ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19

ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19 - 40c8013a 014d 4e33 8f84 c87d2c316cde 580x400 1 - ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19
ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19 - Untitled design - ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19

ຜົນສຳ​ເລັດ​ໃນ​ກາ​ນທົດ​ລອງ​ວັກ​ຊີ​ນ​ໂຄ​ວິດ-19 ຂອງ Pfizer ​ແລະ BioNTech ທີ່​ມີ​ປະສິດທິພາບ​ກະ​ຕຸ້ນ​ໃຫ້​ຮ່າງກາຍ​ອາສາ​ສະໝັກ​ສ້າງ​ພູມ​ຄຸ້ມ​ກັນ​ເຊື້ອ​ໂຄ​ວິດ-19 ​ໄດ້​ເຖິງ 90% ​ເຮັດ​ໃຫ້​ມະນຸດ​ເລີ່​ມມີ​ຄວາມ​ຫວັງ​ວ່າ: ຄວາມ​ຍາກ​ລຳບາກ​ໃນ​ການ​ໃຊ້​ຊີວິດ​ພາຍ​ໃຕ້​ພະຍາດ​ໂຄ​ວິດ-19 ​ໃກ້​ເຖິງ​ຈຸດ​ຈົບ​ແລ້ວ.

​ແຕ່​ໃຜຈະ​ເຊື່ອ​ວ່າ: ​ເບື້ອງຫລັງ​ຜົນສຳ​ເລັດ​ເຫລົ່າ​ນີ້ ມີ​ຈຸດ​ເລີ່​ມຕົ້ນຈາກ​ຜົວ​ເມຍ​ຄູ່​ໜຶ່ງ ທີ່​ເກີດ​ຈາກ​ຄອບ​ຄົວ​ຜູ້​ອົບ​ພະຍົບ ​ເຊິ່ງທັງ​ສອງ​ໄດ້​ສະ​ສົມ​ປະສົບ​ການ​ຜ່ານ​ການ​ວິ​ໄຈ​ຫລາຍ​ສິບ​ປີ ຈົນ​ເຮັດ​ໃຫ້​ວັກ​ຊີ​ນ​ໂຄ​ວິດ-19 ນີ້​ເກີດ​ຂຶ້ນ​ໄດ້.

ຜົນສຳ​ເລັດ​ຂອງ​ວັກ​ຊີ​ນ​ໂຄ​ວິດ-19 ຄັ້ງນີ້​ຕ້ອງ​ຍົກ​ຄຸນງາມຄວາມດີ​ໃຫ້ Ugur Sahin CEO ​ແລະ Oezlem Tuereci ຫົວໜ້າ​ຝ່າຍ​ການ​ແພດ​ຂອງ​ບໍລິສັດ BioNTech.

ນອກຈາກ​ເປັນ​ເພື່ອນ​ຮ່ວມ​ງານ ທັງ​ສອງ​ຍັງ​ເປັນ​ຜົວ​ເມຍ​ທີ່​ມີ​ຄວາມ​ຄື​ກັນ​ຫລາຍ​ເລື່ອງ ຄື​ເລື່ອງ​ທຳ​ອິດ ພື້ນຖານ​ຄອບຄົວ​ທີ່​ທັງ​ສອງ​ຄົນ​ມາ​ຈາກ​ຄອບຄົວ​ຜູ້​ອົບ​ພະຍົບຊາວ​ຕຸຣກີ​ຄື​ກັນ ​ໂດຍ Sahin ​​ເປັນ​ລູກ​ຊາຍ​ຂອງ​ຜູ້​ອົບ​ພະຍົບຊາວ​ຕຸຣກີ​ຄົນ​ໜຶ່ງ​ທີ່​ເຂົ້າມາ​ເປັນ​ແຮງ​ງານ​ຢູ່​ໂຮງງານ​ຜະລິດ​ລົດຍົນ​ຟອດ​ໃນ​ເຢຍລະ​ມັນ, ສ່ວນ Tuereci ​ເປັນ​ລູກ​ສາວ​ຂອງ​ແພດ​ຊາວ​ຕຸຣກີ​ທີ່​ຍ້າຍ​ຖິ່ນ​ຖານ​ໄປ​ຕັ້ງຮາກ​ຖານ​ຢູ່​ເຢຍລະ​ມັນ.

ສ່ວນ​​ເລື່ອງ​ຄື​ອັນ​ທີ​ສອງ​ທີ່​ເປັນສາ​ເຫດ​ໃຫ້​ທັງ​ສອງ​ພົບ​ຮັກ​ກັນ ຄື​ຄວາມ​ຮັກ​ໃນ​ການ​ເຮັດ​ການ​ວິ​ໄຈ ​ໂດຍ​ສະ​ເພາະ​ການ​ສຶກສາ​ກ່ຽວ​ກັບ​ມະ​ເຮັງ​ວິທະຍາ (Oncology) ​ເຊິ່ງຄວາມ​ມັກ​ຮັກ​ນີ້​ຖືກ​ພິສູດ​ໃນ​ມື້​ແຕ່ງດອງ ທີ່​ທັງ​ສອງ​ຍັງ​ສະຫລະ​ເວລາ​ເຮັດ​ວຽກ​ໃນ​ຫ້ອງ​​ແລັບ ທັງໆ​ທີ່​ເປັນ​ມື້​ແຕ່ງດອງ​ຂອງ​ຕົນ​ເອງ.

ການ​ສຶກສາ​ກ່ຽວ​ກັບ​ມະ​ເຮັງ​ວິທະຍາ​ຂອງ​ທັງ​ສອງ​ເນັ້ນ​ໃສ່​ການ​ພັດທະນາ​ລະບົບ​ພູມ​ຄຸ້ມ​ກັນ ​ເພື່ອ​ຕໍ່ຕ້ນ​ຈຸ​ລັງ​ມະ​ເຮັງ​ໃນ​ຮ່າງກາຍ​ມະນຸດ ​ແລະ ຈຸດ​ນີ້​ເອງ​ທີ່​ເປັນ​ຈຸດ​ເລີ່​ມຕົ້ນ​ໃຫ້​ນັກວິ​ໄຈ 2 ຄົນ​ໃສ່​ໝວກ​ນັກທຸລະກິດ ຈັດຕັ້ງບໍລິສັດ Ganymed Pharmaceuticals ​ເມື່ອ​ປີ 2001 ​ເພື່ອ​ລະດົມ​ທຶນ​ສະໜັບສະໜູນ​ການ​ວິ​ໄຈ​ໃຫ້​ເດີນ​ໜ້າ​ຕໍ່​ໄປ​ໄດ້ ​ເຊິ່ງ​ໃນ​ອີກ 15 ປີ​ຕໍ່​ມາ, ບໍລິສັດ Ganymed ຖືກ​ບໍລິສັດ Astellas ​ເຊິ່ງ​ເປັນ​ບໍລິສັດ​ສັນຊາດ​ຍີ່ປຸ່ນ​ຊື້​ໄປ​ດ້ວຍ​ມູນ​ຄ່າ 42.600 ລ້ານ​ກວ່າ​ບາດ.

Sahin ​ແລະ Tuereci ຕັ້ງບໍລິສັດ BioNTech ຂຶ້ນມາ​ອີກ​​ແຫ່ງ​ເມື່ອ​ປີ 2008 ​ໂດຍ​ມີ​ເປົ້າໝາຍ​ເພື່ອ​ຂະຫຍາຍ​ການ​ວິ​ໄຈ​ກ່ຽວ​ກັບ​ພູມ​ຄຸ້ມ​ກັນ​ມະ​ເຮັງ​ໃຫ້​ກວ້າງຂວາງ, ໜຶ່ງ​ໃນ​ນັ້ນຄື​ການ​ພັດທະນາ​ສິ່ງ​ທີ່​ເອີ້ນ​ວ່າ mRNA ​ເຊິ່ງ​ເປັນ​ສິ່ງ​ທີ່​ທັງ​ສອງ​ວິ​ໄຈ​ລົງ​ເລິກ​ບໍ່​ຕໍ່າ​ກວ່າ 25 ປີ.

​ໂດຍ mRNA ຄື​ສານ​ລະດັບ​​ໂມ​ເລ​ກຸນ​ທີ່​ຈະ​ເຮັດ​ໜ້າ​ທີ່​ເປັນ​ຄື​ຜູ້​ສົ່ງ​ສານ ຖ້າ​ເຮົາ​​ໃສ່ສານ​ພັນທຸ​ກຳ​ຂອງ​ເຊື້ອພະຍາດ​ໄປ​ໃນ mRNA ​ແລ້​ວສັກ​ເຂົ້າຮ່າງກາຍ​ມະນຸດ​ໃນ​ລັກສະນະ​ຂອງ​ວັກ​ຊີ​ນ ຮ່າງກາ​ຍມະນຸດ​ທີ່​ໄດ້​ຮັບ​ວັກ​ຊີ​ນນັ້ນຈະ​ຕອບ​ສະໜອງ​ດ້ວຍ​ການ​ສ້າງ​ລະບົບ​ພູມ​ຄຸ້ມ​ກັນ​ຂຶ້ນມາ.

ວັກ​ຊີ​ນ mRNA ຖື​ເປັນ​ເຕັກ​ໂນ​ໂລ​ຊີ​ທີ່​ໃໝ່ ​ເກືອບຈະ​ບໍ່​ເຄີຍ​ມີ​ໃຜ​ເຮັດ​ມາ​ກ່ອນ, ​ແຕ່​ມີ​ຂໍ້​ດີ​ຄື​ຖ້າ​ພັດທະນາ​ວັກ​ຊີ​ນຊະນິດ mRNA ຂຶ້ນມາ​ໄດ້ ປະສິດທິພາບ​ຂອງ​ວັກ​ຊີ​ນຈະ​ດີກ​ວ່າ​ວັກ​ຊີ​ນ​ໃນ​ປັດຈຸບັນ​ທີ່​ພັດທະນາ​ໂດຍ​ນຳ​ເອົາ​ໄວຣັສຊະນິດ​ນັ້ນໆ​ມາ​ເຮັດ​ໃຫ້​ມີ​ລິດ​ອ່ອນ​ລົງ ​ແລ້ວ​ສັກ​ເຂົ້າ​ໄປ​ເພື່​ອ​ໃຫ້​ຮ່າງກາຍ​ສ້າງ​ພູມ​ຄຸ້ມ​ກັນ​ຂຶ້ນມາ.

Sahin ​ເລີ່​ມ​ເຫັນ​ທ່າ​ອ່ຽງຄວາມ​ຮຸນ​ແຮງ​ຂອງ​ພະຍາດ​ໂຄ​ວິດ-19 ມາ​ແຕ່​ເດືອນ​ມັງກອນ ທີ່​ເລີ່​ມມີ​ການ​ແຜ່​ລະບາດ​ໃນ​ປະ​ເທດ​ຈີນ. ​ໃນ​ຖານະ CEO ຂອງ BioNTech ລາວ​ຕັດສິນ​ໃຈ​ປະຊຸມ​ດ່ວນ ​ແລະ ຂໍ​​ໂຈະ​ການ​ພັດທະນາ​ວັກ​ຊີ​ນທີ່​ກຳລັງ​ເດີນ​ໜ້າ​ຢູ່​ຊົ່ວ​ຄາວ ​ເພື່ອ​ນຳ​ເອົາ​ເຕັກ​ໂນ​ໂລ​ຊີ​ການ​ຜະລິດ​ວັກ​ຊີ​ນ​ແບບ mRNA ມາ​ທົດ​ລອງ​ພັດທະນາ​ວັກ​ຊີ​ນ​ພະຍາດ​ໂຄ​ວິດ-19 ​ໂດຍ​ສະ​ເພາະ.

Sahin ​ແລະ Tuereci ຕັ້ງ​ໂຄງການ​ຊື່ “Light Speed” ​ແລະ ຕັ້ງທີ​ມຜູ້​ຊ່ຽວຊານ 500 ຄົນ ​ເພື່ອ​ເລີ່​ມການ​ພັດທະນາ​ວັກ​ຊີ​ນ​ໂຄ​ວິດ-19 ຈົນກະທັງ​ເດືອນ​ມີນາ BioNTech ຕັດສິນ​ໃຈ​ຮ່ວມ​ມື​ກັບ​ບໍລິສັດ​ຢາ​ຍັກ​ໃຫຍ່​ ຄື Pfizer ຮ່ວມ​ພັດທະນາ​ວັກ​ຊີ​ນ​ໂຄ​ວິດ-19 ຢ່າງ​ເປັນ​ທາງ​ການ.

​ໂດຍ​ໃນ​ຂໍ້​ຕົກລົງ BioNTech ຈະ​ຕ້ອງ​ຖ່າຍ​ທອດ​ການ​ວິ​ໄຈ​ກ່ຽວ​ກັບ mRNA ​ໃຫ້ Pfizer ​ແລກກັບ​ການ​ທີ່ Pfizer ຕ້ອງ​ໃຫ້ການ​ຊ່ວຍ​ເຫລື​ອ​ໃນ​ດ້ານ​ຕ່າງໆ ລວມທັງ​ຕ້ອງ​ຍອມ​ໃຫ້​ວັກ​ຊີ​ນ​ໂຄ​ວິດ-19 ທີ່​ພັດທະນາ​ໄດ້​ເປັນ​ຊັບ​ສິນ​ທາງ​ປັນຍາ​ຂອງ BioNTech ​ແຕ່​ພຽງ​ຜູ້​ດຽວ, ຍົກ​ເວັ້ນ​ແຕ່​ຈະ​ມີ​ການ​ພັດທະນາ​ໃໝ່ໆ​ກ່ຽວ​ກັບ​ວັກ​ຊີ​ນ​ໂຄ​ວິດ-19 ທີ່​ອາດ​ຕ້ອງ​ເຈລະຈາ​ກັນ​ອີກ​ວ່າ: ​ໃຜ​ຈະ​ໄດ້​ສິດ​ໃນ​ສ່ວນ​ນັ້ນ​ໄປ.

​ເຖິງ​ວ່າ​ຟັງ​ເບິ່ງ​ແລ້ວ​​ເປັນ​ຂໍ້​ຕົກລົງ​ທີ່ Pfizer ​ເສຍປຽບ, ​ແຕ່​ໃນ​ອີກ​ມຸມ​ໜຶ່ງ​ກໍ​ສະທ້ອນ​ໃຫ້​ເຫັນ​ວ່າ: ​ເຕັກ​ໂນ​ໂລ​ຊີ mRNA ​ເປັນ​ສິ່ງ​ທີ່​ໜ້າ​ສົນ​ໃຈ​ຫລາຍ ​ເຖິງ​ຂັ້ນ Pfizer ຍອມ​ໃຫ້​ທຸກ​ຢ່າງ​ເພື່ອ​ແລກ​ກັບ​ຄວາມ​ຮູ້​ກ່ຽວ​ກັບ​ເຕັກ​ໂນ​ໂລ​ຊີ​ນີ້.

ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19 - Wave100S AD to Website 2020 0 - ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19

ສ່ວນ​ທາງ BioNTech ທີ່​ຢືນຢັນ​ວ່າ​ຈະ​ຕ້ອງ​ເປັນ​ເຈົ້າຂອງ​ວັກ​ຊີ​ນນີ້ ​ເນື່ອງ​ຈາກ​ເຊື່ອ​ວ່າ​ວັກ​ຊີ​ນ​ໂຄ​ວິດ-19 ທີ່​ພັດທະນາ​​ໄດ້​ຈະ​ຊ່ວຍ​ບໍລິສັດ​ຕໍ່​ຍອດ​ໄປ​ຫາ​ການ​ພັດທະນາ​ວັກ​ຊີ​ນອື່ນໆ ລວມທັງ​ການ​ປິ່ນປົວ​ມະ​ເຮັງ​ດ້ວຍ​ການ​ໃຊ້ mRNA ທີ່ BioNTech ກຳລັງ​ຢູ່​ໃນ​ການ​ທົດ​ລອງ​ຂັ້ນສຸດ​ທ້າຍ​ເຊັ່ນ​ກັນ.

ລາຍ​ງານ​ລະບຸ​ວ່າ: ການ​ເຮັດ​ວຽກ​ລະຫວ່າງ Pfizer ກັບ BioNTech ​ໃນ​ໄລຍະ​ທຳ​ອິດ ຕິດ​ບັນຫາ​ການ​ເດີນທາງ​ເປັນ​ຫລັກ ​ເນື່ອງ​ຈາກ​ໃນ​ຕອນ​ນັ້ນອາ​ເມ​ລິ​ກາ ສັ່ງ​ໂຈະ​ການ​ເດີນທາງ​ຈາກ​ສະຫະພາບ​ເອີຣົບ ​ເຮັດ​ໃຫ້​​ເຮື​ອບິນ​ສ່ວນ​ຕົວ​ຂອງ​ຜູ້​ບໍລິຫານ Pfizer ກາຍ​ເປັນ​ຍານພາຫະນະ​ຫລັກ​ໃນ​ການ​ຂົນ​ສົ່ງ​ຂໍ້​ມູນ, ອຸປະກອນ ​ແລະ ການ​ວິ​ໄຈ​ສຳຄັນ​ຂ້າມ​ມະຫາ​ສະໝຸດ​ອັດ​ລັງ​ຕິກ.

Sahin ຍອມຮັບ​ວ່າ: ການ​ທີ່​ບໍລິສັດ​ນ້ອຍໆ​ຄື BioNTech ທີ່​ມີ​ພະນັກງານ​ປະມານ 1.500 ຄົນ ​ໄປ​ເຮັດ​ວຽກ​ເປັນ​ພັນທະ​ມິດ​ກັບ​ບໍລິສັດ​ຢາ​ເກົ່າ​ແກ່​ອາຍຸ 170 ປີ​ທີ່​ມີ​ພະນັກງານ​ເກືອບ 100.000 ຄົນ​ຄື Pfizer ​ເຮັດ​ໃຫ້​ລາວ​ກັງວົນ​ຫລາຍ​ໃນ​ໄລຍະ​ທຳ​ອິດ ​ແຕ່​ຕ້ອງ​ແປກ​ໃຈ​ເພາະ​ເມື່ອ​ເຮັດ​ວຽກ​ນຳ​ກັນ​ແລ້ວ ທັງ​ສອງ​ບໍລິສັດ​ເກືອບ​ຈະ​ບໍ່​ມີ​ຄວາມ​ຂັດ​ແຍ່ງ​ຕໍ່​ກັນ​ເລີຍ ​ເພາະ​ທຸກ​ຄົນ​ຕ່າງ​ຫລຸດ​ແນວ​ຄິດ​ຂອງ​ຕົນ​ເອງ ​ແລະ ​ເຈລະຈາ​ກັນ​ດ້ວຍ​ເຫດຜົນ​ເປັນ​ຫລັກ.

​ໃນ​ທີ່​ສຸດ​ຜົນ​ການ​ທົດ​ລອງ​ກັບ​ອາສາ​ສະໝັກ​ໃນ​ໄລຍະ​ທີ​ສາມ​ພົບ​ວ່າ: ວັກ​ຊີ​ນທີ່ Pfizer ພັດທະນາ​ຮ່ວມ​ກັບ BioNTech ​ໃຫ້​ຜົນ​ຕໍ່ຕ້ານ​ໄວຣັສ​ໂຄ​ວິດ-19 ​ໄດ້​ເຖິງ 90% ​ເຊິ່ງຖື​ວ່າ​ໄດ້ຜົນ​ດີ​ຈົນ​ປະທານ​ບໍລິສັດ Pfizer ລະບຸ​ວ່າ: ນີ້​ຖື​ເປັນ​ມື້ທີ່​ດີ​ທີ່​ສຸດ​ຂອງ​ວົງ​ການ​ວິທະຍາສາດ ​ແລະ ມະນຸດ.

ຜົນ​ການ​ທົດ​ລອງ​ເບື້ອງຕົ້ນສອດຄ່ອງ​ກັບ​ຄວາມ​ເຫັນ​ຂອງ ດຣ. ​ແອນ​ໂທ​ນີ ຟາ​ວຊີ ຜູ້ອຳນວຍການ​ສະ​ຖາ​ບັນ​ພະຍາດ​ຕິດ​ເຊື້ອ ​ແລະ ພູມ​ແພ້​ແຫ່ງ​ຊາດ​ຂອງ​ອາ​ເມ​ລິ​ກາ ​ເຊິ່ງ​ເປັນ​ຜູ້​ຊ່ຽວຊານ​ຄົນ​ສຳຄັນ​ປະຈຳ​ລັດຖະບານ​ອາ​ເມ​ລິ​ກາ ທີ່​ເປີ​ດ​ເຜີຍ​ກ່ອນ​ໜ້າ​ນີ້​ວ່າ: ວັກ​ຊີ​ນຈະ​ຕ້ອງ​ມີ​ປະສິດທິພາບ​ໃຫ້​ໄດ້​ຢ່າງ​ໜ້ອຍ 70-75% ຂຶ້ນ​ໄປ​ຈຶ່ງ​ຈະ​ເໝາະ​ສົມ​ໃນ​ການ​ນຳ​ໃຊ້ ​ເຊິ່ງຜ່ານ​ມາ​ວັກ​ຊີ​ນທີ່​ມີ​ປະສິດທິພາບ​ດີ​ທີ່​ສຸດ​ຄື​ວັກ​ຊີ​ນພະຍາດ​ຫັດ​ທີ່​ທົດ​ລອງ​ແລ້ວ​ເຫັນ​ຜົນ​ເຖິງ 97-98%.

ກ້າວ​ຕໍ່​ໄປ​ຂອງ​ວັກ​ຊີ​ນ​ໂຄ​ວິດ-19 ຂອງ Pfizer ​ແລະ BioNTech ຄືກ​ານລວບ​ລວມຂໍ້​ມູນ​ດ້ານ​ຄວາມ​ປອດ​ໄພ ​ເພື່ອ​ສົ່ງ​ເລື່ອງ​ໄປ​ຂໍ​ອະນຸມັດ​ໃຫ້​ນຳ​ໃຊ້​ວັກ​ຊີ​ນ​ໄດ້​ໃນ​ກໍລະນີ​ສຸກ​ເສີນ​ຕໍ່​ສຳນັກງານ​ຄະນະ​ກຳມະການ​ອາຫານ ​ແລະ ຢາ​ອາ​ເມ​ລິ​ກາ (FDA) ​ເຊິ່ງຄາດ​ວ່າ​ອາດ​ຈະ​ມີ​ການ​ຍື່ນ​ເລື່ອງ​ໃນ​ມໍ່ໆ​ນີ້.

​ໂດຍ​ຫລັງ​ໄດ້​ຮັບ​ການ​ອະນຸມັດ Pfizer ​ແລະ BioNTech ຄາດ​ວ່າ: ອາດ​ຈະ​ສາມາດ​ຜະລິດ​ວັກ​ຊີ​ນ​ໄດ້ 50 ລ້ານ​ໂດ​ສ ພາຍ​ໃນ​ປີ​ນີ້ ​ແລະ ຈະ​ຜະລິດ​ໄດ້ 1.300 ລ້ານ​ໂດ​ສ​ໃນ​ປີໜ້າ ​ເຊິ່ງ​ໃນ​ຕອນ​ນີ້​ມີ​ຫລາຍ​ປະ​ເທດ​ທີ່​ເຮັດ​ຂໍ້​ຕົກລົງ​ຊື້ວັກ​ຊີ​ນຂອງ Pfizer ກັບ BioNTech ​ແລ້ວ​ເຊັ່ນ: ສະຫະພາບ​ເອີຣົບ ຈອງ 200 ລ້ານ​ໂດ​ສ, ຍີ່ປຸ່ນ ຈອງ 120 ລ້ານ​ໂດ​ສ, ອາ​ເມ​ລິ​ກາ ຈອງ 100 ລ້ານ​ໂດ​ສ, ອັງກິດ ຈອງ 30 ລ້ານ​ໂດ​ສ.

ສ່ວນ​ຂໍ້​ຈຳກັດ​ຂອງ​ວັກ​ຊີ​ນ​ໂຄ​ວິດ-19 ຂອງ Pfizer ​ແລະ BioNTech ມີ​ຢູ່ 2 ​ເລື່ອງ​ຄື: ຜູ້​ທີ່​ຈະ​ໄດ້​ຮັບ​ວັກ​ຊີ​ນ ຈະ​ຕ້ອງ​ໄດ້​ຮັບ​ວັກ​ຊີ​ນ 2 ​ໂດ​ສ ​ໂດຍ​ຈະ​ຕ້ອງ​ປະ​ໄລຍະ​ການ​ໃຫ້​ວັກ​ຊີ​ນ​ໂດ​ສທຳ​ອິດ​ກັບ​ໂດ​ສທີ​ສອງ​ປະມານ 3 ອາທິດ. ຂະນະ​ທີ່​ວັກ​ຊີ​ນນີ້​ຈະ​ຕ້ອງ​ເກັບ​ພາຍ​ໃຕ້​ອຸນຫະພູມ -70 ອົງສາ ​ເຊິ່ງອາດ​ຈະ​ເປັນ​ອຸປະສັກ​ໃນ​ການ​ຂົນ​ສົ່ງ​​ບ່ອນ​ຫ່າງ​ໄກ.

ຜົນສຳ​ເລັດ​ໃນ​ການ​ພັດທະນາ​ວັກ​ຊີ​ນ ​ເຮັດ​ໃຫ້​ລາຄາ​ຫຸ້ນ​ຂອງ Pfizer ປັບ​ເພີ່ມ​ສູງ​ຂຶ້ນ 15% ທັນທີ​ທີ່​ເປີດ​ຕະຫລາດ​ຢູ່​ອາ​ເມ​ລິ​ກາ ​ໃນ​ວັນ​ທີ 9 ພະຈິກ. ຂະນະ​ທີ່​ລາຄາ​ຫຸ້ນ​ຂອງ BioNTech ປັບ​ເພີ່ມ​ຂຶ້ນ 25% ​ໂດຍ​ມູນ​ຄ່າ​ຂອງ​ບໍລິສັດ BioNTech ຂອງ Sahin ​ແລະ Tuereci ​ໃນ​ຕະຫລາດ​ຫລັກ​ຊັບ Nasdaq ຢູ່​ເກືອບ 760.000 ​ລ້ານ​ບາດ ສູງ​ກວ່າ​ໄລຍະ​ດຽວ​ກັນ​ຂອງ​ປີຜ່ານມາ​ເຖິງ 5,4 ​ເທົ່າ.

ປັດຈຸບັນ Sahin ຖືກ​ຈັດ​ໃຫ້​ເປັນ 1 ​ໃນ 100 ຊາວ​ເຢຍລະ​ມັນ​ທີ່​ລວຍ​ທີ່​ສຸດ. ​ເຖິງ​ຢ່າງ​ໃດ​ກໍ​ຕາມ, ຄົນ​ທີ່​ເຮັດ​ວຽກ​ໃກ້ຊິດ ຫລື ຮູ້ຈັກ Sahin ຈະ​ບອກ​ເປັນ​ສຽງ​ດຽວ​ກັນ​ວ່າ: ລາວ​ບໍ່​ແມ່ນ​ນັກທຸລະກິດ​ທີ່​ເບິ່ງ​ຮັ່ງມີ​ໄປ​ຕາມ​ລາຄາ​ຫຸ້ນ​ຂອງ​ບໍລິສັດ​ທີ່​ເພີ່ມ​ສູງ​ຂຶ້ນ ກົງກັນຂ້າມ Sahin ຍັ​ງ​ເປັນ​ຜູ້​ຊາຍ​ທີ່​ໃສ່​ໂສ້ງ​ຢີນ ພາຍ​ກະ​ເປົາ ຂີ່​ລົດຖີບ​ມາ​ເຮັດ​ວຽກ​ຕາມ​ປົກກະຕິ ​ແລະ ຍັງ​ເປັນ​ຄົນ​ທີ່​ເພື່ອນ​ຮ່ວມ​ງານ​ບອກ​ກົງກັນ​ວ່າ: ​ເປັນ​ຜູ້​ຊາຍ​ທີ່​ມີ​ສະ​ເໜ່​ແຕ່​ຖ່ອມຕົນ​ເມື່ອ​ໄດ້​ເຮັດ​ວຽກ.

ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19 - WhatsApp Image 2020 05 27 at 5 - ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19
ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19 - WhatsApp Image 2020 05 27 at 5 - ຄູ່ຮັກຈາກຄອບຄົວຜູ້ອົບພະຍົບ ເບື້ອງຫລັງຜົນສຳເລັດວັກຊີນໂຄວິດ-19
error: Alert: ເນື້ອຫາຂ່າວມີລິຂະສິດ !!