ຈໍາໜ່າຍອອກຕ່າງປະເທດ (ໄທ, ກໍາປູເຈຍ, ມຽນມາ) 949,33 ລ້ານກິໂລວັດໂມງ
ທ່ານ ຈັນທະບູນ ສຸກອາລຸນ ເລຂາຄະນະພັກຮາກຖານ ຜູ້ວ່າການອຳນວຍການໃຫ່ຍ ລັດວິສາຫະກິດໄຟຟ້າລາວ ໄດ້ລາຍງານໃຫ້ຮູ້ ໃນວັນທີ 18 ພະຈິກ 2020 ນີ້ວ່າ: ຕະຫລອດໄລຍະຜ່ານມາຈົນເຖິງປັດຈຸບັນ ລັດວິສາຫະກິດໄຟຟ້າລາວ ໄດ້ເອົາໃຈໃສ່ຢ່າງຕັ້ງໜ້າ ພັດທະນາວຽກງານໄຟຟ້າ ໄປສູ່ຊົນນະບົດ, ສາມາດສະໜອງພະລັງງານໄຟຟ້າຮັບໃຊ້ທັງໝົດ 148 ເມືອງ, ຄິດເປັນ 100% ທີ່ ຢູ່ໃນທຸກເທດສະບານແຂວງ, ນະຄອນຫລວງ, ເທດສະບານເມືອງ ແລະ ນະຄອນ. ຈຳນວນບ້ານທີ່ໄດ້ໃຊ້ໄຟຟ້າທັງໝົດມີ 8.449 ບ້ານ, ເທົ່າກັບ 93% ຂອງຈຳນວນບ້ານ ແລະ 95% ຂອງຈໍານວນຄອບຄົວໃນທົ່ວປະເທດ ໄດ້ໃຊ້ໄຟຟ້າແບບຖາວອນແລ້ວ. ຄຽງຄູ່ກັນນັ້ນ, ລັດວິສາຫະກິດໄຟຟ້າລາວ ໄດ້ມີການຄຸ້ມຄອງ ລະບົບສາຍສົ່ງແຮງສູງ 230 ກິໂລໂວນ, ຍາວທັງ ໝົດ 6.700 ກິໂລແມັດ, 115 ກິໂລໂວນ, ຍາວທັງໝົດ 2.640 ກິໂລແມັດ, ແຮງກາງ ຍາວທັງໝົດ 33.757 ກິໂລແມັດ ແລະ ແຮງຕໍ່າ ຍາວທັງໝົດ 20.158 ກວ່າກິໂລແມັດ, ມີສະຖານີຈ່າຍໄຟຟ້າ 68 ແຫ່ງ, ໝໍ້ແປງ 31.916 ໜ່ວຍ, ມີກຳລັງຕິດຕັ້ງ 5.301 MVA ແລະ ໝໍ້ນັບໄຟ 1.582.812 ໜ່ວຍ.
ສໍາລັບ ການຈໍາໜ່າຍພະລັງງານໄຟຟ້າ ສາມາດປະຕິບັດໄດ້ທັງໝົດ 5.201 ລ້ານກິໂລວັດໂມງ ໃນນັ້ນຈຳໜ່າຍພາຍໃນປະເທດ 4.069 ລ້ານກິໂລວັດໂມງ, ຈໍາໜ່າຍອອກຕ່າງປະເທດ (ໄທ, ກໍາປູເຈຍ, ມຽນມາ) 949,33 ລ້ານກິໂລວັດໂມງ, ຂາຍໃຫ້ລູກຄ້າລາຍໃຫຍ່ພາຍໃນປະເທດ 185 ລ້ານກິໂລວັດໂມງ. ພ້ອມນັ້ນ, ໃນກຸ່ມປະເທດອາຊຽນ ສປປ ລາວ ແມ່ນປະເທດທຳອິດ ທີ່ໄດ້ລິເລີ່ມ ສົ່ງຂາຍໄຟຟ້າແບບເຊື່ອມໂຍງໃນກຸ່ມປະເທດອາຊຽນ ປັດຈຸບັນ ໄດ້ສົ່ງອອກແລ້ວ 100 ເມັກກາວັດ ໂດຍຜ່ານປະເທດລາວ-ໄທ-ມາເລເຊຍ ໃນໂຄງການ LTM, ພ້ອມດຽວກັນນັ້ນ, ໃນປີ 2021 ຈະສົ່ງໃຫ້ໄດ້ 300 ເມັກກາວັດ, ພ້ອມຈະສືບຕໍ່ເຈລະຈາຊື້-ຂາຍ ແລະ ເຊື່ອມໂຍງໄປຮອດປະເທດສິງກະໂປ.
ທ່ານ ຈັນທະບູນ ສຸກອາລຸນ ໃຫ້ຮູ້ຕື່ມວ່າ: ສຳລັບ ທິດທາງ, ໜ້າທີ່ລວມໃນການພັດທະນາວຽກງານໄຟຟ້າໃນຕໍ່ໜ້າ ລັດວິສາຫະກິດໄຟຟ້າລາວ ຈະອີງໃສ່ຄໍາຂວັນທີ່ວ່າ: “ເພີ້ມລາຍຮັບຫລຸດລາຍຈ່າຍ, ຈໍາໜ່າຍໄຟໃຫ້ມີຄຸນນະພາບ”, ຈະສືບຕໍ່ຄົ້ນຄວ້າໂຄງສ້າງລາຄາໄຟຟ້າ ພາກຈໍາໜ່າຍຮ່ວມກັບກະຊວງພະລັງງານ ແລະ ບໍ່ແຮ່ ຄືນໃໝ່ ໂດຍອີງຕາມການຊີ້ນໍາຂອງລັດຖະບານ ເພື່ອໃຫ້ລາຄາໄຟເໝາະສົມກັບສະພາບເສດຖະກິດ-ສັງຄົມຂອງຊາດ ແລະ ຄວາມຢູ່ລອດຂອງໄຟຟ້າລາວ. ເນັ້ນໃສ່ການບໍລິການລູກຄ້າໃຫ້ມີຄວາມເພິ່ງພໍໃຈ, ຫລີກລຽງຫາງສຽງຂອງສັງຄົມໃຫ້ໄດ້ໜ້ອຍທີ່ສຸດ, ພັດທະ ນາໄຟຟ້າໃຫ້ກາຍເປັນລະບົບແຫ່ງຊາດທີ່ເປັນລະບົບຄົບຊຸດ, ຮັບປະກັນການສະໜອງໄຟຟ້າເພື່ອການຊົມໃຊ້ຢູ່ພາຍໃນໃຫ້ມີປະສິດທິພາບ, ປະສິດທິຜົນ, ມີຄວາມປອດໄຟ, ທົ່ວເຖິງ, ພຽງພໍ ແລະ ດ້ວຍລາ ຄາທີ່ສົມເຫດສົມຜົນ, ພັດທະນາການເຊື່ອມໂຍງດ້ານພະລັງງານກັບປະເທດເພື່ອບ້ານໃກ້ຄຽງ ແລະ ພາກພື້ນ ແນໃສ່ສ້າງລາຍຮັບທີ່ເປັນພື້ນຖານ ໃຫ້ແກ່ການພັດທະນາປະເທດຊາດ ທັງໃນສະເພາະໜ້າ ແລະ ໃນໄລຍະຍາວ ໃຫ້ສົມກັບຄຳຂັວນຂອງໄຟຟ້າລາວ ທີ່ວ່າ: “ສະໜອງໄຟໃຫ້ພໍ, ບໍລິການໄວ ດ້ວຍຄວາມປອດໄພ ຊົມໃຊ້ໃຫ້ເກີດຜົນ”.
