ອັງກິດຢືນຢັນ ພົບ 2 ຄົນຕິດໂຄວິດ-19 ສາຍພັນໃໝ່ຈາກອາຟຣິກາໃຕ້
ທ່ານ ແມດ ແຮນຄ໊ອກ ລັດຖະມົນຕີສາທາລະນະສຸກແຫ່ງອັງກິດ ປະກາດຢືນຢັນການກວດພົບ 2 ຜູ້ຕິດໂຄວິດ-19 ສາຍພັນໃໝ່ຈາກອາຟຣິກາໃຕ້ໃນນະຄອນຫລວງລອນດອນ ແລະ ທາງຕາເວັນຕົກສຽງເໜືອຂອງອັງກິດ ໃນວັນທີ 22 ທັນວາ ໂດຍທັງ 2 ກໍລະນີ ພົບການຕິດຕໍ່ກັບບຸກຄົນທີ່ເດີນທາງມາຈາກອາຟຣິກາໃຕ້.
ໂດຍພາຍຫລັງການກວດພົບກໍລະນີຕິດເຊື້ອດັ່ງກ່າວ, ທາງການອັງກິດໄດ້ປະກາດໂຈະການເດີນທາງກັບອາຟຣິກາໃຕ້ ເຊິ່ງໃຜທີ່ເດີນທາງໄປອາຟຣິກາໃຕ້ໃນໄລຍະ 14 ວັນຜ່ານມາ ຫລື ມີການຕິດຕໍ່ກັບບຸກຄົນທີ່ມາຈາກອາຟຣິກາໃຕ້ ຈະຕ້ອງກັກຕົວທັນທີ.
ສຳລັບໂຄວິດ-19 ສາຍພັນໃໝ່ຈາກອາຟຣິກາໃຕ້ ມີຊື່ເອີ້ນວ່າ: ສາຍພັນ 501.V2 ພົບຄັ້ງທຳອິດຢູ່ບໍລິເວນອ່າວເນລສັນ ແມນເດລາ ໃນອາຟຣິກາໃຕ້ ເມື່ອຕົ້ນເດືອນຕຸລາຜ່ານມາ ໂດຍຜູ້ຊ່ຽວຊານປະເມີນວ່າ: ມີປະສິດທິພາບໃນການແຜ່ລະບາດໄດ້ສູງເຖິງ 80-90% ເຊິ່ງສູງກວ່າເຊື້ອໂຄວິດ-19 ສາຍພັນໃໝ່ B117 ທີ່ກຳລັງລະບາດຢູ່ອັງກິດ ທີ່ມີປະສິດທິພາບໃນການລະບາດປະມານ 70%.
ຂະນະທີ່ ສາສະດາຈານ ຣີລ ເຟີກູສັນ ຜູ້ຊ່ຽວຊານຈາກມະຫາວິທະຍາໄລອິມພີຣຽວ ຄໍເລັກ ລອນດອນ ສະແດງຄວາມເຫັນໃນທິດທາງດຽວກັນວ່າ: ສິ່ງທີ່ໜ້າກັງວົນຂອງຊາວອັງກິດໃນຕອນນີ້ຄື ໄວຣັສກາຍພັນທີ່ມາຈາກອາຟຣິກາໃຕ້.
ທາງດ້ານກະຊວງສາທາລະນະສຸກອາຟຣິກາໃຕ້ເຕືອນອັນຕະລາຍຈາກໄວຣັສກາຍພັນຊະນິດນີ້ວ່າ: ເປັນອັນຕະລາຍຮ້າຍແຮງກວ່າສຳລັບປະຊາຊົນທີ່ອາຍຸນ້ອຍ ແລະ ສຸຂະພາບແຂງແຮງ ເຊິ່ງບາງຄົນພົບວ່າ: ບໍ່ສະບາຍອາການໜັກຢ່າງວ່ອງໄວ. ຂະນະທີ່ນັກວິທະຍາສາດຢູ່ອາຟຣິກາໃຕ້ລະບຸວ່າ: ໂຄວິດ-19 ສາຍພັນໃໝ່ນີ້ກຳລັງແຜ່ລະບາດໃນຫລາຍພື້ນທີ່ຂອງປະເທດ ແລະ ຫລ້າສຸດລັດຖະບານອາຟຣິກາໃຕ້ໄດ້ສັ່ງເຂັ້ມງວດມາດຕະການປ້ອງກັນການແຜ່ລະບາດໃນໄລຍະທ້າຍປີ ລວມທັງການປິດຫາດຊາຍທີ່ມີນັກທ່ອງທ່ຽວໄປລວມຕົວກັນຈຳນວນຫລາຍແລ້ວ.
