ຫວຽດນາມພົບການຕິດເຊື້ອໂຄວິດ ໃນຊຸມຊົນຄັ້ງທຳອິດໃນຮອບ 3 ເດືອນ
ລັດຖະບານຫວຽດນາມຢືນຢັນການພົບຜູ້ຕິດເຊື້ອໂຄວິດ-19 ເຊິ່ງໄດ້ຮັບເຊື້ອຈາກພາຍໃນປະເທດ ເປັນຄົນທຳອິດໃນຮອບ 87 ວັນ.
ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງຫວຽດນາມອອກຖະແຫລງການໃນວັນທີ 30 ພະຈິກຜ່ານມາ ກ່ຽວກັບສະຖານະການພະຍາດໂຄວິດ-19 ຂອງປະເທດ ໃນວັນທີ 30 ພະຈິກ ຢືນຢັນສະຖິຕິຜູ້ຕິດເຊື້ອສະສົມຢ່າງໜ້ອຍ 1.347 ຄົນ, ປິ່ນປົວຫາຍແລ້ວ 1.179 ຄົນ ແລະ ເສຍຊີວິດສະສົມ 35 ຄົນ.
ເຖິງຢ່າງໃດກໍຕາມ, ລັດຖະບານຫວຽດນາມໃຫ້ຂໍ້ມູນເພີ່ມຕື່ມກ່ຽວກັບ “ຜູ້ຕິດເຊື້ອຄົນທີ 1.347” ເປັນຜູ້ຊາຍສັນຊາດຫວຽດນາມ ອາຍຸ 32 ປີ ປັດຈຸບັນອາໄສຢູ່ເຂດ 6 ເມືອງໂຮຈີມິນ ມີອາຊີບເປັນຄູສອນພາສາອັງກິດ ແລະ ຜົນການສອບສວນພະຍາດບົ່ງບອກວ່າ: ຜູ້ຕິດເຊື້ອຄົນນີ້ໄດ້ຮັບເຊື້ອຈາກ “ຜູ້ຕິດເຊື້ອຄົນທີ 1.342” ເຊິ່ງເປັນໝູ່ກັນ ປັດຈຸບັນມີອາຊີບເປັນພະນັກງານຕ້ອນຮັບຢູ່ເຮືອບິນ ແລະ ໄດ້ຮັບການຢືນຢັນວ່າຕິດເຊື້ອ ໃນວັນທີ 28 ພະຈິກຜ່ານມາ.
ສະຖານະການດັ່ງກ່າວຖືເປັນການພົບຜູ້ຕິດເຊື້ອຈາກພາຍໃນປະເທດ ເປັນຄັ້ງທຳອິດໃນຮອບ 87 ວັນ ແລະ ຢຸດສະຖິຕິຂອງເມືອງໂຮ່ຈີມິນ ເຊິ່ງບໍ່ພົບຜູ້ຕິດເຊື້ອພາຍໃນຊຸມຊົນຕໍ່ເນື່ອງ 120 ວັນ ຫລື ນັບແຕ່ການຢືນຢັນ “ຜູ້ຕິດເຊື້ອຄົນທີ 589” ໃນວັນທີ 2 ສິງຫາຜ່ານມາ.
