ເປີດທາງດ່ວນຊວນກັນເຮ
ໂດຍ: ທິດກໍ່າ
ໃນທີ່ສຸດມາຮອດວັນທີ 20 ທັນວາ 2020 ທາງດ່ວນນະຄອນຫລວງວຽງຈັນ-ວັງວຽງກໍມີພິທີເປີດຢ່າງເປັນທາງການ. ກ່ອນໜ້ານັ້ນ ໄດ້ມີແຫລ່ງຂ່າວຊ່າລືກັນແບບບໍ່ເປັນທາງການວ່າ: ຈະເປີດນຳໃຊ້ໃຫ້ທັນເນື່ອງໃນໂອກາດສະເຫລີມສະຫລອງວັນຊາດທີ 2 ທັນວາ ຄົບຮອບ 45 ປີ. ຍິ່ງໄປກວ່ານັ້ນ, ພັດມີແຫລ່ງຂ່າວຊັກຊວນອວນຕ້ານກັນຕື່ມວ່າ: ໃນວັນທີ 1-3 ຈະເປີດໃຫ້ນຳໃຊ້ຟຣີ ວ່າຊັ້ນ ! ເມື່ອມີກະແສຂ່າວນີ້ອອກມາ ໃຜກໍກຽມຈິດກຽມໃຈລໍຖ້າໄປສະຫລອງເປັນການໃຫຍ່ ໂດຍສະເພາະຄົນທີ່ພາກັນມັກຂອງຟຣີ. ແຕ່ກໍບັງເອີນພໍເມື່ອຮອດວັນທີ 2 ທັນວາແລ້ວ ຄົນສ່ວນຫລາຍກໍພາກັນໄປ ຫວັງຈະໄດ້ສຳຜັດກັບສາຍທາງດ່ວນອັນເປັນເສັ້ນທາງປະຫວັດສາດຂອງຊາດລາວ, ຜົນສຸດທ້າຍມາກໍພາກັນເປິະ. ສະເພາະໃນມື້ວັນຊາດທີ 2 ທັນວາ ມີຊາວວຽງຈັນຈຳນວນຫລວງຫລາຍໄດ້ພາກັນຕັ້ງໃຈຈະໄປທ່ຽວເມືອງວັງວຽງ ໂດຍຜ່ານທາງດ່ວນ, ແຕ່ບັງເອີນເມື່ອໄປຮອດຈຸດທີ່ໝາຍ ທາງເຈົ້າໜ້າທີ່ກ່ຽວຂ້ອງບໍ່ອະນຸຍາດໃຫ້ເຂົ້າ ຈຶ່ງພາກັນເຫງົາຫງອຍຜິດຫວັງໄປຕາມໆກັນ ທັງພາກັນຈົ່ມວ່າພວກເຮົາ “ຖືກຕົ້ມ”. ອັນນີ້ກໍອາດເປັນຍ້ອນຫລາຍສາເຫດ ເປັນຕົ້ນອັນທີໜຶ່ງ ກໍອາດເປັນຍ້ອນການກໍ່ສ້າງເສັ້ນທາງບາງຊ່ວງບໍ່ທັນສຳເລັດຮຽບຮ້ອຍ. ຈຸດສຳຄັນເທົ່າທີ່ເຫັນມາແມ່ນໂຄງສ້າງສະຖານທີ່ເກັບເງິນບໍ່ທັນສຳເລັດເສັດສິ້ນສົມບູນແບບ. ເຫດຜົນອັນທີສອງກໍອາດຈະແມ່ນຖືກແຫລ່ງຂ່າວໂຄສະນາຕົວະຕົ້ມກັນໄປ ໂດຍທີ່ສື່ທາງການບໍ່ທັນອອກມາຢັ້ງຢືນຢ່າງຄັກແນ່.
ແຕ່ແນວໃດກໍຕາມ, ມາຮອດມື້ນີ້ ເສັ້ນທາງສາຍດ່ວນວຽງຈັນ-ວັງວຽງກໍໄດ້ເປີດນຳໃຊ້ບໍລິການຮັບໃຊ້ເປັນທີ່ຮຽບຮ້ອຍແລ້ວ. ໃນມື້ເປີດຢ່າງເປັນທາງການຄືໃນວັນທີ 20 ທັນວາ 2020 ທ່ານປະທານປະເທດ ບຸນຍັງ ວໍລະຈິດ ກໍໄດ້ເປັນກຽດຕັດແຖບຜ້າຢ່າງເປັນທາງການ. ນອກຈາກນັ້ນ ກໍມີແຂກຖືກເຊີນ, ເຈົ້າໜ້າທີ່ກ່ຽວຂ້ອງຈຳນວນມາກໜ້າຫລາຍຕາເຂົ້າຮ່ວມພິທີໃນຄັ້ງນີ້. ດັ່ງທີ່ຮູ້ກັນແລ້ວວ່າ ການເປີດເສັ້ນທາງສາຍດ່ວນວຽງຈັນ-ວັງວຽງຖືເປັນຄັ້ງປະຫວັດສາດຂອງຊາດລາວຄົນລາວ ແລະ ຖືເປັນສາຍທາງຍ່າຍທຳອິດຢູ່ໃນ ສປປ ລາວ ຂອງພວກເຮົາ ກ່ອນຈະມີການເຊື່ອມຕໍ່ຈາກວັງວຽງ-ຫລວງພະບາງ ແລະ ຈາກຫລວງພະບາງ-ອຸດົມໄຊ ຈົນໄປເຖິງຊາຍແດນບໍ່ຫານເຊື່ອມຈອດກັບ ສປ ຈີນ.
ແນວໃດກໍດີ, ນັບແຕ່ມີພິທີເປີດຢ່າງເປັນທາງການມື້ທຳອິດ ເປັນຊ່ວງໄລຍະເປີດຟຣີນັ້ນ ພາບທີ່ເຫັນເຕັມຕາກໍຄືມີລົດແຫ່ແຫນແພນກັ້ງພາກັນໄປສຳຜັດກັບສາຍທາງດ່ວນຈົນເປັນເຫດໃຫ້ລົດຕິດເປັນແຖວຍາວຢຽດເປັນກິໂລແມັດ ທັງຂາໄປ ແລະ ຂາກັບ. ໝາຍວ່າຈາກວຽງຈັນໄປຫາວັງວຽງ ແລະ ຈາກວັງວຽງກັບມານະຄອນຫລວງວຽງຈັນ. ຈາກປາກົດການຄືດັ່ງກ່າວ ກໍຍ້ອນວ່າເສັ້ນທາງດ່ວນມັນຍັງເປັນຂອງໃໝ່ ໃຜກໍຢາກໄປຊີມລົດຊາດ.
ນອກຈາກຄົນທັງຫລາຍພາກັນເຫີ່ຊີງກັນໄປແລ້ວ ກໍຍັງມີຮອດສັດສາວາສິ່ງ ເປັນຕົ້ນງົວກັບຄວາຍຍ່າງເປັນພຶງເປັນແພແຫແຫນແພນກັ້ງ, ມີທັງລົດຕ໊ອກໆອີ່ແຕ໊ນແລ່ນເໝືອນກັບທຸກສິ່ງທຸກຢ່າງໃຜກໍຕ້ອງການສຳຜັດກັບສິ່ງໃໝ່ໆທີ່ເປັນສັນຍາລັກຄັ້ງທຳອິດຂອງປະເທດຊາດ. ໄປຄຽງຄູ່ກັບຂະບວນການອັນຄຶກຄັກນີ້ແລ້ວ, ສິ່ງຕາມມາອີກຢ່າງໜຶ່ງກໍຄືອຸປະຕິເຫດໄດ້ເລີ່ມແລກແຮກໝານກັບສາຍທາງດ່ວນຈົນພາຫະນະຂອງແຕ່ລະຄົນມີການເປ່ເພເສຍຫາຍຢ່າງໜັກ. ນີ້ຄືຊ່ວງເລີ່ມຕົ້ນຂອງການນຳໃຊ້ທາງດ່ວນທີ່ບໍ່ທັນເຄີຍມີໃນປະຫວັດສາດຂອງຊາດລາວ.
ໄປພ້ອມກັບສິ່ງຕ່າງໆທີ່ກ່າວມາຂ້າງເທິງນັ້ນແລ້ວ, ພັດມີກະແສຂ່າວວ່າເພິ່ນຄິດໄລ່ຄ່າຜ່ານລົດວີໂກ້ເທົ່າກັນກັບລົດຂົນສົ່ງ ວ່າຊັ້ນ ! ແຕ່ຄວາມຈິງມັນຈະເປັນແນວໃດ ກໍຂໍໃຫ້ພວກເຮົາທຳໃຈໄວ້ກ່ອນ ເພາະທຸກສິ່ງຢ່າງມັນກໍຕ້ອງດ້ວຍເຫດ ແລະ ຜົນ ເພາະໃນປະຫວັດສາດບ້ານເຮົາຍັງບໍ່ທັນເຄີຍມີສາຍທາງດ່ວນຄືບ້ານເພິ່ນຈັກເທື່ອ. ໃນເມື່ອເຮົາມີທາງດ່ວນແລ້ວ ກໍຊວນກັນໄປເຮ ຖ້າບໍ່ຕ້ອງການໄປເຮ ກໍຕ້ອງເດີນຕາມເສັ້ນທາງເກົ່າທີ່ພວມເລັ່ງລັດປັບປຸງກໍ່ສ້າງຈາກວຽງຈັນຫາໂພນໂຮງ ແລະ ອະນາຄົດຕໍ່ໄປອາດຈະສຸດຕາມສາຍທາງ 13 ເໜືອ ຈຶ່ງຂໍໃຫ້ອົດໃຈລໍຄອຍຕໍ່ໄປ ຖ້າຜີບໍ່ຂ້າມ້າບໍ່ຢຽບ.
