ປຶກສາຄົນນີ້ຍອມຮັບວ່າ ໃນຂະນະນີ້ ໄບເດັນ ແລະ ຄາມາລາ ແຮຣິດ ເປັນຜູ້ຊະນະແລ້ວ.

ທ່ານໃຫ້ຄຳສັງເກດເພີ່ມເຕີມວ່າ ທິມງານຂອງ ໄບເດັນ ຈະເຕັມໄປດ້ວຍມືອາຊີບທີ່ແຂງແກ່ນ ເພາະພວກເຂົາລ້ວນແຕ່ເປັນຜູ້ທີ່ຢູ່ໃນທຳນຽບຂາວມາຍາວນານ ໃນຫຼາຍສະໄໝຂອງປະທານາທິບໍດີທີ່ຜ່ານມາ. ການມອບໂອນອຳນາດຈະເກີດຂຶ້ນກໍຕໍ່ເມື່ອການຮ້ອງຟ້ອງຂອງ ທຣຳ ບໍ່ເປັນຜົນ.

ໜັງສືພິມ The Hill ສັງເກດວ່າ ທັດສະນະຂອງ O’Brien ມີຄວາມແຕກຕ່າງກັບເຈົ້າໜ້າທີ່ຫຼາຍຄົນໃນຄະນະລັດຖະບານຂອງ ທຣຳ ໂດຍສະເພາະແມ່ນກັບທ່ານ ໄມ ພອມແພວ ລັດຖະມົນຕີການຕ່າງປະເທດ. ທ່ານ ພອມແພວ ປະກາດວ່າ ບາດກ້າວຕໍ່ໄປ ກໍຍັງແມ່ນອຳນາດ ທຣຳ ເປັນຄັ້ງທີສອງ.