ປຽບທຽບວັກຊີນຂອງ 4 ບໍລິສັດ

ປຽບທຽບວັກຊີນຂອງ 4 ບໍລິສັດ - 111915680 photo 2020 04 23 18 02 42 - ປຽບທຽບວັກຊີນຂອງ 4 ບໍລິສັດ
ປຽບທຽບວັກຊີນຂອງ 4 ບໍລິສັດ - Untitled design - ປຽບທຽບວັກຊີນຂອງ 4 ບໍລິສັດ

ບໍລິສັດ​ຫລາຍ​ແຫ່ງ​ກຳລັງ​ເລັ່ງພັດທະນາ​ວັກ​ຊີ​ນປ້ອງ​ກັນ​ໄວຣັສ​ໂຄ​ໂຣນາສາ​ຍພັນ​ໃໝ່, ວັກ​ຊີ​ນຂອງ Pfizer-BioNTech ​ແລະ ວັກ​ຊີ​ນຂອງ Moderna ​ໄດ້ຜົນ​ເຖິງ 94% ​ໃນ​ການ​ທົດ​ລອງ​ຂັ້ນທີ​ສາມ, ສ່ວນ​ຂອງ Oxford-AstraZeneca ​ໄດ້ຜົນ 70%.

ປັດຈຸບັນ, ວັກ​ຊີ​ນຂອງ 4 ບໍລິສັດ​ຄື: Oxford-AstraZeneca, Pfizer-BioNTech, Sputnik ​ແລະ Moderna ຕ່າງ​ລາຍ​ງານ​ຜົນ​ເບື້ອງຕົ້ນ​ໃນ​ການ​ທົດ​ລອງ​ຂັ້ນທີ 3.

 

ວັກ​ຊີ​ນຂອງ​ໃຜ​ໄດ້ຜົນ​ດີ​ທີ່​ສຸດ

ອາສາ​ສະໝັກ​ຫລາຍ​ກວ່າ 20.000 ຄົນ​ເຂົ້າຮ່ວມ​ການ​ທົດ​ລອງ​ວັກ​ຊີ​ນຂັ້ນທີ 3 ຂອງ Oxford-AstraZeneca ​ເຄິ່ງໜຶ່ງ​ຢູ່​ສະຫະຣາຊະ​ອານາຈັກ ​ແລະ ​ເຄິ່ງໜຶ່ງ​ຢູ່​ບຣາຊິ​ລ ​ໂດຍ​ມີ​ການ​ແບ່ງ​ກຸ່ມ​ອາສາ​ສະໝັກ​ເປັນ 3 ກຸ່ມ ​ເພື່ອ​​ໃຫ້​ຮັບ​ວັກ​ຊີ​ນ 1 ​ໂດ​ສ ຫລື 2 ​ໂດ​ສ ຫລື ວັກ​ຊີ​ນຂີ້​ຕົວະ. ຈາກ​ນັ້ນຈະ​ມີ​ການ​ປະ​ເມີນ​ຜົນ​ການ​ຕອບ​ສະໜອງ​ໃນ​ວັນ​ທີ່​ອາສາ​ສະໝັກ​ເຫລົ່າ​ນີ້​ຮັບ​ວັກ​ຊີ​ນ ​ແລະ ຈະ​ຕິດຕາມ​ຜົນ​ໃນ​ອີກ 1 ອາທິດ, 2 ອາທິດ ​ແລະ 4 ອາທິດ ຫລັງ​ການ​ຮັບ​ວັກ​ຊີ​ນທັງ 2 ​ໂດ​ສ.

ນັກວິ​ໄຈ​ບອກ​ວ່າ: ວັກ​ຊີ​ນນີ້​ປ້ອງ​ກັນ​ການ​ຕິດພະຍາດ​ໂຄ​ວິດ-19 ​ໄດ້ຜົນ 70%.

​ເມື່ອ​ອາສາ​ສະໝັກ​ໄດ້​ຮັບ​ວັກ​ຊີ​ນ​ໃນ​ໂດ​ສທີ່ “ສູງ” ສອງ​ໂດ​ສ ສາມາດ​ປ້ອງ​ກັນ​ການ​ຕິດພະຍາດ​ໄດ້ 62% ​ແຕ່​ຕົວ​ເລກ​ນີ້​ຈະ​ສູງ​ເຖິງ 90% ຖ້າ​ໄດ້​ຮັບ​ວັກ​ຊີ​ນ​ໂດ​ສ “ຕໍ່າ” ໜຶ່ງ​ຄັ້ງ ​ແລ້ວ​ຖັດມາ​ແມ່ນ​ໂດ​ສ “ສູງ” ໜຶ່ງ​ຄັ້ງ, ​ແຕ່​ຍັງ​ບໍ່​ຮູ້​ເຫດ​ທີ່​ແນ່ນອນ​ວ່າ: ​ເປັນ​ຫຍັງ​ຈຶ່ງ​ໃຫ້​ຜົນ​ທີ່​ແຕກ​ຕ່າງ​ກັນ. ນອກຈາກ​ນີ້ ຍັງ​ພົບ​ການ​ຕິດ​ເຊື້ອທີ່​ບໍ່​ສະ​ແດງ​ອາການ​ໃນ​ລະດັບ​ທີ່​ຕໍ່າລົງ​ໃນ​ກຸ່ມ​ທີ່​ຮັບ​ວັກ​ຊີ​ນ​ໂດ​ສທຳ​ອິດ​ຕໍ່າ ​ແລະ ​ໂດ​ສຫລັງ​ສູງ​ນຳ​ອີກ.

ສ່ວນ Pfizer ​ໄດ້​ເປີດ​ເຜີຍ​ຄວາມ​ຄືບ​ໜ້າການ​ທົດ​ລອງ​ໃນ​ຂັ້ນທີ 3 ​ເຊິ່ງກຳລັງ​ດຳ​ເນີນ​ຢູ່ ​ໂດຍ​ຂໍ້​ມູນ​ຫລ້າ​ສຸດ​ບົ່ງ​ບອກ​ວ່າ: ວັກ​ຊີ​ນຊະນິດ​ນີ້​​ຈະ​ມີ​ປະສິດທິພາບ​ໃນ​ການ​ປ້ອງ​ກັນ​ການ​ຕິດ​ເຊື້ອ​ໄວຣັສ​ໂຄ​ໂຣນາສາ​ຍພັນ​ໃໝ່​ໃຫ້​ກຸ່ມ​ຄົນ​ອາຍຸ 65 ປີ​ຂຶ້ນ​ໄປ​ໄດ້​ເຖິງ 94%.

ປັດຈຸບັນ​ບໍລິສັດ Pfizer ​ແລະ BioNTech ​ເຊິ່ງ​ເປັນ​ຜູ້​ຄິດ​ຄົ້ນວັກ​ຊີ​ນປ້ອງ​ກັນ​ພະຍາດ​ໂຄ​ວິດ-19 ປະກາດ​ວ່າ: ຜົນ​ການ​ທົດ​ລອງ​ວັກ​ຊີ​ນນີ້​ກັບ​ຄົນ 43.500 ຄົນ ​ໃນ 6 ປະ​ເທດ ​ໄດ້​ແກ່ ອາ​ເມ​ລິ​ກາ, ​ເຢຍລະ​ມັນ, ບຣາຊິ​ລ, ອາ​ເຈນ​ຕິ​ນາ, ອາ​ຟຣິກາ​ໃຕ້ ​ແລະ ຕວກກີ ​ໂດຍ​ຜູ້​ເຂົ້າຮ່ວມ​ການ​ທົດ​ລອງ​ຈະ​ໄດ້​ຮັບ​ວັກ​ຊີ​ນ 2 ​ໂດສ​ໃນ​ໄລຍະ​ເວລາ​ຫ່າງ​ກັນ 3 ອາທິດ ພົບ​ວ່າ​ເຮັດ​ໃຫ້​ຄົນ 90% ມີ​ພູມ​ຄຸ້ມ​ກັນ​ຈາກ​ພະຍາດ​ໂຄ​ວິດ-19.

ບໍລິສັດ​ທັງ​ສອງ​ແຫ່ງ​​ໄດ້​ຍື່ນ​ເລື່ອງ​ຂໍ​ອະນຸມັດ​ເປັນ​ກໍລະນີ​ສຸກ​ເສີນ​ໃຫ້​ໃຊ້​ວັກ​ຊີ​ນຊະນິດ​ນີ້​ໂດຍ​ໄວ​ທີ່​ສຸດ.

ສ່ວນ​ຜົນ​ເບື້ອງຕົ້ນຂອງ​ການ​ທົດ​ລອງ​ໃນ​ຂັ້ນທີ​ສາມ​ຂອງ Moderna ບໍລິສັດ​ເຕັກ​ໂນ​ໂລ​ຊີ​ຊີວະ​ພາບ ​ແລະ ອຸປະກອນ​ການ​ແພດ​ຈາກ​ອາ​ເມ​ລິ​ກາ ຊີ້​ວ່າ: ວັກ​ຊີ​ນຊະນິດ​ໃໝ່​ຂອງ​ບໍລິສັດ​ມີ​ປະສິດທິພາບ​ໃນ​ການ​ປ້ອງ​ກັນ​ການ​ຕິດ​ເຊື້ອ​ໄວຣັສ​ໂຄ​ໂຣນາສາ​ຍພັນ​ໃໝ່​ໄດ້​ເກືອບ 95%.

Moderna ທົດ​ລອງ​ວັກ​ຊີ​ນຊະນິດ​ນີ້​ກັບ​ອາສາ​ສະໝັກ 30.000 ຄົນ​​ໃນ​ອາ​ເມ​ລິ​ກາ ​ໂດຍ​ໃຫ້​ອາສາ​ສະໝັກ​ເຄິ່ງໜຶ່ງ​ໄດ້​ຮັບ​ວັກ​ຊີ​ນ 2 ​ໂດ​ສ ​ໂດຍ​ມີ​ໄລຍະ​ເວລາ​ການ​ໃຫ້​ວັກ​ຊີ​ນຫ່າງ​ກັນ 4 ອາທິດ, ສ່ວນ​ອາສາ​ສະໝັກ​ອີກ​ເຄິ່ງໜຶ່ງ​ໄດ້​ຮັບ​ຢາ​ຂີ້​ຕົວະ ​ເຊິ່ງບໍ່​ມີ​ຢາ​ແທ້.

ຜົນ​ປາກົດ​ວ່າ: ມີ​ອາສາ​ສະໝັກ​ທີ່​ໄດ້​ຮັບ​ວັກ​ຊີ​ນ​ແທ້​ຕິດ​ເຊື້ອພະຍາດ​ໂຄ​ວິດ-19 ພຽງ 5 ຄົນ, ສ່ວນ​ກຸ່ມ​ທີ່​ໄດ້​ຮັບ​ຢາ​ຂີ້​ຕົວະ​ຕິດ​ເຊື້ອ 90 ຄົນ. ບໍລິສັດ​ລະບຸ​ວ່າ: ວັກ​ຊີ​ນຊະນິດ​ນີ້​ສາມາດ​ປ້ອງ​ກັນ​ການ​ຕິດ​ເຊື້ອ​ໄດ້ 94,5%.

ນອກຈາກ​ນີ້ ຂໍ້​ມູນ​ຍັງ​ສະ​ແດງ​ໃຫ້​ເຫັນ​ວ່າ: ​ໃນ​ການ​ທົດ​ລອງ​ຄັ້ງນີ້​ມີ​ຜູ້​ຕິດ​ເຊື້ອພະຍາດ​ໂຄ​ວິດ-19 ອາການ​ຮຸນ​ແຮງ 11 ຄົນ ​ແຕ່​ບໍ່​ແມ່ນ​ຄົນ​ໃນ​ກຸ່ມ​ທີ່​ໄດ້​ຮັບ​ວັກ​ຊີ​ນ​ແທ້.

ສ່ວນ​ວັກ​ຊີ​ນຂອງ​ບໍລິສັດ​ກາມາ​ເລ​ຢາ (Sputnik 5) ​ເຊິ່ງຮູ້​ຜົນ​ເບື້ອງຕົ້ນ​ໃນ​ການ​ທົດ​ລອງ​ຂັ້ນທີ 3 ​ແລ້ວ​ເຊັ່ນ​ກັນ ພົບ​ວ່າ: ປະສິດທິພາບ​ຂອງ​ວັກ​ຊີ​ນມີ 92%.

ຄວາມ​ທ້າ​ທາຍ​ໃນ​ການ​ພັດທະນາ​ວັກ​ຊີ​ນ​ໂຄ​ວິດ​ຄື: ການ​ກະ​ຕຸ້ນ​ໃຫ້​ຮ່າງກາຍ​ຕໍ່ສູ້​ກັບ​ເຊື້ອ​ໄວຣັສ​ໄດ້​ບໍ່​ວ່າ​ຜູ້​ຮັບ​ວັກ​ຊີ​ນຈະ​ມີ​ອາຍຸ​ຫລາຍ​ເທົ່າ​ໃດ​ກໍ​ຕາມ.

ປຽບທຽບວັກຊີນຂອງ 4 ບໍລິສັດ - Wave100S AD to Website 2020 0 - ປຽບທຽບວັກຊີນຂອງ 4 ບໍລິສັດ

ຜູ້​ທີ່​ມີ​ອາຍຸ​ຫລາຍ​ກວ່າ ມີ​ລະບົບ​ພູມ​ຄຸ້ມ​ກັນ​ທີ່​ອ່ອນ​ແອ​ລົງ ​ເຮັດ​ໃຫ້​ວັກ​ຊີ​ນຫລາຍ​ຊະນິດ​ບໍ່​ໄດ້ຜົນ​ດີ​ເທົ່າ​ກັບ​ຜູ້​ທີ່​ມີ​ອາຍຸ​ນ້ອຍ​ກວ່າ.

ຜົນ​ການ​ທົດ​ລອງ​ເຫລົ່າ​ນີ້​ຂອງ​ມະຫາວິທະຍາ​ໄລ​ອ໊ອກຟອດ ​ເຊິ່ງຜ່ານ​ການ​ປະ​ເມີນ​ຜົນ​ຂອງ​ຜູ້​ຊ່ຽວຊານ​ໃນ​ວາລະສານ ​ແລນ​ເຊັດ ລະບຸ​ວ່າ: ​ເລື່ອງ​ນີ້​ອາດ​ບໍ່​​ແມ່ນ​ບັນຫາ ​ໂດຍ​ຜົນ​ການ​ທົດ​ລອງ​ພົບ​ວ່າ: ຜູ້​ໃຫຍ່​ທີ່​ມີ​ອາຍຸ 56-69 ປີ ​ແລະ ຫລາຍ​ກວ່າ 70 ປີ ມີ​ການ​ຕອບ​ສະໜອງ​ຂອງ​ພູມ​ຄຸ້ມ​ກັນ​ໃກ້​ຄຽງ​ກັບ​ຜູ້​ໃຫຍ່​ທີ່​ມີ​ອາຍຸ 18-55 ປີ.

 

ການ​ເກັບ​ຮັກສາ​ວັກ​ຊີ​ນ

​ເຖິງ​ວ່າ​ຜົນ​ກາ​ນທົດ​ລອງວັກ​ຊີ​ນຂັ້ນທີ 3 ຂອງ​ Oxford ໄດ້ຜົນ​ໜ້ອຍ​ກວ່າ​ຂອງ​ Pfizer-BioNTech ​ແລະ Moderna ​ແຕ່​ໃນ​ໄລຍະ​ຍາວ ມີ​ໂອກາດ​ວັກ​ຊີ​ນຊະນິດ​ນີ້​ອາດ​ຈະ​ຖືກ​ນຳ​ໄປ​ໃຊ້​ໄດ້​ງ່າຍກວ່າ ​ເພາະ​ບໍ່​ຈຳ​ເປັນ​ຕ້ອງ​ເກັບ​ຮັກສາ​ໄວ້​ໃນ​ອຸນຫະພູມ​ທີ່​ມີ​ຄວາມ​ເຢັນ​ສູງ ​ໂດຍ​ສາມາດ​ເກັບ​ຮັກສາ​ໄວ້​ໃນ​ອຸນຫະພູມ​ຂອງ​ຕູ້​ເຢັນ​ປົກກະຕິ ​ເຊັ່ນ​ດຽວ​ກັບ​ວັກ​ຊີ​ນຂອງ​ບໍລິສັດ​ກາມາ​ເລ​ຢາ (Sputnik 5).

ສ່ວນ​ວັກ​ຊີ​ນຂອງ Pfizer-BioNTech ຕ້ອງ​ເກັບ​ຮັກສາ​ໄວ້​ໃນ​ອຸນຫະພູມ -70 ອົງສາ ​ແລະ ສາມາດ​ເກັບ​ໄວ້​ໃນ​ຕູ້​ເຢັນ​ທຳ​ມະ​ດາ​ໄດ້​ພຽງ 5 ວັນ ​ແລະ ວັກ​ຊີ​ນຂອງ​ຂອງ​ບໍລິສັດ Moderna ຕ້ອງ​ເກັບ​ຮັກສາ​ໄວ້​ໃນ​ອຸນຫະພູມ -20 ອົງສາ ​ເປັນ​ເວລາ​ບໍ່​ເກີນ 6 ​ເດືອນ ​ແລະ ສາມາດ​ເກັບ​ຮັກສາ​ໄວ້​ໃນ​ຕູ້​ເຢັນ​ທຳ​ມະ​ດາ​ໄດ້ 1 ​ເດືອນ.

ລັດຖະບານ​ສະຫະຣາຊະ​ອານາຈັກ ​ໄດ້​ສັ່ງ​ຊື້ວັກ​ຊີ​ນຂອງ Oxford ​ເຊິ່ງຜະລິດ​ໂດຍ​ບໍລິສັດ​ AstraZeneca 100 ລ້ານ​ໂດ​ສ ຫລາຍ​ກວ່າ​ຂອງ​ບໍລິສັດ​ອື່ນ. ຂະນະ​ທີ່​ສັ່ງ​ຊື້ວັກ​ຊີ​ນຂອງ Pfizer-BioNT​ech ຈຳນວນ 40 ລ້ານ​ໂດ​ສ ​ແລະ ວັກ​ຊີ​ນຂອງ Moderna ອີກ 5 ລ້ານ​ໂດ​ສ.

 

ຊະນິດ​ຂອງ​ວັກ​ຊີ​ນ

ວັກ​ຊີ​ນຂອງ Oxford ​ຜະລິດ​ມາ​ຈາກ​ໄວຣັສ​ໄຂ້ຫວັດ​ທົ່ວ​ໄປ (ຫລື ຮູ້ຈັກ​ກັນ​ໃນ​ຊື່ adenovirus) ທີ່​ອ່ອນ​ແອ ​ໂດຍ​ໄດ້​ນຳ​ເອົາ​ເຊື້ອນີ້​ມາ​ຈາກ​ລີງ​ຊິ​ມ​ແປນ​ຊີ​ນ​ໄປ​ດັດ​ແປງ​ພັນທຸ​ກຳ ​ເພື່ອ​ທີ່​ເຊື້ອ​ໄວຣັສນີ້​ຈະ​ບໍ່​ສາມາດ​ຂະຫຍາຍຕົວ​ໃນ​ມະນຸດ​ໄດ້. ຈາກ​ນັ້ນຈະ​ເອົາ​ຢີນທີ່​ໄດ້​ມາ​ຈາກ​ປຸ່ມ​ໂປຣຕີນ​ຂອງ​ເຊື້ອ​ໄວຣັສ​ໂຄ​ໂຣນາ​ໄປ​ໃສ່​ໃນ​ໄວຣັສ​ໄຂ້ຫວັດ​ທີ່​ອ່ອນ​ແອ ​ແລະ ບໍ່​ເປັນ​ອັນຕະລາຍ​ຕໍ່​ຄົນ​ດັ່ງກ່າວ.

ວັກ​ຊີ​ນທີ່​ໄດ້​ຈະ​ຖືກ​ນຳ​ໄປ​ສັກ​ໃຫ້​ຄົນ​​ເຈັບ. ຈຸ​ລັງ​ໃນ​ຮ່າງກາຍ​ມະນຸດ​ຈະ​ສ້າງ​ປຸ່ມ​ໂປຣຕີນ​ໄວຣັສ​ໂຄ​ໂຣນາ​ຂຶ້ນ ​ເປັນ​ການ​ກະ​ຕຸ້ນ​ໃຫ້​ລະບົບ​ພູມ​ຄຸ້ມ​ກັນ​ສ້າງ​ແອນ​ຕິ​ບໍດີ ຫລື ພູມ​ຄຸ້ມ​ກັນ​ຂຶ້ນ ​ແລະ ກະ​ຕຸ້ນ​​ໃຫ້​ທີ-​ຈຸ​ລັງທຳລາຍ​ຈຸ​ລັງທີ່​ຕິດ​ເຊື້ອ.

​ເມື່ອ​ຄົນ​ເຈັບ​ໄດ້​ຮັບ​ເຊື້ອ​ໄວຣັສ​ໂຄ​ໂຣນາ​ເຂົ້າສູ່​ຮ່າງກາຍ ຄວາມ​ຈິງ​ແລ້ວ​ພູມ​ຄຸ້ມ​ກັນ ​ແລະ ທີ​ຈຸ​ລັງ​ຈະ​ຖືກ​ກະ​ຕຸ້ນ​ໃຫ້​ຕໍ່ສູ້​ກັບ​ເຊື້ອ​ໄວຣັສ.

​ໂດ​ຍວັກ​ຊີ​ນຂອງ​ບໍລິສັດ​ກາມາ​ເລ​ຢາ​ຂອງຣັດ​ເຊຍ​ກໍ​ໃຊ້​ເຊື້ອ​ໄວຣັສທີ່​ຖືກ​ດັດ​ແປງ​ພັນທຸ​ກຳ​ເປັນ​ພາຫະ​​ເຊັ່ນ​ດຽວ​ກັນ.

ສ່ວນ​ວັກ​ຊີ​ນຂອງ Pfizer-BioNTech ​ແລະ ບໍລິສັດ Moderna ​ເອີ້ນ​ວ່າ​ວັກ​ຊີ​ນອາຣ​ເອັນ​ເອ ​ເຊິ່ງຜະລິດ​ຈາກ​ຊິ້ນສ່ວນ​ສານ​ພັນທຸ​ກຳ​ຂອງ​ເຊື້ອ​ໄວຣັສ​ໂຄ​ໂຣນາສາ​ຍພັນ​ໃໝ່ ​ເມື່ອ​ຖືກ​ສັກ​ເຂົ້າ​ໄປ​ໃນ​ຮ່າງກາຍ ຈະ​ກະ​ຕຸ້ນ​ໃຫ້​ພູມ​ຄຸ້ມ​ກັນ​ຂອງ​ຜູ້​ຮັບ​ວັກ​ຊີ​ນສ້າງ​ແອນ​ຕິ​ບໍດີ​ທີ່​ໃຊ້​ຕໍ່ສູ້​ກັບ​ເຊື້ອ​ໄວຣັສ​ໄດ້.

ປັດຈຸບັນ ບໍ່​ເຄີຍ​ມີ​ວັກ​ຊີ​ນອາຣ​ເອັນ​ເອທີ່​ໄດ້​ຮັບ​ການ​ຮັບຮອງ​ໃຫ້​ໃຊ້​ໃນ​ຄົນ​ມາ​ກ່ອນ ​ແຕ່​ແນວ​ຄິດ​ໃນ​ການ​ພັດທະນາ​ວັກ​ຊີ​ນດ້ວຍ​ວິທີ​ນີ້​ເຄີຍ​ມີ​ການ​ສຶກສາວິ​ໄຈ​ມາ​ກ່ອນ ​ແລະ ​ເຄີຍ​ມີ​ການ​ທົດ​ລອງ​ທາງ​ຄລີ​ນິກ​ເພື່ອ​ໃຊ້​ປ້ອງ​ກັນ​ພະຍາດ​ອື່ນໆ.

ປຽບທຽບວັກຊີນຂອງ 4 ບໍລິສັດ - WhatsApp Image 2020 05 27 at 5 - ປຽບທຽບວັກຊີນຂອງ 4 ບໍລິສັດ
ປຽບທຽບວັກຊີນຂອງ 4 ບໍລິສັດ - WhatsApp Image 2020 05 27 at 5 - ປຽບທຽບວັກຊີນຂອງ 4 ບໍລິສັດ
error: Alert: ເນື້ອຫາຂ່າວມີລິຂະສິດ !!