ຍີ່ປຸ່ນເລັ່ງຫ້າມຂາຍລົດໃໝ່ທີ່ໃຊ້ນ້ຳມັນ ຕັ້ງເປົ້າໃຊ້ລົດໄຮບຣິດ-ໄຟຟ້າ ກາງປີ 2030
ກະຊວງເສດຖະກິດ, ການຄ້າ ແລະ ອຸດສາຫະກຳຂອງຍີ່ປຸ່ນ ເປີດເຜີຍວ່າ: ກຳລັງຢູ່ລະຫວ່າງການພິຈາລະນາຫ້າມການຈຳໜ່າຍລົດຍົນໃໝ່ທີ່ໃຊ້ເຄື່ອງຈັກສັນດາບພາຍໃນ ຫລື ລົດທີ່ໃຊ້ນ້ຳມັນແອັດຊັງ ແລະ ກາຊວນເປັນເຊື້ອໄຟ ໂດຍຕັ້ງເປົ້າຊຸກຍູ້ການຂາຍລົດຍົນພະລັງງານໄຮບຣິດ ແລະ ລົດຍົນໄຟຟ້າທີ່ເປັນມິດຕໍ່ສິ່ງແວດລ້ອມແທນ ນັບແຕ່ກາງປີ 2030.
ຄວາມພະຍາຍາມດັ່ງກ່າວເປັນສ່ວນໜຶ່ງໃນເປົ້າໝາຍສຳຄັນຂອງລັດຖະບານຍີ່ປຸ່ນທີ່ຕ້ອງການຫລຸດການແຜ່ກະຈາຍແກັສກາກບອນ ຫລື ແກັນເຮືອນແກ້ວໃຫ້ເປັນສູນພາຍໃນປີ 2050 ເຊິ່ງລັດຖະບານຍີ່ປຸ່ນກຽມປະກາດນະໂຍບາຍຊຸກຍູ້ການໃຊ້ລົດຍົນໄຟຟ້າ ພາຍຫລັງກອງປະຊຸມຮ່ວມກັບກຸ່ມຜູ້ຊ່ຽວຊານ ແລະ ຜູ້ບໍລິຫານໃນອຸດສາຫະກຳລົດຍົນທີ່ຈະຈັດຂຶ້ນໃນເດືອນນີ້ ແລະ ຫລັງຈາກນັ້ນ ຈະພິຈາລະນາມາດຕະການຈິງຈັງໃນການປ່ຽນຜ່ານໄປສູ່ການໃຊ້ລົດຍົນໄຮບຣິດ ແລະ ລົດຍົນພະລັງງານໄຟຟ້າຫລາຍຍິ່ງຂຶ້ນ.
ທັງນີ້, ໃນປີ 2018 ການແຜ່ກະຈາຍແກັສກາກບອນ 16% ຂອງຍີ່ປຸ່ນ ເກີດຈາກລົດຍົນ, ສ່ວນເຮືອບິນ, ເຮືອ ແລະ ລົດໄຟນັ້ນ ມີການແຜ່ກະຈາຍແກັສກາກບອນ ລວມແລ້ວບໍ່ເກີນ 3%.
ຂະນະທີ່ປັດຈຸບັນ ບໍລິສັດຜູ້ຜະລິດລົດຍົນຄ້າຍຕ່າງໆຂອງຍີ່ປຸ່ນ ຕ່າງໃຫ້ຄຳໝັ້ນຈະປັບປຸງປະສິດທິພາບໃນການຫລຸດການແຜ່ກະຈາຍແກັສກາກບອນຂອງລົດຍົນໃຫ້ໄດ້ 30% ພາຍໃນປີງົບປະມານ 2030, ແຕ່ຄາດວ່າລັດຖະບານຍັງຈຳເປັນຕ້ອງດຳເນີນມາດຕະການທີ່ເຂັ້ມງວດເພີ່ມຂຶ້ນ ເພື່ອຊ່ວຍໃຫ້ບັນລຸເປົ້າໝາຍຫລຸດການແຜ່ກະຈາຍແກັສກາກບອນໃຫ້ເປັນສູນ.
ທັງນີ້, ນອກຈາກຍີ່ປຸ່ນແລ້ວ ລັດຖະບານອັງກິດກໍກຽມຫ້າມການຂາຍລົດຍົນໃໝ່ທີ່ໃຊ້ນ້ຳມັນໃນປີ 2030 ກ່ອນຈະຫ້າມການຂາຍລົດຍົນພະລັງງານໄຮບຣິດໃນປີ 2035.
