ສະຫລຸບເຫດການຮອບໂລກປີ 2020

- 2308D77DF9F4B2E6A67C316956F04016 - ສະຫລຸບເຫດການຮອບໂລກປີ 2020
- Untitled design - ສະຫລຸບເຫດການຮອບໂລກປີ 2020

​​ລອງ​ມາ​ທົບ​ທວນ​ເຫດການ​ຕ່າງໆ​ ​ໃນ​ປີ 2020 ວ່າ​ໃນ​ໄລຍະ 1 ປີຜ່ານມາ​ມີ​ເຫດການ​ຫຍັງ​ທີ່​ໜ້າ​ສົນ​ໃຈ.

 

  • ໄຟ​​ໄໝ້​ປ່າ​ອົດ​ສະຕຣາລີ

ເປີດ​ຕົວ​ປີ 2020 ມາ​ຢ່າງ​ຮ້ອນ​ແຮງດ້ວຍ​ສະຖານະ​ການ​ໄຟ​ໄໝ້​ປ່າ​ອົດ​ສະຕຣາລີ​ທີ່​​ແກ່ຍາວ​ມາ​ແຕ່​ປີ 2019 ​ເຊິ່ງ​ເຜົາ​ໄໝ້​​ເນື້ອທີ່​ປະມານ 26 ລ້ານ​ເອ​ເຄີ, ທຳລາຍ​ອາຄານ​ບ້ານ​ເຮືອນ 5 ພັນ​ກວ່າ​ແຫ່ງ, ສັດປ່າ​ເສຍ​ຊີວິດ​ກວ່າ​ພັນ​ລ້ານ​ໂຕ ​ແລະ ຂ້າ​ຊີວິດ​ປະຊາຊົນ​ໄປ​ເຖິງ 28 ຊີວິດ ​ໂດຍ​ໜ່ວຍ​ງານ​ມອດ​ໄຟ​ໃນ​ລັດ​ນິວ​ເຊົາ​ເວລພິຈາລະ​ນວ່າ​ເປັນ​ລະດູ​ໄຟ​ໄໝ້​ປ່າ​ຮ້າຍ​ແຮງ​ທີ່​ສຸດ​ໃນ​ຄວາມ​ຊົງ​ຈຳ​ເລີຍ.

 

  • ຂໍ້​ຂັດ​ແຍ່ງ​ອີຣານ-ອາ​ເມ​ລິ​ກາ

ອາ​ເມ​ລິ​ກາ​ປະຕິບັດ​ການ​ໂຈມ​ຕີ​ທາງ​ອາກາດຂ້າ​ຊີວິດ​ນາຍ​ພົນ ກໍ​ເຊມ ​ໂຊ​ເລ​ມາ​ນີ ຜູ້​ບັນຊາ​ການ​ກອງ​ກຳລັງ​ໂກດ​ແຫ່ງ​ກອງ​ກຳລັງ​ພິທັກ​ປະຕິວັດ​ອິດສະ​ລາມ​ຂອງ​ອີຣານ ​ແລະ ມື​ຂວາ​ຄົນ​ສຳຄັນ​ຂອງ ອາຍະ​ຕຸ​ນລໍ ຄໍ​ເມ​ເນ​ອີ ຜູ້ນຳ​ສູງ​ສຸດ​ອີຣານ ລວມທັງ ອະ​ບູ ມະ​ດີ ອັລມຸຮັນ​ດິສ ຮອງ​ຜູ້​ບັນຊາ​ການ​ກອງ​ກຳລັງ​ລະດົມ​ພົນ​ປະຊາຊົນ ກອງ​ກຳລັງ​ຕິດ​ອາວຸດ​ອີຣັກ ​ເຊິ່ງມີ​ຄວາມ​ໃກ້ຊິດ​ກັບ​ອີຣານ ​ໂດຍ​ການ​ປ່ອຍ​ລູກ​ສອນ​ໄຟ​ຫລາ​ຍລູກ ​ເຊິ່ງສັງຫານ​ປະຊາຊົນໄປ 10 ຄົນ.

 

  • Black Lives Matter

ການ​ປະ​ທ້ວງ​ເພື່ອ​ຄວາມ​ເທົ່າ​ທຽມຂອງ​ຄົນ​ຜິວ​ສີ​ທີ່​ເກີດ​ຂຶ້ນຫລັງ ຈອດ ຟອຍ ຊາວ​ຜິວ​ສີ​ຄົນ​ໜຶ່ງ​ຖືກ​ຕຳຫລວດ​ອາ​ເມ​ລິ​ກາ​ສັງຫານ​ຢ່າງ​ໂຫດ​ຫ້ຽມລະຫວ່າງ​ການ​ຈັບ​ກຸມ ​ໂດຍ​ການ​ປະ​ທ້ວງ​ດັ່ງກ່າວ​ເລີ່​ມຕົ້ນ​ໃນ​ລັດ​ມິນ​ນິ​ໂຊ​ຕາ ກ່ອນ​ຈະ​ຂະຫຍາຍ​ໄປ​ທົ່ວ​ອາ​ເມ​ລິ​ກາ ​ແລະ ທົ່ວ​ໂລກ​​ໃນ​ເວລາ​ບໍ່​ດົນ ​ເຊິ່ງນຳ​ໄປ​ສູ່​ເຫດການ​ປະ​ທະ​ລະຫວ່າງ​ກຸ່ມ​ຜູ້​ປະ​ທ້ວງ ​ແລະ ​ເຈົ້າໜ້າ​ທີ່​ຕຳຫລວດ​ຫລາຍ​ຄັ້ງ.

 

  • ເຫດ​ລະ​ເບີດ​ເບຣຸດ

ເຫດການ​ລະ​ເບີດ​ຂອງ​ແອ​ມ​ໂມ​ເນຍ​ໄນ​ເຕຣດປະມານ 2.750 ​ໂຕນ ທີ່​ຖືກ​ຖິ້ມ​ໄວ້​ໃນ​ທ່າ​ເຮືອ​ເບຣຸດ ​ໂດຍ​ບໍ່​ມີ​ມາດ​ຕະການ​ດ້ານ​ຄວາມ​ປອດ​ໄພ​ມາ 6 ປີ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 204 ຄົນ, ບາດ​ເຈັບ 7.500 ກວ່າ​ຄົນ ​ແລະ ຜູ້​ສູນຫາຍ​ອີກ​ຈຳນວນ​ຫລາຍ ລວມທັງ​ຍັງ​ມີ​ປະຊາຊົນ 300.000 ກວ່າ​ຄົນ​ຕ້ອງ​ກາຍ​ເປັນ​ຜູ້​ບໍ່​ມີ​ບ່ອນຢູ່​ອາ​ໄສ ​ແລະ ​ເກີດ​ເຫດການ​ປະ​ທ້ວງ​ຮຸນ​ແຮງ​ຈາກ​ປະຊາຊົນ​ທີ່​ບໍ່ພໍ​ໃຈ​ໃນ​ການ​ຂາດ​ຄວາມ​ຮັບຜິດຊອບ​ຂອງ​ລັດຖະບານ ສົ່ງ​ຜົນ​ໃຫ້​ທ້າຍ​ທີ່​ສຸດ​ຄະນະ​ລັດຖະບານ ພ້ອມ​ດ້ວຍທ່ານ ຮັສຊັນ ດິອັບ ນາຍົກລັດຖະມົນຕີຂອງ​ເລ​ບາ​ນອນ ປະກາດ​ລາ​ອອກ​ຈາກ​ຕຳ​ແໜ່​ງ ​ເນື່ອງ​ຈາກ​ຄວາມ​ກົດ​ດັນ​ທີ່​ທະວີ​ຄວາມ​ຮຸນ​ແຮງ​ຂຶ້ນ.

 

  • ກົດໝາຍ​ຄວາມ​ໝັ້ນຄົງ​ແຫ່ງ​ຊາດ​ຮົງ​ກົງ

ຫລື​ຊື່​ຢ່າງ​ເປັນ​ທາງ​ການ​ວ່າ: ກົດໝາຍ​ສາທາລະນະ​ລັດ​ປະຊາຊົນ​ຈີນ​ວ່າ​ດ້ວຍ​ການ​ຮັກສາ​ຄວາມ​ໝັ້ນຄົງ​ແຫ່ງ​ຊາດ​ໃນ​ເຂດ​ປົກຄອງ​ພິ​ເສດ​ຮົງ​ກົງ ​ເຊິ່ງອອກ​ແບບ​ມາ​ເພື່ອ​ຄຸ້ມ​ຄອງ​ການ​ແຊກ​ແຊງ​ກິດ​ຈະ​ການ​ດິນ​ແດນ​ຂອງ​ຮົງ​ກົງ ​ແລະ ຖືກ​ນຳ​ມາ​ໃຊ້​ດຳ​ເນີນ​ຄະດີ​ຕໍ່​ຜູ້​ປະ​ທ້ວງ​ຊາວ​ຮົງ​ກົງ​ຢ່າງ​ກວ້າງຂວາງ​ໃນ​ເວລາ​ຕໍ່​ມາ ນຳ​ໄປ​ສູ່​ການ​ຈັບ​ກຸມ​ຜູ້​ປະ​ທ້ວງ​ຫລາຍ​ຄົນ ລວມທັງ ​ໂຈ​ຊົວ ຫວ່ອງ ​ແກນ​ນຳ​ເຍົາວະ​ຊົນ​ຊື່​ດັງ ​ແລະ ສົ່ງ​ຜົນ​ໃຫ້​ຜູ້​ປະ​ທ້ວງ​ຮົງ​ກົງ​ຈຳນວນ​ຫລາຍ​ຕ້ອງ​ຂໍ​ລີ້​ໄພ​ໄປ​ຕ່າງປະ​ເທດ.

 

  • ສົງຄາມ​ນາ​ກໍ​ໂນ-ຄາຣາບັກ

ຄວາມ​ຂັດ​ແຍ່ງ​ລະຫວ່າງ​ອາ​ເຊີ​ໄບຈານ ​ແລະ ອາ​ເມ​ເນຍ​ໃນ​ພື້ນທີ່ນາ​ກໍ​ໂນ-ຄາຣາບັກ ​ເຊິ່ງ​ເປັນ​ການ​ຕໍ່ສູ້​ຮຸນ​ແຮງ​ທີ່​ສຸດ​ໃນ​ຮອບ​ຫລາຍ​ປີ ​ເຊິ່ງສ້າງ​ຄວາມ​ເສຍ​ຫາຍ​ເປັນ​ວົງ​ກວ້າງ ​ແລະ ຂ້າ​ຊີວິດ​ປະຊາຊົນ​ໄປ​ຫລາຍ​ພັນ​ຄົນ ລວມທັງ​ສົ່ງ​ຜົນ​ໃຫ້​ມີ​ຜູ້​ອົບ​ພະຍົບຫລາຍ​ກວ່າ 7 ໝື່ນ​ຄົນ ​ໂດຍ​ຫລ້າ​ສຸດ​ທັງ​ສອງ​ໄດ້​ຮ່ວມ​ລົງ​ນາມ​ໃນ​ຂໍ້​ຕົກລົງ​ຢຸດ​ຍິງ​ທີ່​ມີ​ປະ​ເທດຣັດ​ເຊຍ​ເປັນ​ຄົນ​ກາງ.

 

  • ໂລກ​ມຸດ​ສະ​ລິ​ມຕໍ່ຕ້ານ​ຝຣັ່ງ

ເລີ່​ມຕົ້ນມາ​ຈາກ​ການ​ທີ່​ຄູ​ຊາວ​ຝຣັ່ງຖືກ​ຂ້າ​ຕັດ​ຄໍ​ຫລັງ​ນຳ​ເອົາ​ຮູບ​ກາ​ຕູນ​ສາ​ສະ​ດາ​ມູຮຳ​ໝັດ​ມາປະກອບ​ໃສ່​ການ​ຮຽນ-ການ​ສອນ ​ໂດຍ​ປະທານາທິບໍດີ ​ແອ​ມມາ​ນູ​ເອລ ມາຄຣົງ ຂອງຝຣັ່ງ​ເອີ້ນ​ວ່າ​ເປັນ​ການ​ລົງມື​ຂອງ​ກຸ່ມ​ກໍ່​ການ​ຮ້າຍ​ມຸດ​ສະ​ລິ​ມ ​ແລະ ຈະ​ປາບ​ປາມ​ກຸ່ມ​ມຸດ​ສະ​ລິ​ມຫົວ​ຮຸນ​ແຮງ​ຢູ່​ຝຣັ່ງ ສົ່ງ​ຜົນ​ໃຫ້​ປະ​ເທດ​ມຸດ​ສະ​ລິ​ມຫລາຍ​ປະ​ເທດ​ບໍ່ພໍ​ໃຈ ​ແລະ ຈັບ​ມື​ກັນ​ປະນາມຝຣັ່ງ ກໍລະນີ​ດູ​ໝິ່ນ​ສາສະໜາ ​ເຖິງ​ຂັ້ນອອກ​ມາດ​ຕະການ​ຂວ້ຳບາດ​ຝຣັ່ງ ​ແລະ ​ໄລ່​ໃຫ້​ໄປ​ກວດ​ສຸຂະພາບ​ຈິດ.

- Wave100S AD to Website 2020 0 - ສະຫລຸບເຫດການຮອບໂລກປີ 2020

 

  • ຂໍ້​ຕົກລົງ​ຫຸ້ນ​ສ່ວນ​ທາງ​ເສດຖະກິດ​ລະດັບ​ພາກພື້ນ

ປະ​ເທດ​ກຸ່ມ​ອາຊີ-ປາຊີ​ຟິກ 15 ປະ​ເທດ ປະກອບ​ມີ​ປະ​ເທດ​ອາ​ຊຽນທັງ 10 ປະ​ເທດ ​ແລະ ຈີນ, ຍີ່ປຸ່ນ, ສ.​ເກົາຫລີ, ອົດ​ສະຕຣາລີ ​ແລະ ນິວຊີ​ແລນ ລົງ​ນາມ​ໃນ​ຂໍ້​ຕົກລົງ​ຫຸ້ນ​ສ່ວນ​ທາງ​ເສດຖະກິດ​ລະດັບ​ພາກພື້ນ ຫລື ອາ​ເຊັບ (Regional Comprehensive Economic Partnership: RCEP) ຫລັງ​ເຈລະຈາ​ມາຍາ​ວນານ​​ເຖິງ 8 ປີ ​ເຊິ່ງຈະ​ກາຍ​ເປັນ​ເຂດ​ການ​ຄ້າ​ເສລີ​ໃຫຍ່​ທີ່​ສຸດ​ໃນ​ໂລກ.

 

  • ພາລະກິດ​ນອກ​ໂລກ

      ຫລາຍ​ປະ​ເທດ​ມຸ່ງ​ໜ້າ​ປະຕິບັດ​ພາລະກິດນອກ​​ໂລ​ກຊະນິດ​ທີ່​ວ່າ​ບໍ່​ມີ​ໃຜ​ຍອມ​ໃຜ ບໍ່​ວ່າ​ຈະ​ເປັນ​ຍານ​ອະວະກາດ​ໂອ​ໄຊຣິສ-​ເຣັກ ຂອງ​ນາ​ຊາ​ປະສົບ​ຜົນສຳ​ເລັດ​ໃນ​ການ​ເກັບ​ຕົວຢ່າງ​ຢູ່ “ດາວ​ເຄາະ​ນ້ອຍ​ເບັນ​ນູ” ​ເຊິ່ງຈະ​ຖືກ​ສົ່ງ​ກັບ​ມາ​ໂລກ​ໃນ​ປີ 2023 ​ແລະ ນາ​ຊາ​ຍັງ​ຢືນຢັນ​ການຄົ້ນພົບ​ໂມ​ເລ​ກຸນ​ນ້ຳ​ໃນ​ດວງ​ຈັນ ລວມທັງ​ຮ່ວມ​ມື​ກັບ Spacex ​ໃນ​ປະຕິບັດ​ການ​ສົ່ງ​ນັກ​ບິນ​ອະວະກາດ​ເພື່ອ​ໄປ​ສະຖານີ​ອະວະກາດ​ນາໆ​ຊາດ. ນອກຈາກ​ນີ້ ຍັງ​ມີ​ປະ​ເທດ​ຈີນ​ທີ່​ສາມາດ​ເກັບ​ຕົວຢ່າງ​ດວງ​ຈັນ​ມາ​ສຶກສາ​ໄດ້​ສຳ​ເລັດ.

 

  • ​ເລືອກ​ຕັ້ງອາ​ເມ​ລິ​ກາ 2020

ການ​ເລືອກ​ຕັ້ງປະທານາທິບໍດີ​ອາ​ເມ​ລິ​ກາ​ເກີດ​ຂຶ້ນ​ໃນ​ວັນ​ທີ 3 ພະຈິກ ມີ​ຜູ້​ເຂົ້າຊີງ​ຕຳ​ແໜ່​ງຄື​ທ່ານ ​ໂດ​ນັລ ທຣຳ ​ແລະ ທ່ານ ​ໂຈ ​ໄບ​ເດນ ທ່າມກາງ​ການ​ປະຊັນ​ກັນ​ຢ່າງ​ດຸ​ເດືອດ​ດ້ວຍ​ນະ​ໂຍບາຍ​ຄົນ​ລະ​ຂົ້ວ ລວມທັງ​​ໂຕ້ວາທີ​ແບບ​ດຸ​ເດືອດ​ ກ່ອນ​ທ່ານ ທຣຳ ຈະ​ອອກ​ມາ​ປະກາດ​ວ່າ​ຕົນ​ເອງ ​ແລະ ​ແມ່ຍິງ​ໝາຍ​ເລກ​ໜຶ່ງ​ຕິດ​ເຊື້ອ​ໄວຣັສ​ໂຄ​ໂຣນາ​ໃນ​ຊ່ວງ​ກ່ອນ​ການ​ເລືອກ​ຕັ້ງ ​ເຮັດ​ໃຫ້​ຄະ​ແນນ​ຄວາມ​ເຊື່ອ​ໝັ້ນຫລຸດ​ລົງ​ຫລາຍ ສຸດ​ທ້າຍ​ອາ​ເມ​ລິ​ກາ​ໄດ້​ຜູ້ນຳ​ຄົນ​ໃໝ່​ເປັນ​ທ່ານ ​ໂຈ ​ໄບ​ເດນ ​ແລະ ມີ​ກຳນົດ​ເຂົ້າຮັບ​ຕຳ​ແໜ່​ງ​ໃນ​ວັນ​ທີ 20 ມັງກອນ ​ໂດຍ​ຫລາຍ​ຄົນ​ເບິ່ງ​ວ່າການ​ພົວພັນ​ລະຫວ່າງ ອາ​ເມ​ລິ​ກາ ​ແລະ ຈີນ ຈະ​ເປັນ​ແນວ​ໃດ​ຕໍ່​ໄປ​ຫລັງ​ບໍ່​ຄ່ອຍ​ດີ​ໃນ​ສະ​ໄໝ​ປະທານາທິບໍດີ ທຣຳ ລວມທັງ ​ໄບ​ເດນ ຈະ​ນຳພາ​ອາ​ເມ​ລິ​ກາ​ກັບ​ເຂົ້າຂໍ້​ຕົກລົງ​ປາຣີສທີ່ ທຣຳ ​ໄດ້​ຖອນ​ຕົວ​ອອກ​ໄປ ຫລື ບໍ່.

 

  • COVID-19

ບັນຫາ​ເດັ່ນ​ທີ່​ສຸດ​ຂອງ​ປີ​ນີ້​ຄື​ການ​ແຜ່​ລະບາດ​ຂອງ​ໄວຣັສ​ໂຄ​ໂຣນາ ​ເຊິ່ງມີ​ການ​ຢືນຢັນ​ຄັ້ງທຳ​ອິດ​ໃນ​ເມືອງ​ອູ່​ຮັ່ນ ນັບ​ແຕ່​ເດືອນ​ທັນວາ​ປີຜ່ານມາ ກ່ອນ​ຈະ​ກະຈາຍ​ໄປ​ທົ່ວ​ໂລກ ສົ່ງ​ຜົນ​ໃຫ້​ເສດຖະກິດ ​ແລະ ການທ່ອງທ່ຽວ​ຊຸດ​ໂຊມ​ຫລາຍ ​ໂດຍ​ຫລາຍ​ປະ​ເທດ​ຕ້ອງ​ອອກ​ມາດ​ຕະການ​ເພື່ອ​ປ້ອງ​ກັນ ​ແລະ ຄວບ​ຄຸມພະ​ຍາດ​ເຊັ່ນ: ການ​ລັອກດາວ, ປິດ​ປະ​ເທດ, ການ​ໃສ່​ຜ້າ​ປິດ​ປາກ-ດັງ​ຕະຫລອດ​ເວລາ ​ແລະ ການ​ເວັ້ນ​ໄລຍະ​ຫ່າງ​ທາງ​ສັງຄົມ ​ເຮັດ​ໃຫ້​ເກີດ​ປາກົດການ​ທີ່​ເອີ້ນ​ວ່າ: “ນິວນໍ​ມໍ”.

ນອກຈາກ​ນີ້ ຍັງ​ເຮັດ​ໃຫ້​ເກີດ​ກະ​ແສ​ຕໍ່ຕ້ານ​ຢ່າງ​ຮຸນ​ແຮງ​ຕໍ່​ປະ​ເທດ​ທີ່​ມີ​ອັດຕາ​ການ​ແຜ່​ລະບາ​ດຂອງ​ພະຍາດ​ສູງ​ເຊັ່ນ: ການ​ຫ້າມ​​ເຂົ້າຂອງ​ປະ​ເທດ​ຈີນ​ຂອງ​ນາໆ​ປະ​ເທດ​ໃນ​ຊ່ວງ​ຕົ້ນປີ ​ເນື່ອງ​ຈາກ​ເຊື່ອ​ວ່າ​ເປັນ​ຈຸດ​ເລີ່​ມຕົ້ນຂອງ​ໄວຣັສ.

ຜູ້ນຳ​ປະ​ເທດ ​ແລະ ຄົນ​ສຳຄັນ​ຫລາຍ​ຄົນ​ຈາກ​ທົ່ວ​ໂລກ​ຕິດ​ເຊື້ອກັນ​ຈຳນວນ​ຫລາຍ​ເຊັ່ນ: ​ເຈົ້າຟ້າ​ຊາຍ​ຊາລ, ​ເຈົ້າຊາຍ​ແຫ່ງ​ເວລ, ​ເຈົ້າຊາຍ​ວິລລຽມ ດາ​ຍຸກ​ແຫ່ງ​ເຄມບຣິດ, ທ່ານ ບໍຣິສ ຈອນ​ສັນ ນາຍົກລັດຖະມົນຕີອັງກິດ, ທ່ານ ​ໂດ​ນັລ ທຣຳ ປະທານາທິບໍດີ​ອາ​ເມ​ລິ​ກາ ພ້ອມ​ດ້ວຍ​ແມ່ຍິງ​ໝາຍ​ເລກ​ໜຶ່ງ ​ແລະ ທ່ານ ​ເອມມາ​ນູ​ເອລ ມາຄຣົງ ປະທານາທິບໍດີ​ຝຣັ່ງ.

​ໂດຍ​ທີ​ມ​ແພດ ​ແລະ ຜູ້​ຊ່ຽວຊານ​ດ້ານ​ສາທາລະນະ​ສຸກ​ຈາກ​ທົ່ວ​ໂລກ​ເລັ່ງຫາ​​ແນວທາງ​ການ​ປິ່ນປົວ ລວມທັງ​ການ​ຜະລິດ​ວັກ​ຊີ​ນ ​ໂດຍ​ປັດຈຸບັນ​ຫລາຍ​ປະ​ເທດ​ໄດ້​ອະນຸມັດ​ໃຊ້​ວັກ​ຊີ​ນ​ໃນ​ປະ​ເທດ​ຮຽບຮ້ອຍ​ແລ້ວ.

​ແຕ່​ຫລ້າ​ສຸດ​ມີ​ການ​ພົບ​ໄວຣັສ​ໂຄ​ໂຣນາສາ​ຍພັນ​ໃໝ່ ​ເຊິ່ງມີ​ປະສິດທິພາບ​ໃນ​ການ​ແຜ່​ລະບາດ​ສູງ​ຂຶ້ນ​ໃນ​ຫລາຍ​ປະ​ເທດ​ທົ່ວ​ໂລກ ​ເຊິ່ງ​ເປັນ​ບັນຫາ​ໜັກ​ທີ່​ຕ້ອງ​ຜະ​ເຊີນ​ຕໍ່​ໄປ​ໃນ​ປີ 2021.

- WhatsApp Image 2020 05 27 at 5 - ສະຫລຸບເຫດການຮອບໂລກປີ 2020
- WhatsApp Image 2020 05 27 at 5 - ສະຫລຸບເຫດການຮອບໂລກປີ 2020
error: Alert: ເນື້ອຫາຂ່າວມີລິຂະສິດ !!