ສາຍລັບລັດເຊຍ ກວດຢຶດ ຢາເສບຕິດ ມູນຄ່າຫຼາຍຕື້

ລາຍງານຂ່າວຈາກຕ່າງປະເທດ ວັນທີ 30 ທັນວານີ້ວ່າ ອົງການປ້ອງກັນຄວາມສະຫງົບຂອງລັດເຊຍ ແລະ ສະຫະລັດສົມທົບກັນ ມ້າງເສັ້ນທາງຂົນສົ່ງຢາເສບຕິດຈາກແອຟຣິກກາໃຕ້ ໄປຫາ ເອີຣົບ.

ສຳນັກຂ່າວ RT ໂດຍອ້າງຄຳໃຫ້ການຂອງອົງການປ້ອງກັນຄວາມສະຫງົບຂອງລັດເຊຍ(FSB) ວ່າ “ການມ້າງເສັ້ນທາງຄ້າຂາຍຢາເສບຕິດຄັ້ງນີ້ ມັນແມ່ນຜົນຂອງການປະສານສົມທົບກັນຂອງສາກົນຕະຫຼອດໄລຍະຫຼາຍເດືອນທີ່ຜ່ານມາ. ຍ້ອນມີການປະສານສົມທົບກັນຂອງສາກົນ ພວກເຮົາຈຶ່ງສາມາດຈັບກຸມ ແກ້ງຄ້າຢາເສບຕິດໄດ້ຫຼາຍຄົນ”.

ເຈົ້າໜ້າທີ່ FSB ລາຍງານວ່າ ເຈົ້າໜ້າທີ່ສາຍລັບຂອງລັດເຊຍ ໄດ້ຈັບກຸມເປົ້າໝາຍຄ້າຂາຍຢາເສບຕິດໄດ້ທັງໝົດ ແລະ ຢຶດຫີບເງິນສົດ ແລະ ຫີບບັນຈຸຢາເສບຕິດໄດ້ຫຼາຍຫີບ. ຢາເສບຕິດ 330 ກລ, ຄິດເປັນມູນຄ່າປະມານ 1 ຕື້ຣຸບ(ສະກຸນເງິນລັດເຊຍ).