ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ

ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ - 30573983562 ba77ec5984 b - ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ
ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ - Untitled design - ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ

ໂດຍ: ທິດ​ກໍ່າ

ວັນ​ທີ 13 ທັນວາ ​ເປັນ​ວັນ​ເກີດ​ຂອງ​ປະທານ ​ໄກສອນ ພົມວິຫານ ວິລະ​ບູລຸດ ​ແລະ ​ເປັນ​ຜູ້ນຳ​ທີ່​ແສນ​ເຄົາລົບ​ຮັກ​ຂອງ​ປວງ​ຊົນ​ລາວ​ທັງ​ຊາດ. ມາ​ຮອດ​ປີ​ນີ້​ແມ່ນ​ມີ​ອາຍຸ​ຄົບຮອບ 100 ປີ​ພໍດີ (13/12/1920 – 13/12/2020) ​ເພື່ອ​ຈາລຶກ​ເຖິງ​ຜົນງານ ​ແລະ ຄຸນງາມຄວາມດີ​ອັນ​ຍິ່ງ​ໃຫຍ່​ໄພສານ​ທີ່​ເພິ່ນ​ມີ​ຕໍ່​ປະ​ເທດ​ຊາດ​ບ້ານ​ເມືອງ​ນັ້ນ, ​ໃນ​ປີ​ນີ້ ພັກ ​ແລະ ລັດຖະບານ ພ້ອມ​ຍາດຕິ​ພີ່ນ້ອງ​ລູກ​ຫລານ​ຈຶ່ງ​ໄດ້​ພ້ອມ​ກັນ​ມີ​ສັດທາ​ອັນ​ແຮງ​ກ້າ​ຕັ້ງກອງ​ບຸນ ​ເພື່ອ​ອຸທິດ​ເຖິງ​ດວງ​ຍິນ​ຍານ​ຂອງ​ເພິ່ນ​ຕາມ​ຮີດຄອງ​ປະ​ເພນີ ນະ​ສະຖານ​ທີ່​ອານຸສອນ​ສະຖານ​ທີ່​ຕັ້ງຢູ່​ຫລັກ 6 ບ້ານ​ສີວິ​ໄລ ​ເມືອງ​ໄຊ​ທານີ ນະຄອນຫລວງ​ວຽງ​ຈັນ. ການ​ຕັ້ງກອງ​ບຸນ​ເພື່ອ​ອຸທິດ​ເຖິງ​ດວງ​ວິນ​ຍານ​ຂອງ​ທ່ານ ປະທານ ​ໄກສອນ ພົມວິຫານ ​ໃນ​ຄັ້ງນີ້ ​ແມ່ນ​ຈັດ​ຂຶ້ນຢ່າ​ງ​ໃຫຍ່​ໂຕ ​ໂດຍ​ມີ​ກອງ​ບຸນ​ເຖິງ 13 ກອງ, ນິມົນ​ພະສົງ​ເຂົ້າຮ່ວມ​ຕັດ​ບາດ​ຖວາຍ​ສັງຄະ​ທານ​ເຖິງ 113 ອົງ ​ແລະ ນອກຈາກ​ນັ້ນ ກໍ​ຍັງ​ມີ​ການ​ນຳ​ພັກ-ລັດ, ຍາດຕິ​ພີ່ນ້ອງ, ອອກ​ຕົນ​ຍາດ​ໂຍມ​ຜູ້​ມີ​ສັດທາ​ເຂົ້າຮ່ວມ​ຢ່າງ​ຫລວງຫລາຍ​ພາຍ​ມາກ.

ດັ່ງ​ທີ່​ຮູ້​ກັນ​ແລ້ວ​ວ່າ, ຕະຫລອດ​ຊີວິດ​ແຫ່ງ​ພາລະກິດ​ເຄື່ອນ​ໄຫວ​ປະຕິວັດ​ຂອງ​ທ່ານ ປະທານ ​ໄກສອນ ພົມວິຫານ ​ເພິ່ນ​ໄດ້​ອອກ​ເຫື່ອ​​ເ​ທ​ແຮງ ທັງ​ສະຕິ​ປັນຍາ​ຜ່ານ​ຜ່າ​ຄວາມສຸກ​ທຸກ​ໃນ​ພຶດຕິ​ກຳ​ຕົວ​ຈິງ ​ເພື່ອ​ຊີ້​ນຳ-ນຳພາ​ການ​ປະຕິວັດ ນັບ​ແຕ່​ມື້​ເລີ່​ມຕົ້ນຈົນ​ມາ​ຮອດ​ມື້ສຳ​ເລັດ​ການ​ປະຕິວັດ​ຊາດ​ປະຊາທິປະ​ໄຕ ​ແລ້ວ​ພ້ອມ​ກັບ​ໝູ່​ຄະນະ​ສືບ​ຕໍ່​ພາລະກິດ​ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ​ເດີນ​ຕາມ​ເສັ້ນທາງ​ສັງຄົມ​ນິຍົມ ອັນ​ເປັນ​ເສັ້ນທາງ​ຍຸກ​ສະ​ໄໝ​ໃໝ່ ​ແລະ ​ເປັນ​ຍອດ​ປາດ​ຖະໜາ​ຂອງ​ປວງ​ຊົນ​ລາວ​ທັງ​ຊາດ. ປະທານ ​ໄກສອນ ພົມວິຫານ ​ເປັນ​ຜູ້ນຳ​ທີ່​ສະຫລາດ​ຫລັກ​ແຫລມ, ມີ​ຫົວຄິດ​ປະດິດ​ສ້າງ ຊອກ​ຮູ້​ບົດຮຽນ​ທີ່​ດີໆ​ຈາກ​ບັນດາ​ປະ​ເທດ​ທີ່​ກ້າວໜ້າ​ໃນ​ໂລກ ​ເພື່ອ​ນຳ​ເອົາ​ມາ​ໝູນ​ໃຊ້​ໃນ​ພາລະກິດ​ປະຕິວັດ​ປົດ​ປ່ອຍ​ຊາດ ກໍ​ຄື​ໃນ​ໄລຍະ​ສ້າງສາ​ພັດທະນາ​ປະ​ເທດ​ຊາດ​ໃຫ້​ຈະ​ເລີ​ນກ້າວໜ້າ ​ເປັນຕົ້ນ​ໄດ້​ຊອກ​ເຫັນ​ເສັ້ນທາງ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ​ ນັ້ນກໍ​ຄື​ແນວທາງ​ແຫ່ງ​ພາລະກິດ​ການ​ປ່ຽນ​ແປງ​ໃໝ່​ຂອງ​ປະ​ເທດ​ຊາດ.

ນອກຈາກ​ສິ່ງ​ທີ່​ໄດ້​ກ່າວ​ມາ​ຂ້າງ​ເທິງ​ນັ້ນ​ແລ້ວ, ປະທານ ​ໄກສອນ ພົມວິຫານ ຍັງ​ເປັນ​ຜູ້ນຳ​ຄົນ​ໜຶ່ງ​ທີ່​ມີ​ແບບ​ແຜນການ​ດຳລົງ​ຊີວິດ​ກະທັດ​ຮັດ, ​ເປັນ​ແບບຢ່າງ​ດ້ານ​ແນວ​ຄິດ, ທັດສະນະ​ມະຫາຊົນ, ນອບ​ນ້ອມ​ທ່ອມຕົນ ​ເຊິ່ງ​ເວລາ​ໃດ​ເພິ່ນ​ກໍ​ອີງ​ໃສ່​ກຳລັງ​ແຮງ​ຂອງ​ມະຫາຊົນ, ນັບຖື ​ແລະ ​ເຊື່ອ​ໝັ້ນມະຫາຊົນ, ຖື​ມະຫາຊົນ​ເປັນ​ກົກ, ທັງ​ບໍລິສຸດ​ສັດ​ຊື່​ບໍ່​ຖື​ຕົນຖື​ໂຕ​ບໍລິສຸດ ​ແລະ ຈິງ​ໃຈ​ຮັບ​ໃຊ້​ປະຊາຊົນ ​ເພື່ອ​ປະຊາຊົນ​ຢ່າງ​ເຖິງ​ກົກ​ເຖິງ​ຮາກ. ​ໃນ​ພາລະກິດ​ນຳພາ​ການ​ປະຕິວັດ​ຊາດ​ປະຊາທິປະ​ໄຕ ນັບ​ແຕ່​ມື້​ເລີ່​ມຕົ້ນ ​ເພິ່ນ​ໄດ້​ສ້າງຕັ້ງກອງ​ທະຫານ​ແນວ​ລາວ​ອິດສະຫລະ ​ແລະ ​ເປັນ​ຜູ້​ບັນຊາ​ໂດຍ​ກົງ ຈົນ​ກາຍ​ມາ​ເປັນ​ກອງທັບ​ປະຊາຊົນ​ລາວ​ທີ່​ເດັດຂາດ​ເຂັ້ມ​ແຂງ​ຈົນ​ມາ​ຮອດ​ທຸກ​ວັນ​ນີ້. ນອກຈາກ​ນັ້ນ ກໍ​ພ້ອມ​ກັບ​ໝູ່​ຄະນະ​ສ້າງຕັ້ງພັກ​ປະຊາຊົນ​ລາວ​ຈົນ​ກາຍ​ມາ​ເປັນ​ພັກ​ປະຊາຊົນ​ປະຕິວັດ​ລາວ​ໃນ​ທຸກ​ວັນ​ນີ້. ນັບ​ແຕ່​ພັກ​ປະຊາຊົນ​ປະຕິວັດ​ລາວ​ໄດ້​ຮັບ​ການ​ສ້າງຕັ້ງຂຶ້ນ ​ເພິ່ນ​ເອງ​ກໍ​ໄດ້​ຮັບ​ພາລະ​ໜ້າ​ທີ່​ອັນ​ໜັກໜ່ວງ​ໃນ​ຕຳ​ແໜ່​ງ ​ເປັນ​ເລຂາທິການ​ໃຫຍ່​ຂອງ​ພັກ​ໃນ​ຕະຫລອດ​ຊີວິດ ​ແລະ ຜົນງານ​ຂອງ​ເພິ່ນ. ​ໃນ​ພາລະກິດ​ອັນ​ຍິ່ງ​ໃຫຍ່ ​ແລະ ຜົນງານ​ອັນ​ໂດດ​ເດັ່ນ​ໃຫຍ່​ຫລວງ​ທີ່​ສຸດ​ກໍ​ແມ່ນ​ສາມາດ​ນຳພາ​ການ​ປະຕິວັດ​ກ້າວ​ສູ່​ການ​ປົດ​ປ່ອຍປະ​ເທດ​ຊາດ​ໄດ້​ຢ່າງ​ສົມບູນ, ລຶບລ້າງ​ລະບອບ​ລາຊາທິປະ​ໄຕ, ປະກາດ​ສ້າງຕັ້ງ​ເປັນ​ປະ​ເທດ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ​ຂຶ້ນ​ແທນ. ​ໃນ​ໄລຍະ​ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ ​ເພິ່ນ​ໄດ້​ນຳພາ​ປະ​ເທດ​ຜ່ານ​ພົ້ນຈາກ​ການ​ຮຳບາດ​ແຜ​ສົງຄາມ​ທີ່​ແກ່ຍາວ​ມາ​ເປັນ​ເວລາ​ຍາວ​ນານ. ​ເພື່ອ​ເຮັດ​ໃຫ້​ປະ​ເທດ​ຊາດ​ໄດ້​ຫລຸດ​ພົ້ນອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ ​ເພິ່ນ​ເອງ​ໄດ້​ວາງ​ແນວທາງ​ພັດທະນາ​ເສດຖະກິດ-ສັງຄົມ​ທີ່ສອດຄ່ອງ​ກັບ​ຍຸກ​ສະ​ໄໝ​ແຕ່ລະ​ໄລຍະ ​ເປັນຕົ້ນ​ໃນ​ປີ 1976 ວາງ​ແນວທາງ​ການ​ປະຕິວັດ​ສາມ​ປະການ​ຄື: ການ​ປະຕິວັດ​ພົວພັນ​ການ​ຜະລິດ, ການ​ປະຕິວັດ​ສ້າງ​ກຳລັງ​ການ​ຜະລິດ ​ແລະ ການ​ປະຕິວັດ​ດ້ານ​​ແນວ​ຄິດ ​ແລະ ວັດທະນະທຳ. ອັນ​ທີ່​ໂດດ​ເດັ່ນ​ທີ່​ສຸດ​ມາ​ໃນ​ປີ 1986 ປະທານ ​ໄກສອນ ພົມວິຫານ ​ໄດ້​ເປັນ​ຜູ້​ລິ​ເລີ່​ມວາງ​ແນວທາງ​ເສດຖະກິດ​ໃໝ່ ​ເຊິ່ງມີ​ເນື້ອ​ໃນຕົ້ນຕໍ​ຄື: ຕ້ອງ​ສ້າງ​ໂຄງ​ປະກອບ​ເສດຖະກິດ​ສິນຄ້າ​ທີ່ມີ​ຫລາຍ​ຮູບ​ການ​ກຳມະສິດ, ຫລາຍ​ຮູບ​ການຈັດຕັ້ງ​ເສດຖະກິດ, ຫລາຍ​ລະດັບ​ເຕັກນິກ-​ເຕັກ​ໂນ​ໂລ​ຊີ ​ແລະ ຫລາຍ​ຂະໜາດ​ເສດຖະກິດ​ທີ່​ແຕກ​ຕ່າງ​ກັນ.

ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ - Wave100S AD to Website 2020 0 - ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ

ນອກຈາກ​ພາລະກິດ​ອັນ​ໃຫຍ່​ຫລວງ​ທີ່​ໄດ້​ກ່າວ​ມາ​ນີ້​ແລ້ວ, ປະທານ ​ໄກສອນ​ ພົມວິຫານ ຍັງ​ມີ​ຜົນງານ ​ແລະ ຄຸນງາມຄວາມດີ​ຢ່າງ​ມາກ​ມາຍ ສົມ​ກັບ​ວ່າ​ເພິ່ນ​ເປັນ​ປັນຍາ​ຊົນ​ທີ່ພຽບພ້ອມ​ໄປ​ດ້ວຍ​ຄວາມ​ຮູ້, ຄວາມ​ສາມາດ, ຄວາມ​ສະຫລາດ​ຫລັກ​ແຫລມ, ​ເປັນ​ນັກ​ປະຕິວັດ​ທີ່​ປ່ຽມ​ລົ້ນ​ໄປ​ດ້ວຍ​ອຸດົມ​ຄະຕິ ​ແລະ ຄວາມ​ຈົງ​ຮັກ​ພັກດີ​ຕໍ່​ຊາດ​ບ້ານ​ເມືອງ, ບໍ່​ເປັນ​ຄົນ​ເຫັນ​ແກ່​ຕົວ, ບໍ່​ສໍ້​ລາດ​ບັງ​ຫລວງ. ສິ່ງ​ດັ່ງກ່າວ​ໄດ້​ກາຍ​ເປັນ​ຄຸນສົມບັດ​ຂອງ​ຜູ້ນຳ​ທີ່​ພວກ​ເຮົາ​ຄວນ​ຮໍ່າຮຽນ​ເອົາ​ແບບ​ຢ່າງ ​ແລະ ສຶກສາຄົ້ນຄວ້າ​ແກ່​ລູກ​ຫລານ​ສືບ​ຕໍ່​ໄປ​ພາຍ​ໜ້າ.

 

ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ - WhatsApp Image 2020 05 27 at 5 - ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ
ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ - WhatsApp Image 2020 05 27 at 5 - ຈາລຶກ​ຄຸນງາມຄວາມດີ​ຂອງ​ປະທານ ​ໄກສອນ ພົມວິຫານ
error: Alert: ເນື້ອຫາຂ່າວມີລິຂະສິດ !!