ຍາມໜາວ​ເອົາໃຈໃສ່ຮັກສາ​ສຸຂະພາບ

- Untitled design - ຍາມໜາວ​ເອົາໃຈໃສ່ຮັກສາ​ສຸຂະພາບ

ໂດຍ: ທິດ​ກໍ່າ

ຕາມ​ປົກກະຕິ​ແລ້ວ, ສະພາບ​ດິນ​ຟ້າ​ອາກາດ​ຢູ່​ປະ​ເທດ​ເຮົາ ​ເລີ່​ມ​ແຕ່​ເດືອນພະຈິກ​ຫາ​ເດືອນ​ກຸມພາ​ຂອງ​ທຸກ​ໆ​ປີ ຖື​ວ່າ​ເປັນ​ຊ່ວງ​ຍາມໜາວ, ​ແຕ່​ຈະ​ໜາວ​ໜ້ອຍ​ໜາວ​ຫລາຍ​ນັ້ນ ມັນ​ກໍ​ຂຶ້ນກັບ​ແຕ່ລະ​ປີ, ​ແຕ່​ສຳລັບ​ປີ​ນີ້ ​ເທົ່າ​ທີ່​ຕິດຕາມ​ສະພາບ​ດິນ​ຟ້າ​ອາກາດ ຖື​ວ່າ​ທົ່ວ​ທຸກ​ພາກ​ຂອງ​ປະ​ເທດ​ໄດ້​ເລີ່​ມໜາວ​ກັນ​ໝົດ​ແລ້ວ ​ໂດຍ​ສະ​ເພາະ​ແມ່ນ​ບັນດາ​ແຂວງ​ພາກ​ເໜືອ ​ແລະ ພາກ​ເໜືອ​ດ້ານ​ຕາ​ເວັນ​ອອກ​ເຊັ່ນ: ​ແຂວງ​ຜົ້ງສາລີ, ອຸດົມ​ໄຊ, ຫົວພັນ, ຊຽງ​ຂວາງ, ​ໄຊ​ສົມບູນ ​ແລະ ພາກ​ໃຕ້​ແຖວ​ພູ​ພຽງ​ບໍລິ​ເວນ ​ແຂວງ​ຈຳປາ​ສັກ. ສ່ວນ​ບັນດາ​ແຂວງ​ພາກ​ກາງ​ເຊັ່ນ: ນະຄອນຫລວງ​ວຽງ​ຈັນ, ບໍລິ​ຄຳ​ໄຊ, ຄຳ​ມ່ວນ ​ແລະ ສະຫວັນ​ນະ​ເຂດ ກໍ​ເລີ່​ມມີ​ອາກາດ​ໜາວ​ເຢັນ ທັງ​ມີ​ລົມ​ພັດ​ເລີ່​ມ​ແຕ່​ຕົ້ນ​ເດືອນ​ທັນວາ​ເປັນຕົ້ນມາ.

​ແຕ່​ແນວ​ໃດ​ກໍ​ຕາມ, ​ໃນ​ເມື່ອ​ຄວາມ​ໜາວ​ໄດ້ມາ​ຮອດ​ຄື​ແນວ​ນີ້ ສິ່ງ​ທີ່​ໜ້າ​ໜັກ​ໃຈ ​ແລະ ​ເປັນ​ບັນຫາ​ທີ່​ຄວນ​ເອົາ​ໃຈ​ໃສ່​ຕ້ານ ​ແລະ ສະກັດ​ກັ້ນນຳ​ກັນນັ້ນ ກໍ​ຄືກ​ານ​ແຜ່​ລະບາດ​ຂອງ​ເຊື້ອພະຍາດ​ໂຄ​ວິດ-19 ​ເພາະ​ຕາມ​ຫລັກການ​ທາງການ​ແພດ​ແລ້ວ ​ເພິ່ນວ່າ​ເຊື້ອພະຍາດ​ນີ້​ມັນ​ມັກ​ອາກາດ​ໜາວ​ເຢັນ ວ່າ​ຊັ້ນ ! ອີກ​ສິ່ງ​ໜຶ່ງ​ທີ່​ໜ້າ​ເປັນ​ຫ່ວງ​ ກໍ​ຄື​ມີ​ແຫ​ລ່ງຂ່າວ​ຈາກ​ຄະນະ​ສະ​ເພາະ​ກິດ​ວ່າ​ໃນ​ຊ່ວງ​ອາທິດ​ຜ່ານ​ມາ ​ໄດ້​ມີ​ຄົນ​ຈີນ​ຈຳນວນ 2 ຄົນ ລັກ​ເຂົ້າປະ​ເທດ​ກ່ອນ​ຈະ​ລັກ​ເຂົ້າ​ໄປ​ປະ​ເທດ​ຈີນ. ​ໃນ​ສອງ​ຄົນ​ດັ່ງກ່າວ ຜ່ານ​ການ​ຕິດຕາມ​ກວດກາ​ຂອງ​ເຈົ້າໜ້າ​ທີ່​ຈີນ​ບອກ​ວ່າ ພວກ​ເຂົາ​ຕິດ​ເຊື້ອ​ໂຄ​ວິດ-19 ມາ​ແຕ່​ຕົ້ນທາງ ​ເຊິ່ງຫລ້າ​ສຸດ​ທາງ​ຄະນະ​ສະ​ເພາະ​ກິດ​ຂອງ​ລາວ​ເຮົາ​ກໍ​ໄດ້​ອອກ​ມາ​ຢັ້ງຢືນ​ວ່າ​ເປັນຄວາມ​ຈິງ​ແທ້ ​ແລະ ຂໍ​ຢ່າ​ໃຫ້​ພາກັນ​ແຕກ​ຕື່ນ​ເກີນ​ເຫດ ທັງ​ຮຽກຮ້ອງ​ໃຫ້​ທຸກ​ຄົນ​ເປັນ​ຫູ​ເປັນຕາ​ພ້ອມ​ກັນ​ຕ້ານ ​ແລະ ສະກັດ​ກັ້ນການ​ແຜ່​ລະບາດ​ຂອງ​ເຊື້ອພະຍາດ​ໂຄ​ວິດ-19 ​ໃຫ້​ເຖິງ​ກົກ​ເຖິງ​ຮາກ.

ສ່ວນວ່າ​ມາດ​ຕະການ​ຜ່ອນຜັນ​ລະດັບ​ຊາດ​ຫລ້າ​ສຸດ​ທີ່​ຕ້ອງ​ສືບ​ຕໍ່​ປະຕິບັດ​ນັບ​ແຕ່​ວັນ​ທີ 1 ຫາ 31 ທັນວາ 2020 ກໍ​ມີ​ເຖິງ 7 ມາດ​ຕະການ​ຄື: ​ໂຈະ​ການ​ອອກ​ວີ​ຊາ​ສຳລັບ​ຜູ້​ເດີນທາງ​ມາ​ຈາກ​ປະ​ເທດ​ທີ່​ມີ​ການລະບາດ ນັບ​ແຕ່​ນີ້​ຈົນ​ເຖິງ 31 ທັນວາ 2020; ​ໂຈະ​ການ​ອະນຸມັດ​ຖ້ຽວ​ບິນ​ເໝົາ​ລຳ​ຈາກ​ປະ​ເທດ​ທີ່​ມີ​ການລະບາດ, ຍົກ​ເວັ້ນຖ້ຽວ​ບິນ​ມະນຸດສະທຳ​ທີ່​ມີ​ຄວາມ​ຈຳ​ເປັນ; ​ເຫັນ​ດີ​ໃຫ້​ຈັດ​ງານ​ສະ​ເຫລີ​ມສະຫລອງວັນ​ສຳຄັນ​ຂອງ​ພັກ, ຂອງ​ຊາດ ​ແລະ ວັນ​ສຳຄັນ​ອື່ນໆ ​ໂດຍ​ມີ​ການ​ກຳນົດ​ເປົ້າໝາຍ​ຄັກ​ແນ່; ​ເຫັນ​ດີ​ໃຫ້​ສືບ​ຕໍ່​ຈັດ​ງານ​ປະ​ເພນີ​ບັນດາ​ເຜົ່າ ​ແລະ ຈັດ​ກິດຈະກຳ​ຕ່າງໆ​ຂອງ​ສັງຄົມ​ໃນ​ລະດັບ​ບ້ານ ​ແລະ ຄອບຄົວ, ​ແຕ່​ຖ້າ​ຈະ​ຈັດ​ໃຫຍ່​ໂຕ​ມະ​ໂຫຖານ ຕ້ອງ​ໄດ້​ຮັບ​ການ​ອະນຸຍາດ​ຈາກ​ທາງ​ເມືອງ, ທາງ​ແຂວງ​ຢ່າງ​ຄັກ​ແນ່; ມອບ​ໃຫ້​ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ສົມທົບ​ກັບ​ພາກສ່ວນ​ກ່ຽວຂ້ອງ​ເພີ່ມ​ທະວີ​ໂຄສະນາ​ເຜີຍ​ແຜ່​ໃຫ້​ຄົນ​ເຂົ້າ​ໃຈ; ສະ​ເໜີ​ໃຫ້​ກະຊວງ​ປ້ອງ​ກັນ​ປະ​ເທດ, ກະຊວງ​ປ້ອງ​ກັນ​ຄວາມ​ສະຫງົບ ​ແລະ ອົງການ​ປົກຄອງ​ທ້ອງ​ຖິ່ນ​ເພີ່ມ​ທະວີ​ຕິດຕາມ​ກວດກາ​ການ​ເຂົ້າ-ອອກ​ໃຫ້​ເຂັ້ມງວດ; ສະ​ເໜີ​ໃຫ້​ອົງການ​ປົກຄອງ​ແຕ່ລະ​ຂັ້ນ​ເພີ່ມ​ທະວີ​ບົດບາດ​ການ​ຄຸ້ມ​ຄອງ, ນຳພາ, ຕິດຕາມ​ກວດກາ, ຊຸກຍູ້​ການຈັດຕັ້ງປະຕິບັດ​ມາດ​ຕະການ​ປ້ອງ​ກັນ, ຄວບ​ຄຸມ, ສະກັດ​ກັ້ນ ​ແລະ ​ແກ້​ໄຂ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ​ໃນ​ຂອບ​ເຂດ​ຕົນ​ຮັບຜິດຊອບ ​ແລະ ມີ​ການ​ລາຍ​ງານ​ໃຫ້​ຂັ້ນ​ເທິງ​ຮັບ​ຊາບ​ເປັນ​ປົກກະຕິ. ນອກຈາກ​ນີ້ ທາງ​ຂະ​ແໜງ​ການ​ກ່ຽວຂ້ອງ ກໍ​ຄື​ຄະນະ​ສະ​ເພາະ​ກິດ​ລະດັບ​ຊາດ​ຍັງ​ແນະນຳ​ໃຫ້​ທຸກ​ຄົນ​ຈົ່ງ​ເປັນ​ເຈົ້າການ​ຕ້ານ ​ແລະ ສະກັດ​ກັ້ນ ​ໂດຍ​ປະຕິບັດ​ຕາມ​ຫລັກການ​ແນະນຳ​ຂອງ​ແພດ​ໝໍ ​ເປັນຕົ້ນການ​ໃຊ້​ໄລຍະ​ຫ່າງ, ໝັ່ນລ້າງ​ມື​ດ້ວຍ​ນ້ຳຢາ, ຫ້າມ​ໄປ​ໃກ້ຊິດ​ກັບ​ຊຸມ​ຊົນ​ແອ​ອັດ ​ແລະ ກຸ່ມ​ຄົນ​ທີ່​ມີ​ຄວາມ​ສ່ຽງ. ຖ້າ​ທຸກ​ຄົນ​ຫາກ​ພ້ອມ​ກັນ​ປະຕິບັດ​ຢ່າງ​ເຂັ້ມງວດ​ກໍ​ເປັນ​ອັນວ່າ​ສາມາດ​ຫລີກ​ລ່ຽງຈາກ​ການ​ຕິດ​ເຊື້ອພະຍາດ​ໂຄ​ວິດ-19 ​ໄດ້​ຢ່າງ​ແນ່ນອນ.

- Wave100S AD to Website 2020 0 - ຍາມໜາວ​ເອົາໃຈໃສ່ຮັກສາ​ສຸຂະພາບ

ນອກຈາກ​ການ​ຫາ​ວິທີ​ຫລີກ​ລ່ຽງພະຍາດ​ໂຄ​ວິດ-19 ທີ່​ຈະ​ມາ​ທຳລາຍ​ເຜົາ​ຜານ​ແລ້ວ, ​ໃນ​ຊ່ວງ​ຍາມໜາວ​ຄື​ແນວ​ນີ້ ອາດ​ມີ​ພະຍາດ​ຊະນິດ​ອື່ນໆ​ຕາມ​ມາ​ເຊັ່ນ: ​ເປັນ​ໄອ, ​ເຈັບຄໍ, ​ໄຂ້ຫວັດ ຫລື ອາດ​​ເຈັບ​ເປັນ​ມີ​ຜົນ​ກະທົບ​ຍ້ອນ​ຄວາມ​ໜາວ​ເຢັນ ຫລື ບາງ​ກໍລະນີ​ ບໍ່​ວ່າ​ຄົນ ຫລື ສັດ​ແມ່ນ​ຕາຍ​ຍ້ອນ​ຄວາມ​ໜາວ​ເຢັນ​ກໍ​ອາດ​ເປັນ​ໄປ​ໄດ້.

​ໃນ​ເງື່ອນ​ໄຂ​ທີ່​ສະ​ພາບ​ດິນ​ຟ້າ​ອາກາດ​ມັກ​ປ່ຽນ​ແປງ​ເລື້ອຍໆ​ຄື​ດັ່ງ​ທຸກ​ວັນ​ນີ້ ພວກ​ເຮົາ​ຍິ່ງ​ຈະ​ຕ້ອງ​ເອົາ​ໃຈ​ໃສ່​ເບິ່ງ​ແຍງ​ສຸຂະພາບ​ຂອງ​ຕົນ​ເອງ​ໃຫ້​ດີ ​ໂດຍ​ສະ​ເພາະ​ແມ່ນ​ຜູ້​ເຖົ້າ ​ແລະ ​ເດັກນ້ອຍ ​ເພາະ​ຄວາມ​ໜາວ​ອາດ​ເຮັດ​ໃຫ້​ເຊື້ອພະຍາດ​ຕາມ​ມາ​ໂດຍ​ບໍ່​ຄາດ​ຄິດ. ​ໂຣຄາ​ພະຍາດ​ທີ່​ເປັນຕາ​ໜັກ​ໃຈ ​ແລະ ​ເປັນຕາ​ຢ້ານ​ທີ່​ສຸດ​ໃນ​ສະພາບ​ປັດຈຸບັນ ກໍ​ຄື​ໂຄ​ວິດ-19 ​ເພາະ​ເຊື້ອພະຍາດ​ຊະນິດ​ນີ້​ມັນ​ເຂົ້າກັບ​ອາກາດ​ເຢັນ​ໄດ້​ດີ. ສ່ວນ​ຂ່າວ​ຄາວ​ໃນ​ເລື່ອງ​ຢຸກຢາ​ທາ​ນັງ ​ເປັນຕົ້ນຢາ​ວັກ​ຊິ​ນທີ່​ຈະ​ນຳ​ເອົາ​ມາ​ໃຊ້​ເພື່ອ​ຕ້ານ​ກັບ​ພະຍາດ​ຊະນິດ​ນີ້​ມັນ​ກໍ​ຍັງ​ເປັນຄວາ​ມຝັນ​ສຳລັບ​ບ້ານ​ເຮົາ ​ເພາະ​ກວ່າ​ຈະ​ມາ​ເຖິງ​ເພື່ອ​ຈະ​ໄດ້​ນຳ​ໃຊ້​ໃຫ້​ທົ່ວ​ເຖິງ​ກັນ​ມັນ​ກໍ​ຕ້ອງ​ໄດ້​ໃຊ້​ເວລາ​ສົມຄວນ ​ແລະ ຍັງ​ບໍ່​ຮູ້​ຢ່າງ​ລະອຽດ​ວ່າ​ເມື່ອ​ໃດ, ວັນ​ໃດ​ຈະ​ໄດ້​ສັກ​ຢາ​ວັກ​ຊີ​ນປ້ອງ​ກັນ​ໂຄ​ວິດ-19 ຢູ່​ບ້ານ​ເຮົາ.

​ເຖິງ​ຢ່າງ​ໃດ​ກໍ​ດີ, ອີງ​ໃສ່​ພູມີ​ປະ​ເທດ, ຈຸດ​ພິ​ເສດ​ທາງ​ດ້ານ​ສະພາບ​ດິນ​ຟ້າ​ອາກາດ ນັບ​ທັງ​ວິຖີ​ຊີວິດ​ຂອງ​ພົນລະ​ເມືອງ ສົມທົບ​ກັບ​ຮີດຄອງ​ປະ​ເພນີ, ຄວາມ​ເຊື່ອ​ຖື​ ປະ​ເທດ​ພວກ​ເຮົາ​ຈຶ່ງ​ມີ​ຜູ້​ຕິດ​ເຊື້ອໜ້ອຍ​ທີ່​ສຸດ​ໃນ​ພາກພື້ນ ​ແລະ ​ໃນ​ໂລກ, ​ແຕ່​ພວກ​ເຮົາ​ກໍ​ບໍ່​ຄວນ​ປະໝາດ ​ເພາະ​ຜູ້​ທີ່​ຈະ​ນຳ​ເຊື້ອພະຍາດ​ເຂົ້າມາ​ຂ້າ​ຄົນ​ລາວ​ອາດ​ແມ່ນ​ຜູ້​ທີ່​ຕິດ​ເຊື້ອມາ​ຈາກ​ປະ​ເທດ​ທີ່​ມີ​ການລະບາດ ຈຶ່ງ​ຂໍ​ໃຫ້​ທຸກ​ຄົນ​ພ້ອມ​ກັນ​ຮັກສາ​ສຸຂະພາບ​ນັ້ນລະ​ຈຶ່ງ​ດີ.

- WhatsApp Image 2020 05 27 at 5 - ຍາມໜາວ​ເອົາໃຈໃສ່ຮັກສາ​ສຸຂະພາບ
- WhatsApp Image 2020 05 27 at 5 - ຍາມໜາວ​ເອົາໃຈໃສ່ຮັກສາ​ສຸຂະພາບ
error: Alert: ເນື້ອຫາຂ່າວມີລິຂະສິດ !!