ຜັງເມືອງ ຄວນເປັນເລື່ອງຮີບດ່ວນ

ຜັງເມືອງ ຄວນເປັນເລື່ອງຮີບດ່ວນ - 555 3 - ຜັງເມືອງ ຄວນເປັນເລື່ອງຮີບດ່ວນ
ຜັງເມືອງ ຄວນເປັນເລື່ອງຮີບດ່ວນ - Untitled design - ຜັງເມືອງ ຄວນເປັນເລື່ອງຮີບດ່ວນ

ໂດຍ: ມຶກບໍ່ແຫ້ງ

ການພັດທະນາຕົວເມືອງຂອງພວກເຮົາຍັງພົບພໍ້ບັນຫາຫຼາຍອັນ ໂດຍສະເພາະ ທີ່ກ່ຽວກັບ ຄວາມເປັນລະບຽບຮຽບຮ້ອຍ, ການຍົກຍ້າຍ ຈັກສັນ ແລະ ຄ່າຊົດເຊີຍ ເຊິ່ງບັນຫາພື້ນຖານອັນນຶ່ງກໍແມ່ນ ການວາງແຜນຜັງເມືອງ.

ພວກເຮົາທຸກຄົນຕ່າງຮູ້ດີວ່າ ນະຄອນຫຼວງວຽງຈັນແມ່ນນັບມື້ນັບແອອັດ, ລົດຕິດ ກຳລັງກາຍເປັນເລື່ອງປົກກະຕິ ທີ່ບັນດາຜູ້ຄົນບຽດແຫຍ້ກັນ ຂຶ້ນຮອດທາງຍ່າງ ທີ່ຫຼີກລົດຈອດບໍ່ເປັນລະບຽບກໍປານນັ້ນ ໃນຊີວິດປະຈຳວັນ ເຊິ່ງອັດຕາການເພີ່ມຂຶ້ນຂອງຍານພາຫະນະສ່ວນຕົວ ແຕ່ລະເດືອນຫຼາຍພັນຄັນ ໃນຂະນະທີ່ເສັ້ນທາງ ຍັງມີຄວາມຈຳກັດ.

ຫຼາຍທ່ານໄດ້ຍ້ອງຍໍວ່າຢູ່ ນະຄອນໄກສອນ ແຂວງສະຫວັນນະເຂດນັ້ນ ແມ່ນມີຜັງເມືອງທີ່ດີ ມີເສັ້ນທາງ ຫຼາຍສາຍຕັດໄປມາ ແລະ ກຳນົດທີ່ຕັ້ງຈຸດຕ່າງໆ ໂດຍສະເພາະ ສຳນັກງານຫ້ອງການຂອງລັດທີ່ຕັ້ງ ເປັນຈຸດໃກ້ຄຽງກັນສະດວກສະບາຍໃນການພົວພັນວຽກງານ ເຊິ່ງກໍເຫັນວ່າເໝາະສົມດີ ເຮັດໃຫ້ ການສັນຈອນໄປມາ ບໍ່ແອອັດ, ບໍ່ຕິດຄັດຈົນເກີນໄປ ທັງເປັນລະບົບລະບຽບດີສົມຄວນ.

ແຕ່ຢ່າງໃດກໍຕາມ ຫຼາຍຕົວເມືອງປະເທດເຮົາແມ່ນ ສ້າງເສັ້ນທາງ ໄປຕາມເສັ້ນທາງ ທີ່ເປັນປະເພນີມາກ່ອນ, ການປຸກເຮືອນຊານ ສະຖານທີ່ ກໍຢັ່ງຢາຍ ຍັງບໍ່ທັນສອດຄ່ອງ ແລະ ເປັນລະບຽບດີ ກໍໃຫ້ເກີດບັນຫາຕ່າງໆ ໂດຍສະເພາະ ການກໍ່ສ້າງທີ່ຢູ່ອາໄສໃນເຂດ ພື້ນທີ່ ໂຄງການພັດທະນາ ແລະ ອື່ນໆ.

ຜັງເມືອງ ຄວນເປັນເລື່ອງຮີບດ່ວນ - Wave100S AD to Website 2020 0 - ຜັງເມືອງ ຄວນເປັນເລື່ອງຮີບດ່ວນ

ໃນກອງປະຊຸມ ສະພາປະຊາຊົນ ນະຄອນຫຼວງວຽງຈັນ ທີ່ໄດ້ຈັດຂຶ້ນ ເມື່ອກາງປີ 2020 ທີ່ຜ່ານນັ້ນ ເພິ່ນກໍໄດ້ ມີການສົນທະນາ ແລກປ່ຽນກ່ຽວກັບ ເລື່ອງຜັງເມືອງ ທີ່ເປັນບັນຫາພື້ນຖານຂອງການພັດທະນາ ຢູ່ນະຄອນຫຼວງວຽງຈັນ ເພາະວ່າ ມາຮອດປັດຈຸບັນນີ້ ການແຕ້ມຜັງເມືອງ ຂອງນະຄອນຫຼວງພວກເຮົານັ້ນ ຍັງບໍ່ທັນສຳເລັດ ເຊິ່ງກໍເປັນສິ່ງທ້າທາຍ ໃນການພັດທະນາຕົວເມືອງ ທີ່ນັບມື້ນັບຂະຫຍາຍອອກໄປໂດຍທີ່ບໍ່ມີ ແຜນຜັງອັນຈະແຈ້ງ ແລະ ສອດຄ່ອງ.

ຫຼາຍຄົນກໍເຫັນວ່າ ການຈັດສັນ ທີ່ຕັ້ງຂອງບັນດາຫ້ອງການ, ສຳນັກງານຂອງລັດໃນ ນະຄອນຫຼວງວຽງຈັນນັ້ນ ເຮັດໃຫ້ການໄປຫາມາສູ່ຂອງ ອົງການຈັດຕັ້ງຕ່າງໆ ໃຊ້ເວລາ ແລະ ງົບປະມານ ເພາະຕັ້ງຢູ່ຄົນລະທິດທາງ ທີ່ໄກກັນສົມຄວນ ເຊັ່ນ ສ່ວນໜຶ່ງແມ່ນຢູ່ເຂດ ບ້ານ ດົງໝາກຄາຍ, ສ່ວນໜຶ່ງ ຢູ່ຕາມເສັ້ນທາງ 450 ປີ ແລະ ອີກສ່ວນໜຶ່ວພັດຢູ່ທາງໜອງບຶກ ເມື່ອເປັນເຊັ່ນນີ້ ຖ້າຕົວເມືອງຫາກຂະຫຍາຍຕົວ, ເພີ່ມຄວາມແອອັດ ກໍຍິ່ງໃຊ້ເວລາຂຶ້ນ ຖ້າຫາກບໍ່ມີການຂົນສົ່ງແບບສາທາລະນະທີ່ມີປະສິດທິພາບຄືກັບຫຼາຍປະເທດ.

ພ້ອມນັ້ນ, ຍ້ອນເຫັນຄວາມສຳຄັນ ແລະຈຳເປັນ ໃນການພັດທະນາເສດຖະກິດ ຈຶ່ງໄດ້ອະນຸມັດ ບັນດາໂຄງການລົງທຶນຂອງລັດ ແລະ ເອກະຊົນ ໃນເຂດທີ່ມີທ່າແຮງທາງດ້ານເສດຖະກິດ, ໃຫ້ສຳປະທານ ໃນການພັດທະນາ ເຊິ່ງບາງກໍລະນີ ກໍມີຄວາມທ້າທາຍ ແລະ ມີຄວາມຫຍຸ້ງຍາກໃນການ ໄກ່ເກ່ຍ ແລະມອບຄ່າຊົດເຊີຍໂດຍສະເພາະ ຖືກເຂດທີ່ແອອັດຊຸມຊົນ, ບາງກໍລະນີ ກໍບໍ່ສະເພາະ ກ່ຽວກັບ ວຽກງານສັງຄົມ ແຕ່ຍັງມີຜົນກະທົບຕໍ່ ສະພາບແວດລ້ອມຕື່ມອີກ ອັນນີ້ລ້ວນແລ້ວແຕ່ແມ່ນ ຕິດພັນກັບແຜນຜັງເມືອງ.

ແນ່ນອນການອອກຜັງເມືອງທີ່ດີຕ້ອງໃຊ້ງົບປະມານ ແລະເວລາ ແຕ່ຖ້າມີແຜນຜັງເມືອງທີ່ດີ ມີການຈັດຕັ້ງປະຕິບັດທີ່ເຄັ່ງຄັດ ກໍຈະຊ່ວຍໃຫ້ພວກເຮົາສາມາດ ພັດທະນາຕົວເມືອງໄດ້ຢ່າງຍືນຍົງ ແລະ ຫຼີກລ່ຽງບັນຫາ ທາງດ້ານສັງຄົມ-ສິ່ງແວດລ້ອມຕື່ມອີກ. ເພາະສະນັ້ນ ຕົວເມືອງພວກເຮົາຕ້ອງການຜັງທີ່ດີ ຢ່າງຮີບດ່ວນ.

ຜັງເມືອງ ຄວນເປັນເລື່ອງຮີບດ່ວນ - WhatsApp Image 2020 05 27 at 5 - ຜັງເມືອງ ຄວນເປັນເລື່ອງຮີບດ່ວນ
ຜັງເມືອງ ຄວນເປັນເລື່ອງຮີບດ່ວນ - WhatsApp Image 2020 05 27 at 5 - ຜັງເມືອງ ຄວນເປັນເລື່ອງຮີບດ່ວນ
error: Alert: ເນື້ອຫາຂ່າວມີລິຂະສິດ !!