5 ປີຜ່ານມາສະມາຄົມນັກທຸລະກິດແມ່ຍິງລາວໄດ້ເຕີບໃຫຍ່ຂະຫຍາຍຕົວ
ໃນວັນທີ 17 ພະຈິກນີ້, ສະມາຄົມນັກທຸລະກິດແມ່ຍິງ ໄດ້ຈັດກອງປະຊຸມໃຫຍ່ຄັ້ງທີ III ຂອງຕົນຂຶ້ນທີ່ໂຮງແຮມແລນມາກ ນະຄອນຫລວງວຽງຈັນ ເພື່ອສະຫລຸບວຽກງານ 5 ປີ ແລະ ຄົ້ນຄວ້າປະກອບຄຳຄິດຄຳເຫັນໃສ່ແຜນງານຕໍ່ໜ້າ ໂດຍການເຂົ້າຮ່ວມຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ.
ທ່ານ ນາງ ຈັນທະຈອນ ວົງໄຊ ປະທານສະມາຄົມທຸລະກິດແມ່ຍິງ ໄດ້ກ່າວໃນກອງປະຊຸມວ່າ: ຕະຫລອດໄລຍະ 5 ປີທີ່ຜ່ານມາ, ສະພາບການຮ່ວມມືສາກົນກ່ຽວກັບການດໍາເນີນທຸລະກິດການຄ້າແບບບໍ່ມີພົມແດນໄດ້ເປີດກວ້າງໄປທົ່ວທຸກມຸມໂລກຄື: ສປປ ລາວເຮົາກໍໄດ້ເຂົ້າເປັນສະມາຊິກອົງການການຄ້າໂລກ (WTO) ແລະ ໄດ້ເຂົ້າຮ່ວມເຄື່ອນໄຫວໃນວຽກງານປະຊາຄົມເສດຖະກິດອາຊຽນ (AEC) ໃນປີ 2015 ເປັນກາລະໂອກາດອັນດີໃຫ້ແກ່ນັກທຸລະກິດລາວເຮົາ ນັບທັງນັກທຸລະກິດແມ່ຍິງກໍເຊັ່ນກັນ ໂດຍສະເພາະໄດ້ເຊີດຊູຄວາມຮູ້, ຍົກສູງຄວາມສາມາດຂອງຕົນເຂົ້າໃນການດໍາເນີນທຸລະກິດຢ່າງຖືກຕ້ອງ, ສອດຄ່ອງກັບລະບຽບກົດໝາຍ ແລະ ສາມາດພັດທະນາທຸລະກິດຂອງຕົນໃຫ້ກ້າວສູ່ເວທີສາກົນເຊັ່ນຕໍ່ບັນດາປະເທດອາຊຽນ ແລະ ພາກພື້ນ, ນັກທຸລະກິດແມ່ຍິງລາວເຮົາກໍໄດ້ຖືກຄັດເລືອກເຂົ້າເປັນຄະນະບໍລິຫານເຄືອຂ່າຍຜູ້ປະກອບການແມ່ຍິງອາຊຽນ Asean Wornen Enterprinourst Network (AWEN) ໃນປີ 2015 ແລະ ໄດ້ປະກອບສ່ວນເຂົ້າໃນຄະນະ Asean BAC ໃນປີ 2016. ແຕ່ໃນຂະນະດຽວກັນ, ສະພາບພາຍໃນ ແລະ ສາກົນໄດ້ມີຫລາຍປາກົດການເກີດຂຶ້ນໄດ້ເປັນທັງສິ່ງທ້າທາຍຕໍ່ການດໍາເນີນທຸລະກິດ ແລະ ການຄ້າຂາຍຂອງພວກເຮົາ ໂດຍສະເພາະໄພທໍາມະຊາດ, ພະຍາດໂຄວິດ-19 ລະບາດໃນປີ 2019 ແລະ ແກ່ຍາວມາຈົນເຖິງປັດຈຸບັນ.
ແຕ່ເຖິງຢ່າງໃດກໍຕາມ, ໃນໄລຍະທີ່ຜ່ານມາ ພັກ-ລັດຖະບານເຮົາກໍໄດ້ເອົາໃຈໃສ່ເປັນພິເສດ, ມີນະໂຍບາຍທີ່ຖືກຕ້ອງ ເພື່ອຟື້ນຟູເສດຖະກິດສັງຄົມແຫ່ງຊາດໃຫ້ເຂົ້າສູ່ຄວາມເປັນລະບົບ, ປ່ຽນວິທີການດໍາເນີນທຸລະກິດຂອງຕົນເຊັ່ນ: ຫັນວິກິດເປັນໂອກາດ ແລະ ຍົກສູງລະດັບຄວາມຮູ້ຄວາມສາມາດຫັນເປັນທັນສະໄໝ, ປັບປຸງການຄຸ້ມຄອງບໍລິຫານທຸລະກິດຜ່ານລະບົບອອນລາຍ, ພ້ອມການກະກຽມຄວາມພ້ອມຕ່າງໆໃນການຮັບມືຕໍ່ທຸກສະພາບການທີ່ອາດຈະເກີດຂຶ້ນ ເຊິ່ງໄດ້ສ້າງເງື່ອນໄຂ ແລະ ກາລະໂອກາດອັນໃໝ່ໃຫ້ນັກທຸລະກິດແມ່ຍິງລາວໄດ້ຂຸດຄົ້ນກໍາລັງແຮງບົ່ມຊ້ອນຂອງຕົນບືນຕົວພັດທະນາການດຳເນີນທຸລະກິດຂອງຕົນໄດ້ເຕີບໃຫຍ່ເຂັ້ມແຂງ.
