ປະຊາຊົນບ້ານເຫລົາໝາດ ໄດ້ຮັບການຊ່ວຍເຫລືອຈາກກາແດງ

ບ້ານເຫລົາມາດ ເມືອງຈຳພອນ ແຂວງ ສະຫວັນນະເຂດ ເປັນບ້ານໜຶ່ງທີ່ໄດ້ຮັບຜົນກະທົບຈາກໄພທຳມະຊາດຢ່າງໜັກໃນເດືອນຜ່ານມາ, ເຊິ່ງໄດ້ສ້າງຄວາມເສຍຫາຍ ເປັນຕົ້ນແມ່ນ ໄຮ່ນາ, ຮົ້ວສວນ, ພື້ນທີ່ທຳການຜະລິດ ແລະ ອື່ນໆ ສູນເສຍ, ເຊິ່ງມີປະຊາຊົນຈໍານວນ 1.474 ຄົນ, ຍິງ 876 ຄົນ ໃນຈຳນວນ 266 ຄອບຄົວ ໄດ້ຮັບຜົນຈາກນ້ຳຖ້ວມ.

ອົງການກາແດງລາວ ກໍໄດ້ຕິດຕາມ ກຽ່ວກັບຜົນກະທົບຕໍ່ພໍ່ແມ່ປະຊາຊົນ ແລະ ກະກຽມໃຫ້ການຊ່ວຍເຫລືອ ແລະ ໄດ້ນຳເອົາເຄື່ອງບັນເທົາທຸກມາຊ່ວຍເຫລືອຜູ້ທີ່ເດືອດຮ້ອນຂາດເຂີນ, ເຊິ່ງປະກອບມີ:  ປະເພດ ເຂົ້າສານ, ນ້ຳດື່ມ, ປາກະປ໋ອງ, ໝີ່ ແລະ ເຄື່ອງສຸຂະອະນາໄມ ແລະ ອື່ນໆ ມາມອບໃຫ້ພໍ່ແມ່ປະຊາຊົນຈຳນວນ 266 ຄອບຄົວ, ລວມມູນຄ່າທັງໝົດ 81.662.000 ກີບ. ໂດຍການກ່າວມອບຂອງທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ. ເຄື່ອງທີ່ນຳມາຊ່ວຍເຫລືອໃນຄັ້ງນີ້, ໂດຍໄດ້ຮັບການສະໜັບສະໜູນ ຈາກສະພາກາແດງສິງກະໂປ.