ຜູ້ນຳອິນໂດເນເຊຍປົດລັດຖະມົນຕີສາທາລະນະສຸກ ເຫດເຮັດວຽກບໍ່ມີປະສິດທິພາບໃນການຄວບຄຸມໂຄວິດ
ປະທານາທິບໍດີ ໂຈໂກ ວິໂດໂດ ຜູ້ນຳອິນໂດເນເຊຍ ເປັນປະທານໃນພິທີສາບານຕົນຂອງລັດຖະມົນຕີໃໝ່ 6 ຄົນໃນວັນທີ 23 ທັນວາ ໃນການປັບຄະນະລັດຖະບານຄັ້ງໃຫຍ່ຂອງທ່ານ ເພື່ອສ້າງຄວາມເຊື່ອໝັ້ນຕໍ່ປະຊາຊົນກ່ຽວກັບມາດຕະການຮັບມືການແຜ່ລະບາດຂອງໄວຣັສໂຄວິດ-19 ຢູ່ອິນໂດເນເຊຍ ເຊິ່ງເປັນປະເທດທີ່ມີຈຳນວນຜູ້ຕິດເຊື້ອ ແລະ ເສຍຊີວິດສູງທີ່ສຸດໃນສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ). ທັງນີ້, ອິນໂດເນເຊຍມີຜູ້ຕິດເຊື້ອໂຄວິດ-19 ຫລາຍກວ່າ 685.000 ຄົນ ແລະ ເສຍຊີວິດຫລາຍກວ່າ 20.400 ຄົນ.
ເຖິງວ່າອິນໂດເນເຊຍມີລັດຖະມົນຕີໜ້າໃໝ່ 6 ຄົນໃນເທື່ອນີ້, ແຕ່ຜູ້ທີ່ໄດ້ຮັບຄວາມສົນໃຈຫລາຍທີ່ສຸດ ຄືທ່ານ ບູດີ ກູນາດີ ຊາດິຄິນ ເຊິ່ງເປັນລັດຖະມົນຕີສາທາລະນະສຸກຄົນໃໝ່ ຫລັງຈາກປະທານາທິບໍດີ ວິໂດໂດ ປະກາດປົດທ່ານ ເທຣາວານ ອາກັສ ປູຕຣານໂຕ ພົ້ນຕຳແໜ່ງລັດຖະມົນຕີສາທາລະນະສຸກ ເນື່ອງຈາກຄວາມບໍ່ມີປະສິດທິພາບຂອງທ່ານ ເທຣາວານ ໃນການຄວບຄຸມການແຜ່ລະບາດຂອງໄວຣັສໂຄວິດ-19 ຫລັງຈາກທ່ານຖືກວິພາກວິຈານຢ່າງໜັກຈາກການກ່າວວ່າ: ການສູດມົນຈະຊ່ວຍປົກປ້ອງປະຊາຊົນຈາກໄວຣັສດັ່ງກ່າວ.
ທັງນີ້, ປະທານາທິບໍດີ ວິໂດໂດ ໄດ້ຍ້າຍທ່ານ ບູດີ ຈາກຕຳແໜ່ງລັດຖະມົນຕີຊ່ວຍຝ່າຍກິດຈະການລັດວິສາຫະກິດ ແລະ ຫົວໜ້າທີມຟື້ນຟູເສດຖະກິດ ເພື່ອມາຮັບຕຳແໜ່ງລັດຖະມົນຕີສາທາລະນະສຸກຄົນໃໝ່.
ນັກລະບາດວິທະຍາຮຽກຮ້ອງໃຫ້ລັດຖະບານໃຊ້ມາດຕະການທີ່ເຂັ້ມງວດຂຶ້ນໃນການສະກັດກັ້ນການແຜ່ລະບາດຂອງໄວຣັສໂຄວິດ-19 ແລະ ໄດ້ຊີ້ເຖິງຄວາມລະເຫລີງໃນການກວດຫາຜູ້ຕິດເຊື້ອ ລວມທັງການຕິດຕາມຫາແຫລ່ງຕົ້ນຕໍການແຜ່ເຊື້ອ.
