ບານເຕະລາວຫວນມາຄຶກຄັກ ຕ້ອນຮັບວັນຊາດທີ 2 ທັນວາ
ໂດຍ: ທິດກໍ່າ
ເວົ້າໄດ້ວ່າ, ນັບແຕ່ມີການແຜ່ລະບາດຂອງເຊື້ອພະຍາດໂຄວິດ-19 ເປັນຕົ້ນມາ ເຮັດໃຫ້ພາລະກິດການສ້າງສາພັດທະນາປະເທດຊາດໃນຫລາຍຂົງເຂດ, ຫລາຍຂະແໜງການ ແລະ ຫລາຍຂະບວນການໄດ້ມິດງຽບ, ຖົດຖອຍຢຸດສະງັກໄປຕາມໆກັນ ເຊິ່ງໜຶ່ງໃນວຽກງານ ຫລື ຂະແໜງການທີ່ໄດ້ຮັບຜົນກະທົບໂດຍກົງກໍແມ່ນຂະແໜງການສຶກສາ ແລະ ກິລາ. ໃນຊ່ວງເດືອນມີນາຫາເມສາ 2019 ຜ່ານມາ ກໍຈົນເຖິງຂັ້ນໄດ້ປິດການຮຽນການສອນໃນທົ່ວປະເທດ. ສ່ວນທາງດ້ານສິລະປະ, ກິລາເວົ້າໄດ້ວ່າໄດ້ງົດການເຄື່ອນໄຫວໄປຕາມໆກັນ ຍ້ອນທຸກສິ່ງທຸກຢ່າງໃຜກໍພ້ອມກັນປະຕິບັດມາດຕະການປ້ອງກັນ ແລະ ຕ້ານການແຜ່ລະບາດຂອງພະຍາດໂຄວິດ-19 ທີ່ລັດຖະບານ ກໍຄືຄະນະສະເພາະກິດໄດ້ວາງອອກ. ເວົ້າໄດ້ວ່າການງົດກິດຈະກຳເຄື່ອນໄຫວນ້ອຍໃຫຍ່ຕ່າງໆ ກໍເພື່ອຫລີກລ່ຽງການແຜ່ລະບາດຂອງເຊື້ອພະຍາດໂຄວິດ-19 ທີ່ຈະມາສັງເວີຍຊີວິດອິນຊີ ແລະ ຄວາມສະຫງົບສຸກຂອງບ້ານເມືອງ ກໍຄືຄວາມຢູ່ດີມີສຸກຂອງປະຊາຊົນບັນດາເຜົ່າໃນທົ່ວປະເທດ. ຕໍ່ຜົນກະທົບອັນໃຫຍ່ຫລວງທີ່ສຸດທາງດ້ານການກິລາມວນຊົນຢູ່ບ້ານເຮົາທີ່ພວມຈະມີບັນຍາກາດຄຶກຄັກ, ຄຶກຄື້ນມ່ວນຊື່ນໃນທົ່ວປະເທດ ກໍແມ່ນການກະກຽມໃຫ້ແກ່ການຈັດງານມະຫະກຳກິລາແຫ່ງຊາດ ທີ່ຈະຈັດຂຶ້ນຢູ່ແຂວງຊຽງຂວາງ ກໍຈົນໄດ້ແກ່ຍາວຖືກໂຈະ ແລະ ມາຮອດປັດຈຸບັນກໍຍັງບໍ່ທັນສາມາດເປີດຂຶ້ນໄດ້ຕາມຄວາມມຸ້ງຫວັງ ແລະ ຍັງບໍ່ຮູ້ວ່າເມື່ອໃດ, ໂອກາດໃດຈຶ່ງຈະມີເງື່ອນໄຂຈັດຂຶ້ນ ແລະ ໄດ້ສະຫລອງກັນຢ່າງຍິ່ງໃຫຍ່ ເພາະທຸກສິ່ງທຸກຢ່າງມັນກໍຄານຳພະຍາດຈັງໄຮໂຄວິດ-19 ມາກົດໜ່ວງກີດຂວາງ.
ໃນຄວາມເປັນຈິງແລ້ວ, ສະພາບການແຜ່ລະບາດຂອງເຊື້ອພະຍາດໂຄວິດ-19 ມາຮອດໄລຍະປັດຈຸບັນກໍຍັງບໍ່ທັນມີວີ່ແວວຈະຫລຸດໜ້ອຍຖອຍລົງ ແລະ ໝົດໄປຈາກໂລກໃບນີ້ເທື່ອ. ຫລ້າສຸດຈາກສະຖິຕິມາຮອດວັນທີ 22 ພະຈິກ 2020 ໄດ້ມີຜູ້ຕິດເຊື້ອທັງໝົດ 55.527.000 ກວ່າຄົນ ໃນນີ້ມີຜູ້ເສຍຊີວິດໄປແລ້ວເຖິງ 1.335.000 ກວ່າຄົນ, ປິ່ນປົວໃຫ້ຫາຍດີ 38.171.000 ກວ່າຄົນ ແລະ ພວມປິ່ນປົວຢູ່ໂຮງໝໍ 16.020.000 ກວ່າຄົນ. ສ່ວນ ສປປ ລາວ ຂອງພວກເຮົາຫລ້າສຸດມາຮອດວັນທີ 23 ພະຈິກ 2020 ໄດ້ມີຜູ້ຕິດເຊື້ອທັງໝົດ 39 ຄົນ, ປົວໃຫ້ຫາຍດີໄປແລ້ວ 24 ຄົນ ແລະ ພວມປິ່ນປົວຢູ່ໂຮງໝໍ 15 ຄົນ. ຈົນມາຮອດໄລຍະນີ້ ພວກເຮົາກໍຍັງຢູ່ໃນຂັ້ນຕອນຂອງການປະຕິບັດບັນດາມາດຕະການຜ່ອນຜັນຂອງລັດຖະບານ ກໍຄືຄະນະສະເພາະກິດວາງອອກຈົນກວ່າທຸກຢ່າງມັນຈະຄີ່ຄາຍໄປຕາມການເວລາ.
ແຕ່ແນວໃດກໍຕາມ, ອີງໃສ່ມາດຕະການຜ່ອນຜັນເພື່ອຕ້ານ ແລະ ສະກັດກັ້ນກັບການລະບາດຂອງພະຍາດໂຄວິດ-19 ຢູ່ປະເທດເຮົາຂ້ອນຂ້າງເຮັດໄດ້ດີ ທັງໄປຖືກທິດຖືກທາງ ແລະ ຜູ້ທີ່ຕິດເຊື້ອພະຍາດນີ້ກໍມີໜ້ອຍ ເຊິ່ງສ່ວນໃຫຍ່ຜູ້ຕິດເຊື້ອແມ່ນນຳມາຈາກຕ່າງປະເທດ ສົມທົບກັບບ້ານເຮົາມີຄວາມເຂັ້ມງວດກວດຂັນໃນການຄວບຄຸມ, ຕ້ານ ແລະ ສະກັດກັ້ນເປັນຢ່າງ ຈຶ່ງເຮັດໃຫ້ສະພາບການແຜ່ລະບາດຂອງເຊື້ອພະຍາດໂຄວິດ-19 ຢູ່ໃນວົງຈຳກັດ ແລະ ດີທີ່ສຸດຢູ່ພາຍໃນປະເທດ ກໍຄືລະດັບພາກພື້ນ. ເພາະສະນັ້ນ ຈາກປັດໄຈ ແລະ ສາເຫດດັ່ງກ່າວ, ການຈັດການແຂ່ງຂັນກິລາບານເຕະຈຶ່ງໄດ້ປາກົດຕົວຂຶ້ນພາຍໃນປະເທດ ເປັນຕົ້ນໃນໄລຍະຜ່ານມາ ກໍມີການຈັດແຂ່ງຂັນໃນລະດັບສະໂມສອນທີ່ຫາກໍສຳເລັດເສັດສິ້ນໄປເມື່ອບໍ່ພໍເທົ່າໃດເດືອນມານີ້.
ແນວໃດກໍດີ, ມາຮອດໂອກາດນີ້ ພໍດີເໝາະກັບການກະກຽມໃຫ້ຂະບວນການຕ້ອນຮັບ ແລະ ສະເຫລີມສະຫລອງວັນຊາດທີ 2 ທັນວາ ຄົບຮອບ 45 ປີ ໃຫ້ມີຄວາມໝາຍຢ່າງເລິກເຊິ່ງ, ຍິ່ງໃຫຍ່ ແລະ ເຕັມໄປດ້ວຍບັນຍາກາດອັນຟົດຟື້ນ, ທາງກະຊວງສຶກສາ ກໍຄືທາງສະຫະພັນກິລາບານເຕະແຫ່ງຊາດລາວ ຈຶ່ງໄດ້ຈັດໃຫ້ມີການແຂ່ງຂັນກິລາບານເຕະໃນທົ່ວປະເທດຂຶ້ນ ເພື່ອຊີງລາງວັນເງິນສົດ 100 ລ້ານກີບ ພ້ອມຂັນລາງວັນ ເຊິ່ງໄດ້ເລີ່ມຈັດການແຂ່ງຂັນມາແຕ່ຕົ້ນເດືອນພະຈິກຈົນມາຮອດວັນທີ 21 ພະຈິກ 2020 ຈຶ່ງມີການແຂ່ງຂັນໃນຮອບຊີງຊະນະເລີດ ລະຫວ່າງ ທີມບານເຕະຍິງ ໄດ້ແກ່ ນະຄອນຫລວງວຽງຈັນ ພົບກັບ ແຂວງຊຽງຂວາງ. ສ່ວນຄູ່ບານເຕະປະເພດຊາຍນັ້ນ ໄດ້ແກ່ ຈຳປາສັກ ພົບກັບ ຫລວງພະບາງ. ຜ່ານການແຂ່ງຂັນພາຍໃຕ້ບັນຍາກາດອັນຟົດຟື້ນດຸເດືອດ ເຊິ່ງຕ່າງຝ່າຍກໍມຸ້ງໝັ້ນຍາດເອົາໄຊຊະນະຢ່າງກະຕືລືລົ້ນ ທັງເດັດດ່ຽວໜຽວແໜ້ນ ສຸດທ້າຍມາຄູ່ທີມບານເຕະຍິງນະຄອນຫລວງວຽງຈັນກໍເອົາຊະນະທີມບານເຕະຍິງແຂວງຊຽງຂວາງ. ສ່ວນປະເພດບານເຕະຊາຍ ຊະນະເລີດໄດ້ແກ່ ແຂວງຈຳປາສັກ ສາມາດຍາດເອົາຂັນລາງວັນຊະນະເລີດໄປຄອງໜຶ່ງໜ່ວຍ ພ້ອມເງິນສົດ 100 ລ້ານກີບ.
ສະຫລຸບແລ້ວ, ຜ່ານບັ້ນແຂ່ງຂັນກິລາບານເຕະໃນທົ່ວປະເທດຄັ້ງນີ້ ສິ່ງທີ່ເປັນປັດໄຈໃໝ່ ແລະ ໜ້າພາກພູມໃຈທີ່ສຸດໃນມື້ແຂ່ງຂັນຮອບຊີງຊະນະເລີດໃນມື້ວັນທີ 21 ພະຈິກຜ່ານມາ ມີຜູ້ເຂົ້າຊົມຈົນແໜ້ນເຕັມສະໜາມເຖິງ 2 ໝື່ນກວ່າຄົນ ເຊິ່ງເປັນເຫດການບໍ່ເຄີຍມີໃນປະຫວັດສາດຂອງວົງການບານເຕະລາວເຮົາ ຫລື ຖ້າຈະສົມທຽບໃສ່ຈຳນວນຄົນທີ່ໄດ້ເຂົ້າຮ່ວມຊົມມະຫະກຳກິລາຊີເກມ 2009 ທີ່ລາວເປັນເຈົ້າພາບແມ່ນມີຈຳນວນເພີ່ມຂຶ້ນຫລາຍກວ່າ. ຕາມທິດກໍ່າວ່າ, ອັນສາເຫດທີ່ມີຄົນເຂົ້າຊົມຫລາຍກໍມີເງື່ອນໄຂ ແລະ ປັດໄຈຄວາມພ້ອມຫລາຍຢ່າງ ເປັນຕົ້ນກິລາບານເຕະກິລາຍອດນິຍົມ, ສົມທົບກັບການຈັດຕາຕະລາງເສິກຊີງຊະນະເລີດຄັ້ງນີ້ແມ່ນຖືກວັນພັກ ຄືວັນເສົາ ອັນເປັນວັນພັກລັດຖະການ. ອັນສອງມາແມ່ນໃກ້ຮອດວັນຊາດ ແລະ ການຈັດການແຂ່ງຂັນບານເຕະຄັ້ງນີ້ກໍແມ່ນຄົບຮອບ 45 ປີພໍດີ ແລະ ອັນທີສາມມາ ນັບແຕ່ມີໂຄວິດ-19 ມາກົດໜ່ວງຄວາມຈະເລີນຂອງບ້ານເມືອງ ແລະ ໄດ້ທຳລາຍຊີວິດອິນຊີຂອງຄົນໃນທົ່ວໂລກ ກໍຄືຢູ່ປະເທດເຮົາສ່ວນຫລາຍໃຜກໍບໍ່ຄ່ອຍໄດ້ໄປໃສ, ຢູ່ແຕ່ບ່ອນເກົ່າມາເກືອບປີເຕັມແລ້ວ. ເພາະສະນັ້ນ ເມື່ອມີລາຍການດີໆຄືແນວນີ້ ໃຜກໍມີຄວາມສົນໃຈຢາກໄປເບິ່ງ, ໄປທ່ຽວ, ໄປຊົມເຊຍ ເພາະຫລາຍໆປີມັນມີພຽງຄັ້ງໜຶ່ງ ຈຶ່ງມີຄົນຂານຕອບຮັບຫລາຍທີ່ສຸດໃນລາຍການແຂ່ງຂັນກິລາໃນທົ່ວປະເທດແບບນີ້. ນອກຈາກນັ້ນ ຫລາຍໆຄົນຍັງໃຫ້ທັດສະນະຕື່ມວ່າ: ໃນເງື່ອນໄຂທີ່ປະເທດເຮົາພວມສົ່ງເສີມການທ່ອງທ່ຽວພາຍໃນ ຄວນຈັດໃຫ້ມີກິດຈະກຳດີໆໃຫ້ຫລາຍໆຍິ່ງຂຶ້ນ ທັງຢູ່ສູນກາງ ແລະ ທ້ອງຖິ່ນ ເພື່ອສົ່ງເສີມການທ່ອງທ່ຽວພາຍໃນປະເທດໃຫ້ເຕີບໃຫຍ່ເຂັ້ມແຂງຄຶກຄັກ. ອີກປະການໜຶ່ງກໍເພື່ອເຮັດໃຫ້ວົງການບານເຕະລາວກ້າວສູ່ສາກົນໃຫ້ຫລາຍຂຶ້ນ.
