ຂີ້ລັກ​ງັດ​ແງະ ໜຶ່ງ​ໃນ​ບັນຫາ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ

- 666 1 - ຂີ້ລັກ​ງັດ​ແງະ ໜຶ່ງ​ໃນ​ບັນຫາ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ
- Untitled design - ຂີ້ລັກ​ງັດ​ແງະ ໜຶ່ງ​ໃນ​ບັນຫາ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ

ໂດຍ: ທິດ​ກໍ່າ

ບັນຫາ​ຄົນ​ຂີ້ລັກ​ງັດ​ແງະ, ລັກ​ເລັກ​ຂະ​ໂມ​ຍນ້ອຍ ​ເປັນ​ປາກົດການ​ຫຍໍ້​ທໍ້​ອັນ​ໜຶ່ງ​ທີ່​ມີ​ການ​ແຜ່​ລາມ​ຢ່າງ​ກວ້າງຂວາງ​ມາ​ເປັນ​ເວລາ​ຫລາຍ​ສິບ​ປີ​ ໃນ​ປະ​ເທດ​ຊາດ​ບ້ານ​ເມືອງຂອງ​ພວກ​ເຮົາ ​ແລະ ກໍ​ຖື​ວ່າ​ມັນ​ເປັນ​ການ​ກົດ​ໜ່ວງ​ຢ່າງ​ໃຫຍ່​ຫລວງ​ຕໍ່​ຄວາມ​ຈະ​ເລີ​ນຂອງ​ຊາດ​ຫລາຍ​ພໍ​ສົມຄວນ. ຖ້າ​ເຮົາ​ຫາກ​ວິ​ເຄາະ​ເບິ່ງ​ຢ່າງ​ໜຶ່ງ ມັນ​ກໍ​ປຽບ​ເໝືອນ​ຄູ່​ມາດຕະ​ເກນ​ລະຫວ່າງ​ອັນ​ດີ​ກັບ​ອັນ​ຮ້າຍ ​ເຊິ່ງ​ໄດ້​ປາກົດ​ຕົວ​ຂຶ້ນ​ໃນ​ສັງບ້ານ​ເມືອງ​ທີ່ພວມ​ປະສົບ​ບັນຫາ​ຫຍຸ້ງຍາກ ​ແລະ ລິ​ເລີ່​ມມີ​ການ​ພັດທະນາ, ​ແຕ່​ຖ້າ​ປະປ່ອຍ​ໃຫ້​ຂະ​ບວນການ​ດັ່ງກ່າວ​ລອຍ​ນວນ ​ໂດຍ​ບໍ່​ມີ​ມື້ສິ້ນສຸດ ມັນ​ກໍ​ຍິ່ງ​ຈະ​ມີ​ຜົນ​ກະທົບ​ຕໍ່​ຄວາມ​ສະຫງົບ​ສຸກ ​ແລະ ຄວາມ​ໝັ້ນຄົງ​ປອດ​ໄພ​ຂອງ​ປະ​ເທດ​ຊາດ​ບ້ານ​ເມືອງ ນັບ​ທັງ​ລະບົບ​ເສດຖະກິດ-ສັງຄົມ​ຂອງ​ປະ​ເທດ​ບໍ່​ໜ້ອຍ. ດັ່ງ​ຕົວຢ່າງ​ທີ່ຊີ້​ໃຫ້​ເຫັນ​ຢ່າງ​ຊັດ​ເຈນ ກໍ​ຄື​ໃນ​ສອງ​ອາທິດ​ຫລັງໆ​ຜ່ານ​ມາ ກໍ​ມີ​ຂ່າວ​ວ່າ​ໄດ້​ມີ​ຄົນ​ຮ້າຍ​ໄປ​ລັກ​ຫັນ​ເອົາ​ນ໊ອດລາງ​ລົດ​ໄຟ​ຄວາມ​ໄວ​ສູງ ລາວ-ຈີນ ​ແລະ ຕໍ່​ມາ​ໃນ​ວັນ​ທີ 8 ທັນວາຜ່ານ​ມາ​ນີ້ ກໍ​ວ່າ​ມີ​ໂຈນ​ໄປ​ລັກ​ຕັດ​ເອົາ​ສາຍ​ໄຟ​ເຍືອງ​ທາງ​ບາງ​ຍ່ານ​ຕາມ​ສາຍ​ທາງ​ດ່ວນ​ວຽງ​ຈັນ-ວັງ​ວຽງ ​ເຊິ່ງມີ​ຄວາມ​ຍາວ 500 ກວ່າ​ແມັດ ມີ​ມູນ​ຄ່າ​ເສຍ​ຫາຍ​ເຖິງ 45 ລ້ານ​ກີບ ທັງໆ​ທີ່​ສາຍ​ທາງ​ດ່ວນ​ຍັງ​ບໍ່​ທັນ​ໄດ້​ເປີດ​ນຳ​ໃຊ້​ບໍລິການ. ນີ້​ຄື​ສັນຍານ​ເຕືອນ​ໄພ​ອັນຕະລາຍ ຊີ້​ໃຫ້​ເຫັນ​ລ່ວງ​ໜ້າ​ຕໍ່​ໂຄງການ, ກິດຈະການ​ຕ່າງໆ​ຂອງ​ປະ​ເທດ​ທີ່​ພວມ​ດຳ​ເນີນ​ໄປ​ດ້ວຍ​ບັນຍາກາດ​ອັນ​ດີ ​ແລະ ພວມ​ຄຶກຄັກ. ສິ່ງ​ທີ່​ໜ້າ​ເປັນ​ຫ່ວງ ​ແລະ ​ເຫັນ​ວ່າ​ມີ​ຄວາມ​ເປັນ​ອັນຕະລາຍ​ທີ່​ສຸດ​ກໍ​ແມ່ນ​ການ​ໄປ​ລັກ​ເອົາ​ນ໊ອດຕາມ​ສາຍ​ທາງ​ລົດ​ໄຟຄວາມ​ໄວ​ສູງ​ທີ່​ພວມ​ກໍ່ສ້າງ ​ແລະ ​ໃກ້​ຈະ​ສຳ​ເລັດ​ໃນ​ປີ​ສອງ​ປີ​ຂ້າງ​ໜ້າ. ຕໍ່​ເຫດການ​ທີ່​ເກີດ​ຂຶ້ນນີ້ ຖ້າ​ຫາກ​ພວກ​ເຮົາ​ບໍ່​ພ້ອມ​ກັນ​ເປັນ​ເຈົ້າການ​ປ້ອງ​ກັນ​ສະກັດ​ກັ້ນຢ່າງ​ຄັດ​ກຸມ, ​ເຂັ້ມ​ແຂງ ​ແລະ ​ເດັດຂາດ ມັນ​ຈະ​ເປັນ​ໄພ​ຄຸກ​ຄາມ​ຢ່າງ​ໃຫຍ່​ຫລວງ​ຕໍ່​ຄວາມ​ສະຫງົບ ​ແລະ ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ​ຢູ່​ໃນ​ສັງຄົມ. ອັນ​ສຳຄັນທີ່​ສຸດ​ກໍ​ແມ່ນ​ຄວາມ​ເປັນ​ອັນຕະລາຍ​ຕໍ່​ຊີວິດ​ອິນ​ຊີ ​ແລະ ຊັບ​ສິນ​ໃນ​ເວລາ​ລົດ​ໄຟ​ຄວາມ​ໄວ​ສູງ​ແລ່ນ​ບໍລິການ​ຮັບ​ໃຊ້ມວນ​ຊົນ​ໃນ​ອະນາຄົດ​ອັນ​ໃກ້ໆ​ນີ້. ນອກຈາກ​ສອງ​ເຫດການ​ທີ່​ກ່າວ​ມາ​ນີ້​ແລ້ວ ກໍ​ຍັງ​ມີ​ຫລາຍ​ເຫດການ ​ແລະ ປາກົດການຫຍໍ້​ທໍ້​ອື່ນ​ໃນ​ສັງຄົມ​ບ້ານ​ເມືອງ​ເຮົາ​ໃນ​ສະພາບ​ປັດຈຸບັນ.

​ເມື່ອ​ຕັ້ງ​ໂຈດ​ກັນ​ວ່າ: ຕໍ່​ບັນຫາ​ປາກົດການ​ຫຍໍ້​ທໍ້​ດັ່ງກ່າວ, ພວກ​ເຮົາ​ຈະ​ພ້ອມ​ກັນ​ແກ້​ໄຂ​ແນວ​ໃດ ? ຕໍ່​ຄຳ​ຕອບ​ໂຈດ ຖ້າ​ຈະ​ສັງ​ລວມ​ເອົາ​ແບບ​ລວມຍອດ​ກໍ​ຕ້ອງ​ແມ່ນ​ຄວາມ​ຮັບຜິດຊອບ​ຂອງ​ສັງຄົມ​ໂດຍ​ລວມ. ໝາຍວ່າ​ທຸກ​ຄົນ​ຕ້ອງ​ເປັນ​ເຈົ້າການ​ຮັກສາ​ຄວາມ​ສະຫງົບ​ປອດ​ໄພ​ຂອງ​ບ້ານ​ເມືອງ ທັງ​ເປັນ​ຫູ​ເປັນຕາ​ໃນ​ການ​ປົກ​ປັກ​ຮັກສາ​ຊັບ​ສິນລວມຂອງ​ປະ​ເທດ​ຊາດ ​ໃນ​ນີ້​ຖ້າ​ເວົ້າ​ເຖິງ​ພາລະ​ບົດບາດ​ໜ້າ​ທີ່​ໂດຍ​ກົງ ມັນ​ກໍ​ພົວພັນ​ເຖິງ​ວຽກ​ງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ນັບ​ແຕ່​ຂັ້ນສູນ​ກາງ​ລົງ​ຮອດ​ທ້ອງ​ຖິ່ນ. ນອກຈາກ​ລະບົບ​ວຽກ​ງານ​ທາງ​ສາຍຕັ້ງ​ແລ້ວ, ​ເບື້ອງສາຍ​ຂວາງ​ກໍ​ຕ້ອງ​ແມ່ນ​ອຳນາດ​ການ​ປົກຄອງ​ທ້ອງ​ຖິ່ນ​ທີ່​ຈະ​ຕ້ອງ​ໄດ້​ຮ່ວມ​ມື​ກັນ​ຄຸກ​ຄີ​ແກ້​ໄຂ​ບັນຫາ ​ແລະ ​ເຮັດ​ວຽກ​​ເຂັ້ມ​ແຂງ​ພໍ​ສົມຄວນ ຈຶ່ງ​ສາມາດ​ປ້ອງ​ກັນ​ສະກັດ​ກັ້ນພວກ​ໂຈນ​ຫ້າ​ຮ້ອຍ​ນີ້​ໄດ້.

ກໍ​ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ, ສາຍ​ທາງ​ດ່ວນ​ວຽງ​ຈັນ-ວັງ​ວຽງ ​ແລະ ​ເສັ້ນທາງ​ລົດ​ໄຟ​ຄວາມ​ໄວ​ສູງ​ລາວ-ຈີນ ​ແມ່ນ​ໝາກຜົນ​ແຫ່ງ​ການ​ຮ່ວມ​ມື​ລະຫວ່າງ​ສອງ​ພັກ, ສອງ​ລັດຖະບານ​ລາວ-ຈີນ ພາຍ​ໃຕ້​ໂຄງການ​ໜຶ່ງ​ແລ້ວ​ໜຶ່ງ​ເສັ້ນທາງ​ໃນ​ການ​ພັດທະນາ​ເຊື່ອມ​ໂຍງ​ທາງ​ດ້ານ​ເສດຖະກິດ ລະຫວ່າງ ລາວ-ຈີນ ​ແລະ ​ເຊື່ອມ​ໂຍງ​ໄປ​ຍັງ​ພາກພື້ນ ​ແລະ ​ໃນ​ໂລກ. ສະ​ເພາະ​ປະ​ເທດ​ລາວ​ກັບປະ​ເທດ​ຈີນ​ກໍ​ມີ​ສາຍ​ພົວພັນ​ຮ່ວມ​ມື​ກັນ​ມາ​ຢ່າງ​ຍາວ​ນານ ນັບ​ແຕ່​ສະ​ໄໝ​ການ​ປະຕິວັດ​ຊາດ​ປະຊາທິປະ​ໄຕ​ຈົນ​ມາ​ຮອດ​ປັດຈຸບັນ​ໄດ້​ກາຍ​ເປັນ​ເພື່ອນ​ຮ່ວມ​ຊາຕາກຳ​ອັນ​ດຽວ​ກັນ.

- Wave100S AD to Website 2020 0 - ຂີ້ລັກ​ງັດ​ແງະ ໜຶ່ງ​ໃນ​ບັນຫາ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ

​ເພາະສະນັ້ນ, ການ​ປົກ​ປັກ​ຮັກສາ​ໝາກຜົນ​ຂອງ​ການ​ຮ່ວມ​ມື​ໃນ​ການ​ສ້າງສາ ​ແລະ ພັດທະນາ​ປະ​ເທດ​ຊາດ ລະຫວ່າງ​ສອງ​ປະ​ເທດ​ຈຶ່ງ​ເປັນ​ຍອດ​ປາດ​ຖະໜາ​ຂອງ​ປະຊາຊົນ​ສອງຊາດ ລາວ-ຈີນ. ພາຍຫລັງ​ສອງ​ໂຄງການ​ນີ້​ສຳ​ເລັດ​ລົງ​ກໍຈະ​ໄດ້​ສືບ​ຕໍ່​ໂຄງການ​ອື່ນໆ​ໄປ​ຄຽງ​ຄູ່​ກັນ​ຢ່າງ​ມາກ​ມາຍ. ຍົກ​ຕົວຢ່າງ​ພາຍຫລັງ​ສຳ​ເລັດ​ໂຄງການ​ສ້າງ​ທາງ​ດ່ວນ ວຽງ​ຈັນ-ວັງ​ວຽງ ​ແລ້ວ ກໍ​ຈະ​ໄດ້​ສືບ​ຕໍ່​ຈາກ ວັງ​ວຽງ-ຫລວງ​ພະ​ບາງ, ຫລວງ​ພະ​ບາງ-ອຸດົມ​ໄຊ ​ແລະ ຈາກ​ອຸດົມ​ໄຊ​ເຊື່ອມ​ຕໍ່​ໃສ່ ສປ ຈີນ ​ໃນ​ອະນາຄົດ​ອັນ​ບໍ່​ດົນ​ນີ້. ປັດຈຸບັນ​ເຮົາ​ເຫັນ​ໄດ້​ວ່າ ສປ ຈີນ ​ໄດ້​ກາຍ​ເປັນອັນ​ດັບ​ໜຶ່ງ​ໃນ​ການ​ລົງທຶນ​ພັດທະນາ​ຢູ່ ສປປ ລາວ ຂອງ​ພວກ​ເຮົາ.

ບົນ​ພື້ນຖານ​ການ​ຮ່ວມ​ມື ​ແລະ ການ​ພັດທະນາ​ປະ​ເທດ​ຊາດ​ບ້ານ​ເມືອງ​ໄປ​ສູ່​ຄວາມ​ຈະ​ເລີ​ນຢ່າງ​ບໍ່​ຢຸດ​ຢັ້ງນັ້ນ, ​ເຮົາ​ເຫັນ​ວ່າການ​ປົກ​ປັກ​ຮັກສາ​ຄວາມ​ສະຫງົບ​ສຸກ​ຂອງ​ບ້ານ​ເມືອງ​ເປັນ​ບັນຫາ​ທີ່​ສຳຄັນ​ຍິ່ງ, ຈຸດ​ໜັກ​ແມ່ນ​ການ​ປົກ​ປັກ​ຮັກສາ​ວັດຖຸ​ຊັບ​ສິນ​ຂອງ​ລັດ, ຂອງ​ລວມໝູ່ ນັບ​ທັງ​ຂອງ​ບຸກຄົນ​-ນິຕິບຸກຄົນ ​ເພື່ອ​ບໍ່​ໃຫ້​ໂຈນ​ຫ້າ​ຮ້ອຍ​ມາ​ລັກ​ນັ້ນ​ເປັນ​ບັນຫາ​ທີ່​ຕ້ອງ​ພ້ອມ​ກັນ​ເຮັດ ​ເພາະວ່າ​ພວກ​ນີ້​ມັນ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ ທັງ​ທຳລາຍ​ຄວາມ​ສະຫງົບ​ສຸກ​ຂອງ​ບ້ານ​ເມືອງ.

 

- WhatsApp Image 2020 05 27 at 5 - ຂີ້ລັກ​ງັດ​ແງະ ໜຶ່ງ​ໃນ​ບັນຫາ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ
- WhatsApp Image 2020 05 27 at 5 - ຂີ້ລັກ​ງັດ​ແງະ ໜຶ່ງ​ໃນ​ບັນຫາ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ
error: Alert: ເນື້ອຫາຂ່າວມີລິຂະສິດ !!