ປະຊາກອນ 90% ໃນປະເທດທຸກຍາກ ອາດບໍ່ໄດ້ວັກຊີນໂຄວິດ-19

- 1414 2 - ປະຊາກອນ 90% ໃນປະເທດທຸກຍາກ ອາດບໍ່ໄດ້ວັກຊີນໂຄວິດ-19
- Untitled design - ປະຊາກອນ 90% ໃນປະເທດທຸກຍາກ ອາດບໍ່ໄດ້ວັກຊີນໂຄວິດ-19

ການ​ແຜ່​ລະບາດ​ຂອງ​ໂຄ​ວິດ-19 ຜ່ານ​ມາ​ແລ້ວ 1 ປີ ​ແລະ ກຳລັງ​ຢູ່​ໃນ​ໄລຍະ​ເວລາ​ສຳຄັນ ຄື​ການ​ທີ່​ຫລາຍ​ປະ​ເທດ​ເລີ່​ມອະນຸມັດ​ວັກ​ຊີ​ນ​ໂຄ​ວິດ-19 ​ເພື່ອ​ສັກ​ໃຫ້​ປະຊາຊົນ​ສ້າງ​ພູມ​ຕ້ານທານ​​ໂຄ​ວິດ-19.

ພາຍ​ໃຕ້​ຜົນສຳ​ເລັດ​ໃນ​ການ​ພັດທະນາ​ວັກ​ຊີ​ນ​ໂຄ​ວິດ-19 ຫລາຍ​ຝ່າຍ​ເລີ່​ມມີ​ຄວາມ​ກັງວົນ​ເຖິງ​ສະພາບ​ເຫ​ລື່ອມລ້ຳທາງ​ວັກ​ຊີ​ນ ທີ່​ອາດ​ເຮັດ​ໃຫ້​ຄົນ​ຈຳນວນ​ຫລາຍ​ເຂົ້າບໍ່​ເຖິງ​ວັກ​ຊີ​ນ​ໂຄ​ວິດ-19.

People’s Vaccine ​ເຊິ່ງປະກອບ​ມີ​ໜ່ວຍ​ງານ​ພາກ​ປະຊາ​ສັງຄົມ​ລະດັບ​ໂລກ​ທີ່​ເຮັດ​ວຽກ​ກ່ຽວ​ກັບ​ສິດທິ​ມະນຸດ, ຄວາມ​ເທົ່າ​ທຽມ ​ແລະ ສຸຂະພາບ​ເຊັ່ນ: ​ແອ​ມ​ເນສຕີ ອິນ​ຕີ​ເນ​ຊັນ​​ແນ​ລ, Frontline AIDS ​ແລະ Oxfam ​ເຜີຍ​ແຜ່​ຜົນ​ການ​ສຶກສາ​ຫລ້າ​ສຸດ​ທີ່​ປະ​ເມີນ​ວ່າ: ປະຊາກອນ​ໃນ​ເກືອບ 70 ປະ​ເທດ​ທີ່​ມີ​ລາຍ​ໄດ້​ຕໍ່າ ອາດ​ມີ​ໂອກາດ​ເຂົ້າ​ເຖິງ​ວັກ​ຊີ​ນ​ໂຄ​ວິດ-19 ພຽງ 10% ຂອງ​ທັງ​ໝົດ.

ຜົນ​ການ​ສຶກສາ​ນີ້​ແປ​ຄວາມໝາຍ​ໄດ້​ວ່າ: ປະຊາກອນ​ທຸກໆ 10 ຄົນ​ໃນ​ປະ​ເທດ​ທຸກ​ຍາກ ຈະ​ມີ​ພຽງ 1 ຄົນ​ເທົ່າ​ນັ້ນທີ່​ໄດ້​ຮັບ​ວັກ​ຊີ​ນ​ໂຄ​ວິດ-19.

ສອດຄ່ອງ​ກັບ​ການກວດ​ສອບ​ຍອດ​ສັ່ງ​ຈອງ​ວັກ​ຊີ​ນ​ໂຄ​ວິດ-19 ຫລ້າ​ສຸດ​ພົບ​ວ່າ ມີ​ຫລາຍ​ປະ​ເທດ​ຍັງ​ບໍ່​ໄດ້​ສັ່ງ​ຈອງ​ວັກ​ຊີ​ນ. ຂະນະ​ທີ່​ປະ​ເທດ​ກຳລັງ​ພັດທະນາ​ຫລາຍ​ປະ​ເທດ ມີ​ຍອດ​ຈອງ​ວັກ​ຊີ​ນ​ໃນ​ອັດຕາ​ທີ່​ຕໍ່າ​ກວ່າ​ຄວນ​ຈະ​ເປັນ​ເຊັ່ນ: ຟີ​ລິບ​ປິນ ສັ່ງ​ຈອງ​ວັກ​ຊີ​ນ​ໄວ້ 2,6 ລ້ານ​ໂດ​ສ ພຽງພໍ​ຕໍ່​ປະຊາກອນ​ພຽງ 1,3 ລ້ານ​ຄົນ ​ເຊິ່ງຄິດ​ເປັນ 1% ຂອງ​ປະຊາກອນ​ທົ່ວ​ປະ​ເທດ​ເທົ່າ​ນັ້ນ, ​ແຕ່​ໃນ​ທາງກົງກັນຂ້າມ ປະຊາກອນ​ໃນ​ປະ​ເທດ​ຮັ່ງມີ ​ເຊິ່ງຄິດ​ເປັນ 14% ຂອງ​ຄົນ​ທົ່ວ​ໂລກ ພັດ​ຖື​ຄອງ​ວັກ​ຊີ​ນສູງ​ເຖິງ 53% ​ໂດຍ​ມີ​ບາງ​ປະ​ເທດ​ສັ່ງ​ຈອງ​ວັກ​ຊີ​ນພຽງພໍ ​ແລະ ອາດ​ຫລາຍ​ກວ່າ​ຄວາມ​ຕ້ອງການ​ຂອງ​ຄົນ​ທົ່ວ​ປະ​ເທດ​ແລ້ວ​ເຊັ່ນ: ກາ​ນາ​ດາ ສັ່ງ​ຈອງ​ວັກ​ຊີ​ນຫລາຍ​ກວ່າ​ຄວາມ​ຕ້ອງການ​ຂອງ​ຄົນ​ທົ່ວ​ປະ​ເທດ 5 ​ເທົ່າ, ສ.​ເກົາຫລີ ສັ່ງ​ຈອງ​ວັກ​ຊີ​ນພຽງພໍ​ຕໍ່​ປະຊາກອນ 88% ຂອງ​ທົ່ວ​ປະ​ເທດ.

ບັນຫາ​ຄວາມ​ເຫ​ລື່ອມລ້ຳທາງ​ວັກ​ຊີ​ນ​ໂຄ​ວິດ-19 ​ເຮັດ​ໃຫ້ COVAX ​ເຊິ່ງ​ເປັນ​ໂຄງການ​ທີ່​ຈັດຕັ້ງຂຶ້ນ ​ເພື່ອ​ປະສານ​ງານ ​ແລະ ລະດົມ​ທຶນ ຫວັງ​ໃຫ້​ວັກ​ຊີ​ນ​ໂຄ​ວິດ-19 ພຽງພໍ​ກັບ​ຄົນ​ທົ່ວ​ໂລກ​ຕັ້ງ​ເປົ້າ​ໄວ້​ວ່າ: ຈະ​ຕ້ອງ​ຈັດ​ຫາ​ວັກ​ຊີ​ນ​ແຈກ​ຢາຍ​ໃຫ້​ປະ​ເທດ​ທຸກ​ຍາກ​ຢ່າງ​ໜ້ອຍ 92 ປະ​ເທດ​ໃຫ້​ໄດ້ 2.000 ລ້ານ​ໂດ​ສ ພາຍ​ໃນ​ປີໜ້າ ​ໂດຍ​ໃນ​ຕອນ​ນີ້​ສາມາດ​ຈັດ​ຫາ​ໄດ້​ແລ້ວ 700 ລ້ານ​ໂດ​ສ.

ຂະນະ​ດຽວ​ກັນ ​ໃນ​ຕອນ​ນີ້​ມີ​ບໍລິສັດ​ວັກ​ຊີ​ນທີ່​ປະກາດ​ຕົວ​ພ້ອມ​ຊ່ວຍ​ແກ້​ໄຂ​ບັນຫາ​ຄວາມ​ເຫ​ລື່ອມລ້ຳວັກ​ຊີ​ນ​ແລ້ວ​ຢ່າງ​ໜ້ອຍ 1 ບໍລິສັດ ຄື​ບໍລິສັດ AstraZeneca ທີ່​ຮ່ວມ​ພັດທະນາ​ວັກ​ຊີ​ນ​ໂຄ​ວິດ-19 ກັບ​ມະຫາວິທະຍາ​ໄລ​ອ໊ອດຟອດ ​ເຊິ່ງອອກ​ມາ​ຢືນຢັນ​ວ່າ: ຈະ​ຂາຍ​ວັກ​ຊີ​ນ​ໂຄ​ວິດ-19 ​ໃນ​ລາຄາ​ທຶນ​ໃຫ້​ແກ່​ປະ​ເທດ​ກຳລັງ​ພັດທະນາ ​ໂດຍ​ວັກ​ຊີ​ນຂອງ​ບໍລິສັດ AstraZeneca ຮ່ວມ​ກັບ​ມະຫາວິທະຍາ​ໄລ​ອ໊ອດຟອດ ມີ​ຂໍ້​ດີ​ຄື​ສາມາດ​ເກັບ​ຮັກສາ​ໄດ້​ໃນ​ອຸນຫະພູມ​ຕູ້​ເຢັນ​ປົກກະຕິ ບໍ່ຕ້ອງ​ໃຊ້​ອຸນຫະພູມ​ທີ່​ເຢັນ​ຫລາຍ ​ເຮັດ​ໃຫ້​ຊ່ວຍ​ຫລຸດ​ອຸປະສັກ​ໃນ​ການ​ຂົນ​ສົ່ງ​ໄດ້​ຫລາຍ.

- Wave100S AD to Website 2020 0 - ປະຊາກອນ 90% ໃນປະເທດທຸກຍາກ ອາດບໍ່ໄດ້ວັກຊີນໂຄວິດ-19

ນອກຈາກ​ນີ້, ຍັງ​ມີ​ວັກ​ຊີ​ນ​ໂຄ​ວິດ-19 ທີ່​ພັດທະນາ​ໂດຍ​ບໍລິສັດ​ຢາ​ໃນ​ປະ​ເທດ​ຈີນ ​ເຊິ່ງກ່ອນ​ໜ້າ​ນີ້ ລັດຖະບານ​ຈີນ​ປະກາດ​ວ່າ: ຖ້າ​ວັກ​ຊີ​ນທີ່​ພັດທະນາ​ປະສົບ​ຜົນສຳ​ເລັດ ຈະ​ຊ່ວຍ​ແຈກ​ຢາຍ​​​ໃຫ້​ຫລາຍ​ປະ​ເທດ​ທ່າມກາງ​ການ​ເຝົ້າຕິດຕາມ​ວ່າ: ນີ້​ເປັນ​ຍຸດ​ທະ​ສາດ​ທີ່​ສະຫລາດ​ຂອງ​ລັດຖະບານ​ຈີນ ທີ່​ຫວັງ​ໃຊ້​ວັກ​ຊີ​ນ​ໂຄ​ວິດ-19 ​ເປັນ​ເຄື່ອງມື​ທາງ​ການ​ທູດ​ຜູກ​ມິດ​ກັບປະ​ເທດ​ຕ່າງໆ.

​ເຖິງ​ຢ່າງ​ໃດ​ກໍ​ຕາມ, ການ​ແຈກ​ຢາຍ​ວັກ​ຊີ​ນ​ໂຄ​ວິດ-19 ​ໃຫ້​ພຽງພໍ​ຕໍ່​ຄົນ​ທົ່ວ​ໂລກ ບໍ່​ສາມາດ​ເຮັດ​ໄດ້​ຜ່ານ​ວັກ​ຊີ​ນພຽງ​ແຕ່ 1-2 ບໍລິສັດ, ​ແຕ່​ຕ້ອງ​ອາ​ໄສ​ປະລິມານ​ວັກ​ຊີ​ນຈຳນວນ​ມະຫາສານ ​ເຮັດ​ໃຫ້​ຂະ​ແໜງ​ປະຊາ​ສັງຄົມ​ທີ່​ກຳລັງ​ເຝົ້າຕິດຕາມ​ບັນຫາ​ນີ້​ຊີ້​ວ່າ: ບໍລິສັດ​ຜູ້​ພັດທະນາ​ວັກ​ຊີ​ນ​ໂຄ​ວິດ-19 ​ແຫ່ງ​ອື່ນໆ ຄວນ​ເລັ່ງຖ່າຍ​ທອດ​ເຕັກ​ໂນ​ໂລ​ຊີ​ການ​ພັດທະນາ​ວັກ​ຊີ​ນ​ໂຄ​ວິດ-19 ​ໂດຍ​ໄວ​ທີ່​ສຸດ ​ເພື່ອ​ເປັນ​ການ​ກະຈາຍ​ກຳລັງ​ການ​ຜະລິດ ​ໃຫ້​ຄົນ​ເຂົ້າ​ເຖິງ​ວັກ​ຊີ​ນ​ໂຄ​ວິດ-19 ​ໄດ້​ຫລາຍ ​ແລະ ​ໄວ​ທີ່​ສຸດ.

ໜ່ວຍ​ງານ​ທີ່​ກ່ຽວຂ້ອງ​ຍັງ​ຮຽກຮ້ອງ​ເຖິງ​ລັດຖະບານ​ຂອງ​ທຸກ​ປະ​ເທດວ່າ: ຕ້ອງ​ໃຫ້​ຄຳ​ໝັ້ນວ່າປະຊາຊົນ​ຈະ​ສາມາດ​ເຂົ້າ​ເຖິງ​ວັກ​ຊີ​ນ​ໂຄ​ວິດ-19 ​ໄດ້​ຢ່າງ​ທົ່ວ​ເຖິງ ​ເຊິ່ງຈະ​ເຮັດ​ໃຫ້​ແຕ່​ລະ​ລັດຖະບານ​ຕ້ອງ​ຫັນ​ມາ​ໃຫ້​ຄວາ​ມສຳຄັນ​ເປັນ​ພິ​ເສດ​ຕໍ່​ການ​ທຸ້ມງົບປະມານ ຫລື ຂໍ​ການ​ຊ່ວຍ​ເຫລືອ​ຫາ​ໜ່ວຍ​ງານ​ລະດັບ​ໂລກ ​ເພື່ອ​ໃຫ້​ໄດ້​ວັກ​ຊີ​ນ​ໂຄ​ວິດ-19 ພຽງພໍ​ຕໍ່​ຄົນ​ທົ່ວ​ປະ​ເທດ.

ຜູ້​ຊ່ຽວຊານ​ຊີ້​ວ່າ: ການ​ແຈກ​ຢາຍ​ວັກ​ຊີ​ນ​ໂຄ​ວິດ-19 ​ໃຫ້​ທົ່ວ​ເຖິງ​ປະຊາກອນ​ທົ່ວ​ໂລກ​ມີ​ຄວາມ​ຈຳ​ເປັນ ​ເພາະ​ທ້າຍ​ທີ່​ສຸດ​ແລ້ວ​ຈະ​ບໍ່​ມີ​ໃຜ​ປອດ​ໄພ​ຈາກ​ພະຍາດ​ລະບາດ ຕາບ​ໃດ​ທີ່​ຄົນ​ທົ່ວ​ໂລກ​ຍັງ​ບໍ່​ປອດ​ໄພ​ທຸກ​ຄົນ.

- WhatsApp Image 2020 05 27 at 5 - ປະຊາກອນ 90% ໃນປະເທດທຸກຍາກ ອາດບໍ່ໄດ້ວັກຊີນໂຄວິດ-19
- WhatsApp Image 2020 05 27 at 5 - ປະຊາກອນ 90% ໃນປະເທດທຸກຍາກ ອາດບໍ່ໄດ້ວັກຊີນໂຄວິດ-19
error: Alert: ເນື້ອຫາຂ່າວມີລິຂະສິດ !!