ແນວ​ຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານຕໍ່​ວຽກ​ງານ​ສາທາລະນະ​ສຸກ

- ScreenShot207 - ແນວ​ຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານຕໍ່​ວຽກ​ງານ​ສາທາລະນະ​ສຸກ
- Untitled design - ແນວ​ຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານຕໍ່​ວຽກ​ງານ​ສາທາລະນະ​ສຸກ

​​ໂດຍ: ຄຳ​ຮຸ່ງ ​ເຮືອງ​ວົງ​ສີ

ມະຕິ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງທີ X ຂອງ​ພັກ ​ໄດ້​ກຳນົດ​ໄວ້​ວ່າ: “ພັກ​ປະຊາຊົນ​ປະຕິວັດ​ລາວ ຍຶດໝັ້ນຫລັກການ​ພື້ນຖານ​ຂອງ​ລັດທິ​ມາກ-​ເລ​ນິນ, ​ແນວ​ຄິດ​ປະທານ ​ໄກສອນ ພົມວິຫານ ​ເປັນ​ພື້ນຖານ​ແນວ​ຄິດ​ທິດ​ສະ​ດີ​ຂອງ​ພັກ, ​ເປັນ​ເຂັມ​ຊີ້​ທິດ​ໃຫ້​ແກ່​ການຈັດຕັ້ງ ​ແລະ ການ​ເຄື່ອນ​ໄຫວ​ຂອງ​ພັກ”.

​ເປົ້າໝາຍ​ດ້ານ​ສາທາລະນະ​ສຸກ​ທີ່​ມະຕິ X ​ໄດ້​ກຳນົດ​ແມ່ນ “​ເຮັດ​ໃຫ້​ປະຊາຊົນ​ມີ​ສຸຂະພາບ​ດີ ນັບ​ແຕ່​ເດັກນ້ອຍ​ໃນ​ທ້ອງ​ຈົນ​ເຖິງ​ອາຍຸ​ສູງ ​ໂດຍ​ເນັ້ນ​ໃສ່​ການ​ສ້າງ​ຮາກ​ຖານ​ທີ່​ເຂັ້ມ​ແຂງ ຈາກ​ແບບ​ແຜນການ​ດຳລົງ​ຊີວິດ​ທີ່​ປາສະຈາກ​ປັດ​ໄຈ​ສ່ຽງ​ຕໍ່​ສຸຂະພາບ ​ແລະ ສ້າງ​ຈິ​ດສຳນຶກ​ເປັນ​ເຈົ້າການ​ໃນ​ການ​ຮັກສາ​ສຸຂະພາບ​ຂອງ​ຕົນ​ເອງ, ຄອບຄົວ ​ແລະ ຊຸມ​ຊົນ”.

ບົນ​ພື້ນຖານ: ສືບ​ຕໍ່​ຍຶດໝັ້ນ ການ​ປະຕິບັດ​ນະ​ໂຍບາຍ​ສາທາລະນະ​ສຸກ​ທົ່ວ​ປວງ​ຊົນ​ຕາມ​ທິດ​ຖື​ເອົາ​ການ​ອະນາ​ໄມ​ກັນ​ພະຍາດ ​ແລະ ສົ່ງ​ເສີມ​ສຸຂະພາບ​ເປັນຕົ້ນຕໍ, ຖື​ເອົາ​ການ​ປິ່ນປົວ ​ແລະ ສະໜອງ​ບໍລິການ​ສຸຂະພາບ​ຢ່າງ​ທົ່ວ​ເຖິງ, ມີ​ຄຸນ​ນະພາ​ບ, ຍຸຕິ​ທໍາ ​ແລະ ສະ​ເໝີ​ພາບ​ເປັນ​ສຳຄັນ.

ປະຕິ​ຮູບ​ສາທາລະນະ​ສຸກ​ຢ່າງຮອບດ້ານ ດ້ວຍ​ການ​ສ້າງລະບົບ​ບໍລິການ​ທີ່​ດີ ຖື​ເອົາ​ຄົນ​ເປັນ​ໃຈກາງ, ​ໃຫ້ການ​ບໍລິການ​ມີ​ຄຸນ​ນະພາ​ບ, ມີ​ຈັນ​ຍາ​ບັນ, ຈັນຍາທຳ, ​ເອົາ​ໃຈ​ໃສ່​ດູ​ແລ ນັບ​ທັງ​ຮ່າງກາຍ, ຈິດ​ໃຈ ​ແລະ ສິ່ງ​ແວດ​ລ້ອມ.

ສ້າງ​ລະບົບ​ປົກ​ປ້ອງ​ສັງຄົມ​ດ້ານ​ສຸຂະພາບ​ໃຫ້​ທົ່ວ​ເຖິງ ຕາມ​ຫລັກການ ​ແລະ ມູນ​ເຊື້ອ​ແຫ່ງ​ການ​ຊ່ວຍ​ເຫລື​ອ​ເຊິ່ງກັນ ​ແລະ ກັນ ດ້ວຍ​ຫລັກ​ປະກັນ​ສຸຂະພາບ​ທົ່ວ​ປວງ​ຊົນ ທີ່​ປົກ​ປ້ອງ​ທຸກ​ຄົນ​ ທັງ​ໃນ​ດ້ານ​ກັນ​ພະຍາດ, ສົ່ງ​ເສີມ​ສຸຂະພາບ ​ແລະ ດ້ານ​ການ​ປິ່ນປົວ.

​ເພື່ອ​ຈັດຕັ້ງ ​ແລະ ຜັນ​ຂະຫຍາຍ​ມະຕິ X ຂອງ​ພັກ​ເຂົ້າ​ໃນ​ຂົງ​ເຂດ​ສາທາລະນະ​ສຸກ ບັນຫາ​ສຳຄັນ​ແມ່ນ​ການ​ເຊື່ອມ​ຊຶມ​ກຳ​ແໜ້ນ​ມະຕິ​ຂອງ​ພັກ ກ່ຽວ​ກັບ​ວຽກ​ງານ​ສາທາລະນະ​ສຸກ ​ແລະ ບັນດາ​ແນວ​ຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານ ຕໍ່​ວຽກ​ງານ​ດັ່ງກ່າວ ​ເຊິ່ງຈະ​ເປັນ​ພື້ນຖານ​ແນວ​ຄິດ​ທິດ​ສະ​ດີ, ທັດສະນະ​ນຳພາ​ຂອງ​ພັກ ​ແລະ ​ເປັນ​ເຂັມ​ຊີ້​ທິດ​ໃຫ້​ແກ່ການຈັດຕັ້ງ ​ແລະ ການ​ເຄື່ອນ​ໄຫວ​ຂອງ​ກະຊວງ​ສາທາລະນະ​ສຸກ ກໍ​ຄື​ຂະ​ແໜງ​ການ​ສາທາລະນະ​ສຸກ​ທົ່ວ​ປະ​ເທດ.

- Wave100S AD to Website 2020 0 - ແນວ​ຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານຕໍ່​ວຽກ​ງານ​ສາທາລະນະ​ສຸກ

​ໃນ​ປະຫວັດສາດ​ແຫ່ງ​ການ​ກໍ່ຕັ້ງ ​ແລະ ຂະຫຍາຍຕົວ​ຂອງ​ກະຊວງ​ສາທາລະນະ​ສຸກ, ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ຍາມ​ໃດ​ກໍ​ໄດ້​ຮັບ​ຄວາມ​ເອົາ​ໃຈ​ໃສ່, ຄວາມ​ເປັນ​ຫ່ວງ​ເປັນ​​ໄຍ​ໃຫ້ການ​ຊີ້​ນຳ​ຢ່າງ​ໃກ້ຊິດ​ຈາກ​ປະທານ ​ໄກສອນ ພົມວິຫານ ​ເຊິ່ງສະ​ແດງ​ອອກ​ຜ່ານ​ການ​ເຂົ້າຮ່ວມ​ອັນ​ເປັນ​ກຽດ​ໂອ້​ລົມ​ໃຫ້​ທິດ​ຊີ້​ນຳ​ຕໍ່​ກອງ​ປະຊຸມ​ສາທາລະນະ​ສຸກ​ທົ່ວ​ປະ​ເທດ ຄັ້ງທີ I ​ເມື່ອ​ປີ 1980 ​ແລະ ກອງ​ປະຊຸມ​ສາທາລະນະ​ສຸກ​ທົ່ວ​ປະ​ເທດ​ ຄັ້ງທີ II ​​ເມື່ອ​ວັນ​ທີ 11 ມີນາ 1987 ທີ່​ນະຄອນຫລວງ​ວຽງ​ຈັນ. ການ​ເຂົ້າຮ່ວມ ​ແລະ ​ໃຫ້​ທິດ​ຊີ້​ນຳ​ຂອງ​ປະທານ ​ໄກສອນ ພົມວິຫານ ທັງ​ສອງ​ຄັ້ງ ທ່ານ​ໄດ້​ປຸກລະດົມ​ຊຸກຍູ້​ໃຫ້​ກຳລັງ​ໃຈ ​ແລະ ສ້າງ​ຄວາມ​ໝັ້ນ​ໃຈ​ແກ່​ຖັນ​ແຖວ​ແພດ​ໝໍ ກໍ​ຄື​ປະຊາຊົນ​ລາວ​ທົ່ວ​ປະ​ເທດ, ສ່ອງ​ແສງ​ໃຫ້​ເຫັນ​ເຖິງ​ຄວາມ​ເປັນ​ຫ່ວງ​ເປັນ​ໄຍ ​ແລະ ຄວາມ​ເອົາ​ໃຈ​ໃສ່​ຂອງ​ພັກ-ລັດ ​ແລະ ທ່ານ​ປະທານ​ເອງ​ທີ່​ມີ​ຕໍ່​ຂະ​ແໜງການ​ສາທາລະນະ​ສຸກ ​ແລະ ຕໍ່​ພາລະກິດ​ປົກ​ປັກ​ຮັກສາ​ດູ​ແລ​ສຸຂະພາບ​ຂອງ​ປະຊາຊົນ​ລາວ.

ປະທານ ​ໄກສອນ ພົມວິຫານ ວິລະ​ບູລຸດ​ແຫ່ງ​ຊາດ​ຜູ້​ຍິ່ງ​ໃຫຍ່, ​ເປັນ​ຜູ້​ກໍ່ຕັ້ງ ​ແລະ ນຳພາ​ກປະຊາຊົນ​ປະຕິວັດ​ລາວ, ລັດ​ແຫ່ງ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ​ແລະ ກອງທັບ​ປະຊາຊົນ​ລາວ ​ເຖິງ​ວ່າ​ປະທານ​ຈະ​ມີ​ພາລະກິດ ​ແລະ ໜ້າ​ທີ່​ອັນ​ສຳຄັນ, ກວ້າງຂວາງ, ຮອບດ້ານ ​ແລະ ໜັກໜ່ວງ​ລະດັບ​ຊາດ​ກໍ​ຕາມ, ​ແຕ່​ຍາມ​ໃດ ປະທານ ​ໄກສອນ ພົມວິຫານ ກໍ​ມີ​ຄວາມ​ເປັນ​ຫ່ວງ​ເປັນ​ໄຍ ​ແລະ ​ໃຫ້​ຄວາມ​ສຳຄັນ​ຕໍ່​ຊີວິດ​ການ​ເປັນ​ຢູ່​ຂອງ​ປະຊາຊົນ​ລາວ​ບັນດ​າ​ເຜົ່າ ​ເຊິ່ງ​ໃນ​ນັ້ນກໍ​ມີ​ທັງ​ບັນຫາ​ສຸຂະພາບ ​ແລະ ວຽກ​ງານ​ສາທາລະນະ​ສຸກ​ລວມຢູ່​ນຳ. ດ້ວຍ​ເຫດ​ນັ້ນ ວົງ​ການ​ສາທາລະນະ​ສຸກ​ຂອງ​ລາວ​ຈຶ່ງ​ໄດ້​ໃຫ້​ຄວາມ​ເຄົາລົບ​ນັບຖື​ໃຫ້​ກຽດ​ນິຍົມ ​ແລະ ຄວາມ​ເຊື່ອ​ໝັ້ນຕໍ່​ປະທານ ​ໄກສອນ ພົມວິຫານ ຕະຫລອດ​ມາ.

ຜ່ານ​ການ​ເຂົ້າຮ່ວມ​ໂອ້​ລົມ​ຊີ້​ນຳ​ຕໍ່​ກອງ​ປະຊຸມ​ສາທາລະນະ​ສຸກ​ທົ່ວ​ປະ​ເທດ​ທັງ​ສອງ​ຄັ້ງ, ປະທານ ​ໄກສອນ ພົມວິຫານ ​ໄດ້​ໃຫ້​ທັດສະນະ ​ແລະ ​ແນວ​ຄິດ​ຊີ້​ນຳ​ຕໍ່​ບັນຫາ​ສຸຂະພາບ ​ແລະ ວຽກ​ງານ​ສາທາລະນະ​ສຸກ ​ເຊິ່ງປະກອບ​ມີ:

  1. ​ແນ​ວຄິດ​ຊີ້​ນຳ​ກ່ຽວ​ກັບ​ຄວາມ​ໝາຍ​ສຳຄັນ​ຂອງ​ສຸຂະພາບ ​ແລະ ວຽກ​ງານ​ສາທາລະນະ​ສຸກ.
  2. ​ແນວ​ຄິດ​ຊີ້​ນຳ​ກ່ຽວ​ກັບ​ທັດສະນະ​ພື້ນຖານ​ສາທາລະນະ​ສຸກ​ຂອງ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ.
  3. ​ແນວ​ຄິດ​ຊີ້​ນໍາ​ຕໍ່​ວຽກ​ງານ​ສາທາລະນະ​ສຸກ​ທີ່​ໄດ້​ກຳນົດ​ໄວ້​ໃນ​ມະຕິ​ຕ່າງໆ​ຂອງ​ພັກ.
  4. ​ແນວ​ຄິດ​ຊີ້​ນຳ​ຕໍ່​ວຽກ​ງານອະນາ​ໄມ​ກັນ​ພະຍາດ.
  5. ​ແນວ​ຄິດ​ຊີ້​ນໍາ​ຕໍ່​ວຽກ​ງານ​ແມ່ ​ແລະ ​ເດັກ.
  6. ​ແນວ​ຄິດ​ຊີ້​ນຳ​ຕໍ່​ວຽກ​ງານ​ການ​ແພດ ​ແລະ ການ​ຢາພື້ນ​ເມືອງ.
  7. ​ແນວ​ຄິດ​ຊີ້​ນຳ​ຕໍ່​ວຽກ​ງານ​ບໍລິ​ຫານ​ຄຸ້ມ​ຄອງ​ຂະ​ແໜງ​ການ​ສາທາລະນະ​ສຸກ.
  8. ​ແນວ​ຄິດ​ຊີ້​ນຳ​ຕໍ່​ວຽກ​ງານ​ການ​ຫັນ​ລົງ​ຮາກ​ຖານ​ຂອງ​ຂະ​ແໜງ​ການ​ສາທາລະນະ​ສຸກ.
  9. ​ແນວ​ຄິດ​ຊີ້​ນຳ​ຕໍ່​ກັບ​ການ​ສ້າງ​ກົນ​ໄກ​ຄຸ້ມ​ຄອງ​ໃໝ່​ໃນ​ຂະ​ແໜງ​ການ​ສາທາລະນະ​ສຸກ.
  10. ​ແນວ​ຄິດ​ຊີ້​ນຳ​ຕໍ່​ວຽກ​ງານ​ກໍ່ສ້າງ ​ແລະ ພັດທະນາ​ບຸກຄະລາ​ກອນ​ດ້ານ​ສາທາລະນະ​ສຸກ (ຫລື ​ເອີ້ນ​ວ່າ: ການ​ກໍ່ສ້າງ ​ແລະ ພັດທະນາ​ພະນັກງານ​ສາທາລະນະ​ສຸກ).

ບັນດາ​ແນ​ວຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານ ທີ່​ກ່າວ​ມາ​ຂ້າງ​ເທິງ​ນັ້ນ ​ເຊິ່ງ​ໄດ້​ສະທ້ອນ​ໃຫ້​ເຫັນ​ເຖິງ​ຄວາມ​ສຳຄັນ​ຂອງ​ວຽກ​ງານ​ສຸຂະພາບ ​ແລະ ວຽກ​ງານ​ສາທາລະນະ​ສຸກ. ພ້ອມ​ກັນນັ້ນ ກໍ​ສະ​ແດງ​ໃຫ້​ເຫັນ​ເຖິງ​ຄວາມ​ຮັບຜິດຊອບ ​ແລະ ​ເຈດ​ຕະນາ​ລົມ​ອັນ​ແຮງ​ກ້າ​ຂອງ​ປະທານ​ທີ່​ມີ​ຕໍ່​ວຽກ​ງານ​ສາທາລະນະ​ສຸກ.

ສະນັ້ນ, ການ​ສຶກສາຄົ້ນຄວ້າ ​ແລະ ຜັນ​ຂະຫຍາຍ​ແຕ່ລະ​ເນື້ອ​ໃນ​ຂອງ​ບັນດາ​ແນວ​ຄິດ​ຊີ້​ນຳ ຈຶ່ງ​ເປັນ​ພາລະ​ໜ້າ​ທີ່​ອັນ​ຮີບ​ດ່ວນ​ຂອງ​ບັນດາ​ສະຫາຍ​ການ​ນຳ ​ແລະ ນັກວິຊາການ​ທີ່​ກ່ຽວຂ້ອງ ​ໂດຍ​ສະ​ເພາະ​ແມ່ນ​ການ​ນຳ​ຂອງ​ຂະ​ແໜງ​ການ​ສາທາລະນະ​ສຸກ ​ແລະ ນັກວິຊາການ​ແຕ່ລະ​ຂັ້ນ ຈະ​ຕ້ອງ​ໄດ້​ຄົ້ນຄວ້າ​ພິຈາລະນາ​ຢ່າງ​ເລິກ​ເຊິ່ງ ​ເພື່ອ​ສ້າງ​ເປັນ​ລະບົບ​ທິດ​ສະ​ດີ ​ແລະ ພຶດຕິ​ກຳ 10 ຫົວ​ຂໍ້ທີ່​ກ່າວ​ມາ​ເທິງ​ນັ້ນ. ຖ້າ​ຫາກ​ມີ​ການ​ສຶກສາຄົ້ນຄວ້າ​ແຕ່ລະ​ເນື້ອ​ໃນ​ໃຈຄວາມ​ຂອງ​ແຕ່ລະ​ແນວ​ຄິດ​ຊີ້​ນຳ​ຢ່າງ​ເປັນ​ລະບົບ ​ແລະ ວິທະຍາສາດ​ແລ້ວ ​ແນ່ນອນ​ຈະ​ເຮັດ​ໃຫ້​ພວກ​ເຮົາ​ມີ​ຄວາມ​ຮັບ​ຮູ້​ເຂົ້າ​ໃຈ, ມີ​ຈິນຕະນາການ ​ແລະ ວິ​ໄສ​ທັດ​ທີ່​ຖືກຕ້ອງ ​ເພື່ອ​ນຳ​ໄປ​ສູ່​ການຈັດຕັ້ງປະຕິບັດ​ມະຕິ X ​ແລະ XI ຂອງ​ພັກ ດ້ານ​ສາທາລະນະ​ສຸກ​ໃຫ້​ປາກົດ​ຜົນ​ເປັນ​ຈິງ.

- WhatsApp Image 2020 05 27 at 5 - ແນວ​ຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານຕໍ່​ວຽກ​ງານ​ສາທາລະນະ​ສຸກ
- WhatsApp Image 2020 05 27 at 5 - ແນວ​ຄິດ​ຊີ້​ນຳ​ຂອງ​ປະທານ ​ໄກສອນ ພົມວິຫານຕໍ່​ວຽກ​ງານ​ສາທາລະນະ​ສຸກ
error: Alert: ເນື້ອຫາຂ່າວມີລິຂະສິດ !!