ບິວ ເກດ ຍັງຮັກສາອັນດັບ 1 ມະຫາເສດຖີໂລກ 4 ປີຕິດຕໍ່ກັນ ມີຊັບສິນ 86.000 ລ້ານໂດລາສະຫະລັດ
ວາລະສານຟອບ ເປີດເຜີຍລາຍງານການສຳຫລວດບຸກຄົນທີ່ມີຖານະຮັ່ງມີທີ່ສຸດໃນໂລກປະຈຳປີ 2017 ປາກົດ ວ່າ: ອັນດັບ 1 ເປັນຂອງທ່ານ ບິວ ເກດ ມະຫາເສດຖີຊາວອາເມລິກາ ຜູ້ຮ່ວມສ້າງຕັ້ງບໍລິສັດໄມໂຄຣຊອບ ດ້ວຍມູນຄ່າ ຊັບສິນປະມານ 86.000 ລ້ານໂດລາສະຫະລັດ ຖືເປັນປີທີ 4 ຕິດຕໍ່ກັນແລ້ວທີ່ທ່ານ ບິວ ເກດ ຢູ່ໃນຕຳແໜ່ງອະພິມະຫາ ເສດຖີຂອງໂລກ, ສ່ວນອັນດັບ 2 ເປັນຂອງທ່ານ ວໍເຣນ ບັບເຟດ ປະທານບໍລິສັດດ້ານການລົງທຶນເບິຣກເຊຍ ຮາທາເວ ດ້ວຍມູນຄ່າຊັບສິນ 75.600 ລ້ານໂດລາສະຫະລັດ, ຖັດມາແມ່ນອັນດັບ 3 ເປັນຂອງທ່ານ ເຈບ ເບຊໍ ຜູ້ສ້າງຕັ້ງອະເມ ຊອນ.
ອັນດັບ 5 ມີ 2 ຄົນ ຄືທ່ານ ມາຣກ ຊັດເກີເບິຣກ ຜູ້ສ້າງຕັ້ງເຟສບຸກ ແລະ ທ່ານ ອາມານຊິໂອ ອໍເຕກາ ຈາກແອັດ ສະປາຍ ເຈົ້າຂອງທຸລະກິດເຄື່ອງແຕ່ງກາຍຊາຣາ, ອັນດັບ 6 ທ່ານ ຄາຣລໍ ສະລິມ ເຈົ້າຂອງທຸລະກິດສື່ສານໂທລະຄົມ ມະນາຄົມຈາກເມັກຊິກ, ອັນດັບ 7 ທ່ານ ແລຣີ ເອວລິສັນ ຜູ້ຮ່ວມສ້າງຕັ້ງອໍຣາເຄິລ, ອັນດັບ 8 ແລະ 9 ເປັນຂອງອ້າຍນ້ອງ ຄອດ ຄືທ່ານ ຊາວ ແລະ ທ່ານ ເດວິດ, ອັນດັບທີ 10 ເປັນຂອງທ່ານ ໄມເຄິລ ບລູມເບີກ ອະດີດເຈົ້າຄອງນະຄອນ ນິວຢ໋ອກ ແລະ ຜູ້ສ້າງຕັ້ງສຳນັກຂ່າວບລູມເບີກ.
ຟອບລາຍງານວ່າ: ປະຊາກອນຂອງມະຫາເສດຖີພັນລ້ານຂອງໂລກເພີ່ມຂຶ້ນ 13% ຈາກປີຜ່ານມາ ເປັນ 2.043 ຄົນໃນປີນີ້ ຖືເປັນການເພີ່ມຈຳນວນມະຫາເສດຖີຫລາຍທີ່ສຸດໃນຮອບ 31 ປີຂອງການສຳຫລວດປະຈຳປີຂອງຟອບ ນັບແຕ່ເລີ່ມເຮັດມາ ໂດຍມີສະຫະລັດອາເມລິກາເປັນປະເທດທີ່ມີມະຫາເສດຖີພັນລ້ານໂດລາຫລາຍທີ່ສຸດ 656 ຄົນ ສາ ເຫດມາຈາກມູນຄ່າທີ່ເພີ່ມຂຶ້ນຂອງຕະຫລາດຫຸ້ນອາເມລິກາ ນັບແຕ່ທ່ານ ໂດນັນ ທຣຳ ເຂົ້າຮັບຕຳແໜ່ງປະທານາທິບໍດີ ສະຫະລັດອາເມລິກາ ຈາກຜົນການເລືອກຕັ້ງໃນເດືອນພະຈິກປີຜ່ານມາ, ຖັດມາແມ່ນປະເທດຈີນ 319 ຄົນ ແລະ ເຢຍ ລະມັນ 114 ຄົນ.
ການຈັດອັນດັບອະພິມະຫາເສດຖີໂລກປະຈຳປີນີ້ຈະຕ້ອງມີຊັບສິນຢ່າງໜ້ອຍ 3.700 ລ້ານໂດລາສະຫະລັດ ຈຶ່ງຈະ ເຂົ້າຢູ່ໃນ 500 ອັນດັບໄດ້.
