ຄູ ຢູ່ໃນ ຮົງກົງ ຖືກຮຽກໃຫ້ສົ່ງເງິນເດືອນຄືນ ເພາະສອນບໍ່ຖືກກັບວິຊາສະເພາະ

ໜັງສືພິມ South China Morning Post ລາຍງານວັນທີ 28 ທັນວານີ້ວ່າ ອາຈານຊາຍຄົນໜຶ່ງ ທີ່ສອນຢູ່ໃນໂຮງຮຽນປະຖົມແຫ່ງໜຶ່ງ ໃນ ຮົງກົງ ຖືກຮຽກໃຫ້ສົ່ງເງິນເດືອນຄືນຈຳນວນ 200.000 HKD  ຫຼື ປະມານ 25.800 ໂດລາ  ໃນເມື່ອພົບວ່າ ເຂົາສອນບໍ່ຖືກກັບວິຊາສະເພາະທີ່ຮຽນມາ.

ນາຍຄູຄົນດັ່ງກ່າວມີໃບປາກາສະນີຍະບັດ ຈົບລະດັບປະລິນຍາຕີ ໃນ 2 ສາຂາ: ຂະແໜງການສຶກສາສາດ ແລະ ວິທະຍາສາດສັງຄົມ ຈາກມະຫາວິທະຍາໄລ ຮົງກົງ.

ຈາກນັ້ນເຂົາເຂົ້າສອນຢູ່ໃນໂຮງຮຽນປະຖົມແຫ່ງໜຶ່ງ ຕັ້ງແຕ່ເດືອນ ກຸມພາປີນີ້ເປັນຕົ້ນມາ ຫຼັງຈາກນັ້ນສອງສາມເດືອນ ກໍພົບວ່າ ໃບປາກາສະນີຍະບັດຂອງເຂົາ ຍັງບໍ່ທັນໄດ້ລົງທະບຽນໃນໂຄງການກໍ່ສ້າງຄູຊັ້ນປະຖົມ.

ເຖິງຢ່າງໃດກໍຕາມ ນາຍຄູຄົນດັ່ງກ່າວ ບອກວ່າ ໂຄງການຫຼັກສູດທີ່ເຂົາຮຽນຢູ່ໃນມະຫາວິທະຍາໄລ ຮົງກົງນັ້ນ ມີມາດຕະຖານທີ່ຊ່ວຍໃຫ້ເຂົາສາມາດສອນໄດ້ທັງວິທະຍາສາດທຳມະຊາດ, ສັງຄົມ ແລະ  ວິຊາມະນຸດສາດ ໃນຊັ້ນປະຖົມ ແລະ ຊັ້ນມັດທະຍົມຕົ້ນໄດ້.

ໃນລະຫວ່າງເດືອນພຶດສາພາ ປີນີ້,  ຄະນະຄຸ້ມຄອງການສຶກສາຂອງ ຮົງກົງ ໄດ້ແຈ້ງການເຖິງຜູ້ອຳນວຍການໂຮງຮຽນທີ່ເຂົາສອນຢູ່ນັ້ນວ່າ: ຄູຄົນດັ່ງກ່າວ ໄດ້ສອນສິ່ງທີ່ຕົນເອງ ບໍ່ມີມາດຕະຖານຄົບຖ້ວນຕາມໃບປາກາສະນີຍະບັດ ທີ່ຮຽນມາ.