ຫວຽດນາມເລີ່ມທົດລອງວັກຊີນປ້ອງກັນໂຄວິດທີ່ຜະລິດເອງ
ລັດຖະບານຫວຽດນາມເລີ່ມທົດລອງປະສິດທິພາບຂອງວັກຊີນປ້ອງກັນພະຍາດໂຄວິດ-19 ທີ່ຜະລິດໂດຍບໍລິສັດໃນປະເທດ ກັບອາສາສະໝັກ 60 ຄົນ ຢູ່ນະຄອນຫລວງຮ່າໂນ້ຍ.
ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງຫວຽດນາມອອກຖະແຫລງການວ່າ: ບໍລິສັດນາໂນເຈນ ໜຶ່ງໃນຜູ້ປະກອບການດ້ານການຢາລາຍໃຫຍ່ຂອງປະເທດ ເລີ່ມການທົດລອງປະສິດທິພາບທາງຄລີນິກໃນໄລຍະທີໜຶ່ງ ຂອງວັກຊີນປ້ອງກັນເຊື້ອໄວຣັສໂຄໂຣນາສາຍພັນໃໝ່ ເຊິ່ງທາງບໍລິສັດພັດທະນາຂຶ້ນເອງໃນຊື່ “ນາໂນໂຄແວກ”.
ທັງນີ້, ການທົດລອງເກີດຂຶ້ນຢູ່ມະຫາວິທະຍາໄລແພດສາດແຫ່ງຊາດ ໃນນະຄອນຫລວງຮ່າໂນ້ຍ ໂດຍອາສາສະໝັກກຸ່ມທຳອິດມີທັງໝົດ 60 ຄົນ ທັງເພດຊາຍ ແລະ ຍິງ ມີອາຍຸລະຫວ່າງ 18 ປີ ຈົນເຖິງ 50 ປີ. ຕໍ່ຈາກນີ້ທຸກຄົນຈະຢູ່ພາຍໃຕ້ການສັງເກດການຢ່າງໃກ້ຊິດໃນເບື້ອງຕົ້ນເປັນເວລາ 72 ຊົ່ວໂມງ ຖ້າບໍ່ມີອາການຂ້າງຄຽງ ທຸກຄົນຈະໄດ້ຮັບອະນຸຍາດໃຫ້ກັບເຮືອນ, ແຕ່ຈະຕ້ອງເຂົ້າຮັບການກວດຮ່າງກາຍຢ່າງຕໍ່ເນື່ອງ ຕະຫລອດໄລຍະເວລາອີກ 56 ວັນ.
ປັດຈຸບັນ ຫວຽດນາມກຳລັງພັດທະນາວັກຊີນປ້ອງກັນພະຍາດໂຄວິດ-19 ດ້ວຍຕົນເອງຢ່າງໜ້ອຍ 4 ລາຍການ ເຊິ່ງວັກຊີນນາໂນໂຄແວກເປັນໜຶ່ງໃນນັ້ນ ແລະ ເປັນວັກຊີນລາຍການທຳອິດ ເຊິ່ງໄດ້ຮັບອະນຸຍາດໃຫ້ທົດລອງໃນມະນຸດ. ຂະນະທີ່ວັກຊີນອີກ 3 ລາຍການອາດຈະເຂົ້າສູ່ໄລຍະທົດລອງທາງຄລີນິກໄລຍະທຳອິດໃນເດືອນກຸມພາ ຫລື ມີນາປີໜ້າ.
ດ້ານຕົວແທນຂອງນາໂນເຈນໃຫ້ຂໍ້ມູນເພີ່ມຕື່ມວ່າ: ບໍລິສັດຕັ້ງເປົ້າໝາຍຜະລິດວັກຊີນໃຫ້ໄດ້ເດືອນລະ 5 ລ້ານໂດສ ແລະ ລາຄາຈຳໜ່າຍຈະຢູ່ປະມານໂດສລະ 5 ໂດລາສະຫະລັດເທົ່ານັ້ນ.
