ພົບຜູ້ມີອາການແພ້ຮຸນແຮງຢ່າງໜ້ອຍ 3 ຄົນຢູ່ອາເມລິກາ-ອັງກິດ ຫລັງໄດ້ຮັບວັກຊີນຕ້ານໂຄວິດ-19 ຈາກ Pfizer-BioNTech
ເບື້ອງຕົ້ນມີລາຍງານພົບຜູ້ມີອາການແພ້ຮຸນແຮງຢ່າງໜ້ອຍ 3 ຄົນຢູ່ອາເມລິກາ ແລະ ອັງກິດ ຫລັງໄດ້ຮັບວັກຊີນຕ້ານໂຄວິດ-19 ຈາກ Pfizer-BioNTech ທີ່ຫາກໍໄດ້ຮັບອະນຸຍາດໃຫ້ນຳໃຊ້ເປັນວົງກວ້າງໄດ້ເປັນກໍລະນີສຸກເສີນ ໂດຍຜູ້ທີ່ມີອາການແພ້ຮຸນແຮງຄົນຫລ້າສຸດເປັນເຈົ້າໜ້າທີ່ສາທາລະນະສຸກໃນລັດອະແລສະກາຂອງອາເມລິກາ, ເບື້ອງຕົ້ນກຳລັງຢູ່ລະຫວ່າງເຂົ້າສັງເກດອາການຢູ່ໂຮງໝໍແຫ່ງໜຶ່ງພາຍໃນລັດ ເຊິ່ງລາວບໍ່ເຄີຍມີປະຫວັດແພ້ຢາມາກ່ອນ.
ຂະນະທີ່ກ່ອນໜ້ານີ້ ເຈົ້າໜ້າທີ່ສາທາລະນະສຸກຂອງອັງກິດ 2 ຄົນ ເຄີຍສະແດງອາການແພ້ຮຸນແຮງຫລັງໄດ້ຮັບວັກຊີນຕ້ານໂຄວິດ-19 ນີ້ ເມື່ອອາທິດຜ່ານມາ, ແຕ່ທັງ 2 ຄົນເຄີຍມີປະຫວັດການແພ້ຮຸນແຮງມາກ່ອນ. ແຕ່ຢ່າງໃດກໍຕາມ, ໜ່ວຍງານທີ່ຮັບຜິດຊອບຄື Medicines and Healthcare products Regulatory Agency (MHRA) ຈຶ່ງແນະນຳໃຫ້ປະຊາຊົນທີ່ເຄີຍມີປະຫວັດການແພ້ (Anaphylactic Reaction) ອາຫານ, ຢາ ລວມທັງວັກຊີນ ຫລີກລ່ຽງການຮັບວັກຊີນຕ້ານໂຄວິດ-19 ໃນໄລຍະເວລານີ້ ເຖິງວ່າອາການແພ້ວັກຊີນຈະບໍ່ຄ່ອຍເກີດຂຶ້ນກໍຕາມ.
ເບື້ອງຕົ້ນຍັງບໍ່ສາມາດສະຫລຸບໄດ້ແນ່ນອນວ່າ: ຜູ້ທີ່ມີອາການແພ້ທັງ 3 ຄົນເກີດອາການແພ້ຈາກການໄດ້ຮັບວັກຊີນ ຫລື ເກີດຂຶ້ນຈາກສາເຫດອື່ນ ໂດຍ Pfizer ລະບຸວ່າ: ປັດຈຸບັນຍັງບໍ່ຮູ້ລາຍລະອຽດຂອງການເກີດອາການແພ້ທັງໝົດ, ແຕ່ໄດ້ປະສານງານກັບທີມເຈົ້າໜ້າທີ່ທ້ອງຖິ່ນແລ້ວ ເພື່ອສັງເກດ ແລະ ກວດສອບອາການແພ້ຂອງຜູ້ທີ່ມີລາຍງານຄວາມຜິດປົກກະຕິນີ້.
ດຣ. ວິວລຽມ ກຣູເບີ ຮອງປະທານອາວຸໂສ ທີມພັດທະນາ ແລະ ທົດລອງວັກຊີນຕ້ານໂຄວິດ-19 ຈາກ Pfizer ລະບຸວ່າ: ໃນການທົດລອງວັກຊີນໃນມະນຸດປະມານ 44.000 ຄົນຜ່ານມາ, ພວກເຮົາຍັງບໍ່ເຄີຍພົບອາການແພ້ຮຸນແຮງທີ່ເກີດຂຶ້ນຈາກການໄດ້ຮັບວັກຊີນແຕ່ຢ່າງໃດ. ຂະນະທີ່ ດຣ. ພໍ ອອຟຟິດ ຜູ້ອຳນວຍການສູນສຶກສາວັກຊີນສຳລັບເດັກ ຢູ່ໂຮງໝໍຟິລາເດວເຟຍ ສະແດງຄວາມກັງວົນວ່າ: ສິ່ງທີ່ເກີດຂຶ້ນອາດເຮັດໃຫ້ເຊື່ອວ່າ: ພົນລະເມືອງອາເມລິກາຈຳນວນຫລາຍທີ່ມີອາການແພ້ບໍ່ສາມາດເຂົ້າຮັບການສັກວັກຊີນຕ້ານໂຄວິດ-19 ຈາກ Pfizer ໄດ້ໃນໄລຍະເວລານີ້ ເຊິ່ງມີຈຳນວນເປັນສິບໆລ້ານຄົນ.
ອົງການອາຫານ ແລະ ຢາອາເມລິກາ (FDA) ແນະນຳໃຫ້ Pfizer ສະຫລຸບລາຍງານອາການແພ້ຮຸນແຮງທີ່ເກີດຂຶ້ນໂດຍໄວ ຕາມລະບົບ Vaccine Adverse Event Reporting System ທີ່ໄດ້ຕົກລົງໄວ້ ຖ້າເກີດຄວາມຜິດປົກກະຕິໃດໆຂຶ້ນທີ່ອາດຈະກ່ຽວຂ້ອງກັບການໄດ້ຮັບວັກຊີນ ລວມທັງຈະເຮັດວຽກຮ່ວມກັບສູນຄວບຄຸມ ແລະ ປ້ອງກັນພະຍາດ (CDC) ຢ່າງໃກ້ຊິດ ເພື່ອຫາຄຳຕອບໃນເລື່ອງນີ້.
