ນາຍົກອິດສະລາແອນ “ອາສາ” ສັກວັກຊີນ ປ້ອງກັນໂຄວິດຄົນທຳອິດຂອງປະເທດ

ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ໄດ້ໄປຢືນຖ້າຮັບວັກຊີນປ້ອງກັນໂຄວິດທີ່ສັ່ງມາຈາກບໍລິສັດ Pfizer ແລະ BioNTech SE ພ້ອມທັງອາສາເປັນຄົນທຳອິດທີ່ຈະໄດ້ຮັບການສັກວັກຊີນນີ້.
ສຳນັກຂ່າວເຈ ໂພດ ລາຍງານວ່າ: ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ຖະແຫລງວ່າ: ຈະອາສາເປັນຄົນທຳອິດທີ່ໄດ້ຮັບການສັກວັກຊີນປ້ອງກັນໂຄວິດ-19 ຂອງປະເທດ ເພື່ອສະແດງຄວາມເຊື່ອໝັ້ນຕໍ່ປະຊາກອນ ເຊິ່ງທາງລັດຖະບານໄດ້ສັ່ງມາຈາກບໍລິສັດ ໄຟເຊີ ອິງ ແລະ ໄບໂອເອນເທັກ ເອັສອີ.
ທ່ານນາຍົກ ໄດ້ໄປຢືນຖ້າຮັບວັກຊີນຢູ່ສະໜາມບິນ ໃນເຊົ້າວັນທີ 9 ທັນວາ ເຊິ່ງທັງສອງບໍລິສັດໄດ້ເຊັນຂໍ້ຕົກລົງຈະສົ່ງວັກຊີນ 8 ລ້ານໂດສ ໃຫ້ປະເທດອິດສະລາແອນ ຕາມຫລັງອັງກິດທີ່ເລີ່ມການສັກວັກຊີນໃນວັນທີ 8 ທັນວາ.
ເຖິງຢ່າງໃດກໍຕາມ, ແຫລ່ງຂ່າວທ້ອງຖິ່ນອິດສະລາແອນລາຍງານວ່າ: ວັກຊີນທີ່ຖືກສົ່ງມານີ້ມີໄວ້ສຳລັບການທົດລອງຂະບວນການຂົນສົ່ງ ແລະ ການເກັບຮັກສາ, ສ່ວນວັກຊີນສຳລັບປະຊາຊົນທົ່ວໄປຈະທະຍອຍມາສົ່ງພາຍໃນວັນທີ 10 ທັນວາຄືເກົ່າ.
ອິດສະລາແອນມີປະຊາກອນ 9 ລ້ານຄົນທົ່ວປະເທດ ໂດຍມີຜູ້ຕິດເຊື້ອໂຄວິດ-19 ແລ້ວ 347.497 ຄົນ ແລະ ຜູ້ເສຍຊີວິດ 2.925 ຄົນ.