ອາເມລິກາ ອະນຸມັດວັກຊີນໂຄວິດ-19 ຂອງ Pfizer-BioNTech ວັນຈັນນີ້ພ້ອມສັກ 2,9 ລ້ານໂດສ

- Untitled design - ອາເມລິກາ ອະນຸມັດວັກຊີນໂຄວິດ-19 ຂອງ Pfizer-BioNTech ວັນຈັນນີ້ພ້ອມສັກ 2,9 ລ້ານໂດສ

ລັດຖະບານ​ອາ​ເມ​ລິ​ກາ ອະນຸມັດວັກ​ຊີ​ນ​ໂຄ​ວິດ-19 ຂອງ​ບໍລິສັດ Pfizer ​ແລະ BioNTech, ຄາດ​ວ່າ​ສັກ​ເຂັມ​ທຳ​ອິດ​ໃນ​ວັນ​ທີ 14 ທັນວາ​ນີ້ ​ແລະ ຈະ​ສັກ​ໃຫ້​ຊາວ​ອາ​ເມ​ລິ​ກາ 20 ລ້ານ​ຄົນ​ພາຍ​ໃນ​ບໍ່​ເທົ່າ​ໃດ​ຊົ່ວ​ໂມງ​ຕໍ່ໜ້າ.

ວັນ​ທີ 12 ທັນວານີ້, ສຳນັກ​ຂ່າວ CNN ລາຍ​ງານ​ວ່າ: ອົງການ​ອາຫານ ​ແລະ ຢາ​ອາ​ເມ​ລິ​ກາ (FDA) ປະກາດ​ອະນຸມັດ​ການ​ນຳ​ໃຊ້​ວັກ​ຊີ​ນ​ໂຄ​ວິດ-19 ຂອງ​ບໍລິສັດ Pfizer ​ແລະ BioNTech ​ໃນ​ກໍລະນີ​ສຸກ​ເສີນ​ແລ້ວ​ໃນ​ວັນ​ທີ 11 ທັນວາ ຫລັງ​ຜ່ານ​ການກວດ​ສອບ​ຄວາມ​ປອດ​ໄພ ​ແລະ ປະສິດທິພາບ.

ທ່ານ ດຣ. ສະຕີ​ເຟນ ຮານ ຜູ້ອຳນວຍການ FDA ຊີ້​ວ່າ: ນີ້​ຄື​ຈຸດໝາຍ​ສຳຄັນ​ທີ່​ຈະ​ເປັນ​ຈຸດ​ປ່ຽນ​ຄອບຄົວ​ຊາວ​ອາ​ເມ​ລິ​ກາ ​ແລະ ຄົນ​ທົ່ວ​ໂລກ. ຂະນະ​ທີ່​ທ່ານ ອາ​ເລັກ ອາຊາ ລັດຖະມົນຕີ​ສາທາລະນະ​ສຸກ​ອາ​ເມ​ລິ​ກາ ​ເປີດ​ເຜີຍ​ກ່ອນ​ໜ້າ​ນີ້​ວ່າ: ​ໃນ​ວັນ​ທີ 14 ທັນວາ ອາດ​ຈະ​ໄດ້​ເຫັນ​ການ​ສັກ​ວັກ​ຊີ​ນ​ໂຄ​ວິດ-19 ​ໂດສທຳ​ອິດ​ຢູ່​ອາ​ເມ​ລິ​ກາ ​ແລະ ຄາດ​ວ່າ​ປະຊາກອນ​ອາ​ເມ​ລິ​ກາ​ປະມານ 20 ລ້ານ​ຄົນ ອາດ​ຈະ​ໄດ້​ຮັບ​ວັກ​ຊີ​ນພາຍ​ໃນ​ບໍ່​ເທົ່າ​ໃດ​ຊົ່ວ​ໂມງ​ຕໍ່ໜ້າ.

ຂະນະ​ທີ່​ທ່ານ ​ໂດ​ນັລ ທຣຳ ປະທານາທິບໍດີ​ອາ​ເມ​ລິ​ກາ ຖະ​ແຫລ​ງຜ່ານ​ໂທລະພາບ ​ລະບຸ​ວ່າ: ນີ້​ເປັນ​ປະຕິ​ຫານ​ທາງ​ການ​ແພດ ​ແລະ ​ເປັນ​ໜຶ່ງ​ໃນ​ຜົນສຳ​ເລັດ​ທາງ​ວິທະຍາສາດ​ທີ່​ຍິ່ງ​ໃຫຍ່​ທີ່​ສຸດ​ໃນ​ປະຫວັດສາດ.

ລາຍ​ງານ​ລະບຸ​ວ່າ: ​ໃນ​ອາທິດ​ໜ້າ, ລັດຖະບານ​ອາ​ເມ​ລິ​ກາ​ອາດ​ຈະ​ແຈກ​ຢາຍ​ວັກ​ຊີ​ນ​ໂຄ​ວິດ-19 ພຽງ 2,9 ລ້ານ​ໂດ​ສ ​ເຊິ່ງຄິດ​ເປັນ​ເຄິ່ງໜຶ່ງ​ຂອງ​ວັກ​ຊີ​ນທີ່​ບໍລິສັດ​ Pfizer ສາມາດ​ສົ່ງ​ມອບ​ໃຫ້​ລັດຖະບານ​ອາ​ເມ​ລິ​ກາ​ໄດ້​ໃນ​ອາທິດ​ທຳ​ອິດ ​ເນື່ອງ​ຈາກ​ລັດຖະບານ​ອາ​ເມ​ລິ​ກາ​ຈຳ​ເປັນ​ຕ້ອງ​ເກັບ​ວັກ​ຊີ​ນສ່ວນ​ທີ່​ເຫລືອ ​ເພື່ອ​ເປັນ​ຫລັກ​ປະກັນ​ວ່າ: ຈະ​ມີ​ວັກ​ຊີ​ນ​ໂດ​ສທີ 2 ສັກ​ໃຫ້​ຜູ້​ຕິດ​ເຊື້ອ​ໃນ​ອີກ 21 ວັນ​ຂ້າງ​ໜ້າ.

- Wave100S AD to Website 2020 0 - ອາເມລິກາ ອະນຸມັດວັກຊີນໂຄວິດ-19 ຂອງ Pfizer-BioNTech ວັນຈັນນີ້ພ້ອມສັກ 2,9 ລ້ານໂດສ

ກ່ອນ​ໜ້າ​ນີ້​ມີ​ລາຍ​ງານ​ວ່າ: ລັດຖະບານ​ອາ​ເມ​ລິ​ກາ​ມີ​ຄວາມ​ພະຍາຍາມ​ກົດ​ດັນ​ຂະ​ບວນການ​ອະນຸມັດ​ວັກ​ຊີ​ນ​ໂຄ​ວິດ-19 ​ໂດຍ​ໜັງສືພິມ​ວໍ​ຊິງ​ຕັນ ​ໂພສ ລາຍ​ງານ​ອ້າງ​ແຫ​ລ່ງຂ່າວ​ວ່າ: ທ່ານ ມາກ ມີ​ໂດ ຫົວໜ້າ​ຄະນະ​ປະຈຳ​ທຳນຽບຂາວ ​ເປັນ​ຝ່າຍ​ໂທລະສັບ​ໄປ​ກົດ​ດັນ​ທ່ານ ສະຕີ​ເຟນ ຮານ ​ໃຫ້​ອະນຸມັດ​ວັກ​ຊີ​ນພາຍ​ໃນ​ວັນ​ທີ 11 ທັນວາ ບໍ່​ສະນັ້ນຄວນ​ຂຽນ​ໃບ​ລາ​ອອກ​ໄວ້​​ເລີຍ, ​ແຕ່ ດຣ. ຮານ ປະຕິ​ເສດ​ກະ​ແສ​ຂ່າວ​ດັ່ງກ່າວ.

ອາ​ເມ​ລິ​ກາ​ເປັນ​ປະ​ເທດ​ທີ 6 ​ໃນ​ໂລກ​ທີ່​ອະນຸມັດ​ວັກ​ຊີ​ນ​ໂຄ​ວິດ-19 ຂອງ​ບໍລິສັດ Pfizer ​ແລະ BioNTech ຫລັງ​ຈາກ​ອັງກິດ, ບາ​ເຣນ, ກາ​ນາ​ດາ, ຊາ​ອຸ​ດິອາຣະ​ເບຍ ​ແລະ ​ເມັກ​ຊິກ.

ການ​ອະນຸມັດ​ນຳ​ໃຊ້​ວັກ​ຊີ​ນ​ໂຄ​ວິດ-19 ​ເປັນຄວາມ​ຫວັງ​ທີ່​ຈະ​ຢຸດ​ຢັ້ງຈຳນວນ​ຜູ້​ຕິດ​ເຊື້ອ ​ແລະ ຜູ້​ເສຍ​ຊີວິດ​ຈາກ​ໂຄ​ວິດ-19 ຢູ່​ອາ​ເມ​ລິ​ກາ ທີ່​ຖື​ວ່າ​ຫລາຍ​ທີ່​ສຸດ​ໃນ​ໂລກ ​ແລະ ກຳລັງ​ເພີ່ມ​ສູງ​ຂຶ້ນຢ່າງ​ຕໍ່​ເນື່ອງ ​ໂດຍ​ປັດຈຸບັນ​ອາ​ເມ​ລິ​ກາ​ມີ​ຜູ້​ຕິດ​ເຊື້ອ​ໂຄ​ວິດ-19 ສະ​ສົມ​ຫລາຍ​ກວ່າ 16,2 ລ້ານ​ຄົນ, ສ່ວນ​ຜູ້​ເສຍ​ຊີວິດ​ມີ 300.000 ກວ່າ​ຄົນ​ແລ້ວ ​ໂດຍ​ໃນ​ວັນ​ທີ 11 ທັນວາ ມື້ດຽວ​ມີ​ຜູ້​ເສຍ​ຊີວິດ​ເພີ່ມ​ຂຶ້ນ 2.700 ກວ່າ​ຄົນ.

- WhatsApp Image 2020 05 27 at 5 - ອາເມລິກາ ອະນຸມັດວັກຊີນໂຄວິດ-19 ຂອງ Pfizer-BioNTech ວັນຈັນນີ້ພ້ອມສັກ 2,9 ລ້ານໂດສ
- WhatsApp Image 2020 05 27 at 5 - ອາເມລິກາ ອະນຸມັດວັກຊີນໂຄວິດ-19 ຂອງ Pfizer-BioNTech ວັນຈັນນີ້ພ້ອມສັກ 2,9 ລ້ານໂດສ
error: Alert: ເນື້ອຫາຂ່າວມີລິຂະສິດ !!