ເປີດນໍາໃຊ້ແລ້ວລະບົບໄຟເຍືອງທາງໃນ 7 ເສັ້ນທາງ ແລະ ລະບົບນໍ້າພຸປະຕູໄຊ
ພິທີເປີດການນໍາໃຊ້ລະບົບໄຟເຍືອງທາງໃນ 7 ເສັ້ນທາງ ແລະ ລະບົບນໍ້າພຸປະຕູໄຊ ໃນໂຄງການແສງສະຫວ່າງຂອງເຂດເທດສະບານໃຈກາງຕົວເມືອງນະຄອນຫລວງວຽງຈັນ ໄດ້ມີຂຶ້ນໃນວັນທີ 27 ພະຈິກນີ້, ເຊິ່ງເປັນໂຄງການຊ່ວຍເຫລືອລ້າຈາກລັດຖະບານຈີນ ໂດຍການເຂົ້າຮ່ວມຂອງທ່ານ ສິນລະວົງ ຄຸດໄພທູນ ເລຂາຄະນະພັກ ເຈົ້າຄອງນະຄອນຫລວງວຽງຈັນ, ທ່ານ ສົມສະຫວາດ ເລັ່ງສະຫວັດ ທີ່ປຶກສາ ຄະນະບໍລິຫານງານສູນກາງພັກ, ທ່ານ ຈ່ຽງຈ້າຍຕຸງ ເອກອັກຄະລັດຖະທູດຈີນ ປະຈໍາລາວ ພ້ອມພາກສ່ວນກ່ຽວຂ້ອງສອງປະເທດ ລາວ-ຈີນ ເຂົ້າຮ່ວມ.
ທ່ານ ຊົງເລົ່າ ຢົງນູ ຫົວໜ້າພະແນກພະລັງງານ ແລະ ບໍ່ແຮ່ ນະຄອນຫລວງວຽງຈັນ ໄດ້ກ່າວວ່າ: ໂຄງການຍົກລະດັບໄຟຟ້າໃນນະຄອນຫລວງວຽງຈັນ ດ້ເລີ່ມສຶກສາສຳຫລວດມາແຕ່ປີ 2016 ແລະ ໄດ້ສ້າງເປັນໂຄງການສະເໜີຂໍການຊ່ວຍເຫລືອຈາກສ ສປ ຈີນ, ມາຮອດປີ 2018 ໄດ້ຮັບການແຈ້ງຕອບຕົກລົງເຫັນດີໃຫ້ທຶນຊ່ວຍເຫລືອລ້າຈາກລັດຖະບານ ສປ ຈີນ, ເຊິ່ງໂຄງການນີ້ແມ່ນນອນຢູ່ໃນກອບສັນຍາວ່າດ້ວຍການຮ່ວມມືດ້ານເສດຖະກິດ ແລະ ເຕັກນິກ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານ ສປ ຈີນ ສະບັບລົງວັນທີ 30 ພຶດສະພາ 2018, ໃນວັນທີ 6 ທັນວາ 2019 ທັງສອງຝ່າຍໄດ້ເຊັນບົດບັນທຶກການສຳຫລວດພາກສະໜາມຮ່ວມກັນ ເຊິ່ງ ປະກອບມີ 3 ໜ້າວຽກຫລັກຄື: ຍົກລະດັບລະບົບໄຟຟ້າເຂດເທດສະບານ ແລະຊານເມືອງໃນນະຄອນຫລວງວຽງຈັນ, ປັບປຸງລະບົບນໍ້າພຸຢູ່ສວນປະຕູໄຊ ແລະຍົກລະດັບລະບົບໄຟແສງສະຫວ່າງເຍືອງທາງໃນ 7 ເສັ້ນທາງ ຂອງເຂດໃຈກາງນະຄອນຫລວງວຽງຈັນ.
ສຳລັບຄວາມຄືບໜ້າການຈັດຕັ້ງປະຕິບັດໂຄງການດັ່ງກ່າວ ເຊິ່ງພາຍຫລັງສອງຝ່າຍ ລາວ-ຈີນ ໄດ້ລົງມືຕິດຕັ້ງລະບົບດັ່ງກ່າວ ນັບແຕ່ວັນທີ 12 ກັນຍາ ປີ 2020 ຮອດປັດຈຸບັນ, ໂຄງການດັ່ງກ່າວໄດ້ສຳເລັດໂດຍພື້ນຖານໃນການກໍ່ສ້າງ-ຕິດຕັ້ງ ແລະສາມາດເປີດນໍາໃຊ້ຢ່າງເປັນທາງການ.
ເຖິງຢ່າງໃດກໍຕາມ, ໂຄງການນີ້ ຍັງມີວຽກຈໍານວນໜຶ່ງຈະຕ້ອງໄດ້ສືບຕໍ່ປະຕິບັດ ເຊັ່ນ: ການປັບປຸງທາງຍ່າງ, ບ່ອນຕິດຕັ້ງຕີນເສົາ, ຕິດຕັ້ງລະບົບກ້ອງວົງຈອນປິດ ແລະຫ້ອງຄວບຄຸມ ລວມທັງສັນຍານສົ່ງຂໍ້ມູນ ແລະອື່ນໆ ເຊິ່ງຈະໃຫ້ສໍາເລັດໃນວັນທີ 25 ກຸມພາ ປີ 2021 ແລະຄາດວ່າຈະໄດ້ມອບ-ຮັບໂຄງການ ໃນວັນທີ 25 ມີນາ ປີ 2021.
