ເຫດໄຟໄໝ້ລົດແກ່ຫີນກາວແລ້ວມີສຽງແຕກ ຢູ່ດ່ານສາກົນແດນສະຫວັນແມ່ນຍ້ອນບັ້ງກະໂພກ ແລະ ດອກໄຟພຸ

ໃນວັນທີ 15 ທັນວາ 2020, ກອງບັນຊາການ ປກສ ແຂວງສະຫວັນນະເຂດ ໄດ້ຈັດພິທີຖະແຫຼງຂ່າວກ່ຽວກັບຜົນການສືບສວນ-ສອບສວນເຫດການເກີດມີສຽງດັງແຕກ ພາໃຫ້ເກີດອັກຄີໄພຢ່າງຮຸນແຮງ ຢູ່ຈຸດກວດກາສິນຄ້າຂອງເຈົ້າໜ້າທີ່ພາສີດ່ານສາກົນແດນສະຫວັນ ທີ່ເກີດຂຶ້ນໃນຕອນເຊົ້າຂອງວັນທີ 3 ທັນວາຜ່ານມານີ້ ແມ່ນຍ້ອນບັ້ງກະໂພກ ແລະ ດອກໄຟພຸຈຳນວນຫລາຍທີ່ຊຸກເຊື່ອງມານຳລົດແກ່ຫີນກາວ ຊຶ່ງບໍ່ແມ່ນເກີດຈາກການວາງລະເບີດ ຫຼື ການແຕກຂອງລູກລະເບີດແຕ່ຢ່າງໃດ ເນື່ອງຈາກວ່າ: ຜ່ານການກວດກາຊັນນະສູດສະຖານທີ່ເກີດເຫດ ບວກກັບການນຳໃຊ້ເຄື່ອງມືອຸປະກອນທັນສະໄໝຂອງຊ່ຽວຊານດ້ານວັດຖຸລະເບີດຂອງບໍລິສັດບໍ່ຄຳເຊໂປນ ແມ່ນບໍ່ພົບເຫັນດິນລະເບີດ ແລະ ຊິ້ນສ່ວນຂອງລະເບີດ ກໍຄືຊິ້ນສ່ວນສານເຄມີ ແລະ ອຶ່ນໆ, ພຽງແຕ່ພົບເຫັນສິ້ນສ່ວນຂອງບັ້ງກະໂພກ ແລະ ບັ້ງໄຟພຸຈຳນວນຫຼາຍ ທີ່ຟົ້ງກະຈາຍຢູ່ໃນສະຖານທີ່ເກີດເຫດເປັນວົງລັດສະໜີກວ້າງ 100 ກວ່າແມັດ.

ຈາກສະພາບຄວາມເປັນຈິງຂອງເຫດການດັ່ງກ່າວ ເຈົ້າໜ້າທີ່ຢັ້ງຢືນ ແລະ ຢ້ຳຄືນຕື່ມອີກວ່າ:  ເຫດການຄັ້ງນີ້ແມ່ນເກີດຈາກການແຕກຂອງບັ້ງກະໂພກປິ້ງປ໋ອງ ແລະ ບັ້ງໄຟພຸຈຳນວນຫຼາຍທີ່ຊຸກເຊື່ອງມານຳລົດກາໝັດ ທະບຽນ ຄຳມ່ວນ ບກ 0347/ບກ 0311 ຄົນຂັບຊື່ທ້າວ ຫງວຽນແທັງຖຸຍ ອາຍຸ 44 ປີ ສັນຊາດຫວຽດນາມ ຢູ່ບ້ານດົງຮ່າ ເມືອງດົງຮາ ແຂວງກວາງຈິ ໜັງສືຜ່ານແດນ C 7282838 ທີ່ບັນທຸກຫີນກາວຈາກບໍລິສັດແຮ່ທາດສະຫວັນ ຈໍາກັດ ທີ່ຕັ້ງຢູ່ເມືອງຈໍາພອນ ແຂວງສະຫວັນນະເຂດ, ເມື່ອມາຮອດຈຸດກວດກາບ່ອນເກີດເຫດ ກຳມະກອນທີ່ຊ່ວຍວຽກພາສີ ຈຶ່ງກວດກາໂດຍການໃຊ້ເຫຼັກສະແລັງທັ່ງ ແທງ ແລະ ໃຊ້ຄ້ອນຕີຕອກລົງ ຈຶ່ງເຮັດໃຫ້ເກີດເປັນປະກາຍໄຟ ພ້ອມທັງສຽງແຕກຮຸນແຮງ ເຮັດໃຫ້ຫີນກາວຟົ້ງກະຈາຍໄປໃນວົງກວ້າງ ແລະ ໄຟໄໝ້ລຸກລາມໄປໃສ່ຟຸຍນ້ຳມັນຈຳນວນ 1.700 ລິດ ທີ່ຮັກສາໄວ້ໃນຈຸດດັ່ງກ່າວ ຍິ່ງເພີ່ມທະວີຄວາມແຮງຂອງແປວໄຟ ເຮັດໃຫ້ຫຍຸ້ງຍາກໃນການສະກັດກັ້ນ ແລະ ມອດໄຟຂອງເຈົ້າໜ້າທີ່ ຈຶ່ງກໍ່ໃຫ້ເກີດຜົນເສຍຫາຍຢ່າງຫຼວງຫຼາຍຄື: ມີຜູ້ເສຍຊີວິດ 3 ຄົນ, ໃນນັ້ນ ມີສັນຊາດ ລາວ 2 ຄົນ, ຊັນຊາດຫວຽດນາມ 1 ຄົນ,  ມີຜູ້ໄດ້ຮັບບາດເຈັບສາຫັດ 7 ຄົນ: ຄົນລາວ 2 ຄົນ ແລະຄົນຫວຽດນາມ 5 ຄົນ ແລະ ມີຜູ້ໄດ້ຮັບບາດເຈັບສົມຄວນ 1 ຄົນ, ບາດເຈັບເລັກໜ້ອຍ 2 ຄົນ; ຊັບສິນຖືກໄຟໄໝ້ເປັນຈຳນວນຫລາຍ ຊຶ່ງປັດຈຸບັນທາງເຈົ້າໜ້າທີ່  ປກສ ແຂວງສະຫວັນນະເຂດ ພວມສຸມໃສ່ສືບຕໍ່ເກັບກຳຂໍ້ມູນ, ສືບສວນ-ສອບສວນຫາທີ່ມາຂອງບັ້ງກະໂພກດັ່ງກ່າວ ເພື່ອນຳເອົາຕົວຜູ້ກະທຳຜິດ ແລະ ຜູ້ຮ່ວມຂະບວນການມາດຳເນີນຄະດີຕາມລະບຽບກົດໝາຍ.