45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ

45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ - F National day - 45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ
45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ - 174233 - 45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ

ທິດກໍ່າ:

ການ​ກຳ​ເນີ​ດ ສປປ ລາວ ​ແມ່ນ​ໝາກຜົນ​ແຫ່ງ​ການ​ຕໍ່ສູ້​ປະຕິວັດ​ມາ​ຢ່າງ​ຍືດ​ເຍື້ອຍາວ​ນານ. ພວກ​ເຮົາ​ສາມາດ​ເວົ້າ​ໄດ້​ຢ່າງ​ຈະ​ແຈ້ງວ່າ: ນັບ​ແຕ່​ປະ​ເທດ​ຊາດ​ໄດ້​ຕົກ​ເປັນ​ຫົວ​ເມືອງ​ຂຶ້ນຂອງ​ຕ່າງ​ຊາດ ກໍ​ເລີ່​ມມີ​ຂະ​ບວນການ​ຕໍ່ສູ້​ປະຕິວັດ​ໄປ​ຕາມ​ກະ​ແສ​ຟອງ​ສັງຄົມ ​ແລະ ຂອງ​ໂລກ ​ເຊິ່ງ​ໄດ້​ຜ່ານ​ພົ້ນ​ໄປ​ໃນ​ຫລາຍ​ຍຸກ​ຫລາຍ​ສະ​ໄໝ ​ແລະ ຜ່ານ​ຂະ​ບວນວິວັດ​ຫລາຍ​ເຊັ່ນ​ຄົນ​ຈົນ​ມາ​ຮອດ​ປີ 1975 ຈຶ່ງ​ສາມາດ​ປົດ​ປ່ອຍປະ​ເທດ​ຊາດ​ໄດ້​ຢ່າງ​ສົມບູນ. ການ​ທີ່​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ, ມີ​ເອກະລາດ, ປະຊາທິປະ​ໄຕ, ມີ​ສັນຕິພາບ, ມີ​ຄວາມ​ຈະ​ເລີ​ນຮຸ່ງ​ເຮືອງ, ປະຊາຊົນ​ນັບ​ມື້ມີ​ຢູ່​ມີ​ກິນ, ມີ​ຄວາມ​ຜາ​ສຸກ​ຄື​ດັ່ງ​ທຸກ​ວັນ​ນີ້ ກໍ​ຍ້ອນ​ມີ​ພັກ-ລັດຖະບານ​ເຮົາ​ໄດ້​ນຳພາ​ຕໍ່ສູ້​ປະຕິວັດ ​ແລະ ນຳພາ​ສ້າງສາ​ພັດທະນາ​ປະ​ເທດ​ຊາດ​ໃຫ້​ກ້າວ​ສູ່​ຄວາມ​ຈະ​ເລີ​ນຮຸ່ງ​ເຮືອງ​ເດີນ​ໜ້າ​ໄປ​ຢ່າງ​ບໍ່​ຢຸດ​ຢັ້ງ.

​ເມື່ອ​ຫວນ​ຄືນ​ເບິ່ງ​ປະຫວັດສາດ​ໃນ​ອະດີດ​ຈົນ​ມາ​ຮອດ​ປັດຈຸບັນ, ສະພາບ​ການບ້ານ​ເມືອງ​ຂອງ​ພວກ​ເຮົາ​ມັນ​ກໍ​ມີ​ຫລາຍ​ອັນ​ຫລາຍ​ຢ່າງ​ໄດ້​ມີ​ການ​ປ່ຽນ​ແປງ​ໄປ​ແຕ່ລະ​ໄລຍະ. ​ເມື່ອ​ປຽບທຽບ​ໃສ່​ຄົນ​ຍຸກ​ກ່ອນ​ມາ​ໃສ່​ຄົນ​ຍຸກ​ນີ້ມັນ​ກໍ​ແຕກ​ຕ່າງ​ກັນ​ໃນ​ດ້ານ​ແນວ​ຄິດ ​ແລະ ການ​ກະທຳ ​ເປັນຕົ້ນຄົນ​ຮຸ້ນ​ກ່ອນ​ສ່ວນ​ຫລາຍ​ຢູ່​ກັບ​ຄວາມທຸກ​ຍາກ​ລຳບາກ​ນາໆ​ປະການ, ຊ້ຳບໍ່​ໜຳ ຖືກ​ເສິກ​ສົງຄາມ​ຮຸກ​ຮານ​ມາ​ເປັນ​ເວລາ​ຍາວ​ນານ. ສ່ວນ​ຄົນ​ຍຸກ​ນີ້ ຄວາມ​ຮັບ​ຮູ້ ​ແລະ ​ເຂົ້າ​ໃຈ​ມັນ​ກໍ​ແຕກ​ຕ່າງ​ກັນ​ໄປ​ຕາມ​ສະພາບ​ການ​ປ່ຽນ​ແປງ​ທາງ​ດ້ານ​ສັງຄົມ​ທີ່​ມີ​ການ​ພັດທະນາ​ກ້າວ​ໄປ​ຕາມ​ຍຸກ​ຕາມ​ສະ​ໄໝ ​ໂດຍ​ສະ​ເພາະ​ແມ່ນ​ຄົນ​ຮຸ້ນ​ໜຸ່ມ​ທີ່​ເກີດ​ໃໝ່​ໃຫຍ່​ລຸນ ພວກ​ເຂົາ​ອາດ​ບໍ່​ຮູ້​ຊ້ຳວ່າ​ແຕ່​ກ່ອນ​ປະ​ເທດ​ຊາດ​ບ້ານ​ເມືອງ​ເຮົາ​ສະ​ໄໝ​ຮຸ້ນ​ປູ່​ຮຸ້ນ​ຍ່າ​ຕານາຍ​ເພິ່ນ​ໄດ້​ຜ່ານ​ຜ່າ​ວິ​ກິດ​ເສິກ​ສົງຄາມ, ລອດ​ລົ້ມລອດ​ຕາຍ​ຈາກ​ຫ່າ​ລະ​ເບີດ​ຕາມ​ລ່າ​ເຜົາ​ຜານ​ໃນ​ສະໜາມຮົບ ຫລື ​ໃນ​ພື້ນທີ່​ເຂດ​ປົດ​ປ່ອຍ​ຂອງ​ການ​ປະຕິວັດ.

​ແຕ່​ແນວ​ໃດ​ກໍ​ຕາມ, ນັບ​ແຕ່​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ ປະກາດ​ເປັນ​ສາທາລະນະ​ລັດ ປະຊາທິປະ​ໄຕ ປະຊາຊົນລາວ ​ໃນ​ວັນ​ທີ 2 ທັນວາ 1975 ​ເປັນຕົ້ນມາ, ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ກໍ​ນັບ​ມື້​ໄດ້​ຮັບ​ການ​ບູລະນະ​ສ້າງສາ ​ແລະ ສາມາດ​ເວົ້າ​ໄດ້​ວ່າ: ນັບ​ແຕ່​ປະ​ເທດ​ຊາດ​ໄດ້​ເກີດ​ມີ​ລະບອບ​ໃໝ່​ເປັນຕົ້ນມາ ມັນ​ຜ່ານ​ພົ້ນມາ​ໄດ້​ສອງ​ໄລຍະ ຄື​ໄລຍະ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ. ​ໄລຍະ​ປົກ​ປັກ​ຮັກສາ​ປະ​ເທດ​ຊາດ​ແມ່ນ​ເລີ່​ມ​ແຕ່​ປີ 1975 ຫາ​ປີ 1985. ສ່ວນ​ໄລຍະ​ສ້າງສາ​ພັດທະນາ​ປະ​ເທດ​ຊາດ​ແມ່ນ​ເລີ່​ມ​ແຕ່​ປີ 1986 ຮອດ​ປັດຈຸບັນ. ຄວາມ​ແຕກ​ຕ່າງ​ລະຫວ່າງ​ສອງ​ໄລຍະ​ນີ້​ມັນ​ກໍ​ສະ​ແດງອອກ​ຄື: ​ໄລຍະ​ປົກ​ປັກ​ຮັກສາ​ປະ​ເທດ​ຊາດ​ນັ້ນ ມັນ​ແມ່ນ​ການ​ລິ​ເລີ່​ມປັບປຸງ ​ແລະ ກໍ່ສ້າງ​ອຳນາດ​ການ​ປົກຄອງ​ປະຕິວັດ ກໍ​ຄື​ອຳນາດ​ການ​ປົກຄອງ​ໃໝ່ ທັງ​ປົກ​ປັກ​ຮັກສາ​ໝາກຜົນ​ຂອງ​ການ​ປະຕິວັດ, ທັງ​ສ້າງສາ​ພັດທະນາ​ປະ​ເທດ​ຊາດ ​ແລະ ທັງ​ຮຳບາດ​ແຜ​ສົງຄາມ​ທີ່​ແກ່ຍາວ​ມາ​ເປັນ​ເວລາ​ຍາວ​ນານ ຈຶ່ງ​ເຮັດ​ໃຫ້​ພວກ​ເຮົາ​ມີ​ຄວາມ​ສະດວກ ​ແລະ ຄວາມ​ຫຍຸ້ງຍາກ​ຫລາ​ຍດ້ານ, ມີ​ທັງ​ດັດ​ສ້າງ ​ແລະ ກໍ່ສ້າງ​ໄປ​ພ້ອມໆ​ກັນ. ສ່ວນ​ໄລຍະ​ສ້າງສາ​ພັດທະນາ​ປະ​ເທດ​ຊາດ​ແມ່ນ​ເລີ່​ມ​ແຕ່​ມີ​ການວາງ​​ແນວທາງ​ປ່ຽນ​ແປງ​ໃໝ່​ໃນ​ປີ 1986 ​ເປັນຕົ້ນມາ. ໝາຍວ່າ​: ພັກ ​ແລະ ລັດຖະບານ​ເຮົາ​ໄດ້​ເປີດ​ປະຕູ​ສູ່​ພາຍ​ນອກ, ​ເປີດ​ກວ້າງ​ການ​ລົງທຶນ​ທັງ​ພາຍ​ໃນ ​ແລະ ຕ່າງປະ​ເທດ​ໃຫ້​ຫລາຍ​ຂຶ້ນ, ກຳນົດ​ໃຫ້​ມີ​ຫລາຍ​ພາກສ່ວນ​ເສດຖະກິດ ​ແລະ ກຳມະສິດ, ຫັນ​ເສດຖະກິດ​ຜູກຂາດ​ທີ່​ອ່ອນ​ນ້ອຍ​ໄປ​ສູ່​ເສດຖະກິດ​ຕະຫລາດ​ຢ່າງ​ກວ້າງຂວາງ.

45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ - Wave100S AD to Website 2020 0 - 45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ

ຈາກ​ປັດ​ໄຈ​ດັ່ງ​ກ່າວ ຈຶ່ງ​ເຮັດ​ໃຫ້ການ​ສ້າງສາ​ພັດທະນາ​ປະ​ເທດ​ຊາດ​ກ້າວ​ສູ່​ໄລຍະ​ໃໝ່ ທັງ​ເຕີບ​ໃຫຍ່​ຂະຫຍາຍຕົວ​ກ້າວ​ໄປ​ຢ່າງ​ບໍ່​ຢຸດ​ຢັ້ງ. ​ໄປ​ຄຽງ​ຄູ່​ກັນນັ້ນ ທາງ​ດ້ານ​ການ​ເມືອງ​ກໍ​ມີ​ການ​ພົວພັນ​ກັບ​ພາກພື້ນ ​ແລະ ສາກົນ​ໃຫ້​ກວ້າງຂວາງ ຈຶ່ງ​ເຮັດ​ໃຫ້​ຖານະ​ບົດບາດ​ຂອງ​ປະ​ເທດ​ເຮົາ​ນັບ​ມື້​ໄດ້​ຮັບ​ການ​ເຊື່ອ​ໝັ້ນຈາກ​ພາກພື້ນ ​ແລະ ສາກົນ. ມາ​ຮອດ​ປັດຈຸບັນ ລາວ​ເຮົາ​ໄດ້​ມີ​ການ​ພົວພັນ​ທາງ​ການ​ທູດ​ເຖິງ 140 ກວ່າ​ປະ​ເທດ, ​ໄດ້​ເຊື່ອມ​ໂຍງ​ເຂົ້າອົງການ​ພາຄີ​ຕ່າງໆ​ທີ່​ກ້າວໜ້າ​ໃນ​ໂລກ ​ເປັນຕົ້ນກຸ່ມ​ອາ​ຊຽນ, ອົງການ​ການ​ຄ້າ​ໂລກ ​ແລະ ອົງການ​ອື່ນ​ໆ. ຈາກ​ການວາງ​ແນວທາງ​ຕ່າງປະ​ເທດ​ທີ່​ສອດຄ່ອງ​ສະຫລາດ​ສ່ອງ​ໃສ​ຂອງ​ພັກ-ລັດຖະບານ​ເຮົາ ຈຶ່ງ​ມີ​ຜົນ​ກະທົບ​ເຊື່ອມ​ໂຍງ​ຕໍ່​ການ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ​ໄດ້​ເປັນ​ຢ່າງ​ດີ. ຕະຫລອດ​ໄລຍະ 45 ປີມາ​ນີ້, ​ເຖິງ​ວ່າ​ພວກ​ເຮົາ​ມີ​ຄວາມ​ຫຍຸ້ງຍາກ​ບາງ​ຢ່າງ ທັງ​ມີ​ຜົນ​ກະທົບ​ຈາກ​ໄພພິບັດ​ທຳ​ມະ​ຊາດ, ​ໂຣກລະບາດ, ພະຍາດ​ບາດ​ເຍົາ, ​ແຕ່​ກໍ​ເຫັນ​ວ່າການ​ພັດທະນາ​ທາງ​ດ້ານ​ເສດຖະກິດ​ຕາມ​ແນວທາງ​ປ່ຽນ​ແປງ​ໃໝ່​ໄດ້​ດຳ​ເນີນ ​ແລະ ຂະຫຍາຍຕົວ​ໄປ​ຢ່າງ​ບໍ່​ຢຸດ​ຢັ້ງ. ຈາກ​ຕົວ​ເລກ​ສະຖິຕິ​ໃນ​ຫລາຍ​ຂະ​ແໜງ​ການ ​ໄດ້​ຊີ້​ໃຫ້​ເຫັນ​ເຖິງ​ການ​ກ້າວ​ກະ​ໂດດ​ຂັ້ນ​ໃນ​ການ​ພັດທະນາ​ປະ​ເທດ​ຊາດ​ເຊັ່ນ: ​ໂຄງການ​ກໍ່ສ້າງ​ເຂື່ອນ​ໄຟຟ້າ​ໄດ້​ສຳ​ເລັດ​ໄປ​ແລ້ວ 70 ກວ່າ​ແຫ່ງ ​ແລະ ໝົດ​ປີ 2020 ນີ້ ຈະ​ເພີ່ມ​ຂຶ້ນ​ເຖິງ 100 ​ແຫ່ງ. ຈາກ​ຜົນ​ດີ​ດັ່ງກ່າວ, ມາ​ຮອດ​ປັດຈຸບັນ​ສາມາດ​ສະໜອງ​ກະ​ແສ​ໄຟຟ້າ​ໃຫ້​ປະຊາຊົນ​ໄດ້​ຊົມ​ໃຊ້​ເຖິງ 95%. ໝາຍວ່າ​ທຸກ​ຄົວ​ເຮືອນ​ນັບ​ແຕ່​ຕົວ​ເມືອງ​ຮອດ​ຊົນນະບົດ​ໄດ້​ມີ​ໄຟຟ້າ​ໄຕ້, ​ເຫລືອ​ຈາກ​ນັ້ນ​ແມ່ນ​ສົ່ງ​ຂາຍ​ໃຫ້​ປະ​ເທດ​ອ້ອມ​ຂ້າງ​ໃນ​ກຸ່ມ​ອາ​ຊຽນ ​ເປັນຕົ້ນປະ​ເທດ​ໄທ, ຫວຽດນາມ, ກຳປູ​ເຈຍ, ມາ​ເລ​ເຊຍ ​ແລະ ຈະ​ມີ​ແຜນ​ສົ່ງ​ຂາຍ​ໄປ​ຍັງ​ສິງກະ​ໂປ​ຕື່ມ​ອີກ. ຕໍ່​ກັບ​ໂຄງການ​ສ້າງ​ຖະໜົນ​ຫົນທາງ​ພື້ນຖານ​ໂຄງ​ລ່າງ ມາ​ຮອດ​ປັດຈຸບັນ​ບັນດາ​ເສັ້ນທາງ​ນ້ອຍ​ໃຫຍ່​ສາມາດ​ເຂົ້າ​ໄປ​ເຖິງ​ທຸກ​ບ້ານທຸກ​ເມືອງ​ໃນ​ທົ່ວ​ປະ​ເທດ. ອັນ​ທີ່​ພົ້ນ​ເດັ່ນ​ທີ່​ສຸດ ກໍ​ຄື​ໂຄງການ​ກໍ່ສ້າງ​ທາງ​ລົດ​ໄຟ​ຄວາມ​ໄວ​ສູງ ລາວ-ຈີນ, ​ໂຄງການ​ສ້າງ​ທາງ​ດ່ວນ​ນະຄອນຫລວງ​ວຽງ​ຈັນ-ວັງ​ວຽງ ​ແລະ ຈະ​ສືບ​ຕໍ່​ວັງ​ວຽງ-ຫລວງ​ພະ​ບາງ ຈົນ​ເຊື່ອມ​ຈອດ​ໄປ​ຮອດ​ຊາຍ​ແດນ ລາວ-ຈີນ ​ໃນ​ສອງ​ສາມ​ປີ​ຂ້າງ​ໜ້າ​ນີ້.

ນອກຈາກ​ບາງ​ໂຄງການ, ບາງ​ກິດຈະການ​ພົ້ນ​ເດັ່ນ​ທີ່​ໄດ້​ກ່າວ​ມາ​ຂ້າງ​ເທິງ​ນີ້, ​ໃນ​ຂົງ​ເຂດ​ອື່ນໆ​ກໍ​ພວມ​ໄດ້​ຮັບ​ການ​ສ້າງສາ​ພັດທະນາ​ຄຽງ​ຄູ່​ກັນ​ໄປ​ຢ່າງ​ເປັນ​ຂະ​ບວນ ​ແລະ ມີ​ບັນຍາກາດ​ອັນ​ດີ. ອັນ​ທີ່​ໂດດ​ເດັ່ນ​ອີກ​ສິ່ງ​ໜຶ່ງ​ກໍ​ແມ່ນ​ໂຄງການ​ສ້າງ​ເຂດ​ເສດຖະກິດ​ພິ​ເສດ ​ແລະ ​ເຂດ​ເສດຖະກິດ​ສະ​ເພາະ ​ເຊິ່ງມາ​ຮອດ​ປັດຈຸບັນ​ມີ​ເຖິງ 10 ກວ່າ​ແຫ່ງ​ໃນ​ທົ່ວ​ປະ​ເທດ. ​ເວົ້າ​ໄດ້​ວ່າ: ຕະຫລອດ 45 ປີຜ່ານມາ​ນີ້ ປະ​ເທດ​ຊາດ​ຂອງ​ພວກ​ເຮົາ​ພວມ​ເຕີບ​ໃຫຍ່​ຂະຫຍາຍຕົວ​ບົນ​ເສັ້ນທາງ​ແຫ່ງ​ການ​ສ້າງສາ​ພັດທະນາ​ໄປ​ຢ່າງ​ກ້າວ​ກະ​ໂດດ​ຂັ້ນ. ​ໃນ​ອະນາຄົດ​ອີກ​ຫ້າ​ປີ ຫລື ສິບ​ປີ​ຂ້າງ​ໜ້າ ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ຕ້ອງ​ຫລຸດ​ພົ້ນອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ​ຢ່າງ​ເດັດຂາດ ​ແລະ ຈະ​ກ້າວ​​ເປັນ​ປະ​ເທດ​ທີ່​ພັດທະນາ​ຍຸກ​ໃໝ່​ໃນ​ອະນາຄົດ​ຢ່າງ​ແນ່ນອນ.

45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ - WhatsApp Image 2020 05 27 at 5 - 45 ປີ ສປປ ລາວ ເຕີບໃຫຍ່ບົນເສັ້ນທາງສ້າງສາພັດທະນາ
error: Alert: ເນື້ອຫາຂ່າວມີລິຂະສິດ !!