“ຖ້າ​ສິ່ງ​ສັກສິດ​ມີ​ຈິງວ່າ​ບໍ່​ໄດ້​ໂລບ​ເອົາ​ເງິນ​ຈັກກີ​ບກ້າ​ສາບານ​ແມ”

- 18622578 1326285024116421 4122453718666675551 n - “ຖ້າ​ສິ່ງ​ສັກສິດ​ມີ​ຈິງວ່າ​ບໍ່​ໄດ້​ໂລບ​ເອົາ​ເງິນ​ຈັກກີ​ບກ້າ​ສາບານ​ແມ”
- Untitled design - “ຖ້າ​ສິ່ງ​ສັກສິດ​ມີ​ຈິງວ່າ​ບໍ່​ໄດ້​ໂລບ​ເອົາ​ເງິນ​ຈັກກີ​ບກ້າ​ສາບານ​ແມ”

ໂດຍ:ທິດ​ກໍ່າ

ຕໍ່​ປະ​ໂຫຍ​ກຄຳ​ເຫັນ, ຊີ້​ແນະ​ໂອ້​ລົມ ອັນ​ເປັນ​ຄຳ​ເວົ້າທີ​ເດັດ​ຂອງ​ທ່ານ ພັນ​ຄຳ ວິພາ​ວັນ ຮອງ​ປະທານ​ປະ​ເທດ ທີ່​ໄດ້​ກ່າວ​ໃນ​ໂອກາດ​ເປີດ​ກອງ​ປະຊຸມ​ໃຫຍ່​ອົງຄະ​ນະ​ພັກ​ກະຊວງ​ການ​ເງິນ ຄັ້ງທີ III ທີ່​ໄດ້​ຈັດ​ຂຶ້ນ​ໃນ​ວັນ​ທີ 19 ພະຈິກ​ຜ່ານ​ມາ. ມີ​ບາງ​ຕອນ​ກາຍ​ເປັນ​ກະທູ້​ທີ​ເດັດ​ສຳຄັນ​ທີ່​ໄດ້​ໃຈ​ປະຊາຊົນ. ດັ່ງ​ປະ​ໂຫຍ​ກຄຳ​ເວົ້າທີ່​ວ່າ: “…ຖ້າ​ສິ່ງ​ສັກສິດ​ມີ​ຈິງ ວ່າ​ບໍ່​ໄດ້​ໂລບ​ເອົາ​ເງິນ​ຈັກກີ​ບກ້າ​ສາບານ​ແມ” ພາຍຫລັງ​ທ່ານ​ເວົ້າປະ​ໂຫຍ​ກນີ້​ສິ້ນສຸດ​ລົງ ກໍ​ມີ​ສຽງ​ຫົວ​ຮື​ຮາ​ດັງ​ຂຶ້ນທົ່ວ​ຫ້ອງ​ປະຊຸມ. ນອກຈາກ​ນັ້ນ ກໍ​ຍັງ​ມີ​ຫລາຍ​ບັນຫາ​ທີ່​ທ່ານ​ໄດ້​ຍົກ​ຂຶ້ນ ​ເພື່ອ​ເປັນ​ທິດ​ທາງ​ແກ້​ໄຂ​ໃນ​ຕໍ່ໜ້າ ​ເປັນຕົ້ນ​ແມ່ນ​ໃນ​ໜ້າ​ທີ່​ການ​ງານ​ຂອງ​ກະຊວງ​ການ​ເງິນ ກໍ​ຄື​ພະນັກງານ​ໃນ​ຂະ​ແໜງ​ການ​ເງິນ ນັບ​ແຕ່​ຂັ້ນທ້ອງ​ຖິ່ນ​ຂຶ້ນຮອດ​ສູນ​ກາງ​ທີ່​ຈະ​ຕ້ອງ​ໄດ້​ແກ້​ໄຂ​ຈຸດ​ອ່ອນ​ຄົງ​ຄ້າງ​ຂອງ​ຕົນ​ເຊັ່ນ: ຍັງ​ມີ​ສະມາຊິກ​ພັກ, ພະນັກງານ​ການ​ເງິນ​ຫລາຍ​ສະຫາຍ​ຍັງ​ບໍ່​ທັນ​ກຳ​ໄດ້​ລະບຽບ​ຫລັກການ​ພື້ນຖານ​ວຽກ​ງານ​ທີ່​ຕົນ​ຮັບຜິດຊອບ, ບາງ​ສະຫາຍ​ຄວາມ​ຮູ້​ຄວາມ​ສາມາດ​ບໍ່​ທັນ​ພຽງພໍ ​ເຊິ່ງ​ໃນ​ຜ່ານ​ມາ​ກໍ​ເຄີຍ​ໄດ້​ຈັດຕັ້ງສອບ​ເສັງ​ທົດ​ສອບ​ດ້ານ​ຄວາມ​ຮູ້, ຄວາມ​ສາມາດ​ຂອງ​ພະນັກງານ​ການ​ເງິນ​ ​ໄດ້​ມີ​ຫລາຍ​ສະຫາຍ​ບໍ່​ຜ່ານ, ​ແຕ່​ກົງກັນຂ້າມ ​ໃຜ​ກໍ​ຍາດ​ກັນ​ມາ​ເປັນ​ພະນັກງານ​ການ​ເງິນ, ​ເມື່ອ​ໄດ້​ເຂົ້າມາ​ເຮັດ​ວຽກ​ແລ້ວ ກໍ​ຫາ​ວິທີ​ສໍ້​ໂກງ​ເອົາ​ເງິນ​ລັດ​ດ້ວຍ​ວິທີ​ການ​ຕ່າງໆ​ນາໆ.

​ເພາະສະນັ້ນ ຈຶ່ງ​ຮຽກຮ້ອງ​ໃຫ້​ພະນັກງານ​ໃນ​ຂະ​ແໜງ​ການ​ເງິນ​ທຸກ​ສະຫາຍ​ຕ້ອງ​ໄດ້​ພ້ອມ​ກັນ​ສູ້​ຊົນ​ແກ້​ໄຂ​ບັນຫາ​ໃຫ້​ໝົດ​ໄປ, ​ໃຫ້​ສົມ​ກັບ​ວ່າ​: ຊາດ ​ແລະ ປະຊາຊົນ ກໍ​ຄື​ພັກ-ລັດຖະບານ​ໄດ້​ມອບ​ໝາ​ຍ​ໃຫ້. ທ່ານ​ຮອງ​ປະທານ​ປະ​ເທດ ຍັງ​ໄດ້​ຢ້ຳວ່າ: ໜ້າ​ທີ່​ບູລິ​ມະ​ສິດ​ຂອງ​ຂະ​ແໜງ​ການ​ເງິນ​ໃນ 5 ປີ​ຕໍ່ໜ້າ ຄືກ​ອບກູ້​ເອົາ​ສະພາບ​ວິ​ກິດ​ທາງ​ດ້ານ​ການ​ເງິນ​ໃນ​ໄລຍະ​ຫລາຍ​ປີຜ່ານມາ​ໃຫ້​ຄືນ​ສູ່​ສະພາບ​ປົກກະຕິ ຫລື ຢ່າງ​ໜ້ອຍ​ກໍ​ໃຫ້​ມັນ​ເບົາບາງ​ລົງ. ຖ້າ​ເຮັດ​ໄດ້​ແນວ​ນີ້ ຈຶ່ງ​ຖື​ວ່າ​ເຮັດ​ຫລ້ອນ​ໜ້າ​ທີ່. ​ໃນ​ໄລຍະ​ຜ່ານ​ມາ, ຖື​ວ່າ​ພວກ​ສະຫາຍ​ກໍ​ໄດ້​ສູ້​ຊົນ​ແກ້​ໄຂ​ບັນຫາ​ຕ່າງໆ​ໄດ້​ດີ​ສົມຄວນ​ແລ້ວ, ​ແຕ່​ສຳລັບ​ອົງຄະ​ນະ​ພັກ​ຊຸດ​ນີ້​ຕ້ອງ​ໄດ້​ບຸ​ກທະລຸ​ເຮັດ​ຫລ້ອນ​ໜ້າ​ທີ່​ຂອງ​ຕົນ​ໃຫ້​ຫລາຍ​ຂຶ້ນ ​ເພາະ​ອົງຄະ​ນະ​ພັກ​ຊຸດ​ນີ້​ສ່ວນ​ຫລາຍ​ມີ​ແຕ່​ຄົນ​ຮຸ້ນ​ໜຸ່ມ ທັງ​ມີ​ວິຊາ​ຄວາມ​ຮູ້, ຄວາມ​ສາມາດ​ພຽງ​ພ້ອມ ​ແລະ ຂໍ​ຢ່າ​ໃຫ້​ພັກ ​ແລະ ລັດຖະບານ​ມີ​ຄວາມ​ຜິດ​ຫວັງ ຍ້ອນ​ການ​ບໍລິຫານ​ງານ​ຂອງ​ຄະນະ​ພັກ​ຊຸດ​ໃໝ່.

​ໄປ​ຄຽງ​ຄູ່​ກັນນັ້ນ, ທ່ານ​ຍັງ​ໄດ້​ຮຽກຮ້ອງ​ໃຫ້​ພະນັກງານ​ການ​ເງິນ​ທຸກ​ຄົນ​ຕ້ອງ​ໄດ້​ແກ້​ໄຂ​ພາບ​ພົດ​ທາງ​ລົບ ​ແລະ ຫາງ​ສຽງ​ວິພາກ​ວິຈານ​ຂອງ​ສັງຄົມ​ຕໍ່​ພະນັກງານ​ການ​ເງິນ ກໍ​ຄື​ຂະ​ແໜງ​ການ​ເງິນ​ໃນ​ແງ່​ມຸມ​ທີ່​ບໍ່​ດີ​ໃຫ້​ໝົດ​ໄປ ຍ້ອນ​ວ່າ​ໃນ​ຜ່ານ​ມາ ສັງຄົມ​ເຂົາ​ຂາດ​ສັດທາ​ຕໍ່​ພະນັກງານ​ການ​ເງິນ ຍ້ອນ​ບັນຫາ​ການ​ສໍ້​ລາດ​ບັງ​ຫລວງ​ໃນ​ຂົງ​ເຂດ​ນີ້​ຢ່າງ​ກວ້າງຂວາງ ​ແລະ ​ແຜ່​ລາມ. ຕໍ່​ພາບ​ພົດ​ທີ່​ເສຍ​ຫາຍ​ແຜ່​ລາມ​ທີ່​ສຸດ​ກໍ​ແມ່ນ​ໃນ​ຂົງ​ເຂດ​ພາສີ, ຂົງ​ເຂດ​ອາກອນ ​ເຊິ່ງ​ໃນ​ຕົວ​ຈິງ​ແລ້ວ ຖ້າ​ໃຜ​ໄດ້​ເປັນ​ພາສີ, ​ເປັນ​ອາກອນ​ແລ້ວ ​ລ້ວນ​ແຕ່​ເປັນ​ຄົນ​ລ້ຳລວຍ​ຮັ່ງມີ​ແບບ​ຜິດ​ປົກກະຕິ​ເຊັ່ນ: ມີ​ຄະ​ລື​ຫາດ​ຫລາຍ​ຫລັງ, ມີ​ລົດ​ຫລູຫລາ​ຂີ່​ຫລາຍ​ຄັນ, ມີ​ດິນ​ດອນ​ຕອນ​ຫຍ້າ​ບໍ່​ອຶດ​ບໍ່​ຢາກ ​ເຊິ່ງສິ່ງ​ເຫລົ່າ​ນີ້​ມັນ​ລ້ວນ​ແລ້ວ​ແຕ່​ເປັນ​ການ​ຜິດ​ຕໍ່​ຈັນ​ຍາ​ບັນ​ຂອງ​ການ​ເປັນ​ພະນັກງານ​ການ​ເງິນ ​ແລະ ​ເມື່ອ​ປຽບທຽບ​​ໃສ່​ສັງຄົມ​ທົ່ວ​ໄປ ຫລື ປຽບທຽບ​ໃສ່​ຊີວິດ​ການ​ເປັນ​ຢູ່​ຂອງ​ພະນັກງານ, ສະມາຊິກ​ພັກ​ຜູ້​ທີ່​ເຮັດ​ວຽກ​ໃນ​ຂົງ​ເຂດ​ການ​ເມືອງ​ແມ່ນ​ຫລຸດ​ລື່ນ​ແຕກ​ຕ່າງ​ກັນ​ປານ​ຟ້າ​ກັບ​ດິນ.

ຈາກ​ປາກົດການ​ຫຍໍ້​ທໍ້​ຕ່າງໆ​ທີ່​ໄດ້​ກ່າວ​ມາ​ນີ້ ມັນ​ຈຶ່ງ​ມີ​ຜົນ​ກະທົບ​ໃນ​ທາງ​ລົບ​ຫລາຍ​ດ້ານ​ຕໍ່​ລາຍ​ຮັບ​ຂອງ​ຊາດ ​ແລະ ຊີວິດ​ການ​ເປັນ​ຢູ່​ຂອງ​ພະນັກງານ-ລັດຖະກອນ​ໂດຍ​ລວມ ທັງ​ຍັງ​ສ້າງ​ຄວາມ​ເລື່ອມ​ລ້ຳຕໍ່າ​ສູງ, ຖານະ​ຕຳ​ແໜ່​ງ​ໃນ​ສັງຄົມ​ບ້ານ​ເມືອງ​ຢ່າງ​ໄຮ້​ຄວາມ​ຍຸຕິ​ທຳ.

ຕາມ​ທິດ​ກໍ່າ​ວ່າ, ​ເວົ້າ​ເລື່ອງ​ການ​ສໍ້​ລາດ​ບັງ​ຫລວງ​ໃນ​ສັງຄົມ​ລາວ​ໃນ​ໄລຍະ​ຜ່ານ​ມາ ກໍ​ຄື​ໃນ​ປັດຈຸບັນ ມັນ​ກໍ​ບໍ່​ແມ່ນ​ແຕ່​ຂະ​ແໜງ​ການ​ເງິນ ຫລື ພະນັກງານ​ການ​ເງິນ​ດ໋ອກ, ມັນ​ມີ​ຢູ່​ທົ່ວ​ໄປ ຕ່າງ​ແຕ່​ວ່າ​ຜູ້​ຫລາຍ​ຜູ້​ໜ້ອຍ, ຜູ້​ນ້ອຍ​ຜູ້​ໃຫຍ່, ຜູ້​ຕໍ່າ​ຜູ້​ສູງ, ​ເປັນ​ເຈົ້າ​ເປັນ​ນາຍ ​ເວົ້າລວມ​ແລ້ວ​ຜູ້​ໃດ​ທີ່ຢູ່​ໃກ້​ກັບ​ເສດຖະກິດ, ຢູ່​ໃກ້​ກັບ​ເງິນ, ຢູ່​ໃກ້​ກັບ​ຊັບ​ສິນ​ດິນ​ດອນ​ຕອນ​ຫຍ້າ ກໍ​ເປັນ​ອັນວ່າ​ລຽບ​ວຶດ​ດ້ວຍ​ກັນ​ທັງ​ນັ້ນ. ຈາກ​ນັ້ນຈຶ່ງ​ເຮັດ​ໃຫ້​ສະພາບ​ເສດຖະກິດ​ຂອງ​ຊາດ​ຈຳນວນ​ບໍ່​ໜ້ອຍ​ຖືກ​ຫລຸດ​ຖອຍ​ຄື​ດັ່ງ​ເຮົາ​ເຫັນ​ໃນ​ໄລຍະ​ຊຸມ​ປີຜ່ານມາ, ຊ້ຳບໍ່​ໜຳ ປະ​ເທດ​ຊາດ​ບ້ານ​ເມືອງ​ຍັງ​ຕ້ອງ​ມາ​ປະສົບ​ບັນຫາ​ຖືກ​ຜົນ​ກະທົບ​ກັບ​ໄພ​ທໍາມະ​ຊາດ, ​ໂຣກລະບາດ, ​ໂຣຄາ​ພະຍາດ​ຢ່າງ​ເນື່ອງ​ຈິດ​ລຽນຕິດ. ກໍ​ເໝືອນ​ດັ່ງ​ພວກ​ເຮົາ​ໄດ້​ຜະ​ເຊີນ​ກັບ​ໂຣກລະບາດ​ຂອງ​ເຊື້ອພະຍາດ​ໂຄ​ວິດ-19 ​ໃນ​ປັດຈຸບັນ.

- Wave100S AD to Website 2020 0 - “ຖ້າ​ສິ່ງ​ສັກສິດ​ມີ​ຈິງວ່າ​ບໍ່​ໄດ້​ໂລບ​ເອົາ​ເງິນ​ຈັກກີ​ບກ້າ​ສາບານ​ແມ”

​ເຖິງ​ຢ່າງ​ໃດກໍ​ດີ, ພາຍ​ໃຕ້​ການ​ນຳພາ​ຂອງ​ພັກ ​ແລະ ລັດຖະບານ​ເຮົາ​ໃນ​ຜ່ານ​ມາ ກໍ​ຄື​ໃນ​ປັດຈຸບັນ ​ແລະ ​ເບິ່ງ​ໄປ​ໃນ​ອະນາຄົດ​ຂ້າງ​ໜ້າ, ຖ້າ​ພວກ​ເຮົາ​ຫາກ​ເຫັນ​ໄດ້​ຄວາມທຸກ​ຍາກ​ຂອງ​ບ້ານ​ເມືອງ, ​ເຫັນ​ໄດ້ຜົນ​ປະ​ໂຫຍ​ດຂອງ​ຊາດ​ຫລາຍ​ກວ່າ​ຜົນ​ປະ​ໂຫຍ​ດສ່ວນ​ຕົວ, ມີ​ສິນ​ທຳ​ປະຕິວັດ, ມີ​ເມດ​ຕາ​ກະລຸນາ, ຮູ້​ແບ່ງ​ຜົນ​ປະ​ໂຫຍ​ດ​ເພື່ອ​ຕົນ​ເອງ ​ແລະ ​ເພື່ອ​ປະ​ເທດ​ຊາດ, ຮ່ວມ​ກັນ​ສ້າງສາ​ພັດທະນາ​ໃຫ້​ປະ​ເທດ​ຊາດ​ບ້ານ​ເມືອງ​ຈະ​ເລີ​ນຮຸ່ງ​ເຮືອງ​ມີ​ກ້າວໜ້າ​ເໝືອນ​ດັ່ງປະ​ເທດ​ອື່ນ​ທີ່​ເຂົາ​ຈະ​ເລີ​ນ​ແລ້ວ, ​ແນ່ນອນ​ປະ​ເທດ​ຊາດ​ກໍ​ຕ້ອງ​ຈະ​ເລີ​ນຮຸ່ງ​ເຮືອງ, ມັ່ງ​ຄັ່ງ​ຮັ່ງມີ, ປະຊາຊົນ​ມີ​ຄວາມ​ຜາ​ສຸກ​ຢ່າງ​ແນ່ນອນ.

 

- WhatsApp Image 2020 05 27 at 5 - “ຖ້າ​ສິ່ງ​ສັກສິດ​ມີ​ຈິງວ່າ​ບໍ່​ໄດ້​ໂລບ​ເອົາ​ເງິນ​ຈັກກີ​ບກ້າ​ສາບານ​ແມ”
- WhatsApp Image 2020 05 27 at 5 - “ຖ້າ​ສິ່ງ​ສັກສິດ​ມີ​ຈິງວ່າ​ບໍ່​ໄດ້​ໂລບ​ເອົາ​ເງິນ​ຈັກກີ​ບກ້າ​ສາບານ​ແມ”

Comment

    Bounchanh Wanthammasyda
    09/12/2020 - 1:43 am

    ຂໍມີຄຳເຫັນນຳແດ່.
    ຂະນ້ອຍກໍ່ໄດ້ເບິ່ງວິດີໂອຂອງເພີ່ນທີ່ໂອ້ລົມກ່ຽວກັບບັນຫາດັ່ງກ່າວ. ຖ້າຂະນ້ອຍເປັນນັກວາງແຜນ ຫລື ເປັນຜູ້ບໍລິຫານ ຂະນ້ອຍຈະທຳແຕກຕ່າງໄປຈາກ ອະຍາລຸງປະທານເວົ້າ ໃນບາງກໍລະນີ ແລະ ບາງບັນຫາ. ເພາະວ່າການທີ່ຈະໃຫ້ພະນັກງານໄປສາບານຕົນກັບສິ່ງສັກສິດ ເຖິງວ່າມັນມີຈິງ ມັນກໍ່ຊ່ວຍທ່ານບໍ່ໄດ້. ເພາະວ່າສິ່ງສັກສິດບໍ່ໄດ້ເຄີຍສາບານກັບທ່ານເລີຍວ່າ ພວກເພິ່ນຈະທຳງານເພື່ອທ່ານ ແລະ ຊ່ວຍທ່ານປາບການສໍ້ໂກງພວກນີ້. ຖ້າສິ່ງສັກສິດມີຈິງ, ພວກເພີ່ນກໍ່ຄົງມີງານທີ່ຈະຕ້ອງທຳ. ຖ້າພວກເພີ່ນມາທຳງານໃຫ້ພວກທ່ານໃນການຮັບຟັງການສາບານຕົນວ່າຂ້າພະເຈົ້າໂກງ ຫລື ບໍ່ໂກງ, ພວກສິ່ງສັກສິດເຫລົ່ານັ້ນຄົງຫີວຕາຍ ເພາະເຫີງໆພວກຄົນທີ່ຈະສາບານຕົນເຫລົ້ານັ້ນທຳອີກທີ. ພວກສິ່ງສັກສິດເຫລົ້ານັ້ນບໍ່ຍອມທຳການຄ້າກັບພວກລູກຄ້າທີ່ບໍ່ແນ່ນອນກັບພວກເຂົາເດັດຂາດ. ຖ້າພວກເຂົາທຳ, ພວກເຂົາກະໂງນັ້ນຕົວເພາະພວກເຂົາສາມາດຮູ້ຮອດວ່າໃຜທຳດີ ແລະ ບໍ່ດີ.

    ຖ້າຂະນ້ອຍເປັນສິ່ງສັກສິດ, ຈະໄປນິມີດຄວາມຝັນໃຫ້ອະຍາລຸງ ຮອງປະທານວ່າ: ສານຕຸລາການ, ກົດຫມາຍ, ຕຳຫລວດ, ທະຫານ, ພັກ, ລັດ ແລະ ທິດສະດີຂອງລັດທິຂອງຄອມມິວນິດ ຫລື ສັງຄົມນິຍົມຂອງພວກທ່ານກະມີ ເປັນຫຍັງບໍ່ໃຊ້ມັນ ມາສາບານຕົນກັບກູໃຫ້ເມື່ອຍປາກສູໄປເຮັດຫຍັງ. ເຄື່ອງມືໃຊ້ໃນການເຮັດວຽກມີຫມົດແລ້ວ ກໍ່ໃຊ້ມັນຕະວາ.
    ຖ້າຂະນ້ອຍເປັນສິ່ງສັກສິດ ສິບອກທ່ານຮອງປະທານອີກວ່າ: ໃຫ້ພວກເຂົາ ມາສາບານກັບ ພັກ, ລັດ, ກະຊວງຍຸດຕິທຳ
    ແລະ ສານຕຸລາການ ນັ້ນ. ເມື່ອພວກເຂົາມາສາບານຕໍ່ ພັກ, ລັດ, ກະຊວງຍຸດຕິທຳ ແລະ ສານຕຸລາການແລ້ວ ບໍ່ທຳຕາມທີ່ຕົນສາບານ. ພັກ, ລັດ, ກະຊວງຍຸດຕິທຳ ແລະ ສານ ກໍ່່ຄວນຈະທຳງານຕວດສອບ ແລະ ສອບສວນ. ຖ້າ ພັກ, ລັດ, ກະຊວງຍຸດທຳ ແລະ ສານ ຂີ້ຄ້ານເຮັດວຽກ ຫລື ບໍ່ມີຄວາມສາມາດໃນການເຮັດວຽກ ນັັ້ນມັນກໍ່ເລື້ອງຂອງພວກສູ ມັນເປັນວາດສະຫນາຂອງພວກສູ. ປຽບເຫມືອນພໍ່ແມ່ມີລູກ ແຕ່ບໍ່ຮູ້ຈັກຕິດຕາມ, ກວດສອບ, ຕັດສິນ ແລະ ລົງໂທດເມື່ອລູກທຳຜິດ ສູກໍ່ໄດ້ລູກບໍ່ດີ ແລ້ວ ພວກລູກນັ້ນໆ ກໍ່ຈະກັບມາທຳລາຍຄອບຄົວຂອງພວກທ່ານເອງ. ອົງກອນຕ່າງໆພວກທ່ານກໍ່ມີຫມົດແລ້ວ ຊິມາສາບານຕົນກັບສິ່ງສັກສິດຄືພວກກູເຮັດຫຍັງ? ທຳເອົາເອງຊັ້ນຕະວາ. ຖ້າບໍ່ຮູ້ຈັກທຳເອົາເອງ, ພວກທ່ານກໍ່ແຍ້ງກັນກິນຢູ່ຫັ່ນແລະ.
    ຄົນເຮົາ: ມີໂກດ, ມີໂລບ, ມີຫລົງ, ມາຈາກຫລາຍພໍ່ຫລາຍແມ່, ມາກຈາກຫລາຍຕະກູນ, ບາງຄົນມີອຳນາດນ້ອຍບາງຄົນມີອຳນາດຫລາຍ ຄວາມຮູ້ຄວາມສາມາດແຕ່ລະຄົນບໍ່ຄືກັນ, ຄວາມຢາກຂອງແຕ່ລະຄົນກໍ່ບໍ່ຄືກັນ ແລະ ຄວາມສັດຊື່ບໍລິສຸດກໍ່ບໍ່ຄືກັນ. ມີແຕ່ສິ່ງດຽວທີ່ແກ້ໄຂໄດ້ນັ້ນກໍ່ຄື: ການບັງຄັບການໃຊ້ກົດຫມາຍຢ່າງເຂັ້ມງວດ ແລະ ການປົກຄອງທີ່ໃຊ້ກົດຫມາຍຢ່າງເດັດຂາດ. ບໍ່ແມ່ນການໃຊ້ອຳນາດນອກກົດຫມາຍຢ່າງເດັດຂາດ. ຖ້າບໍ່ດັ່ງນັ້ນ, ຜູ້ມີອຳນາດເຫນືອກວ່າຄົນອື່ນ, ມີຄວາມຮູ້ຄວາມສາມາດກວ່າຄົນອື່ນ ແລະ ຄວາມໂລບກວ່າຄົນອື່ນ ຈະໄປເອົາປຽບຜູ້ທີ່ດ້ອຍກວ່າ ແລະ ຜານງົບປະມານຂອງຊາດ.
    ສິ່ງສັກສິດບອກວ່າ: ຢ່າມາສາບານກັບພວກກູດອກມັນບໍ່ມີປະໂຫຍດ ເພາະພວກກູບໍ່ໄດ້ເຄີຍໃຫ້ຄຳສາບານກັບພວກທ່ານວ່າຈະຊ່ວຍພວກທ່ານໃນເລື້ອງເຫລົ່ານັ້ນເລີຍ. ເມື່ອພວກກູບໍ່ເຄີຍຮັບປາກວ່າຈະຊ່ວຍພວກທ່ານ, ຢ່າເອົາຂອງມາບະພວກກູອີກເລີຍ, ຢ່າມາສາບານກັບພວກກູອີກ ແລະ ຢ່າສອນໃຫ້ພັກພວກສູມາສາບານກັບພວກກູອີກ. ພວກກູຈະບໍ່ຊ່ວຍພວກທ່ານແນ່ນອນ. ພວກທ່ານຕ້ອງທຳເອົາເອງ. ຖ້າບໍ່ເຊື່ອກໍ່ລອງທຳຈັກຫນື່ງຮ້ອຍປີວ່າຈະເປັນຢ່າງໃດ,

    ເຮັດເອົາເອງເສຍເຖີດທ່ານຮອງປະທານເອີຍ. ຢ່າສອນພວກລູກພວກຫລານທຳແບບນັ້ນເລີຍ. ມັນບໍ່ມີປະໂຫຍດທາງການບໍລິຫານເລີຍ.

    ສິ່ງສັກສິດຈິງໆນັ້ນຄື: ພັກ, ລັດ, ກະຊວງຍຸດຕິທຳ, ສານ ແລະ ອົງກອນຕ່າງໆທີ່ໃຊ້ເປັນເຄື່ອງມືໃນການເຮັດວຽກ. ສິ່ງສັກສິດເຫລົ້ານີ້ ສາມາດຕັດຄໍຄົນກໍ່ໄດ້, ໃຫ້ຕຳແຫນ່ງກໍ່ໄດ້, ປົດຕຳແຫນ່ງກໍ່ໄດ້, ເອົາຄົນເຂົ້າຄຸກກໍ່ໄດ້, ລົງໂທດກໍ່ໄດ້, ກວດສອບຄົນກໍ່ໄດ້, ສືບສວນຄົນກໍ່ໄດ້. ເມື່ອສິ່ງເຫລົ້ານີ້ຄືສິ່ງສັກສິດ ກໍ່ໃຊ້ພວກມັນຊັ້ນຕົວ ຫລືວ່າສິ່ງສັກສິດເຫລົ້ານີ້ ບໍ່ຮັບປາກເຮັດວຽກໃຫ້ບໍ? ທ່ານຮອງປະທານ.

Comments are closed.

error: Alert: ເນື້ອຫາຂ່າວມີລິຂະສິດ !!