ອົດສະຕຣາລີ ສະໜັບສະໜູນການເຂົ້າເຖິງວັກແຊງ ທີ່ປອດໄພ ມີປະສິດ ທິພາບຢູ່ພາກພື້ນອາຊີຕາເວັນອອກສຽງໃຕ້ ແລະ ອາຊີ-ປາຊີຟິກ

ໃນອາທິດຜ່ານມາ, ລັດຖະບານອົດສະຕຣາລີ ໄດ້ປະກາດທຶນຊ່ວຍເຫລືອການເຂົ້າເຖິງວັກແຊງທີ່ປອດໄພ ເປັນຈໍານວນເງິນ 500 ລ້ານໂດລາອົດສະຕຣາລີ ໃຫ້ແກ່ພາກພື້ນອາຊີອາເວັນອອກສຽງໃຕ້ ແລະ ອາຊີ-ປາຊີຟິກ ຜ່ານສູນຮັບປະກັນຄວາມປອດໄພດ້ານສຸຂະພາບ.

ທ່ານ ເມຣີ ເພັນ ລັດຖະມົນຕີກະຊວງການຕ່າງປະເທດ ແລະ ການຄ້າ ທັງເປັນລັດຖະມົນຕີ ກະຊວງແມ່ຍິງອົດສະຕຣາລີ ກ່າວວ່າ: ປະເທດທີ່ຢູ່ໃນພາກພື້ນຂອງພວກເຮົາບໍ່ມີບູລິມະສິດສູງໃນການເຂົ້າເຖິງການສັກຢາວັກແຊງໂຄວິດ-19. ການແຈກຢາຍວັກແຊງໄວ ແລະ ປອດໄພໃນພາກພື້ນປາຊີຟິກ ແລະ ອາຊີຕາເວັນອອກສຽງໃຕ້ ໝາຍເຖິງພວກເຮົາສາມາດກັບຄືນສູ່ສະພາບການເດີນທາງແບບປົກກະຕິ, ການທ່ອງທ່ຽວ ແລະ ການຄ້າກັບປະເທດຄູ່ຄ້າທີ່ສຳຄັນຂອງພວກເຮົາໃນພາກພື້ນໄດ້ຂໍ້ລິເລີ່ມນີ້ ຈະເປັນການປະກອບສ່ວນອັນສຳຄັນເຂົ້າໃນການຕອບສະໜອງຄວາມຕ້ອງການວັກແຊງ ຂອງພາກພື້ນອາຊີຕາເວັນອອກສຽງໃຕ້. ໂຄງການນີ້ຈະປະກອບມີການຈັດຊື້ ແລະ ການແຈກຢາຍຢາວັກແຊງ ລວມໄປເຖິງການປະເມີນຄວາມປອດໄພ ແລະ ປະສິດທິພາບຂອງຢາ ແລະ ການສະໜັບສະໜູນດ້ານເຕັກນິກ ສຳລັບເພື່ອສະໜັບສະໜູນນະໂຍບາຍ ແລະ ການວາງແຜນການສ້າງພູມຕ້ານທານໃນອະນາຄົດ.

ທ່ານເອກອັກຄະລັດຖະທູດອົດສະຕຣາລີປະຈຳ ສປປ ລາວ ກ່າວວ່າ: ນີ້ແມ່ນການປະກາດທີ່ສຳຄັນຂອງລັດຖະບານອົດສະຕຣາລີທີ່ຈະສືບຕໍ່ຈາກການປະກອບສ່ວນຂອງພວກເຮົາດ້ານວຽກງານຕ້ານຕໍ່ການລະບາດຂອງໂຄວິດ-19 ໃນໄລຍະຜ່ານມາ. ມັນແມ່ນນະໂຍບາຍທັງໝົດຂອງພວກເຮົາທີ່ຈະເຫັນພາກພື້ນອິນໂດ-ປາຊີຟິກໃຫ້ສາມາດເຂົ້າເຖິງວັກແຊງທີ່ໄດ້ຮັບການອະນຸມັດຈາກອົງການອະນາໄມໂລກທີ່ປອດໄພ ແລະ ມີປະສິດຕິຜົນ. ຂໍ້ລິເລີ່ມດັ່ງກ່າວສະແດງໃຫ້ເຫັນເຖິງມິດຕະພາບ ແລະ ຄວາມມຸ້ງໝັ້ນຂອງອົດສະຕຣາລີ ເພື່ອສ້າງໃຫ້ເກີດຜົນໄດ້ຮັບດ້ານບວກທາງເສດຖະກິດ-ສັງຄົມ ແລະ ການຟື້ນຟູຄວາມເຂັ້ມແຂງດ້ານສຸຂະພາບໃນ ສປປ ລາວ.