ອິນໂດເນເຊຍຈັບກຸມລັດຖະມົນຕີຮັບສິນບົນບໍລິສັດເອກະຊົນ ຈັດຫາເຄື່ອງຊ່ວຍເຫລືອຜູ້ປະສົບໄພໂຄວິດ-19

ວັນທີ 6 ທັນວານີ້, ໜ່ວຍງານຕໍ່ຕ້ານການສໍ້ລາດບັງຫລວງຂອງອິນໂດເນເຊຍຈັບກຸມທ່ານ Juliari Batubara ລັດຖະມົນຕີກະຊວງກິດຈະການສັງຄົມຂອງອິນໂດເນເຊຍ ໂດຍກ່າວຫາວ່າລັດຖະມົນຕີຄົນດັ່ງກ່າວຮັບສິນບົນມູນຄ່າ 1,2 ລ້ານໂດລາ ຈາກບໍລິສັດເອກະຊົນ ເພື່ອແລກກັບສິດໃນການເປັນຜູ້ຈັດຫາເຄື່ອງຊ່ວຍເຫລືອຜູ້ປະສົບໄພຈາກການລະບາດຂອງພະຍາດໂຄວິດ-19.
ການຈັບກຸມລັດຖະມົນຕີຂອງອິນໂດເນເຊຍໃນຄັ້ງນີ້ ເກີດຂຶ້ນຫລັງຈາກເຈົ້າໜ້າທີ່ດຳເນີນການສອບສວນ ແລະ ຕິດຕາມພຶດຕິກຳຂອງເຈົ້າໜ້າທີ່ປະຈຳກະຊວງ 2 ຄົນ ລວມທັງເຈົ້າໜ້າທີ່ຂອງບໍລິສັດເອກະຊົນອີກ 2 ຄົນ ເຊິ່ງທັງໝົດຖືກຄວບຄຸມຕົວ ພ້ອມກະເປົາໃສ່ເງິນສົດຫລາກຫລາຍສະກຸນເງິນ ມີມູນຄ່າມະຫາສານ.
ເຈົ້າໜ້າທີ່ເຊື່ອວ່າ: ເງິນດັ່ງກ່າວເປັນເງິນສິນບົນທີ່ລັດຖະມົນຕີຈະໄດ້ຮັບຈາກການອະນຸມັດໃຫ້ບໍລິສັດເອກະຊົນມີສິດເປັນຜູ້ຈັດຫາເຄື່ອງສຳລັບຜູ້ໄດ້ຮັບຜົນກະທົບຈາກພະຍາດໂຄວິດ-19 ຈຳນວນ 10 ລ້ານຄອບຄົວ.
ລັດຖະມົນຕີກະຊວງກິດຈະການສັງຄົມເປັນລັດຖະມົນຕີຄົນທີ 2 ໃນລັດຖະບານວາລະທີ 2 ຂອງປະທານາທິບໍດີ ໂຈໂກ ວິໂດໂດ ທີ່ຖືກຈັບໃນຄວາມຜິດກ່ຽວກັບການສຸຈະລິດ ໂດຍກ່ອນໜ້ານີ້ເມື່ອທ້າຍເດືອນຜ່ານມາ ລັດຖະມົນຕີປະມົງ ແລະ ກິດຈະການທາງທະເລ ຫາກໍຖືກເຈົ້າໜ້າທີ່ບຸກເຂົ້າຈັບກຸມຢູ່ສະໜາມບິນໃນນະຄອນຫລວງຈາກາຕາ ຫລັງຈາກເດີນທາງໄປປະຕິບັດພາລະກິດຢູ່ອາເມລິກາ ຈາກຂໍ້ກ່າວຫາສໍ້ລາດບັງຫລວງທີ່ເຊື່ອມໂຍງກັບການອອກຄຳສັ່ງຍົກເລີກການຫ້າມນຳເຂົ້າໂຕອ່ອນລ໊ອບສະເຕີ.