ລາວ ແລະ ອົງການ ສປຊ ສຳລັບເດັກ ຫາລືແຜນງງານການຮ່ວມມືໄລຍະໃໝ່
ກະຊວງແຜນການ ແລະ ການລົງທຶນ ຮ່ວມກັບ ອົງການ ສປຊ ສຳລັບເດັກ (UNICEF) ໄດ້ຈັດກອງປະຊຸມປຶກສາຫາລື ກ່ຽວກັບແຜນງງານການຮ່ວມມືໄລຍະໃໝ່ ລະຫວ່າງ ລັດຖະບານລາວ ແລະ ອົງການ ສປຊ ສຳລັບເດັກ (2022-2026) ແລະ ທົບທວນການຈັດຕັ້ງປະຕິບັດໂຄງການ ປະຈຳປີ 2020 ເຊິ່ງໄດ້ຈັດຂຶ້ນໃນວັນທີ 18 ທັນວາ 2020 ໂດຍການເປັນປະທານຮ່ວມ ຂອງ ທ່ານ ກິແກ້ວ ຈັນ ທະບູຣີ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ ນາງ Pia Rebello Britto ຜູ້ຕາງໜ້າອົງການ ສປຊ ສໍາລັບເດັກປະຈໍາ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມໃນຄັ້ງນີ້, ໄດ້ປຶກສາຫາລືຢ່າງກົງໄປກົງມາ ໂດຍການຖອດຖອນບົດຮຽນ ຈາກການຈັດຕັ້ງປະຕິບັດຜ່ານມາ ແນໃສ່ເພື່ອປັບປຸງແຜນງານການຮ່ວມມື ໃນສົກປີ 2020 ນີ້, ເຊິ່ງເປັນປີທ້າຍສະໄໝ ຂອງການຈັດຕັ້ງປະຕິບັດແຜນງານການຮ່ວມມື (2017-2021) ແລະ ເພື່ອຮັບປະກັນໄດ້ ໃນການສ້າງແຜນງານການຮ່ວມມື ໃນໄລຍະໃໝ່ 2022-2026 ໃຫ້ມີປະສິດທິພາບ ແລະ ປະສິດທິຜົນດີຂື້ນກ່ວາເກົ່າ ເພີ່ມທະວີການລົງທຶນໃສ່ວຽກງານການພັດທະນາເດັກນ້ອຍ ໃຫ້ມີປະສິດທິພາບ ແລະ ປະສິດທິຜົນ ໂດຍສຸມໃສ່ວຽກງານການວາງແຜນ, ການຂຶ້ນງົບປະມານ, ການປະສານງານ ແລະ ການຕິດຕາມລະດັບທ້ອງຖິ່ນ ໂດຍສະເພາະ ເດັກນ້ອຍທີ່ຢູ່ຫ່າງໄກສອກຫລີກ ທີ່ບໍ່ສາມາດເຂົ້າເຖິງ, ນຳໃຊ້ຖານຂໍ້ມູນທີ່ມີ ເພື່ອເປັນບ່ອນອີງ ໃນການກໍານົດເປົ້າໝາຍຈຸດສຸມ ເຂົ້າໃນການວາງແຜນ ເປັນເຈົ້າການໃນການວາງແຜນຮ່ວມກັນ ໃຫ້ແທດເໝາະ ແລະ ເໝາະສົມກັບຄວາມອາດສາມາດ, ມີການຕິດຕາມການຈັດຕັ້ງປະຕິບັດ ແລະ ການສັງເກດຕີລາຄາແຕ່ລະໄລຍະ (ໄຕມາດ, 6 ເດືອນ); ສືບຕໍ່ສ້າງຄວາມເຂັ້ມແຂງ ແລະ ຄວາມອາດສາມາດ ໃນການບໍລິຫານ-ຄຸ້ມຄອງແຜນງານ/ໂຄງການ ແລະ ການເງິນ ໃຫ້ແກ່ຄູ່ຮ່ວມງານ (IPs) ສືບຕໍ່ເພີ່ມທະວີເອົາໃຈໃສ່ ໃນການຈັດຕັ້ງປະຕິບັດວຽກງານ ໃຫ້ມີປະສິດທິຜົນຫລາຍຂຶ້ນກ່ວາເກົ່າ ທັງເປັນເຈົ້າການໃນການວາງແຜນຮ່ວມກັນ ໃຫ້ສອດຄອງ ແລະ ກົມກ່ຽວກັບ ຄວາມອາດສາມາດຂອງຂະແໜງ ການ ແລະ ອື່ນໆ.
ທ່ານ ນາງ Pia Rebello Britto ກ່າວວ່າ: ອົງການ ຢູ່ນິເຊັບ ໄດ້ອີງໃສ່ເເຮງບັນດານໃຈ ມາຈາກວິໄສທັດ ຂອງທ່ານ ໄກສອນ ພົມວິຫານ ຜູ້ປຽບຄືພໍ່ເເຫ່ງຊາດ ແລະ ພວກເຮົາພ້ອມທີ່ຈະຮ່ວມມືກັບລັດຖະບານລາວ ເພື່ອເຮັດໃຫ້ວິໄສທັດຂອງທ່ານ ກາຍເປັນຄວາມຈິງ ແລະ ເພື່ອບໍ່ປ່ອຍປະໃຜໄວ້ທ່າງຫລັງ ເຊິ່ງການປັບປຸງຊີວິດການເປັນຢູ່ຂອງເດັກທຸກຄົນໃນປະເທດລາວ, ແຜນງານການຮວມມືໄລະຍະ ໃໝ່ລະຫວ່າງ ລັດຖະບານເເຫ່ງ ສປປ ລາວ ແລະ ສປຊ ສໍາລັບເດັກ ຈະສຸມໃສ່ 3 ປັດໄຈ ຄື: ຄວາມສະເໝີພາບ, ການເສີມສ້າງຄວາມເຂັ້ມແຂງຂອງລະບົບ ແລະ ການເສີມສ້າງຄວາມເຂັ້ມແຂງໃຫ້ກັບເດັກ ແລະ ໄວໜຸ່ມ ເພື່ອໃຫ້ພວກເຂົາສາມາດປະກອບສ່ວນ ເຂົ້າໃນການພັດທະນາຂອງປະເທດຊາດ.
ໃນໂອກາດດຽວກັນນີ້, ອົງການ ສປຊ ສຳລັບເດັກ ກໍໄດ້ນຳເອົາອຸປະກອນໄອທີ ຈຳນວນໜຶ່ງ ມາມອບໃຫ້ກະຊວງແຜນການ ແລະ ການລົງທຶນ ເພື່ອແກ້ໄຂຄວາມຈຳເປັນໃນການຫັນ ເປັນຂັ້ນຕອນການເຮັດວຽກແບບດິຈີຕອນ ພາຍໃນກະຊວງ ແລະ ສ້າງຄວາມເຂັ້ມແຂງໃຫ້ລັດຖະບານ ໃນດ້ານຄວາມສາ ມາດໃນການຕິດຕາມ ກວດກາພາກສະໜາມໃນຊ່ວງການລະບາດຂອງພະຍາດໂຄວິດ-19 ອຸປະກອນທີ່ນຳມາມອບໃນຄັ້ງນີ້, ປະກອບມີຄອມພີວເຕີ້ PCS ຂະໜາດນ້ອຍຈໍານວຍ 6 ໜ່ວຍ ແລະ TABLETS 8 ໜ່ວຍ, ພ້ອມທັງແອັບພລິເຄຊັນ ANDROID ສຳລັບການຕິດຕາມ ແລະ ປະເມີນຜົນໂຄງການພາກສະໜາມ ທີ່ໄດ້ສ້າງຂຶ້ນສະເພາະຕໍ່ການນຳໃຊ້ພາຍໃນ MPI/DIC ເພື່ອອຳນວຍຄວາມສະດວກໃນການເກັບກຳຕົວເລກຂໍ້ມູນການຊ່ວຍເຫລືອ ເພື່ອການພັດທະນາແບບທາງການ (ODA) ໃນໄລຍະລົງຢ້ຽມຢາມພາກສະໜາມ, ອຸປະກອນ ແລະ ແອັບພລິເຄຊັນ ANDROID ມີມູນຄ່າລວມປະມານ 19.620 ໂດລາສະຫະລັດ.
