ໄລຍະ 5 ປີທີ່ຜ່ານມາ ຂະແໜງອຸດສາຫະກຳ ແລະ ການຄ້າ ຍາດໄດ້ຜົນງານທີ່ຍິ່ງໃຫຍ່

ໄລຍະ 5 ປີທີ່ຜ່ານມາ ຂະແໜງອຸດສາຫະກຳ ແລະ ການຄ້າ ຍາດໄດ້ຜົນງານທີ່ຍິ່ງໃຫຍ່ - 174233 - ໄລຍະ 5 ປີທີ່ຜ່ານມາ ຂະແໜງອຸດສາຫະກຳ ແລະ ການຄ້າ ຍາດໄດ້ຜົນງານທີ່ຍິ່ງໃຫຍ່

ໂດຍ: ລູກເມືອງພວນ

ຂະແໜງ ອຸດສາຫະກຳ ແລະ ການຄ້າ ເປັນອີກຂະແໜງການໜຶ່ງທີ່ມີຄວາມສຳຄັນຫຼາຍທາງດ້ານການພັດທະນາເສດຖະກິດຂອງປະເທດ, ຊຶ່ງຕະຫຼອດໄລຍະທີ່ຜ່ານມາ ຂະແໜງອຸດສາຫະກຳ ແລະ ການຄ້າ ໄດ້ມີຄວາມພະຍາຍາມຢ່າງຕັ້ງໜ້າໃນການປັບແຜນຍຸດທະສາດ ແລະ ວາງນະໂຍບາຍການຄ້າອອກມາຢ່າງມີຫົວຄິດປະດິດສ້າງ ແລະ ເໝາະສົມໃນທ່າມກາງເສດຖະກິດໂລກ ກໍຄື ເສດຖະກິດໃນພາກພື້ນມີການຜັນແປໄປຢ່າງສັບສົນ, ໂດຍສະເພາະແມ່ນສົງຄາມການຄ້າລະຫວ່າງສອງປະເທດຍັກໃຫ່ຍທາງດ້ານເສດຖະກິດ ດັ່ງສະຫະລັດ ແລະ ຈີນ ໄດ້ສ້າງຄວາມປັ່ນປ່ວນ, ສົ່ງຜົນກະທົບຕໍ່ເສດຖະກິດໂລກຢ່າງໜັກໜ່ວງໄລຍະທີ່ຜ່ານມາ. ໃນນັ້ນຂະແໜງອຸດສາຫະກຳ ແລະ ການຄ້າຂອງລາວເຮົາກໍໄດ້ຮັບຜົນກະທົບບໍ່ໜ້ອຍຈາກສົງຄາມດັ່ງກ່າວ. ດ້ານໜຶ່ງອີກ ການລະບາດຂອງເຊື້ອໄວຣັດ ໂຄໂຣນາສາຍພັນໃໝ່ ກໍສົ່ງຜົນກະທົບຕໍ່ເສດຖະກິດໂລກຢ່າງໜັກໜ່ວງເຊັ່ນດຽວກັນ. ສົ່ງຜົນກະທົບຕໍ່ເສດຖະກິດ ແລະ ການເງິນຂອງໂລກຫົດຕົວລົງທີ່ບໍ່ເຄີຍມີມາກ່ອນ, ເຮັດໃຫ້ການເຕີບໂຕເສດຖະກິດໂລກບໍ່ມີສະຖຽນລະພາບ, ເກີດຄວາມຜັນຜວນຢ່າງໜັກຕະຫຼອດໄລຍະປີ 2019-2020.

ເຖິງຢ່າໃດກໍຕາມ, ຂະແໜງອຸດສາຫະກຳ ແລະ ການຄ້າກໍໄດ້ມີຄວາມພະຍາຍາມເຮັດໃຫ້ເສດຖະກິດຂອງປະເທດມີການເຕີບໂຕຢ່າງຕໍ່ເນື່ອງ ຊຶ່ງຜົນງານດັ່ງກ່າວສະແດງອອກບາງດ້ານດັ່ງນີ້:

ໄລຍະ 5 ປີທີ່ຜ່ານມາ ຂະແໜງອຸດສາຫະກຳ ແລະ ການຄ້າ ຍາດໄດ້ຜົນງານທີ່ຍິ່ງໃຫຍ່ - Wave100S AD to Website 2020 0 - ໄລຍະ 5 ປີທີ່ຜ່ານມາ ຂະແໜງອຸດສາຫະກຳ ແລະ ການຄ້າ ຍາດໄດ້ຜົນງານທີ່ຍິ່ງໃຫຍ່
  1. ດ້ານອຸດສາຫະກຳປຸງແຕ່ງ ແລະ ຫັດຖະກຳ: ຄາດຄະເນລວມມູນຄ່າການຜະລິດອຸດສາຫະກຳປຸງແຕ່ງ ແລະ ຫັດຖະກຳ 5ປີ(2016-2020) ສະແດງອອກດັ່ງນີ້:
  • ຄາດວ່າຈະບັນລຸໄດ້ປະມານ 54.845 ຕື້ກີບ, ທຽບໃສ່ໄລຍະດຽວກັນ 2011-2015 ເພີ່ມຂຶ້ນ 87.3%, ເມື່ອທຽບໃສ່ແຜນການວາງໄວ້ປະຕິບັດໄດ້ 113%, ເພີ່ມຂຶ້ນສະເລ່ຍ 14,81%/ປີ.
  • ກາຜະລິດທີ່ພົ້ນເດັ່ນປະກອບມີ: ການຜະລິດສະບຽງອາຫານກວມ 32,05%, ຜະລິດເຄື່ອງດື່ມກວມ 21,66%, ຜະລິດເຄື່ອງນຸ່ງຫົ່ມກວມ 10,88%, ການຜະລິດໂລຫະຂັ້ນພື້ນຖານ(ເຫຼັກເສັ້ນ, ຫຼອມເຫຼັກ ແລະ ທາດເຫຼັກ) ກວມ 5,79%, ຜະລິດເຄື່ອງເຟີນິເຈີກວມ 3,19%, ການຜະລິດຕະພັນເຄື່ອງໜັງ, ການເອືອບ, ການຟອກກວມ 2,80%, ການຜະລິດຕະພັນຢາສູບກວມ 2,34%, ການຜະລິດແຜ່ນແພ ແລະ ຜະລິດຕະພັນກ່ຽວກັບເຊືອກ, ຕາໜ່າງ, ແຫ ແລະ ອື່ນໆ ກວມ 1,32%
  1. ດ້ານຈະລາຈອນສິນຄ້າ(ຂາຍຍົກ ຂາຍຍ່ອຍ ແລະ ບໍລິການ):

ຄາດຄະເນການຈະລາຈອນສິຄ້າ(ຂາຍຍົກ ຂາຍຍ່ອຍ ແລະ ບໍລິການ) 5 ປີ(2016-2020) ຄາດວ່າຈະບັນລຸປະມານ 292,180 ຕື້ກີບ, ທຽບໃສ່ໄລຍະດຽວກັນ 2011-2015 ເພີ່ມຂຶ້ນ95,7%, ທຽບໃສ່ແຜນການວາງອອກປະຕິບັດໄດ້ 100,30%. ອັດຕາເພີ່ມຂຶ້ນສະເລ່ຍ 12.67%/ປີ. ໃນນັ້ນໝວດເຄື່ອງກໍ່ສ້າງກວມ 12,66%, ໝວດສະບຽງອາຫານກວມ 12,02%, ໝວດນໍ້າມັນເຊື້ອໄຟ ແລະ ອາຍແກສກວມ 10,19%, ໝວດເຄື່ອງຫັດຖະກຳ ແລະ ຈັກສານກວມ 9,98%, ໝວດຜະລິດສິນຄ້າຮັບໃຊ້ຜະລິດກະສິກຳກວມ 8,43%, ໝວດພາຫະນະ ແລະ ເຄື່ອງອາໄຫຼ່ກວມ 7,27%, ໝວດເຄື່ອງດື່ມ, ເຫຼົ້າ ແລະ ຢາສູບກວມ 3,93%, ໝວດແຜ່ນແພ, ເຄື່ອງນຸ່ງຫົ່ມ, ກະເປົາ ແລະ ເກີບກວມ 1,48%.

  1. ການຄ້າກັບຕ່າງປະເທດ:
  • ຄາດຄະເນລວມມູນຄ່າສົ່ງອອກ 5 ປີ(2016-2020) ຄາດວ່າຈະບັນລຸປະມານ 26,668 ລ້ານດອນລາ, ທຽບໃສ່ໄລຍະດຽວກັນ 2011-2015 ເພີ່ມຂຶ້ນ 81,82%, ທຽບໃສ່ແຜນວາງອອກປະຕິບັດໄດ້ 103,04%, ອັດຕາເພີ່ມຂຶ້ນສະເລ່ຍ 11%/ປີ. ໃນນັ້ນການສົ່ງອອກທີ່ພົ້ນເດັ່ນລວມມີ:
  • ໄຟຟ້າກວມ 23,91%, ແຮ່ທອງກວມ 12.08%, ທອງແດງ ແລະ ເຄື່ອງຂອງທີ່ເຮັດດ້ວຍທອງແດງກວມ 7,56%, ໂຄງຮ່າງ, ຊິ້ນສ່ວນກ້ອງບັນທຶກພາບກວມ 4,22%, ເຄື່ອງດື່ມ(ນໍ້າ, ນໍ້າອັດລົມ, ເຄື່ອງດື່ມຊູກຳລັງ…)ກວມ 3,68%, ເຍື່ອໄມ້ ແລະ ເສດເຈ້ຍກວມ 3,37%, ເຄື່ອງນຸ່ງຫົ່ມກວມ 3,35%, ເຄື່ອງໄຟຟ້າ ແລະ ອູປະກອນເຄື່ອງໄຟຟ້າກວມ 3,20%, ໝາກກ້ວຍກວມ 3,15%, ຄຳປະສົມ ແລະ ຄຳແທ່ງກວມ 3,10%, ຢາງພາລາກວມ 2,61%, ງົວ ຄວາຍກວມ 2,06%, ມັນຕົ້ນກວມ 1,90%, ເກືອກາລີກວມ 1,62%, ນໍ້າຕານກວມ 1,62%, ກາເຟກວມ(ບໍ່ນັບປຸງແຕ່ງ)ກວມ 1,60%, ຢາສູບແລະ ຜະລິດຕະພັນຢາສູບກວມ 1,46%, ໝາກໄມ້(ໝາກໂມ, ໝາກຂາມ, ໝາກມ່ວງ…)ກວມ 1,28%. ຕະຫຼາດການສົ່ງອອກຕົ້ນຕໍແມ່ນ: ໄທ ກວມ 43,85%, ຈີນກວມ 27,26%, ຫວຽດນາມກວມ 15,62%, ອິນເດຍກວມ 2,47%, ຍີ່ປຸ່ນກວມ 1,54%, ເຢຍລະມັນກວມ 1,35%, ສະຫະລັດ ອາຣັບ ເອມີເຣດກວມ 0,40%. ເມື່ອທຽບໃສ່ແຜນການວາງໄວ້ປະຕິບັດໄດ້ 105,81%, ອັດຕາເພີ່ມຂຶ້ນສະເລ່ຍ 11,91%/ປີ.ໃນນັ້ນສິນຄ້ານຳເຂົ້າສ່ວນໃຫ່ຍແມ່ນ: ພາຫະນະທາງບົກ. ນອກຈາກນັ້ນແມ່ນລົດໄຖນາ ແລະ ລົດຈັກກວມ 10,84%, ນໍ້າມັນກາຊວນກວມ 9,82%, ອຸປະກອນກົນຈັກ(ນອກຈາກເຄື່ອງກົນຈັກພາຫະນະ)ກວມ 8,60%, ເຄື່ອງໄຟຟ້າ ແລະ ອຸປະກອນໄຟຟ້າກວມ 7,50%, ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າກວມ 6,97%, ເຄື່ອງດື່ມ(ນໍ້າ, ນໍ້າອັດລົມ, ຊູກຳລັງ…)ກວມ 3.91%, ຊິ້ນສ່ວນອາໄຫຼ່ລົດກວມ 3,22%, ເຫຼັກເສັ້ນ ແລະ ເຫຼັກຮູບປະພັນຕ່າງໆກວມ 2,97%, ນໍ້າມັນແອັດຊັງ, ແອັດຊັງພິເສດກວມ 2,35%, ພາລາສະຕິກ ແລະ ເຄື່ອງທີ່ເຮັດດ້ວຍພລາສຕິກກວມ 2.08%, ຊີມັງກວມ 1,61%. ບັນດາປະເທດນຳເຂົ້າຕົ້ນຕໍແມ່ນ: ໄທກວມ 57,94%, ຈີນກວມ 27,77%, ຫວຽດນາມກວມ 11,55%, ຍີ່ປຸ່ນກວມ 1,91%, ສ ເກົາຫຼີກວມ 1,31%, ອິນໂດເນເຊຍກວມ 0,83%, ສິງກະໂປກວມ 0,48%…
  1. ການຮ່ວມມືພາຍໃຕ້ຫຼາຍຝ່າຍ:
  • ສຳເລັດການປັບປຸງ ແລະ ຮ່າງນິຕິກຳຕ່າງໆ ຫຼາຍກວ່າ 100 ສະບັບກັບຕ່າງປະເທດ.
  • ຫຼຸດຜ່ອນອັດຕາພາສີໄດ້ຈຳນວນ 1.032 ລາຍການ, ຈາກທັງໝົດ 10.600 ລາຍການທີ່ໄດ້ເຈລະຈາ.
  • ສຳເລັດການສ້າງສູນຂໍ້ມູນຂ່າວສານການຄ້າດ້ານການບໍລິການຂອງ ສປປ ລາວ(Laos Services Portal).
  • ສຳເລັດການປະກາດການນຳໃຊ້ກົດໝາຍວ່າດ້ວຍການປົກປ້ອງຜົນກະທົບຈາກການນຳເຂົ້າພາຍໃຕ້ພັນທະສັນຍາອົງການການຄ້າໂລກ.
  • ສຳເລັດການແນະນຳກ່ຽວກັບການຈັດຕັ້ງປະຕິບັດມາດຕາ 9 ຂອງກົດໝາຍວ່າດ້ວຍການປົກປ້ອງຜູ້ຜະລິດທີ່ໄດ້ຮັບຜົນກະທົບຈາກການນຳເຂົ້າສິນຄ້າ.
  • ສຳເລັດການຄົ້ນຄ້ວາການເຂົ້າເປັນພາຄີຂອງສົນທີສັນຍາວ່າດ້ວຍການຊຶ້-ຂາຍສິນຄ້າລະຫວ່າງປະເທດ ແລະ ບົດຄົ້ນຄວ້າການເຂົ້າເປັນພາຄີຂອງສັນຍາວ່າດ້ວຍເຕັກໂນໂລຊີ ຂໍ້ມູນຂ່າວສານ.
  • ສຳເລັດການອອກຂໍ້ຕົກລົງວ່າດ້ວຍສິດທາງການຄ້າຂອງຜູ້ຄ້າຕ່າງປະເທດ.
  • ສຳເລັດການກຳນົດມາດຕະການທີ່ນອນໃນໝວດ B ແລະ ໝວດ C ຂອງສັນຍາວ່າດ້ວຍການອຳນວຍຄວາມສະດວກທາງດ້ານການຄ້າ ໃນຂອບອົງການການຄ້າໂລກ…
  1. ການພົວພັນການຄ້າໃນຂອບອະນຸພາກພຶື້ນ:
  • ສຳເລັດການເຈລະຈາເປີດຕະຫຼາດການຄ້າ ສິນຄ້າຮອບທີ 4 ແລະ ສືບຕໍ່ເຈລະຈາເປີດຕະຫຼາດດ້ານບໍລິການ, ການລົງທຶນ ແລະ ການອຳນວຍຄວາມສະດວກທາງການຄ້າ.
  • ສຳເລັດການເຈລະຈາສັນວ່າດ້ວຍການສົ່ງເສີມ ແລະ ອຳນວຍຄວາມສະດວກດ້ານການຄ້າໃນເຂດ 3 ຫຼຽ່ມພັດທະນາ ກຳປູເຈຍ-ລາວ-ຫວຽດນາມ(CLV).
  • ສຳເລັດການສ້າງຮ່າງຂອບວຽກການພັດທະນາປະເທດ(CLMV) .
  1. ການເຊື່ອງໂຍງເສດຖະກິດພາກພື້ນ ແລະ ອາຊຽນ: ສຳເລັດການເຂົ້າຮ່ວມເຈລະຈາ ແລະ ລົງນາມບັນດາຂອບສັນຍາທີ່ສຳຄັນເຊັ່ນ:
  • ອະນຸສັນຍາເພື່ອປັບປຸງສັນຍາການຄ້າເສລີອາຊຽນ-ອົສຕາລີ ແລະ ນິວຊີແລນ
  • ອະນຸສັນຍາທີ 3 ເພື່ອປັບປຸງສັນຍາການຄ້າດ້ານສິນຄ້າລະຫວ່າງອາຊຽນ-ສ, ເກົາຫຼີ.
  • ອະນຸສັນຍາປັບປຸງສັຍາການຮ່ວມມືດ້ານເສດຖະກິດແບບຮອບດ້ານລະຫວ່າງອາຊຽນ ກັບ ຈີນ.
  • ສັນຍາການຄ້າເສລີລະຫວ່າງອາຊຽນ ກັບ ຮົງກົງ, ສປ ຈີນ ແລະ ສັຍາການລົງທຶນລະຫວ່າງອາຊຽນກັບຮົງກົງ ແລະ ສປ ຈີນ.
  • ອະນຸສັນຍາເພື່ອປັບປຸງສັນຍາການຮ່ວມມືເສດຖະກິດແບບຮອບດ້ານລະຫວ່າງອາຊຽນ-ຍີ່ປຸ່ນ.
  • ສຳເລັດການເຈລະຈາການຄ້າດ້ານບໍລິການພັນທະຜູກພັນພູດທີ 10 ໃນຂອບອາຊຽນ(AFAS10).
  • ໃນຂອບເຈລະຈາສັນຍາຄູ່ຮ່ວມມືເສດຖະກິດຮອບດ້ານລະດັບພາກພື້ນ(RCEP).
  • ສັນຍາວ່າດ້ວຍການຄ້າຜ່ານທາງເອເລັກໂຕຣນິກອາຊຽນ.
  • ອານຸສັນຍາວ່າດ້ວຍ ກົນໄກແກ້ໄຂຂໍ້ຂັດແຍ່ງອາຊຽນ…

ນີ້ພຽງແຕ່ເປັນສ່ວນໃດສ່ວນໜຶ່ງຂອງຜົນງານພົ້ນເດັ່ນຕະຫຼອດໄລຍະ 5 ປີທີ່ຜ່ານມາ ຊຶ່ງພວກເຮົາບໍ່ສາມາດຈະຍົກໃຫ້ເຫັນຢູ່ທີ່ນີ້ໄດ້ທັງໝົດ. ຢ່າງໃດກໍດີ, ໄປຄຽງຄູ່ກັບດ້ານດີ ແລະ ຜົນງານດັ່ງກ່າວ ກໍບໍ່ສາມາດປະຕິເສດໄດ້ຂໍ້ຂາດຕົກບົກຜ່ອງຈຳນວນໜຶ່ງ ທີຍັງຈະໄດ້ປັບປຸງແກ້ໄຂໃຫ້ດີຂຶ້ນໃນຕໍ່ໜ່າ. ຊຶ່ງຈຸດອ່ອນ ແລະ ຂໍ້ຄົງຄ້າງພື້ນຖານນັ້ນກໍຄື:

  1. ດ້ານອ່ອນ:
  • ທ່ານອ່ຽງດ້ານການຈະເລີນເຕີບໂຕຂອງຂະແໜງການອຸດສາຫະກຳປຸງແຕ່ງ ແລະ ຫັດຖະກຳ, ການຄ້າ ແລະ ການບໍລິການຍັງບໍ່ທັນໜັກແໜ້ນເທົ່າທີ່ຄວນ., ການຂະຫຍາຍຕົວຍັງບໍ່ໜັກແໜ້ນເຂັ້ມແຂງແທ້.
  • ໂຮງງານອຸດສາຫະກຳປຸງແຕ່ງສ່ວນໃຫ່ຍຍັງແມ່ນໂຮງງານຂະໜາດກາງ, ຂະໜາດນ້ອຍ ແລະ ທຸລະກິດຂະໜາດນ້ອຍແບບຄອບຄົວ ກວມເອົາ 94,5%, ທັງຂາດແຄນທຶນຮອນ. ບົດຮຽນການຄຸ້ມຄອງແລະ ບໍລິຫານທຸລະກິດຍັງອ່ອນນ້ອຍ, ຄຸນນະພາບສີມືແຮງງານຈຳກັດ, ການສົ່ງອອກຜະລິດຕະພັນກະສິກຳຍັງມີລັກສະນະສົ່ງອອກວັດຖຸດິບເປັນສ່ວນໃຫ່ຍ, ຜະລິດຕະພັນທີ່ສຳເລັດຮູບສ່ວນໃຫ່ນແມ່ນຜະລິດຕະພັນຕັດຍິບ.
  • ອຸດສາຫະກຳປຸງແຕ່ງຜົນຜະລິດກະສິກຳຍັງບໍ່ທັນໄດ້ຮັບການພັດທະນາຕາມທ່າແຮງ , ການລົງທຶນໃນຂະແໜງອຸດສາຫະກຳປຸງແຕ່ງຍັງບໍ່ທັນຫຼາຍ, ສ່ວນຫຼາຍສຸມໃສ່ແຕ່ດ້ານການຄ້າ, ການບໍລິການເປັນຕົ້ນຕໍ.
  • ດ້ານລະບຽບການ, ນິຕິກຳ ແລະ ກົດໝາຍທີ່ເປັນເຄື່ອງມືໃຫ້ແກ່ການຄຸ້ມຄອງມະຫາພາກຂອງຂະແໜງການຕໍ່ເສດຖະກິດຕະຫຼາດຍັງບໍ່ທັນເຂັ້ມງວດ ຍັງເກີດມີການສວຍໃຊ້ຊ່ອງວ່າງຂອງກົດໝາຍ.
  • ການປະສານສົມທົບລະຫວ່າງອົງການມະຫາພາກດ້ວຍກັນໃນວຽກງານຊຸກຍູ້ສົ່ງເສີມການຜະລິດເປັນສິນຄ້າ ແລະ ການສົ່ງອອກ. ການຄຸ້ມຄອງດ້ານອຸດສາຫະກຳຍັງບໍ່ທັນລ່ອງຊ່ອງກົມກຽວກັນດີເທົ່າທີ່ຄວນ, ການຈັດສັນເຂດ ແລະ ນິຄົມອຸດສາຫະກຳສ່ວນໃຫ່ຍຍັງຂາດນະໂຍບາຍ ແລະ ການລົງທຶນກໍ່ສ້າງໂຄງລ່າງພື້ນຖານທີ່ຈຳເປັນ.
  • SMEs ຍັງມີຂໍ້ຈຳກັດໃນການເຂົ້າເຖິງແຫຼ່ງທຶນ, ຄວາມສາມາດໃນການແຂ່ງຂັນຍັງຕໍ່າ, ຕ່ອງໂສ້ມູນຄ່າເພີ່ມການຜະລິດລະຫວ່າງທຸລະກິດດ້ວຍກັນ ແລະ ການສະໜັບສະໜູນລະຫວ່າງ SMEs ແລະ ວິສາຫະກິດຂະໜາດໃຫ່ຍຍັງບໍ່ທັນກົມກຽວກັນດີ ແລະ ການຈັດຕັ້ງກຸ່ມເພື່ອການຜະລິດໃຫ້ໄດ້ທັງປະລິມານ ແລະ ຄຸນນະພາບ, ມາດຖານແມ່ນຍັງເຮັດບໍ່ທັນໄດ້ດີເທົ່າທີ່ຄວນ.
ໄລຍະ 5 ປີທີ່ຜ່ານມາ ຂະແໜງອຸດສາຫະກຳ ແລະ ການຄ້າ ຍາດໄດ້ຜົນງານທີ່ຍິ່ງໃຫຍ່ - WhatsApp Image 2020 05 27 at 5 - ໄລຍະ 5 ປີທີ່ຜ່ານມາ ຂະແໜງອຸດສາຫະກຳ ແລະ ການຄ້າ ຍາດໄດ້ຜົນງານທີ່ຍິ່ງໃຫຍ່
error: Alert: ເນື້ອຫາຂ່າວມີລິຂະສິດ !!