ຝຣັ່ງ ສັ່ງກຳຈັດເປັດ 6 ພັນໂຕ ຫລັງໄຂ້ຫວັດສັດປີກລະບາດໃນປະເທດ
ສຳນັກຂ່າວຕ່າງປະເທດລາຍງານວ່າ: ໄຂ້ຫວັດສັດປີກສາຍພັນ H5N8 ໄດ້ລະບາດຢ່າງໜັກໃນປະເທດເຂດເອີຣົບ ໂດຍລັດຖະມົນຕີກະຊວງກະສິກຳຂອງຝຣັ່ງ ອອກມາຢືນຢັນວ່າ: ໄຂ້ຫວັດສັດປີກໄດ້ລະບາດຢູ່ຟາມເປັດແຫ່ງໜຶ່ງທາງຕາເວັນຕົກສຽງໃຕ້ຂອງປະເທດແລ້ວ.
ຫລ້າສຸດລັດຖະບານສັ່ງຄັດເປັດປະມານ 6 ພັນໂຕທີ່ມີເຊື້ອໄວຣັສອອກຈາກຟາມ ເນື່ອງຈາກພົບວ່າມີອັດຕາການຕາຍຂ້ອນຂ້າງສູງ ແລະ ການຄັດເປັດທີ່ຕິດເຊື້ອໄວຣັສອອກມາ ເພື່ອປ້ອງກັນການລະບາດຂອງໄວຣັສ. ລັດຖະມົນຕີກະຊວງກະສິກຳຂອງຝຣັ່ງ ຍັງບອກອີກວ່າ: ນີ້ເປັນການລະບາດຂອງໄຂ້ຫວັດສັດປີກໃນຟາມສັດລ້ຽງຂອງຝຣັ່ງເປັນຄັ້ງທຳອິດໃນປີນີ້ ແລະ ຢືນຢັນວ່າ: ໄວຣັສ H5N8 ລະບາດໃນກຸ່ມສັດປ່າເທົ່ານັ້ນ ແລະ ຈະບໍ່ແຜ່ເຊື້ອມາສູ່ມະນຸດ.
ໃນອາທິດຜ່ານມາ, ຝຣັ່ງພົບສັດປ່າເຊັ່ນ: ຫ່ານ ແລະ ຫົງຕາຍທົ່ວປະເທດ ແລະ ລັດຖະບານໄດ້ເລັ່ງແກ້ໄຂບັນຫາ ໂດຍການສັ່ງປິດພື້ນທີ່ທີ່ໄດ້ຮັບຜົນກະທົບ.
